أبيات أعجبتني
قد ايش تخدعني المظاهر ولا اتوب
ما كنها مرت علي التجاريب
العين ماتكشف لك اللي ورا الثوب
كلن يظن ويخطي الظن ويصيب
كم واحدن يعطيني الهرج مقلوب
وانا اعتبرته من خيار الاصاحيب
الفرق بين الناس في عقول وقلوب
وأسرارهم يعلم بها عالم الغيب
اللي يودك مايرى فيك عذروب
واللي شناك يحط فيك العذاريب
إن كان شفت انك من العقل موهوب
لا تستمع لمروجين الأكاذيب
كم من حديث قد لقيناه مكذوب
عن النبي اللي منزه عن العيب
العبد في دنياه غالب ومغلوب
والعمر جاري والليالي دواليب
نجمع مع الأيام حسنات وذنوب
والستر ضافي والعبر في العواقيب
إصبر على الدنيا ترى الصبر مطلوب
واستخدم الحكمة وحسن الأساليب
واحذر تلج عواك في كل عرقوب
محدن بقايل ويش مسريك ياذيب
لا يعتريك الهم والرزق مكتوب
مضمون لك مافيه شك ولاريب
والنفس لاتارد على كل مشروب
حتى توردها لصافي المشاريب
لاتندفع معها ورى كل محبوب
وتعلقك بحبال الآمال وتخيب
إن كان ماتحسب ترى العمر محسوب
في كل يوم تطلع الشمس وتغيب
رد مع اقتباس
المفضلات