@ سواليف المعلمات في حصص الفراغ هنا!!

**مجد** · 08-09-2004 22:48

[align=center]

مرحبــــــا بكم
أود أن آخذكم في استطلاع سريع لمجالس معلماتنا في المدارس
خاصة في أوقات الفراغ

كتبت إحداهن قائلة ..

تبدأ الحوارات بتقييم طبخة الجلسة"وأكيد مصلحتها الشغالة".؟..
وش مقاديرها؟؟.. عطيني طريقتها .. والله عندي أهل رجلي ..
خليني اتنفخ بطبق جديد .. وتنطلق قافلة توزيع روشتة المقادير..
وتوصل الإدارة ليتم نسخها على الآلة ..وبعد مايطفحن الحلى.. تدور ترامس القهوة ..

وتفتتح السوالف بأشدها حرارة .. خطر "غزو الشاميات "اللي بدأ يهدد البيوت.. وتفكير الأزواج بالزوجة الثانية ..
وفلانة أخذ عليها شامية!! واللي سافر زوجها يخطب لأخوها ..
وتزوج هو!! وهات ياحش ..
(وهناك مسجات ونكت على هالموضوع ..
واللي ترسلها لزوجها .. واللي ترسلها لصديقاتها )!! ..

ويسخن الحوار مع "طاري الراتب ".. وتنهال التحذيرات لا تعطينه راتبك ياخبلة ..
يتزوج فيه ويحرق قلبك.. ولاتخلينه يتقاعد بكره يفضى لمغامراته..
وفلانة تبي تتقاعد عشان تستعد لأم المعارك!!.

وينتقل الحديث الآن إلى جاكرتا والفلبين و"سوالف الشغالات ".. اللي تزوج عليها خدامتها وهي ماتدري!!
واللي سافرت شغالاتها وهي في حالة يرثى لها.." تعودت الرفالة والربادة!!"..

وتدور بين المكاتب للبحث عن ضالتها..
واللي مضربة عن العمل تبي تسافر ويمكن تسوي شي في نفسها وإلا في العيال!!
وبسرعة تبدأ التحذيرات.. لازم تفتحين رسايلها .. و
تفتشين أغراضها .. فلانة لقت شعرها فيها.. واللي تحت راسها ورقة طلاسم ..
ذولا راعين طبوب .. الله يستر..!!!

ثم ينتقل الحديث إلى ماهوأكثر إثارة .. وموضة هالأيام .." العين والحسد "فلانة عينها حارة .. فلانة نضول.. وفلانة صابتها عين ..
ومن ثم تتبرع وحدة بالمرور على المعلمات بقارورة ماء والكل يقرأ وينفخ ..
وياويل اللي ماتقرأ !! والذكية تجيب تمر ..
ثم تجمع النوى وتتغسل به .. ويتم توزيع عناوين اللي يقرون على الناس ..
وتطور الأمر في المدارس صاروا يدورون على الطالبات بقارورة الماء
يقرون للمعلمات وينفخون..!!

المحور الرابع لمناقشات الجامعة النسائية العربية هو "المطاعم ".. وين فيه مطعم جديد ؟؟
ومتى فتحوه .. ويالله شيلوها شيلة ..!!!

مراسلتكم ..من موقع الحدث المجــــد
نقل مباشر من إحدى المدارس
[/align]

**مجموعة إنسان** · 08-09-2004 23:28

[align=center]وينتقل الحديث الى محور العقار والمكاتب العقاريّة

سعر المتر المربّع والمكعّب << المكعّب هذا لإيضاح عدم فهمهن التام بهذا المجال الذي يتحدثن به

ثم ينتقل الحديث الى الجمعية ومن ستستلمها هذا الشهر وماذا ستفعل بها وبكم سهم قد دخلت وهل السهم المقنّع هو للزوج ام لإحد الإخوة ..

ووعدّي وإغلطــي من هالسوالف مجّوده

ياسلااااام على المدارس والله خــوش

شكراً لك[/align]

.

**سالم** · 09-09-2004 00:00

[align=center]سلااااااااااااااااااااااااام

ثم ينتقل الحديث لـ سوالف الحش و تكسير الرجلين
و فلانه سوت و فلانه عملت .. شوفي لبس فلانه و شوفي حق فلانه
وشوفي شوشة فلانه

ثم ينتقل الحديث لـ السحج >>>> الكذب لغير الناطقين بالعربيه
عاد حدث و لاحرج .. تشوفين الوحده لسانه يلوط إذانه
وتقرق تقل راديو .. اللي تقول امس ابوي شرا شاليه واللي
تقول اخوي نقيب واللي تقول سواقنا مايعرف يسوق وابوها اللي يوديها
للمدرسه كل يوم لا وبعد اللي تقول امس انا وااهلي صورنا عند بحر الرياض

و محاور حديث النساء كثيره .. لا أستطيع و لا نستطيع حصرها هون
>>>> من عربي لـ لبناني

الف شكر ابلى مجد

ماننحرم [/align]

**مجد** · 12-09-2004 15:52

[align=center]اشكر لكم تواصلكم ..

فعلا الاحاديث وسواليف المعلمات تطول ..
واذا انصت لاحاديثهن .. تشعرين ان المعلمة وغير المعلمة
في الهموم واحدة

فسوالفهن .. كأنها سواليف شاي الضحى

اما بالنسبة للعقار أول مره اسمع عنه بصراحة

الف شكر لكم ولمداخلاتكم

المجـــــد[/align]