ريال الفسحة والمطنوخ وشليويح جمعت بينهم الظروف المتشابهة كلهم رعيان أبل وكلهم عزبان وكلهم خبول وكلهم دلوخ من العيار الثقيل.
المهم ماودي أخفف من ذنوبهم لكن أعرف لهم قصة حصلت معهم الربع هذولاء سبحان الخالق الواحد منهم نفسه برأس خشته ونظرته ماتعدى ركبته ولايخالطون الناس أبد مستخدمين هالأسماء الحلوة وهم قشران حيل.
جمعت بينهم خوة التشابه بالظروف رعي الإبل وإتفقوا على أن كل إسبوع يخدمهم واحد منهم يسمونه الأم والأم هذه تسوي العشاء وتحطب وتروي الماء وتخض اللبن وتمل كل شيء خلال هالإسبوع والأسبوع الثاني على الثاني وهكذا دواليك.
بما أنهم دلوخ يحملون نفوس شينة وعين قوية تهاوشو ليلة من الليالي وتقاضبوا الشوش يمار شليويح الأصلج نفعه الله بهالصلجة رأسه تقل كرش شاة مغسولة بصابون ومقلوبة أما خالي ريال والمطنوخ إلا لهم شوش مهبل تقل طلح.
ويوم تخامشوا ويجي خالي ريال ويمصع قرن المطنوخ الأيسر ويجي المطنوخ ويمصع قرن خالي الأيمن الله يجيركم وشليويح سلم يتخمشونه وينطلق من بينهم تقل جحة صلجته ويوم خلصة المعركة ياوالله كل واحد بقرن واحد خالي مافيه الإالقرن الأيسر والمطنوخ فيه القرن الأيمن فقط.
جلسوا يتشاورون مع شليويح الأصلج قالو أنت ياشليويح هالحين صرت أحسن منا حال عرفوك الناس أصلج وبقيت كما أنت ولكن حنا وين نودي وجيهنا من البنات الي عرفننا بالجذل الهلهلية ويش الحل ياشليويح هم يسألونه؟
شليويح يعرف أن خوياه الصمول تلوخ ومنقهر من هالشوش عليهم وهالحين جابهم الله على منكس قرونهم وأحب أن يصفيهم وتكمل السالفة فقال مافيه إلا حل واحد فقط ، قالوا وشو تكفى علمنا قال ما أعلمكم إلا كل واحد منكم يعطيني ناقة من أحسن نياقه تردد المطنوخ بخيل ووافق خالي على طول وأقنع عشيره المطنوخ أحب رأسه خالي ووافق على مضض.
عطوه الناقتين وجلسوا يستمعون الحل السحري الذي يخرجهم من هالمصيبة فقال لهما أنت يالمطنوخ ممصوع قرنك اليمين صح وإلا أنا غلطان قالو صح مافيه كلام ياشيخ شليويح الأصلج وأنت ياريال ممصوع قرنك اليسار صح ياريال وإلا لاء قال بلا.
قال إذا الحل هو واضح وضوح الشمس في عز النهار بدون غيم ولاغبار ، قالو كيف؟
قال شليويح أنت يالمطنوخ تمصع قرنك اليسار وتعطيه ريال الفسحة وبذلك يكون لريال قرنين صح وإلا لا قالوا على أفم واحد الدلوخ صح صح.
قال تمام وأنت ياريال تمصع قرنك اليمين وتعطيه أخوك المطنوخ الذي كان عنده قرن يسار وبذلك يكون عنده قرنين يسار ويمين صح وإلا لاء قالوا صح 100% ياشيخ شليويح والله إنك شيخ حكيم ما يشبهك بالأفكار الحلوة إلا الشيخ ابو عارف.
والله قالوا حنا وكلناك تمصع وتركب الله يخليك فقال نعم أنا يسمونن المصاع ولكن التركيب صعب تشوفون الغسلان يمكن يعرف يركب قرونكم كما يركب القصيد.
قالم الأصلج شليويح ومصع قرن المطنوخ الأيسر وقرن خالي الأيمن وأصبح الثلاثة صلجان وصمول وخبول وأكمل لكم سالفة خطوبتهم بالحلقة القادمة.
والسلام عليكم.
رد مع اقتباس
المشاركة الأصلية كتبت بواسطة مناكد
المفضلات