انثى ماتجزع من اللي يلمس ردفها((لغز))

[ابو يزيد]

الحل سواء لغز واحد او جميعها فالمشاركة مفتوحة.

اللغز رقم((1))
انشدك عن رجل(ن)سبق ناس ودول****فعله مسطر في سجلات الأجداد
شي(ن)صحيح ماهو تزييف وهول****مشهور مابين القريب والأبعاد

اللغز رقم((2))
ياويش سبع اليا هد وادلى****يجنب الهادي وكفاي شره
وينصى الذي ماغير فرقاه بدلى****ويجذ حبل اللي بدى بالمضرة

اللغز رقم((3))
انشدك عن انثى عجيب طبعها****من اللي يلمس ردفها ماتجزعي
اليا قربن البيض حروة جوفها****وردنه ابكار وردن رجعي

اللغز رقم((4))
عميا يقوده يابو الفود غازي****متزهبن دهنت عراقيبه السود
تاكل ولا تشرب سواة الجوازي****ومن العجب تلقح وتالد بلا زوج

ملاحظة:
عند الحل او الرمعة يكتب رقم اللغز والمحاولات مفتوحة سواء لحل لغز واحد او الجميع .
والله يعينكم.


وتقبل تحياتي
اخوك/ابو يزيد

[ابو يزيد]

الأخ/بشير الويش
الله يسعدك اينما كنت
صحيح ياخوي بشير
رجال العرف ماينبحل بهم
اكيد انك بتحركنا بالرمعة
وعلى شانك هالرمعة صح ولو
هي سماوية وهذا اللغز معلق على
شانك يعني خارج المسابقة .
وعلى شانك حركتنا ابقرب الحلول:
اللغز الثاني((له علاقة بالطبيب بس أي
طبيب هذا على القاريء))
تقريب حل اللغز الثاني :
((تلقاها على مكتب واحد(ن)سنافي))
تقريب حل اللغز الثالث:
((لها علاقة بموسم القمح))
وهه عسى نلقى الي يقدر يحلهن.
وتشكر على هاالتحريكة
والله لايهينك
تحياتي
اخوك/ابو يزيد

[بشير اللويش]

مساء الخير يابو يزيد
\
بيض الله وجهك
صراحة فزعتك معي ومجاملتك عطتني دافع
لكن المره

تكفى لاتبخل علي مثل اول شجعني
وعندي حلول ولاني ظامن الصحيح لكن يالله

رقم اثنين اجابته كان ماهي الخرامه وانااعتقد الظاهر انها اجابة سماااااااويه

ورقم اربعه كان ماهي اللي تجمع البرسيم والحصيد على شكل مربعات وهي الظاهر سمانين

مررررررره اخرىىىىى للتحريك والمشاركه
واعذرني على القصور

تقبل تحيااات اخوووك الصغررر

بشير اللويش

[ابو يزيد]

الأخ/بشير اللويش

الله يمسيك بالخير

مشكور على كل المحاولات

وعسى الله يعطيك العافية على تحريكنا

اما بالنسبة لحل اللغز الثاني

تقول انها((الخرامه)) لكن اعتقد انك

غلطان بالنمره وانك ناوي تقول حل اللغز

رقم((3)) وهو الصحيح ان حله الخرامه

وما قصرت .

اما اللغز الرابع تقول ان حله اللي تجمع الحصيد

والبرسيم على شكل مربعات وانا اقول حلك

((بالعارضه )) يعني أشوى ماهي سماويه لك تراك ماحليته

باقي لك وللقراء هذا والثاني؟؟اماالثاني وهو واضح وهو

اشد من هم العرس ((هه جنحت بك))

تحياتي لمحاولاتك ماشاء الله عليك

واذا صار عندك وقت فكر ترى

ربعنا حقين الألغاز

فشلونا ماادري

وين راحو.

تحياتي

وتقديري

لتفاعلك

اخوك

ابو يزيد

[سنـعـوسـي]

بسم الله الرحمن الرحيم


مساك الله بالخير حبيب الكل ابو يزيد وترا بحاول مثلي مثل اخوي بشير بس هاه لا تقولي بالعارضه >>>>>>>>>>>> واثق من حله 0

اللغز الثاني كان ماهو باللي يقولون ما همِ الا هم العرس ولا وجعِ الا وجع الضرس 0 وله شبيه تعرف عاد انت الناس تحب المغالط ويقولون ما وجعِ الا وجع العين ولا هِمِ الا هم الدين 0 والله اعلم انه الضرس هو الحل 0


اللغز الرابع طال عمرك كان ماهو الحصادة فنا ماعنديله رمعةِ ثانية 0
\r


،،،،،،،،،، وعسى الله يعطيك العافية ،،،،،،،،،،

[ابو يزيد]

الأخ/سنعوسي

هلابك اكثر

وعسا الله يعافيك

على هالمشاركة اللي بتحركنا

اما الحل للغز الرابع فعزالله انك فضخت عين اللغز وتسلم

اما اللغز الثاني اللي قلت فيه لأخوي بشير انه بالعارضه

فوالله انك ماقصرت على هالحل وطبعا مارايح اقولك

بالعارضة لو الله الا بالقائمة لكن ابوضح اكثر ترى حله

تلقاه في بيت هالشعر .

الجاز يعبا للضروس المثاني**واعرف ترى سن اللبن يقلعه سن

وحط حيلك بالشطر اأول.

اخيرا

لك خالص الشكر

على المشاركة

وتقبل تحياتي
اخوك/ابو يزيد

[عبدالعزيز الغفيلي]

مساك الله بالخير يا ابو يــز يــد ومبرووك عليك الشهر.


رمعتي للغز الاول : السيف ..


رمعتي للغز الثاني : السياف او على حسب تلميحك طبيب الاسنان..



وشكرا..

[ابو يزيد]

اخوي/عبد العزيز الغفيلي
الشهر مبارك
وكل عام وانت بخير
بالنسبة لحل اللغز الأول فانا علقت اللغز
وبعد اذنك وذلك علشان الأخ /بشير
وحلك كذلك لم يصب الهدف.
اما حلك للغز الثاني يااخي
عبد العزيز فيؤسفني ان اقول ان
رمعتك سماوية يعني سطحت الكورة
وليته بالعارضة فلذلك ابقرب لك الحل اكثر
الحل اصلا بالشطر الأول من البيت اللي ذكرت
والشطر اللي فيه الحل هو:
((الجاز يعبا للضروس المثاني))
واخيرا تشكر على محاولتك
ولك الحل بيدك هالحين
وارجو ان تحاول مرة ثانية وانا بانتظارك.
اكرر شكري للمشاركة
وتقبل تحياتي
اخوك/ابو يزيد

[ابو يزيد]

اخوي/عبد العزيز الغفيلي
علينا وعليك يتبارك الشهر
وتقبل الله منا ومنك صالح الأعمال


بالنسبة لحل اللغز الأول فانا علقت اللغز
وبعد اذنك وذلك علشان الأخ /بشير
وحلك كذلك لم يصب الهدف.
اما حلك للغز الثاني يااخي
عبد العزيز فيؤسفني ان اقول ان
رمعتك سماوية يعني سطحت الكورة
وليته بالعارضة فلذلك ابقرب لك الحل اكثر
الحل اصلا بالشطر الأول من البيت اللي ذكرت
والشطر اللي فيه الحل هو:
((الجاز يعبا للضروس المثاني)
واخيرا تشكر على محاولتك
ولكن الحل بيدك هالحين
وارجو ان تحاول مرة ثانية وانا بانتظارك.
اكرر شكري للمشاركة
وتقبل تحياتي
اخوك/ابو يزيد

[عبدالعزيز الغفيلي]

مساء الله بالخير ومشكور لانك رديت علي بسرعه ..


بس انا مشتهي ارمع رمعه للغز الاول لانها بخاطري هالرمعه ..


لان رمعه السيف لواحد كان بجنبي يوم ارسل الرد وانا بنفسي رمعه

صحيح انك قلتلي انك معلقه لا كن ودي تسمحلي اقول رمعتي ان صارت

سماوي خله تلحق خوياته ..ورعمتي هي القران الكريم من باب كلمتك شي(ن) صحيح وماهو تزييف وهول.


ومشكووووووووووور والله يا ابو يــــز يـد