مريت انا المطلاع والشوق هزني
قبل الظلام وتوها الشمس غايبه
وفيضت في عالي روابيه عبرتي
وكثرت على قلب المعنى مصايبه
تذكرت من نفسي تمنى مودته
لا القلب ساليها ولا النفس طايبه
وتذكرت خلي يوم الأصوات هودت
وخيم سكون الليل والناس نايمه
تصورت لي في خيالي حبيبتي
بحر الخيال وفوقه الروح عايمه
أحبها لكن من الصعب نلتقي
قلبي ملايمها وهي ما تلايمه
أحبها في صمت وأذرى غرورها
وأظهر خفيف الشوق وأخفي عظايمه
أحبها باخلاص ما أحب غيرها
والروح عن كل الغنادير شايمه
هي مطلبي هي روحي هي حبيبتي
هي ريح قلبي في غناه وغنايمة
يا ناشد عني عقب فقد خلي
تنبيك عن حال المولع هوايمه
غريب والمطلاع مقر غربتي
هاك المكان أغليه والنفس ظايمه
وهب النسيم وغرد الطير عبرتي
وخيم سكون الليل والناس نايمه
لولا غلا ذكراه مارخصت دمعتي
لوكان عيني بازرق الدمع رايبه
هذا المكان اللي جمعنا وضمنا
وهناك حاكتني وهي تقل هايبه
هذاك ماقفها وهذاك ماقفي....
يوم اشرت بالراس وارخت ذوايبه
لاعاد يوم عقب الابعاد شفتها
تجدد الجرح القديم بسبايبه
من عقب ماني فاكر اني نسيتها
اول شرارة حب شبت لهايبه
حفرت قبر الحب في وسط ضامري
من عقب ماهي باليات ٍ نصايبه
قالوا ملكها الغير مالك ومالها
برق بعيد ولاتحوشك سحايبه
يكفيك دور فات بينك وبينها
جنب وخل الحب واترك نشايبه
قلت اتركوني هرجكم مايسرني
والميت ماتحييه دمعة قرايبه
والنار ماتحرق سوى اللي يدوسها
جرحي وانا ابخص في دواه وطبايبه
ان كان روحي عقب الفراق شيبت
سود الليالي عقب الاقمار شايبه
ولو كان يدرون الجماعة بقصتي
محد عذل روح من الوجد ذايبه
اول معرفه بين عيني وعينها
كلام عين لعين نظرات صايبه
العشق كان لغيرها لين شفتها
ومن شفتها نفسي عن البيض طايبه
بالغصب فرت موجة القلب يمها
بالغصب قلبي طاع وانكر حبايبه
قعدت اماري وافتخر في جمالها
واقول هذا الزين شوفوا عجايبه
انا اندفعت وعشت في جو عاطفي
انا بنيت احلام وآمال خايبه
انا مع الايام تكبر مصيبتي
هذيك أعدلها وهذيك عايبه
لو كان حرماني على الناس ينشكي
شكيت مير الناس ماهيب ثايبه
أشكي على اللي قادر انه يحلها
يلهمني السلوان في كل نايبه
وأصبر واخبي في حشى الصدر علتي
واظن تالي الصبر تحمد عقايبه
واحبها في صمت واخفي مشاعري
وابكي اذا دار الشمال بهبايبه
ولابد ماعقب التفاريق نلتقي
انا وانت ياحب دفعنا ضرايبه
وناقف على المطلاع في نفس ماقفي
قبل الظلام وتوها الشمس غايبه
http://www.youtube.com/watch?v=nuECR...layer_embedded
رد مع اقتباس
المشاركة الأصلية كتبت بواسطة الجازي
المفضلات