قصيدة مشاعر طفل للشاعر طلال بن سعود
يبه وينك انا ناجح ابيك تشوف وش سويت
خذيت الاول بصفي ونقلة لمرحلة ثاني
يبه طالع نجاحاتي ابي ارفع لذكرك صيت
ابي اكذب على نفسي واقول ابوي رباني
يبه ودي تشاركني وتعاقبني اذا اخطيت
واجيلك واطلبك ماحتجت تقول امر من اعياني
يبه وشذنبي اشتاقك تروح وعني اتخليت
براءة ضحكتي يمنى تصافح لوعة احزاني
امي تزوجت بعدك تواعدني وتقول نّسيت
وانا كلمة يبه لغيرك عجز ينطقبها لساني
صديقي خالد يسولف يقول بابا ترى بالبيت
يقول بابا مواعدني يوديني لجداني
وصديقي احمد مفرفش يقول بابا ورى ماجيت
انا جالس انتظرك تعال وبشر اخواني
يبه بعدك انا مهمل من جروح القهر مليت
احس الناس تضحك لي ولكن مو علشاني
يبه بعدك انا متعّب حرقت الصدر بالتنهيت
يموت الحلم قدامي كثر ماقلبي يعاني
يبه تكفى تعال ارجع فقدتك ياغلا هالبيت
احس البيت من بعدك فراغ وهمه اشقاني
عسى الله يرحم ترابك دعائي كل ماصليت
وعساك انت بوسط قبرك تحس وماتنساني
خذيت الاول بصفي ولكن كني ماسويت
لان الفرحه بعيوني اشوفك انت ترعاني
رد مع اقتباس
المفضلات