مرحبا
الله يفللكم بالرضى والعافية يالربع
والله من البطى اني فتحت صفحة الفله وقمت اراعيله مادري وش اعمل ,, ابكتب موضوع ,, ابسولف ,, بس وشلون !!
عاد رحت لقوقل وكتبت كيفية كتابة موضوع بالفله
نتيجة البحث : تستهبل انت ووجهك !!
قوقل صايره اخلاقه تجاريه هاليومين ,,
على طاري الاخلاق التجارية جلس قريب مني احد الزملاء عابس الوجه حزين الملامح رث البدله تعتريه الهموم وتتسابق اليه صكات( بقعاء) مع انه من اهل جده بس مادري ليه الناس ماعندهم الا صكات بقعاء
الاكيد اني التفت له وقلت يابو فلان اشوفك ماتقهويت وشكلك مش على بعضك عسى ماشر !!
قال : وكله الم ومعاناة ياخي الزواج والعيال ضيقة صدر ,, تصدق اني ماخليت شتمه ولا سبه من اللي اعرفها واللي قريتها بالنت الا وسبيت الحرمه وعيالها قبل شوي !!
ازعجوني طول الليل صياح ولعب ويوم قمت الصبح لقيتهم كلهم صاحين وينتظروني اصحى !!
يبوني اوديهم عند خالتهم في طرف الرياض قمت صفقت العيال وخليتهم ينامون غصب وبغيت ارتكب جريمه بامهم !!
سكت شوي وقال : والله انك ذيب يوم اخرت زواجك ,, مشينا خلنا نروح فوق وندخن !!
قلت لا ياخي ماصار لنا ربع ساعه جايين من برا وبعدين انا ابخفف من التدخين ,,
قام اخونا وصوت على واحد من الشباب وراحوا يدخنون ,, هالشاب اللي راح معه سربوت شد بلد ,,وخلقه تخليك دائم الشكر لله ,, لو تقول له فيه بسه فوق وش رايك نمسكه ونطبخه قال مشينا ,, يعني مختصر الكلام وجه مايبعث بالطمأنينة ابداً
اقل من عشر دقائق ويجيني اشعار على صفحة الفيس بان صديقي المهموم اللي قبل شوي قام بالنشر في المجموعه !!
قلت بنفسي ياولد معقوله يبي يفقش السوالف اللي قبل شوي على الفيس ,, او يبي يطلق حرمته بنشر الطلاق على صفحتها والاعلان بالمجموعه !!
واروح للمجموعه والقى هالعباره :
( عندما تتنفس شذا الورود فانت تشكر من قام بسقايتها ,, شكراً حبيبتي الغالية ,,)
صباحكم جميل بجمال الورود ,,
بعد دقائق دخل علينا بنفس الوجه العبوس وجلس عندي ,, قلت له النت شغال فوق يوم تدخنون ,, قال ايه انا فتحت صفحتي بالفيس !!
اللهم الهمني الصبر والسلوان يااارب
مخرج ,,
لولا مخافة الله ,,
وإيماني بالقضاء والقدر ,,
ومعرفتي باني ابورط ابوي واخواني بديوني ,,
والا كان طبيت من دريشة المكتب من الدور الثالث
تري مكاسي
رد مع اقتباس
المفضلات