بسم الله الرحمن الرحيم
ياخوان السالفه هذي من السوالف المثمنه
واللي تعلمك قوة الصبر عند شيباننا رحمة الله عليهم
حنا بوقتك هذا لو تبي لك قطعة خبزه من البقاله
والبقالة قرطة عصا عنك لازم بسياره
لاشك جميع من شارك بهالقصه هو بطل لكن تعلمنا بتاريخنا
انه دائما لايذكر الا العقيد
فنجد معارك كبيره يذكر منها واحد او اثنان اللي هم العقدا
بطلا قصتنا هم:
جفران المعكلي من المعاكله "وهذولا هم ربعي القريبين " من الغفيله من شمر
وجفران المعكلي معروف انه دليله وهو دليلة شمر عبيد الرشيد يوم يلحق ساجر الرفدي
وكذلك طلع ولده خزعل مثلوه دليله وخزعل هو دليلة عبيد يوم هو يغزي على بن مرشد
وطلع عقبهم خلف المعكلي وكذلك دليله وهو دليلة شمر يوم معركة الجوف
والبطل الثاني شايش الصلج من الصلوج من الرمال من الغفيله من شمر
ومجموعه من الرجال يقاربون العشره فقط او يزودون برجالين وجميعهم من ربع المذكورين
ومنهم من شمر لكن لاعرف من وين بالتحديد
كان عددهم قليل وهم يغزون على قافله باطراف العراق واللي يظهر لي ان القافله ماهي لقبايل عربيه ويبدو انه للعثمانيين والسبب ان كسبهم بهالمغزى كان صناديق ذهب
المهم ان هالمغزى انتصر بهالغزوه وكسب الغنايم وانتزح به
فكان يتحتم على هالمجموعه انهم يوصلون الصناديق لمكان امن واللي هو احد المزارع بالجوف
جمعهم جفران بحكم انوه عقيدهم قال يالربع شوفة عينكم حنا بلاماء ولاطعام وهالصناديق نبي نوصلهن لسكاكا
وكل موارد الماء اللي على طريقنا بهن عربان اللي بهن عنزه واللي بهن الروله وغيرهن
واذا شافونا ماحنا واجد ومعانا غنايم طمعو بنا وخذونا
قالوا والشور ياجفران
قال جفران كانكم رجال تصبرون عن الماء حول الاسبوع وانا ابي اقطعكم من عند هالحماد
"والمعروف ان الحماد منطقه مابه موارد ماء ونادر ماينزلون به العرب"
قال الرجال نصبر ياجفران
وهم يشدون وكانو بجمرة القيض يعني بعز الصيف
ويمضي اليوم الاول وليلته
ويمضي اليوم الثاني وليلته
ويمضي اليوم الثالث وليلته
يوم جاء حول اليوم الرابع او الخامس وهم يتليشون الرجال ويذبحهم العطش
منهم من عجز عن الحركه ومنهم من وقع من فوق ذلوله
وماصبر منهم الا جفران وشلاش
وهو يجي جفران قال ياشايش نبي نبي نخلي ركايبهم ورا بعضهن ونربطهن ببعض
ونبي نربط الرجال فوق اشدتهم عشان مايقعون وانت خلك وراهم ماوقع من الرجال شلوه
وانا ابي اتقدم بكم
مامضى حلو خمس ايام الى اسبوع الا وهم واصلين المزرعه اللي يبون
يقولون يوم دخلو على المزرعه وهم يتواقعون على الماء من العطش
يقولون اليامار متغيرتن وجيههم وغاديتن سود من التعب والعطش وهاللاواهيب
وباثناء ماهم يشربون يقولون وهو يدخل عليهم اكا السكاكي من اهل سكاكا
يقولون قال :واويحي وسود وجيهكم واقشره "
قال شايش الصلج بهالمناسبه:
[poem=font="Simplified Arabic,5,burlywood,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
ياولد وان كان وجهك يبضي=انا من اللاهوب يقلب سماري
كم فاطرٍ قامت تحتنا تجضي=من كثر ماتطلع سنود وحداري
وكم ليلةٍ فيها عشانا تمضي=يوم انت تاكل من لقاط الشعاري
تذكر لنا وقت الملاقا تفضي=ياحيف زولك ياغليظ العتاري[/poem]
والقصيده اطول من كذا وانشالله راح اجيبه كامله
واطلب من احد مشرفينا الافاضل ابو فيصل او ابو فراج يضيفونه للموضوع
هذا اللي قدرنا الله عليه
مع العلم ياخوان ان السالفه به تفاصيل كثيره وبه ذكر مناطق
لكن حبيت اختصره حتى تكون اسهل للمتلقي
حتى اللهجه استخدمت اللهجه البيضاء
اللي مفهومه للشمري واللي ماهو شمري
لو ابي اجيب لهجتهم الاصليه كم واحدن بهذا يبي يتلفت
والمتصفح مفتوح للاضافه والاستفسار والتصحيح 
المفضلات