السلام عليكم ورحمة الله وبركاته
جمعه مباركه على الجميع باذن الله تعالى . .
.
.
اهداء الى كل قارئ وخاصه أهل الجوف //
يا جرح ما يبريك جرّ المواويل
______ تبقى عطيب وطبّك أصعب قضيّه
أثاري الغربه عذاب وبهاذيل
______ حدّه .. بحد السيف وأشطر شويّه
تاهت بي الدنيا وانا تهت بالحيل
______ وسهوم بقعا .. وجّهوها عليّه
عقب البراد و زين ذيك التعاليل
______ اليوم في رمضا الشتات القويّه
وعقب القراح اللي عدا ميّة النيل
______ اليوم . . في دار ٍ يعافون ميّه
أهب و اقطع .. يا زمان الغرابيل
______ جدعتني بين الظروف العصيّه
عانيت من وقتي وشفت التهاويل
______ ما عاد بي قوّه .. ولا مقدريّه
يشق صبحي .. ما تهنّيت بالليل
______ والليل يقبل .. والمحاجر نديّه
وجدي على ديرة هل الكيف والهيل
______ اللي تنصّاهم جميييع البريّه
ديرة خوالي .. والرجال المشاكيل
______ ( النقره ) اللي بالنشاما غنيّه
وجدي عليها وجد من شاله السيل
______ واقفوا ربوعه ما بقى له بقيّه
أقفى وهو يشكي من الهم والويل
______ وأقفت حياته ضيق صبح وعشيّه
قل هيه ياللي تركب الجمس وتشيل
______ قبل اندفاعك .. هاك مني وصيّه
اليا نزلت بدار . . عسّافة الخيل
______ ( الجوف ) دار الطيب دار الحميه
اصعد على ( مارد ) وناد الحلاحيل
______ وسلم عليهم كل ابوووهم سويّه
وخبّرهم اني حيل .. بالحيل .. بالحيل
______ مشتاق .. والترحال صعب ٍ عليّه !!
.
.
وسلامة الجميع
محبكم
عبدالمجيد بن عابد
