!!!!!!! الدكتور وابو طروق !!!!!!!!
السلام عليكم ورحمة الله وبركاته
شلونكم عساكم بخير
(مستانسين)
هذي سالفة قديمة أيام الأبيض والأسود
كان أخوكم أبوطروق (قبل يسير أبوطروق) عزوبي حاله حال ريال الفسحة
وكان حفظه الله يعيش حياةً سعيدة في سكن للعزاب عبارة عن غرفة وصالة بمنافعهن وكان فرحاً بالوظيفة الجديدة
وفي ليلة غبراء لم يطلع فيها القمر (لأنه كان البارح سهران لطلعة الشمس)اللي هو القمر
سمع أبوطروق ومن معه (عيال عمن له عواطلية)قرعاً على الباب على غير العادة
لأن الباب كان مفتوح 24ساعة واللي يبي يسير يدرعم على طول
قام أبوطروق مفزوعاً بإتجاه الباب لمعرفة من هذا المؤدب اللذي يقرع الباب
وعندما فتح الباب وجد أحد أصدقائه يعمل بالجمارك ومعه شخص لايعرفه
يالله حيهم أقلطوا
قلطوا وقام صديقي بتعريف صديقه علينا وقال: أعرفكم بالدكتور فلان الفلاني
تفاجأنا أنا وعيال عمي (دكتووور عندنا!!) يعني الليلة نبي نسولف مع دكتور
قمز حدا عيال عمي للغرفة ولبس ثوبه (كان بالسروال والفنيلة) وجا يترزز عند الدكتور
والثاني له قرشه بالمطبخ يسوي شاهي وقهوة
جت القهوة وتقهوينا والدكتور أنطلق علينا بالسوالف والفلسفة وحنا فاتحين افامنا وساكتين (إحتراماً للدكترة ولجهلنا بما يقول الدكتور)
والدكتور ماشاالله يفهم بكل شي (حتى بحلب الناقة)
قمت وقلت عن أذنكم أبي أروح شوي وارجع لاحد يروح (اعمل عمل الرجال)
وانا أركب الموتر وطيران على مطعم المندي وقلت يابو يمن أبيلي هرفي على صحن وحط عليه كل شي
قال والله ياعمي ماعندي إلا نص هرفي
قلت لا ماينفع عندي ضيف دكتووور<< ناذخ
وأنا أطلع واروح للمطعم اللي بجنبه وقلت فزعتك يابويمن عندي ضيف دكتور وابيلي هرفي
قال والله ماعندي الا نص (شكلهم متفقين علي هالزيود) قلت مايخالف عطن اللي عندك بس بدون رز
وانا آخذه وأرجع للمطعم الأول وقلت هذا نص حطه على النص اللي عندك بصحن واحد ورتبهن (تر ضيفي دكتور)
حطهن أبويمن بصحن وقصدرهن وحط الصحن بسيارتي
وأنا أجيك طاير
دخلت عليهم الا الدكتور للحين يسولف وكأنه يشرح لهم كيفية الحياة (وشلون يعيشون)
حطيت الصحن على السفرة قدامهم وقلت تفضل يادكتور وتر هذا مو حقك
يالله لحقت على سوق الغنم قبل يسكر المسلخ واسمحلنا بالقصور
قال: لاعادي
وأنا أفك القصدير وهي تدور بي الدنيا من المنظر اللي شفته
شفت خروف براسين
اتري كل نص خروف معه راسه واليماني من كثر ما اوصيه حطهن الدلخ كلهن (الكذب حبله قصيييير)
من الفشيلة رحت وجلست (معزب) وحتى ماقلت سمو
تعشوا وخلصوا
كثرالله خيرك
صحة وعافية
كثرالله خيرك
صحة وعافية
طبعاً ماحد قال كثر خيرك الا الدكتور وخويه
اما عيال عمي ينتعون من الضحك وواحد منهم همسلي وقال (كثر الله روسهم)
قعدنا بعد العشا نشرب الشاهي والدكتور مثل ماهو يسولف وحنا (ولانفس) محاولة منا الإستفادة بأكبر قدر من خبرة الدكتور بالحياة
وفجأة قال الدكتور سالفة بغيت أنثر كاسة الشاهي بوجهه
قال:-
مرة انمرض عندنا كــلــب وقعدت أعالجه لمدة شهر يما تعافى وقام (ينبح)
طلع دكتور تسلاب مهو دكتور أوادم
واحسافة خروفي أبوراسين على هالمروح (لا وحنا ماندعيه الا دكتور مالت عليه هو ودكترته)
ماصدقت على الله قاموا وقالوا أكرمكم الله
قلت حياكم الله (وبقلبي قلعكم الله)
وأنا أمسك خوينا عند الباب وقلت دكتورك هذا خله عند بهايمه ولاعاد أشوفه
وياليت حتى أنت ماشوفك لمدة شهر يما تبرد تسبدي
طلع البيطري حق الجمارك وحنا نحسبه دكتور صدز وذابحنا الإحترام
وأنا أقول وش عرف دكتور لحلب الناقة (اتريه شغلته)
الوكاد انه مو كل من قال انا دكتور صار دكتور
لازم نتأكد من دكترته
تروا المتدكترين كثروا هاليومين فأنتبهوا من دكاترة الحــمـــيـــر
تمت..
وشكراً لكم كلكم
الموضوع إهداء لمشرفي فلة الحجاج الأفاضل
(الحاليين والسابقين)
ودمتم بوناسة وفالين الحجاج
""""""""
المشاركة الأصلية كتبت بواسطة أبوطروق
المفضلات