يستلـج القلـب لاهـبّ الشـمـال...وينبلج صدري ليا شفـت الجبـل
بين أجا وسلمى مشاريف الجبـال... جتمعنا في دجـى ليـل(ن) هشـل
ليلة(ن) ماهي مثـل بـاق الليـال...رفـرف الخفـاّق والكـل إحتفـل
ودامهم أعطـوك ياشعـري مجـال ...إنتهض مثل الأصيـل إليـا صهـل
بسرج أمهـار القوافـي بإبتهـال ...وانظم القيفـان والشعـر الجـزل
إيه أعرف إنّك هبـالٍ فـي هبـال... ان طغيت أنهيت كل غـث وهـزل
تِسكر عقول(ن) وتودعهـا ثكـال ...وكم صميّدع مـن تبهلالـك زِِمـل
إيتنّحـى مـن تـذمّـه بإنـعـزال ...ومن تبيه اتوّصلـه كوكـب زحـل
طال ليلي والعنـا والشـوق طـال ...وغير حايل ما مـلأ عينـي مَحـل
دار حاتـم طـي وقـروم العيـال ...منبع الأخيـار فـي ذيـك الُطلـل
مارأت عيني مثـل زينـه جمـال... انرضى منّي عذولـي أو زَعـل
صيفهـا هايـل ومرباعـه خيـال ...وجوّهـا يانـاس يفتلنـي فـتـل
وماالـوم اللـي تغنّابـه وقــال :صوب حايل قلبي العاشـق رَحـل
ياسقـى الله يـوم غناّبـه طـلال ...مالت اعـذوق البختـري والنفـل
ديـرة الأجـواد وزحـول الرجـال ...جودهم غيث(ن) تهامـل وانهمـل
ديرة أهل الطيـب مافيهـم جـدال ...طيبهم ديم(ن) على الـوادي هطـل
الله يغيثـه مـن مـزون الخيـال ...وترتـع بغدرانـه أجـوال الحَجـل
وعشت ياسعود السعد واف الخصال ...يالأمير اللـي علـى العليـا نـزل
كامـل الأوصــاف ولله الكـمـال ...ضاري(ن) ساطي وزيزوم(ن) عدل
حنضل(ن) حلتيت بحلـوق الحثـال ...وللهجافـا فـيّ وظـلال وسـهـل
ارتقى بحايل طناطيـر(ن) عـوالقادها للمجـد وكـل سايـح ذهـل
يامعدّيهـا مراقـيـب(ن) طــوال ...ياهلال(ن) هل فـي حايـل وحـل
العـرب لاشبّهـت تضـرب مثـال ...وانـت ماتوفيـك أمثـال وجمـل
السموحـه دام أوجـزت المـقـال ...أشهد إن الشاعر ابوصفـك بحـل
قد سمعت ابمامضى حكمـه تقـال ...خير قـول المـرء : ماقـلَّ ودل !
رد مع اقتباس
المشاركة الأصلية كتبت بواسطة عبدالرحمن
المفضلات