قضى 50 عاما فيها ...قصيدة بأهالي حائل من المدينة المنورة

قضى 50 عاما فيها ...قصيدة بأهالي حائل من المدينة المنورة

سبق حائل ــ موسى العمران :

سلام من داررفيع مقامها
بقلوب كل المسلمين احترامها

دار النبي المصطفى مع صحابته
الطيبه طيبه عليكم سلامها

عليكم ياهل دار عزيزه نعزها
دار تروم الطيب والطيب رامها

دارالكرم بامثالها يضرب المثل
في صفحه التاريخ بصمةابهامها

بانوارها مكتوب يامرحبا بكم
ترحيبة بالنور معنى كلامها

حايل مثل شمس الربيع بشروقها
عقب ألمطر عنهاتجلا غمامها

بربوعها خمسين عام قضيتها
بايامها واشهورها مع عوامها

أعزها معزة ما تقسمت
وألاجوارالدار صار انقسامها

وارسلت من دارالرساله رسالتي
رسالة سلام والحروف ابتمامها

منا ياهل حايل سلام عليكم
ياهل السلوم الطيبه ياكرامها

من زاركم بالطيب يلقا حفاوه
يلقاالحفاوه والكرم ياحشامها

سرتم وسارت للمعالي ركابكم
مع كاسبين الطيب قدتم زمامها

نظمت جزلات المدايح امدحكم
نوادرمنظومة في نظامها

محاسن الإبداع في مفرداتها
والصدق في جزل المدايح وسامها

فيها المعزه مبرمات عقودها
مثل الحبال ابعقدها وابترامها

أما بعد ياهل المكارم نحبكم
محبة لله غاية مرامها

محبة لله بيني وبينكم
ياهل العقول الراجحه يافهامها

البعد مايبعد قلوب توالفت
على المحبه والوفا بالتزامها

والحب مايمحى من البعد والبطا
نحب ناس باليات عظامها

هذي هي الدنيا تقلب حوالها
تجمع وتفرق والأخير انعدامها

كم فرقت بين الخليل وخليله
وبين الأحبه من خوال وعمامها

دنياك يالمخلوق لو هي تزخرفت
بقصورها وابيوتها مع خيامها

قصورها اللي شامخات بروسها
يموت ساكنها ويبدا هدامها

أرض سقاها الغيث واخضر خضارها ياسرع خضرتها وسرع إنصرامها

لاتغرك الدنيا الغرور بغرورها
تغري بغرتها وزين إبتسامها

نظراتها فيها العجايب اليا قبلت
تصرف نظرعشاقها بانسجامها

تجملت للعاشقين بجمالها
حتى وقع منهم كثير بغرامها

ياويل من قلبه تعلق بحبها
يعيش هايم في محبة هيامها

ياعارف الدنيا وتشتيت شملها
يكفي مثل زاد المسافر طعامها

كنك غريب الدار من فوق ضامر
هميم أصيل من أصايل اهمامها

شد الشداد وشد زاده ومشربه
وشد المطيه ماتراخا حزامها

تشوق المشتاق من طول غربته
تسهر عيونه ماتبات امنامها

عابر سبيل ايتابع السير بالسرا
لو غابت القمراء وظلم ظلامها

بالليل يسري والسرا مايهمه
ضار على قطع الديار اومهامها

بين الظماوالجوع والخوف والرجا
وبين السباع الجايعات وهوامها

واصل مسيره في نهاره وليله
ألا مقيله غفوة مايلامها

بالقايله قيل تحت ظل طلحه
وراح وتركها قائمه في مقامها

إزهد بدنياك الدنيه وزودها
قليلها يكفيك واترك حطامها

تزودالتقوى ترى الزاد بالتقى
وإحذر تقرب للمعاصي واثامها

ارفع مقام النفس في واسع الفضاء
حر نزيه ماتقرب حرامها

حر يعزالنفس عن مايهينها
إعقالهاعقله وجود إخطامها

ماتابع الشيطان والنفس والهوا
دليلها خيرالدلايل أمامها

على طريق الخير همه وهمته
في هامته هم المعالي وهامها

والرجل بالهمه يحقق مهمته
عليه مقناص الفرص واغتنامها

مايدرك الطولات من لاسعالها
ومن يطلب العليا عليه اقتحامها

اما رقا من فوق مرقا يعزه
في عالي القمه بذروة سنامها

والا تطيب النفس عقب إجتهادها
يبعد عن النفس العزيزة ملامها

العز لنفوس تنافس على العلا
بالدين والحبل المتين إعتصامها

الله يعز الطيبين ويديمهم
ويعز الأمه في معزة إمامها

وصلاة وتسليم تكاثر على النبي
وروح وريحان ومسك ختامها

،،
نسخه للمنقول
،
الشاعر موسى العمران
،
اذا ممكن تثبيته فضلا ليس امرا اخي جمران
لاهميته لان الشاعر من خارج حائل واهل حايل

يستاهلون القصيد اهل حائل

وتستاهل الطيب يابو عمر


لاهنت

طيب وش اسم الشاعر !!؟ <<<<< أبوتس يالتناحة :)

تسلم يابو عمر على النقل المتميز

بس ليتك نقلتها بدون المصدر سبق حايل :)

وصح لسان الشاعر موسى العمران الرشيدي <<< يمديكم عالمعلومات بس :)

^
^

من أي الرشايده :)

50 عام وهو بحايل ... ياشين الفرقا

لاهنت يابو عمر على النقل

وصح لسان الشاعر الرشيدي >>> على ذمة السنعوسيه :)

-

-

والله مدري وش اعمل بك يابو عمر


تسني شايفن المشاركه هذي من قبل




وين ياربي وين .... امممم وين ؟؟؟




ايه تذكرت






صح نقلك يابو عمر :)

^

بحائليات:d:


المشاركه هنا مكانها انسب :thumb:



يعطيك العافيه بو عمر ع النقل واهل حائل يستاهلون كل خير

اقتباس:

---

المشاركة الأصلية كتبت بواسطة الونش

^

^

من أي الرشايده :)

50 عام وهو بحايل ... ياشين الفرقا

لاهنت يابو عمر على النقل

وصح لسان الشاعر الرشيدي >>> على ذمة السنعوسيه :)

-

-

---

بعد القوقلة طلع لي موسى عمران الرويضي من بني رشيد من عبس <<< يكفي والا نقوقل ثانية :)

عاد وأنا أقوقل طحت على قصيدة له حلوة جازت لي

قلت أشارك بها في مشاركة أبو عمر مع الاعتذار له :7ayyoh:


عسى هموم القلب ربي يزيلها
..................تخلي منازلها ويبعد رحيلها
ترحل ولا يبقى لها ساكن الحشا
............ومن عقبها الفرحات تنزل بديلها
تنزل على قلب ٍ همومه تحاصره
.............بجيوشها ترجف وتصهل بخيلها
لولا الرجا بالله كان استحلت
.............واستعمرت قلبي نهارها وليلها
لكن هزمها هازم الهم وأدبرت
..................فرّت وجرّت للهزيمه بذيلها
واللي بقى منها بقايا قليله
....................الله يمحاها ويمحى قليلها
يمحى هموم ٍ ما عرفنا حسابها
..............وأسبابها معروف داخل عليلها

أسبابها حب الشرف ياهل الشرف
...............حالي محبة خلها حل حيلها
ولا لوم روحي في محبة محبها
..............هاك الفتاة اللي غريبه بجيلها
بالخلق والأخلاق والعقل والحلا
...........تاخذ من أوصاف العذارى بجيلها
أوصافها بالبحر درة ثمينه
............من دونها موج البحر من يجيلها
مصيونة عن لمس الأيدي بعيده
............مستورة ٍ عن كل عين ٍ تخيلها
وأوصافها بالبر من قادة الظباء
...........هبّت لها الغربي وزادت جفيلها
ما ترتع إلا في رياض ٍ خليه
.............تدري عن القنّاص قبل يجيلها
ريحانة ٍ بغصون خضر ٍ تفرعت
...........بين الهضاب اللي يظلّل ظليلها
تشرق عليها الشمس في ساعة الضحى
.............ويمرها نبع الصفا مع مسيلها
هذي وصايفها ولوهي تخيرت
............تختار من حلو المعاني جزيلها
إن قلت أوصفها وصوف ٍ تعددت
...........لو قلت مهما قلت مالقى مثيلها

^

يعطيتس العافيه الجازي


صح نقلتس :)


ههههاااي

تسلم وتدوم اخوي متفأئل على النقل الرائع


ولك تحياتي

اقتباس:

---

المشاركة الأصلية كتبت بواسطة ابو ضاري

يستاهلون القصيد اهل حائل

وتستاهل الطيب يابو عمر


لاهنت

---

ماعليك زود

لاهنت ابو ضاري

اقتباس:

---

المشاركة الأصلية كتبت بواسطة الجازي

طيب وش اسم الشاعر !!؟ <<<<< أبوتس يالتناحة :)

تسلم يابو عمر على النقل المتميز

بس ليتك نقلتها بدون المصدر سبق حايل :)

وصح لسان الشاعر موسى العمران الرشيدي <<< يمديكم عالمعلومات بس :)

---

هههههههههههههههههه

حياااك ربي وحيا مرورك الكريم

اقتباس:

---

المشاركة الأصلية كتبت بواسطة الونش

^
^

من أي الرشايده :)



50 عام وهو بحايل ... ياشين الفرقا

لاهنت يابو عمر على النقل


وصح لسان الشاعر الرشيدي >>> على ذمة السنعوسيه :)


-



-

---

يالربع بعض هالنشده

ليه احد قايل لك اني ابن براك تنشدن من اي الرشايده :)

يامرحبا بالونش ومروره

اقتباس:

---

المشاركة الأصلية كتبت بواسطة الجازي

بعد القوقلة طلع لي موسى عمران الرويضي من بني رشيد من عبس <<< يكفي والا نقوقل ثانية :)

عاد وأنا أقوقل طحت على قصيدة له حلوة جازت لي

قلت أشارك بها في مشاركة أبو عمر مع الاعتذار له :7ayyoh:


عسى هموم القلب ربي يزيلها
..................تخلي منازلها ويبعد رحيلها
ترحل ولا يبقى لها ساكن الحشا
............ومن عقبها الفرحات تنزل بديلها
تنزل على قلب ٍ همومه تحاصره
.............بجيوشها ترجف وتصهل بخيلها
لولا الرجا بالله كان استحلت
.............واستعمرت قلبي نهارها وليلها
لكن هزمها هازم الهم وأدبرت
..................فرّت وجرّت للهزيمه بذيلها
واللي بقى منها بقايا قليله
....................الله يمحاها ويمحى قليلها
يمحى هموم ٍ ما عرفنا حسابها
..............وأسبابها معروف داخل عليلها

أسبابها حب الشرف ياهل الشرف
...............حالي محبة خلها حل حيلها
ولا لوم روحي في محبة محبها
..............هاك الفتاة اللي غريبه بجيلها
بالخلق والأخلاق والعقل والحلا
...........تاخذ من أوصاف العذارى بجيلها
أوصافها بالبحر درة ثمينه
............من دونها موج البحر من يجيلها
مصيونة عن لمس الأيدي بعيده
............مستورة ٍ عن كل عين ٍ تخيلها
وأوصافها بالبر من قادة الظباء
...........هبّت لها الغربي وزادت جفيلها
ما ترتع إلا في رياض ٍ خليه
.............تدري عن القنّاص قبل يجيلها
ريحانة ٍ بغصون خضر ٍ تفرعت
...........بين الهضاب اللي يظلّل ظليلها
تشرق عليها الشمس في ساعة الضحى
.............ويمرها نبع الصفا مع مسيلها
هذي وصايفها ولوهي تخيرت
............تختار من حلو المعاني جزيلها
إن قلت أوصفها وصوف ٍ تعددت
...........لو قلت مهما قلت مالقى مثيلها

---

تمووونين واللي يسكتك هو المبارك :)

سلمتي وصخ نقلك الجازي

اقتباس:

---

المشاركة الأصلية كتبت بواسطة جمران

^

يعطيتس العافيه الجازي


صح نقلتس :)


ههههاااي

---

جمران يسعد مرورك
ونشكر جهودك
لاهنت يالغالي

اقتباس:

---

المشاركة الأصلية كتبت بواسطة سالم الظفيري

تسلم وتدوم اخوي متفأئل على النقل الرائع


ولك تحياتي

---

هلا وغلا بسالم ومروره العطر

لاهنت بعدي

الله يسلمكم

أقول تسني طمعت :)

ورا ماتنسخها يامشرفنا الكريم وتحطها بموضوع لحالها

منها نكثر مواضيعكم وتكثرون مشاركاتي :7ayyoh:

اقتباس:

---

المشاركة الأصلية كتبت بواسطة الجازي

الله يسلمكم

أقول تسني طمعت :)

ورا ماتنسخها يامشرفنا الكريم وتحطها بموضوع لحالها

منها نكثر مواضيعكم وتكثرون مشاركاتي :7ayyoh:

---

هيه انتي ماكنك قطيتي المونه حيل المتصفح متصفحي وانا سمحت بالاوله والثانيه لا:)
سم الله تمسكن ياما تمكن:)