قصة "دخيل الحوي" وراعي بقعاء " ابن بريك البقعاوي

**نقا الهاملي** · 28-09-2009 17:51

بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين
اقدم اليكم قصة دخيل الحوي وابن بريك البقعاوي كما رواها لي احد كبار السن من القبيله وهي :-
ان القصه وقعت لابن بريك البقعاوي راعي بقعاء حيث انه كريم وتاتيه القبائل من كل مكان في ذلك الوقت وكان يمدهم ويعينهم " بالتمر " في الغالب . وفي سنة من السنين كانت مزارعه من النخيل اصيبت ( بالغبير ) وهو مرض يصيب النخيل .
فاضطر في تلك السنه الى انه يتسلف من اصحاب المزراع اللتي من الله عليها بالسلامه من ذلك المرض . ووعدهم انه في السنه الجايه يسددهم ماتسلف منهم . وانقضت السنه وجاى رد الدين لاصحابه وهو لايملك شيء , فجمع اصحابه للمشوره لكي يأخذ ويعطي معهم ويوضح لهم وش قرر عليه .
فقال انا جمعتكم اليوم ابي اقول لكم اني نويت امشي من هنا يقصد " بقعاء " وسوف اتوجه شمالاً لشمر اتعطى لين اوصل العراق لين اخذ حاجتي واسدد ماعلي من ديون . فقال له احد العارفين انا عندي لك شور انت تقول انك تبي تمشي من هنا لين تاصل العراق الي يبي يعطيك بعير واللي غنم واللي طحين . وهذا صعباً عليك وانت رجّال تبي تروح مرة وحدة ولاتقدر تجمع البعارين مع الغنم مع الطحين ...الخ من الاطعمه , انا شوري لك انك تزبن الهامل بالضلع " بنقبين " وبتلقى حاجتك عندهم وقال شورك وهداية الله . وبالفعل ذهب للهامل واول ماطب شعيب نقبين استقبلوه الهامل احر استقبال وياهلا براعي بقعاء ويامرحبا لما يتمتع به من صيت في هاك الزمان .
وقال لهم انا زابنكم " يالحسانا " علي دين اربعين ( زبيل ) من التمر لان قصتي كذا وكذا وقالوا له ابشر بسعدك . وجمعوا له اهل الشعيب اربعين ( زبيل ) من التمر بلحظه وحده . وقال بيض الله وجيهكم وماقصرتوا وانا ابي امشي لبقعاء قالوا مايصير لازم تروح لدخيل الحوي عشان مايزعل علينا اذا دري بسالفتك , وراح معه احد رجال الهامل يدلّه على دخيل ويوم وصلوه . علمه بالسالفه واعطاه اربعين زبيل بس من دخيل لحاله وقال هذولي لك وتستاهلنه .
وطلع ابن بريك من " نقبين " بثمانين زبيل من اهل الشعيب اربعين ومن دخيل اربعين وقال القصيده اللي مطلعه :

أحسب إن ثلث الندى لآل هامل xxxxxxxxx واثريه بس حق الحوي دخيل

هذا مااستطعت ان احصل عليه من كبار السن وهذي هي القصه وارجوا اني اكون ما اطلت عليكم اما القصيده سوف انقلها لكم ان شاء الله بعد مااحصل عليها كامله من احد احفاد ابن بريك هذا والله اعلم وصلى الله على سيدنا محمد ...وعلى اله وصحبه وسلم .

**المفضلي11** · 28-09-2009 21:29

ونعم والله بدخيل الحوي وبراعي بقعاء بيطار الاشعار
وهذي من العادات الحميده لدى الآباء والاجداد
شكرن لك يا نقا

وعلى ما اعتقد ان نقا الحوي هو اللي فزع لزوجة الطيار بنت الطوالة.. يعني المروءة والكرم شيء وراثي لديهم

**ستــر سلمى** · 29-09-2009 03:32

الي فزع لبنت ابن طواله هو المختاري وليس الهاملي

**نقا الهاملي** · 29-09-2009 08:23

المشاركة الأصلية كتبت بواسطة ستــر سلمى

الي فزع لبنت ابن طواله هو المختاري وليس الهاملي

هلا وغلا باخوي .. ستر سلمى

( وقيلت هذه الابيات بـ نقاء الحوي الهاملي من عبده من شمر )

أبتمنى مثل راعــي الأمانة
مثل الحوي اللي يزبن خويه
يوم ألتجتله قال سرت ثمانة
سرابها عــن العيــون الشقيه
شرطه ثمان سنين باعه ضمانة
شرى ذلول وأردف الأسلميه
حيثه شجاع ولا بقلبه خيــانة
ولا لـدَّت عيونه لنظرة خويه

قال بالقصيد .. مثل الحوي اللي يزبن خويه

وبالاخير .. كلنا ربع سواء كان المختاري او نقا الحوي

ويعطيك العافيه على الرد

**الحيمري** · 29-09-2009 14:44

نقا الهاملي
شكرا لك على هالقصه وهذي من القصص المحموده لدى الناس الاجواد والاوفيا
والف نعم بالهامل وراعي بقعا

وشكرا
ــــــــــــــــــــــــــــــــــــــــ

المشاركة الأصلية كتبت بواسطة ستــر سلمى

الي فزع لبنت ابن طواله هو المختاري وليس الهاملي

الاخ ستر سلمى
اتق الله القصه معروفه ومثبته من كل شمري

شرى ذلول وأردف الأسلميه
حيثه شجاع ولا بقلبه خيــانة

(((هو الحوي الهاملي)))

**عقيل الجمل** · 29-09-2009 16:29

[align=center]
شكرا لك اخي نقا على القصه ونعم بالهامل والف نعم بدخيل الحوي رحمه الله

نعم هو الذي باع نياقه عند عنزه واركب الاسلميه زوجة الطيار لين اوصلها لاهله

والقصه والقصيده مشهوره

أبتمنى مثل راعــي الأمانة
مثل الحوي اللي يزبن خويه
يوم ألتجتله قال سرت ثمانة
سرابها عــن العيــون الشقيه
شرطه ثمان سنين باعه ضمانة
شرى ذلول وأردف الأسلميه
حيثه شجاع ولا بقلبه خيــانة
ولا لـدَّت عيونه لنظرة خويه
تحياتي لك
[/align]

**صلفيق** · 29-09-2009 17:27

شكرا لك أخي نقا الهاملي
ونعم فيك وبالحسانا ودخيل الحوي ،، ونعم ببريك وكل الرجال الطيبين.
قصة مثرية تنمي عن الفزعة والكرم - وليس بغريب على
الهامل أو شمر عامة والطيبين من القبائل.

شكرا لك

احترامات نقا

**المفضلي11** · 29-09-2009 21:22

المشاركة الأصلية كتبت بواسطة ستــر سلمى

الي فزع لبنت ابن طواله هو المختاري وليس الهاملي

مالك لوا اللي فزع لبنت الطوالة هو طير شلوى اللي باع نياقه علشان يفزع لبنت الطواله نقا الحوي الهاملي العبدي الشمري يا ستر سلمى اتق الله لا تحرف بالحقايق

**ستــر سلمى** · 30-09-2009 02:20

متقي الله ولاني محتاج احد يعلمن بالتقوى او غصب اجي على كيفك يالمفضلي انت والحيمري

نعم الي نسمعه انه مختاري من سنجاره وهذا الي تتوارثثه الطواله ونعرفه جميعا نحن الاسلم ولازال المختار

يتفاخرون بالشي هذا وتقوله الطواله في مجالسهم والحقائق مخبوره لاتفرض رايك على الجميع

**ستــر سلمى** · 30-09-2009 02:26

الحيمري والمفضلي اتركوا هالحزازيات المختاري والهاملي كلهم من شمر ولاتراعي من منظور ان هذاك

سنجاري وهذاك عبدي كلهم شمر ولاتفرضون رايكم على الجميع انا قلت الحق نسمع انه المختاري اكثر

شي خصوصا عند الطواله مع وجود اقوال عند البعض من شمر الثانيه وخصوصا عبده انه الهاملي