[ALIGN=CENTER]
يقول الشاعر :
عــدم تـسـديـدك للفـاتـورة أدى …. إلـى فـصـل الـخـدمة عـنك مؤقتا
الرجاء الاسراع بالتسديد حتى …. لا تفصل الخدمة نهائياً عن هاتفك
وسلامتكم


هالبيتين ذكرهم الشاعر وفارس القبيلة الجوال … وهالبيتين مشهوره جدا .. كتبها في محبوبته الفاتورة .. طبعا قصة الحب اللي صارت بينهم بدايتها كره ومكابره ... الى ان انقلب الحال وصاروا عشاق من درجة عنتر ولبنه ( فطاير مو بنت ).. المهم قصتهم ياطويلين العمر


الشاعر والفارس الكبير الجوال يوم شاف الفاتورة عند الغدير تسقي نياق ابوها شيخ القبيلة شركة الاستهبالات السعودية ..( من عرب بني الاتصالات) .. كانت الفاتورة الله يرجها متبرقعة .. ورافعه دراعتها ( فستانها ) … ومطلعه نص ساقها .. وشعرها طويل منزلته قدام كتفها ومغطي صدرها وواصل الى ركبتها من طوله .. ومدخله اصابعها في شعرها وتصيد قمل الله يخيسها .. .. جاها الفارس والشاعر الكبير الجوال.. وبعد ماتنحنح عشان تغطي البلاوي اللي طالعه .. قال : امحححمحممم.. يابنت فيه احد في الغدير غيرنا ؟ .. قالت الفاتورة : مابه الا انا وقلبي يافارس العرب .. قال .. لا تلمحين ترقيم منيب مرقمك .. وزواج عز الله مااعرس عليك ياام القمل .. وخري عني بس خليني اروي فرسي من الغدير .. بالعون انها ضميانه وبدها تشرب <- - - لاتشرهون الفرس لبنانيه



قامت الفاتورة معصبه من مكانها .. وقالت .. والله لا اشكيك لأبوي الشيخ واقول انك تتحرش في البنات عند الغدير .. بالعون انك خسيس وسربوت يالصلبي .. قال الجوال.. اعقلي يامره .. كل شي ولا عمي الشيخ .. بالعون انه بيقص راسي من لغاليغوه .. وش تبين مني انا رجال معروف بين العشاير والعربان .. لا تفضحيني يرحم امك ... قالت الفاتورة ... اجل اروي فرسك .. وبعدها تعال عند الكهف اللي بآخر الشعيب ... انتظرك هناك يبو كرشه .. ( ماتعرف تسب )




راحت الفاتورة بعد ماهددت فارس القبيلة الجوال.. وجلست في وسط الكهف .. هو مهوب كهف بالضبط .. تقدرون تقولون انه غار ... تبون الحقيقه .. هو مهوب غار بالضبط .. تقدرون تقولون جحر ضب .. تدرون عاد ابتكلم جد ... هو مهوب جحر ضب بالضبط ..هو وطيت رجل صعيدي ... راحت الفاتوره وجلست في حفرة الاصبع الكبير لرجل الصعيدي ... وقعدت تدفن الاصبع اللي جمبه... وشوي وتشوف .. الجوال ... جاي من بعيد .. من عند الاصبع الصغير .. قامت الفاتورة متحمسه وفصخت برقعها .. وقعدت تأشر له .. يعني انا هناااا ... الله من الصياعه يالفاتورة اثقلي شوي



وصل عندها وباين عليه التعب ... قالت له الفاتورة .. سلامة فارس العرب.. سلامة قلبه.. سلامة رجل مشت فيه .. سلامة خشم ينغف به .. سلامته كله من اوله الى اخره ... وش ودك تاكل وش تبيني اطبخ لك بس .. انت تامرني يابعد ارقام فيني .. قال الجوال.. وش عندك يامره من علوم .. انا ماجيت اكل .. وقهوتك صايده .. وخلوهم يدخلون بشق النسوان.. ومكاري في البريه يقنص .. وزوينه لازم تاخذ حمد.. وجواهر لازم تجيب عيال يشيلون اسم القبيله من بعدنا ( كلمات مالها دخل بس اذكرهم يقولونها في المسلسلات البدوية ).. قالت الفاتورة .. والله ومحمد رسول الله .. انك تخليني اطبخ لك علمني وش مشتهي بس ...



قال الجوال... اطبخي أي شي .. وش عندك توكلينا ؟ ... قالت والله ماعندي الا قلبي ( يقال انها رومانسيه هالحين ) .. قال الجوال.. انا قلت شي ناكله مابي دواء المسالك البوليه .. وش عندك تطبخينه ترى ابمشي .. قالت الفاتورة .. اذا في امك خير رح وخلني .. بعدين حنا في حفرة رجل صعيدي .. يعني وش بتلقى فيها ... يالله قم ورنا فروسيتك وشهامتك يافارس العرب ... وصيد لنا غزال ولا طير نشويه وناكله ...



قام الجوال.. وربط شماغه على خصره .. ( بيصيد ولا يرقص ؟ ) .. وطلع برا حفرة رجل الصعيدي يدور على الصيد .. وغابت الشمس ولا بعد جاء .. الفاتوره خافت لايصير فيه شي .. طلعت بتدوره قبل لا تغيب الاشفاق .. توها واصله عند نهاية اصبع رجل الصعيدي الاخير ... لينها تشوف الجوال يسحب له شيء كبيــــرررر ... فرحت وقالت عز الله انك فارس العرب ... شكلك صايد لنا ديناصور .. قامت الفاتورة تزغرت ( تيبب ).. وتولول ... واويييهاا .. على فارس القبيله .. وأوييييهااا .. صاد لنا ديناصور .. وأوييهااا شو يخزي العين .. وأويييهااا .. الله يعيننا على هالليله .. وأويييهااا .. شنقليله شنقليله .. وأويييهاا.. جنقل لاند .. وأويييهااا .. عروض افريقيه ببلااش ... وأويييهاا .. ماتسمع بقول لك ببلااااش وفوقها كاااش .. واويييهااا ..و الف الصلاة والسلام عليك ياحبيب الله محمد .. كلوللووويييش



راحت الفاتورة تركض قبل ما يشوفها فارس القبيلة الجوال وجلست تشب النار ... لين يوصل بالصيد ... شوي وصل الجوال وجاء من وراء الفاتورة وهي تشب النار ... وحط يديه على عيونها ... وقال .. مين أنا ؟؟... قالت .. انتا قلبي (ذابحتها الرومانسيه) .. قال لا يالهدره .. انا الجوال وش تتوقعين صدت لك ؟... الفاتورة على بالها ماتدري وش معه .. قالت .. جربوع ؟... قال ... لا اكبر شوي ... قالت .. ضب ؟... قال أكبر شوي ... قالت ... ارنب ؟... قال اكبر اكبر ... قالت .. غزال ؟.. قال لالالا .. اكبر شوي ... قالت الفاتورة : .. انا عارفه وش معك .. بس استهبل .. معك ديناصور .. وخر عني بس احس عيوني غرقت من عرق يديك ...


قال .. معي شي اكبر من الديناصور .. قالت .. وشووووو تكفى قل لي وشو ؟؟؟ .. قام الجوال ووخر يديه عن عيون الفاتوره ... وقال يالله فتحي عيونك وشووووووفي ... الفاتوره قالت .. وشلون افتح عيوني وانت عيوني ياقلبي ..( قايلن لكم ذابحتها الرومانسيه ).. قال افتحي عيونك جعلها العمى اليوم بنمرح جوعانين مامعنى شي ... شوفي وش لقيت.... الفاتورة فتحت عيونها وشافت ... وشــــــووووو ذاااا .... ظــفـــرررر .. وياليته ظفر مثل الناس .. ظفر منكسر بعد ؟؟؟؟؟؟ ... قال الجوال ايه ... وش اسوي مالقيت الا ظفر منكسر الظاهر انه حق ابو رجل ... قالت منهو ابو رجل ... قال الصعيدي اللي جالسين في وطيته يالدبشه ... قالت طيب وش الاحمر اللي في الظفر ... لاتقول انه دم هالصعيدي .. وعععع ... قال .. استحي على وجهك وكرمي النعمه ترى هذا عشانا الليله .. وهالاحمر اعتبريه أي شي.. خلينا نقول مثلا .. كاتشب... اهم شي ناكل وبس



قعدوا يقرضون من ذا الظفر لين غدت بطونهم اصابع ... وناموا هالليله كل واحد بعيد عن الثاني ( بعيدين عن بعض ركزوا.. خابر بعضكم بيفهمها غلط يالملاعين ) .. يوم اصبحوا ..قامت الفاتورة من النوم .. لقت فوق راسها .. ثلاثة رجاجيل متلطمين ومعهم البارود ( البندقيه ) .. وموجهينها عليها ... التفتت على الجوال لقت فوقه خمسة رجاجيل ومعهم البارود وموجهينها عليه بس انه مطنشهم معطيهم ركبه ونايم ... الفاتورة من الروعه ماتدري وش تسوي.. تبي تقوم الجوال من النوم عشان يشوف هالبلوى.. اللي طاحوا فيها .. قامت ترمي عليه طبشور عشان يقوم ( حركة المدرسين ) .. يوم جت طبشوره في عينه .. قال الجوال ... يااستاذ والله ان عندي ظروف عائليه ولا نمت امس .. قالت الفاتورة يالملعون ظروف عائليه ولا جالس تشوف المباراه ... يالله قم شف اللي فوق راسك بس...




رفع راسه وشاف الشباب الحلوين اللي فوقه ... وقال بالعون رحنا في خرايطهاااا .. قال واحد من الشباب وشكله قائد العصابه ( وش عصابته معليش ثقافتي افلام كرتون ) .. قال اخس يالخسيس .. تغدر في بنت عمي الشيخ هذا وانت فارس العرب .. يالله قم معنا... قم لا بارك الله فيك اللي يتفاهم معك .. عمي الشيخ شركة الاستهبالات السعودية .. هو اللي يعرف دواك وعلاجك ... واذا تحركت يمين ولا يسار ... والله مايردني عن طخ راسك الا ضغطت زناد البارود ..وقف الجوال... حس انه مظلوم .. وكأي مظلوم لابد انه يستعطف قلوب الناس .. وقال ليه الظلم .. انا .. انا .. تتهموني بالشينه .. تتهموني بأني مسوي ذاك وذاك مع الفاتورة بنت عمي ... حراااام عليكم يالنشامه ... حراااام ...حراااام .... وطاح على ركبته ... وحط يديه على الارض .. دليل على الانهزام .. جاء قائد العصابه ... ومسكه مع شوشته ... ورفع راسه وقال ... تبي تصير رجال وتمشي معنا ... ولا نسحبك بكراعك ؟ ... قال الجوال .. انا بعد هالعمر تسحبوني مع كراعي .. ايييه يادنيا .. اييييه يادينا لك جينا وكل الامل فينا... الحب جمع قلبين وضم الهوا يدينا ... عاش ابو صقر



ربطوا الجوال... مع الفاتوره ...ظهر بظهر ... يعني كل واحد معطي الثاني ظهره ... ومشوا فيهم لين وصلوا .. عند خيمة الشيخ شركة الاستهبالات السعودية وهو شيخ القبيلة والعرب كلها .. حطوا الفاتوره والجوال ورا الخيمه عشان مايشوفهم الشيخ ويذبحهم .. ودخلوا على الشيخ.. وكان شيخ القبيله يلعب كيرم مهوب فاضي لاحد .. وكل شوي يصارخ .. ياجوهر صب القهوة ... ياجوهر قرب المركا .. ياجوهر جب لي مويه ... ياجوهر تعال العب معي كيرم ( كنها طلبات خالي يوم حنا بزران ) .. شيخ القبيلة محلل راتب جوهر من قلب .. المهم دخلوا عليه النشاما اللي صادوا الفاتورة مع الجوال .. وقالوا ياعمي الشيخ ... معنا علوم واخبار ماتسرك ولا تسر قبيلتنا ... والبلى كله من بنتك الفاتورة ... هذا الموجز واليك التفاصيل .... قال شيخ القبيله .. انطم شوي خلني ابدخل خمسين الكيرم بعدين قل التفاصيل ...




وشوي وتدخل الخمسين ... ويصفقون له كل اللي بالخيمه .. قالو يالله جب غطاها .. (لازم الخمسين يدخل بعدها غطاها) ... قال شجعوني والله اجيبها .. اصلا الكيرم لعبتي... وكل اللي في الخيمة ..قعدوا يشجعونه ويقولون ... شيخناااا شيخناااا هوه هوه ... شيخناااا شيخناااا هوه هوه ... اووووه ياشيخنا ياموج البحر .. عاد الشيخ على باله يستهتر .. قال شوفوا .. ابجيب غطا الخمسين بيدي اليسار .. لا وأبلعب بأصبعي الصغير ... وشوي والله ويدخل غطا الخمسين .... قام الشيخ يركض في وسط الخيمه .. طاح بشته .. والنشاما يلحقونه يبون يمسكونه .. اللي يسحب شماغ الشيخ واللي يسحب صرواله ... حالتهم خياس في ذا الخيمه ... يوم وصل الشيخ عند زاوية الخيمه ويتزحلق على بطنه ... ووراه النشاما تزحلقوا على بطونهم ... ووصلوا .. لين نهاية الخيمه ولاامدا الشيخ يوقف عند نهاية الخيمه ... فطلع راسه من تحت الخيمه على برا ... وشوي لين النشاما تطلع روسهم جمب راس الشيخ ... ويناظرون بعض .. ويضحكون .. ويقولون والله انك فنان ياشيخ .. رفع راسه الشيخ ... لقى بنته الفاتورة مربوطه مع الجوال.. ظهر بظهر .. التفت على النشاما.. وعطى كل واحد فيهم تفله في عينه .. وقال .. ياعيال الكلب رابطين بنتي مع فارس قبيلتي ماتستحون على وجيهكم .. دخلوهم دخلوهم لا تفشلونا قدام العربان



جلس الشيخ في صدر المجلس .. وراحوا النشاما وفكوا الفاتوره عن الجوال.. ودخلوهم على شيخ القبيله ... جلس الجوال على ركبته بوسط الخيمه .. وجلست جمبه الفاتوره .. وبينهم مركا .. قال واحد من النشاما ... ياشيخ نبي تحكم في اللي شفناه من هالاثنين بالعدل .. قال الشيخ انتم خابريني احكم بغير العدل ؟ ..


قالو والله بعض الساعات تخمبق وتكذب .. وألزم ماعليك الواسطه .. ودايم بنتك بريئه والناس هي الغلطانه .. لكن اليوم شفناهم مع بعض .. ولا ندري وش السالفه .. فأحسن شي خلهم يحلفون بالله .. ويقولون الصدق ... قال الشيخ .. يالجوال .. تعال عندي .. وبعد ماتحلف بالله انك تقول الحقيقه .. علمنا وش قصتك مع بنتي الفاتورة


قرب الجوال عند الشيخ .. وقال... ياقاضي ياقاضينا.. ياللي بالعدل تقضينا... جيتك هدي قدي .. وافلح من صلى على النبي .... كل اللي في الخيمه قالوا . اللهم صلي على نبينا محمد .. قال الجوال.. يشهد علي الله .. اني مااقول غير الحقيقة ..... ودخل اصبعه في فمه وحطه على لسانه شوي .. ومسح اصبعه على رقبته ( يعني جعل رقبتي تنقص اذا كذبت )..



وقال الجوال .. كنت راجع من عيال عمي ومااجلس عندهم الا ثواني واذا طولت دقايق .. ولا احب المشاوير اصلا .. لاني عارف ان فرسي بتضما ولازم ترتوي .. ومثلك عارف ياعمي الشيخ ... الغدير جالسه عنده بنتك 24 ساعه ... ولا تخلي احد يرتوي ولا يروي فرسه .. الا اذا طلعت ريحته ... وانا هالمره .. يوم جيت عند الغدير .. قالت لي بنتك ماراح تشرب من الغدير ولا ترتوي لانك رايح مشاوير لعربان وعشاير غير عربنا .. وجلست تتبلى علي ... وراودتني عن نفسي حتى انها قالت افصخ بطاريتك ولا منتب شارب من الغدير ... ليه هالدكتاتوريه ياعمي الشيخ ..


. انا لو جيت ابعترض واقدم شكوى على بنتك .. تقول لازم تعطي بنتي حقوقها بعدين اعترض .... طيب انا من وين اعطيها حقوقها اذا هي طالبه مني حلالي وحلال عشيرتنا كله .. ليه مافيه ديموقراطيه .. خلنا نعترض على بنتك قبل نعطيها حلالنا وبهايمنا .. ياشيخ خلك مثل العشاير والعربان الثانيه ... والله ان خدمتهم لعيال عشيرتهم اصرف منك يالحرامي .. انت تستهبل علينا عيني عينك وعارف ان ماأحد يقدر يصير شيخ على قبيلتنا غيرك .. طالبنا بشيخ بديل عنك... وقالوا .. بعد سنتين بيجينا شيخ فرنسي ... ونفتك منك يبو ريحه يالدب يالحرااااامي


بعدين ياشيخ ليه البهايم( المسجات ).. اذا جت ترتوي من الغدير .. بنتك تاخذ منها لها ؟ ... العربان الثانيه والعشاير اللي حولنا ..البهايم ( المسجات ) يرتوون من الغدير بلاش ... وحنا في عشيرتنا .. كل شي بفلوس وكل شي لازم نعطيك من حلالنا ... حتى المسجات جعلك الضعفه .. خافوا الله فينا ..


من القهر اللي في الجوال داخ عليهم في الخيمة وطاح على وجهه وانكسر راسه ( الاريل ) .. قاموا النشاما وركككض .. على الجوال بيشيلونه .. قال الشيخ خلوه ... اتركوه لاحد يجيه .. الخسيس ماداخ الا اكيد انه حامل من بنتي ( على باله فاهم ) .. قالت الفاتورة .. يايبه .. عز الله ان مابيني وبينه خرابيط شباب هاليومين .. وانا اللي لعبت عليه واغريته انه يجيني عند الغدير كل يوم ... بس مهوب ذنبي اذا صار تافه وسخيف .. ولايحكم عقله .. المفروض انه يوزن مشاويره عشان مايتورط بظلمك يايبه ...


قامت الفاتوره وجلست جمب الجوال وهو طايح على وجهه ... وقالت ... يايبه .. تراك ظالمه وظالم كل فرسان القبيلة .. واللي يرحم والديك ... ارحمني وارحمهم ... قال الشيخ شركة الاستهبالات السعودية ... ارحمهم هذي فهمناها .. انتي وش دخلك ... ليه ارحمك .. بالعكس انا حاطك غاليه ومهرك بالحيل غاااالي .... قالت الفاتورة يايبه ... ارحمني كل من شافني عند الغدير ... تفل بوجهي .. ولا اقدر اسوي شي لانك ظالمهم يايبه ... يبه .. يبه .. يبه .. كفاية استهبال كفاااااايه


مـــنـــقـــول [/ALIGN]