على ذمة الراوي

[ابو يزيد]

من الأوفى


زميلي بالعمل ابو خالد تقهوى عندي امس العصر وخذ من هالسواليف حتى وصلنا للوفا

قال مار على فكرة أمي الله يحفظة شاعرة وراعية كار وجلسة العصرية يعني وجه حريم

(على وزن وجه رجال) بلشتني كل يوم تعيد علي هالأسطوانة انتم يالرجال مالكم أمان

حنا اوفى منكم عاد اقول سمي ياأمي ابجرعها واسكت.. . المهم اني اقول جزاك الله خير

عسى الله يسلمك ماودي اعارضك اللي تشوفينه اخيرا شكلي اقول (شكلي)ابعارضها

باستعين بكل ماسمعت عن وفاء الرجال سواء لأمه او زوجته او جارته المهم اني

جمعت كل ماعندي واشوي واصيدها بوحدة قلت طيب زوجة ابن حثلين يوم تأخر عنها

بتركيا ماصبرت وراحت تزوج غيره وين الوفا عاد هي ماصدقت اقول هذي إلا وقالت

خذ بدالها: وينك وين اللي يقولون له بالحرم امك امك ويقول امن بلابه الشيطان اعوذ

بالله ليش يسوي به كذا…..قلت يابعيدي انتي فاهمه غلط هذا واحد بالحرم بلاه الله

بعجوز بالحرم يوم شافت متونه العريضة وجسمه الطويل قالت والله السنع هذا والله اللي

أقدر أطف واسعى على ظهره مادري بي ؟؟وهو مايعرفها ولا تعرفه المهم ان العجوز

قالت للي حوله مكنوني من ظهر هالوليدة وما صدق إلا والعجوز على ظهره المهم انه

استحى قدام الناس انه يقول انزلي ….. لكن تدرين يابعيدي ليش ماقدر عليه ،لأن

العجوز شكله جيزانية وما تعود على ريحة( القات )ومير يبدأ "يكبع بها" بالحرم عشان

تطيح والناس يقولون امك امك وعاد هو يحاول يقنعهم ويقول هذي ماهي امي هذي امن

بلابه الشيطان قالت عاد امي (هه )هذي السالفه ياوليدي قلت ايه وانتي ماعندك غيره

قالت بلى عني خذ:
انت ماسمعت رثاء الشاعرة اهداية العطاوية في زوجها مشحن (اخو شليويح العطاوي)عندما توفي بمرض الجدري واللي تقول فيها:

قلبي كما شيهانة بيضها فقش @@المح راح ولابقى الاقفوشه

واصاحبي صيده ادقاق المها العكش@@وله عادة في كل ليلة يحوشه

والله يالولا الدرب من دونهم عفش@@ودرب الخلا ماينوطي في عفوشه

لافز فزة واحد موحي وقش@@يخاف من مخلاب شي ينوشه

قلت ماسمعت فيها بس هي تزوجت بعده والا لا قالت مادري قلت تأكدي عشان احسبها نقطة لك.
قالت لا مالك فضل انت سمعت بقصة هيا العياد الحربية يوم زوجها ابوها برجل حالته المادية ضعيفة وبعد فترة استدرجها ابوها ورجعها للبيت وقال لاتروحين لبيت زوجك فقالت هالقصيدة :

يامل عين حاربت سوجة الميل****على عشيرن بالحشا شب ضوه

عليك ياللي طبخته نصفها هيل****اللي سعى بالطيب من غير قوة

المال ماطيب عفون الرجاجيل ****والقل مايقصر براعي المروة

ياعنك ماحس الرفاقة ولا قيل ****ذا مغثين ماينزل حول جوه

وله عادة ينطح وجيه الرجاجيل****هذي فعوله بالمراجل تفوه

اجواد نسل اجواد جيل ورا جيل ****الطيب فيهم من قديم وتوه.
\nوكانت هذه القصيدة على مسامع والدها فندم على مافات واعتذر لأبنته واعادها على زوجها .
قلت هذي يامي حجة عليك ماهي علي قالت وشلون"قلت اعلمك هذا الأب يريد مصلحة بنته ….قالت عشان يزوجها واحد غني ينتفع منه …..قلت بنت الجربوع الشمري اللي ببريدة من اكبر اغنيا القصيم في ذلك الوقت ليه مانفعت زوجها من حلال ابيها المهم اني بلشت بالترقيع ثم طلعت علي بوحدة جديدة ..

قالت سمعت بالشاعرة سعدى الروقية قلت هذي بعد وش فيها قالت اسمع واحكم على ماقالت بزوجها المسن:
العام تبغالك من البيض ثنتين **** ايضا وتبغى لكعليهن زيادة

ومثلك الى منه وصل عام سبعين **** يروح مخه مثل مخ الجرادة

لايقضي الحاجة ولايوفي الدين **** حتيش لو عطرت فرش الوسادة

والله مالوم العود مير الكبر شين **** العود جاته خلته من زناده

ياما ثنى عمره خلاف المقفين **** إلى نشب خطو الردي في شداده

واليوم لو نوزيه في محجر العين **** أمشي على مشهاه واتبع مراده

ماالحق جزاه اللي مضى قبل عامين **** ماني من اللي دايم بالجحادة

ياجاحدات حقهم فالكن شين **** ميعادكن يوم الحشر والشهادة

لعود لاشيب لزمنا بحقين **** رد الجميل وتحمد الله عبادة

لابد يوم به فراق المحبين **** يامن غضر عوده وادنا حصاده.
المهم في النهاية قلت لأمي عطيني فرصة اقدر فيها اجمع وفانا بمثل هالحالات وقالت
ياوليدي لاتخليني تره ذمه إذا سمعت شي عنا لاتخفيه علي عشان اقوله بجلسة العصر مع جاراتي تراني شابتن لهن.
وفي الأخير قال ابو خالد هذي سالفتي يابو يزيد اذا عندك سواليف عن وفانا لاتذخر

عني شي قلت يالحبيب الله يرحم الحال لاتشكك في وفا الرجال وبعدين قلت ياخي انا مالي علاقة بهالسوالف هذي بينك بين امك وسواليف الحريم مالي بها دخل (عاد شفته كنه استحى)قال ياخي منهن الحريم ماهي امي وامك واخواتنا وزوجاتناوخالاتنا!!!! ،والله ومير اخجل واتعوذ من الشيطان واقوله ابشر ابشر بس عطني

فرصة ابنشر هاللي صار لك على شمر وخل كل واحد يدلي بدلوه
.
قالي تكفى لاتأخر علي يابو يزيد ترى بيننا حقوق( وانت عارف الحقوق يبغالها حلوق)

…وهالحين يالربع عطونا اللي عندكم وادلو بدلاكم اغدينا نقلط على خروف هالسنعوسي

(لاتفهمون غلط تراه ماهو السنعوسي المشرف على هالمضيف).

وفي الأخير ارجو المعذرةاذا طولت عليكم .
وسلامتكم.

[الداعيه / براك الفريسي الجربا]

ابو يزيد

السلام عليكم

صراحة اسلوب رائع ومثير وان شاء الله ماهم مقصرين معك الجماعة

هنا ولك الشكر

[ابو يزيد]

الأخ /ماجد الفريسي
تحية طيبة
أول الغيث (قطرة)لاوالله سحابة
دامها جت منك في اول تعقيب .
واسمحلي هالشهادة ابحطها على صدري وسام دامها جت منك .
لك الف تحية ولا تبخل علينا بالملاحظات
اكرر شكري

[المهاجر]

ابو يزيد/


مشاركه رائعه


وكم أنا محتاج لمثل هذه المشاركات الرائعه


ولا فيه قصور من الموجودين

[ابو يزيد]

الأخ/المهاجر
تشكر على التعقيب
والثناء
وهذا كله
من ذوقك
اكرر شكري.

[موج البحر]

الاخ ابو يزيد
.................
قصة رائعة ودبلاج جدا" جميل واخراج احلى
انا اقول ان المراة هي اول من تحب واول من توفي وتخلاص
واول من تنسى.
تســـــــــــــــــــــــــــلم والله
على المشاركه

[جواهر]

الاخ بو يزيد

يعطيك العافيه على هالقصه

الازواج نادر منهم الوفي لكن اذا وفا مايقصر

وهذي قصه عشانك :

القصه جرت على الشاعر عيادة الخريصي كان يعيش مع زوجته واولاده وكانت زوجته ذات خلق رفيع وفي احدى السنوات طلبت منه زوجته السماح لها بالحج مع والدها فقال لها توكلي على الله وعندما حجت وانتهت وهم في طريق العوده اصابها مرض هي وبعض الحجيج وارد الله ان تتوفي قبل ان تصل زوجها وعندما وصل الحجاج وسمع زوجها خبر وصول الحجاج ذهب سالهم عن زوجته فقال ابيها توفيت في الطريق ونحن في العوده بسبب مرض حل بنا فانزعج عياده وتكدر لهذا الخبر واصبح في عزلة عن الناس وحزن وجاءه صديقه يدعى فريح الفريسي وقال لماذا انت في حزن وانت انسان مومن فقال عياده اتركني اليوم وتعال غداً اخبرك وعندما جاءه غداً قال سوف اسمعك ماقلت في زوجتي :

امس الضحى نطيت في روس الجبالي
........................ودليت اجيب ابيوتنا من مغنه
وزعجت انا صوت الضحى من هبالي
........................بصوت طويل وترفعه راس قنه
يافريح انا ادري ينقدون الرجالي
.......................يافريح مايقدر ضميري يكنه
يالايمي بموادعـــه كل غـــــالي
........................عساك ماتلفى على باب جنه
يالايمي مـــالت عليك الليــالي
.........................تاخذ عجوز مرقطه مستكنه
ياتل قلبي من معــاليق جالــي
........................بخدامه يوم ادرجت بالمسنه
الصاحب اللي مثل وصف الغزالي
........................له بي ولا له بالعشاشيق لنه
وحطوا عليها من لبيد الرمالي
.......................نهجن به العيرات ولا احضرنه
ودية من ريهــجــان ازلالــي
.....................نبتت وعيدان الثمر شايطنه

وسلامتكم ،،،
.

[ابو يزيد]

أخي موج البحر
والله أغرقتني بالمدح
وخليتني اقول والله
ماهي حسافة هالساعتين
اللي جالس اكتب بها
مشكلة أبو خالد
تحية مرة أخرى
وشكرا للتعقيب والتواصل





الأخت عبرة الغالي

أولا : اسمحي لي ان أرد عليك

في نفس الصفحة مع الأخ موج البحر

لأني احترت هل افتح صفحة جديدة ولا

يكون الرد في نفس الصفحة .

ثانيا:والله أنتي أم الكرم (حاتمية)قصة كاملة رائعة كتعقيب

ومساعدة أبو خالد لكن اسمحي لي أن أم (أبو خالد)

لما عرفت انك جبتي قصة وفا رجالية

المسكينة عيت تعشى الليلة ...

شكرا لإطرائك وتواصلك .

[ابو خالد الجربا]

ابو يزيد الفريد

السلام عليكم

قصة لاتحتاج الى كلام مسكتة وحلوة وما قصروا اللى قبلى

بتعقيباتهم

الاولين ما خلوا للتالين شي.

لاكن

يقولون ان شايب من شيباننا انمرض عسى الله ما يمرضكم واضطروا

انهم يسافرون فيه عياله الى الخارج

وهو يتلقا العلاج كانت عنده ممرضة متخصصة وكانت الممرضه حلوة

الشايب جازتله الممرضة وطلب من عياله انهم يجوزونه الممرضة

وورفضوا عياله بدعوا ان الممرضة يهودة وقال الشايب وش تقولون

قالوا يهودية قال الشايب اليهودية والله امكم

اللى ماذقت معها يوم زين دايم مع الحريم زينه لهن وسوالفه

الزينة لهن وانا مالي الا الطلبات ووجع الراس


والمعذرة يا بو يزيد

وتعذر لي من صاحبك وقله يتعذر لنا من امه (وجه الحريم)


ولا نبي نستطرد مع الموضوع



اخوكم

[ابو يزيد]

أخي /أبوخالد الجربا
اولا تشكر على الإضافة " الفريد "
لكن منهو فريد هذا؟؟؟ هل هو فريد الأطرش
اللي لعب بقلوب هالمصريات
ولا الفريد نوبل اللي ماقصر
باختراعه وحصد هاليشرية باختراعه الديناميت
T.N.T
لا وعاد شكلهم معطين جايزته هالسنة الشيطان ""سلمان رشدي "
المهم ماعلينا اللقب هذا شكله اكبر مني لأني ماوصلت الى مستوا فريد ولكنه مادامه جاء منك يابو خالد خلاص يعتمد .
لكن هالدلة اللي توك حاطة منين جبته والله يابوخالد اني حاولت ادور فيها شي انتقده مالقيت حتى اني قلت اشوى ماتصب اقهوه لكن ماطلع صحيح .
اخيرا ترى بلغت ابو خالد بالقصة الرائعة وتشكر على التواصل ولاتخلينا من ملاحظاتك .
والله يحفظك .