كتبتها بعد ان عودني ابني الصغير / مهيب على سؤال يردده لي اول ما يسمع صوتي : بابا أنت وينك ؟
وبعد ما اجاوب
يسأل سؤال ثاني
متى تجي ؟
لاجيت ابكتب جف حبرك يالاقلام
..................... حتى الحبر عيّا يعبر كنيني
هذا فراق ايام ماهو بالاعوام
..................... كتمت عبرات الوله وسط عيني
لا قلت صبرك والفرج دوم قدام
..................... متى على الله يالفرج بس تجيني
اوله على اللي صوتهم صوت صيّام
..................... بابا انت وينك ؟وآتحشرج بــ ويني
اسهل سؤال اللي غدى مثل الالغام
..................... واصعب اجابه رطّبت لي جبيني
ياكيف اجاوب جعل يسلى بالاحلام
..................... وانا هنا ليل السهر يحتريني
لا قلت امريكا بطواريف الاهرام
..................... متى تجي ...؟ باذني غدى له زنيني
حظي ولا يدري بحسابات الايام
..................... يومين صارت عندنا بالسنيني
والشوق كافر دام ما يرحم غلام
..................... لاقال اسمه مادرى السامعيني
ياشوق وجدي وجد وصّال الارحام
..................... عقب الكبر اصبح وحيدٍ حزيني
وجدي عليهم وجد مقبل على اعدام
..................... ذباحـتـه ربـعـه ولاله عـويني
وجدي عليهم وجد مسكين منظام
..................... عـزيز قـوم ٍ بـالـمذله غـبـيـني
الموت والفرقا غدن سرج وخطام
.................... يوم الفراق الموت منّك مكيني
بهذه اللحظه
1-5-2010
نافع بن طواله
كاليفورنيا
اسمحوا لي ما اتوقع اقدر اعقب على الردود
رد مع اقتباس
المفضلات