رغم الظليمه وطعناتي وعلّاتي
لا زلت أنا الشاعر اللي ذاعر ٍ ندّه
شاعر شمالي ولا تتعبني أبياتي
يجيني البيت لمحة عين وآعدّه
ما أتعب على فكرتي بالحيل وآحاتي
تقبل سمينه ولا تستدعي الشده
لا قلت لي بيت قالوا ماكل ٍ قاتي
حر ٍ على كف قرم و يحتري هده
نظم ٍ مرتّب تقل سلسال بنّاتي
در ٍ من الماس ذا لده و ذا لدّه
صمصام يفزع ليا من شاف ضيقاتي
سيف ٍ بحدين ذا حده و ذا حده
أنا أحمد اللي رزقني سلّ جزلاتي
لا صارت النفس بالضيقات منكدّه
لا زلت وارد معي حبلي ومدلاتي
أدلي وأنا الضامي اللي مانشف عده
تخيل ان الشعر من حب كلماتي :
يبكي على غيبتي لا غبت لي مده !!
جاني تقل ينتخيني طالب ٍ ذاتي
لبّيت .. واليا شكى ضدّيت من ضده
ياشعري أسرع وسمّع ناقد أبياتي
قلّه على الشامي ( الملقوف شو بده )!!
قالوا علاج المجنّن ( طرق سكّاتي )
وأقول أنا ( علاجه انك تدعس بخدّه )
ما حرّك طويق .. تصفيق الهواء العاتي
محشوم يالبحر الاحمر .. عن لغى جده
أنا أشهد ان القصيد أحيان منجاتي
حوشي اليا ضاق بيتي وأعلن الصدّه
يا حشمة الشارب اللي منه فزعاتي
امّـا جلت غم ,, والا قيل من قــدّه !!؟
يا زمجرة خافقي .. يا طش عبراتي
يا هيبة اللحيه اللي حيل ممتدّه
لا لا يهمّك حقود ٍ عدّ غلطااااتي
خلّى خطأ عمري ( مخاواه ) ما عده
شاعرك مبدع وابداعه معه ذاااااتي
من أمس لليوم من ذا الحين لا غدّه
الله خلقني سنافي واعرف اثباتي :
( حر ٍ أحب المراجل واعشق الهده )
أمشي ملك واثق ٍ من كل خطواتي
رفيقي ان ضاق يلقاني على الشدّه
ولو كنت أعاني من الطعنه وعلّااااتي
لا زلت أنا الشاعر اللي ذاعر ٍ نددده
عبدالمجيد الرمالي
رد مع اقتباس
المفضلات