مساء الخير
لقلوبكم متواضعي
العام مر .. وعامنا يشبه العام
ومافي جديد الا على الضيق .. ضيقه !!
الحال : ناحل ..والجسم : جلد وعظام
والزاد : عفته .. والامل : جف ريقه
تعبت ادوٌر واسئلن ليه الاحلام !!
ماتت ؟؟ واموت ذا السؤال بطريقه :
انام .. واصحى ..والعن ابليس .. وأنام
شرهان ابنسى ماحصل !! والحقيقه :
اسهي غصب .. واذكره ..واعض الابهام
ومااطيق بعده نفسي اللي اطيقه !!
تسري بي اوهام ٍ ..وتخنقني اوهام
تمرني بـ الثانيه ..والدقيقه
كل زول اشوفه ..اسأله (يـ ابن الاكرام)
ماشفتني ؟؟ في جاه رب الخليقه !!
منهو انا ؟؟ ماادري !! واحاول بالاقلام
اكتبني .. واقرا نجم فاقد بريقه !!
الحظ : غافي .. كم ندهته ولاقام
ولو هو بيًدي .. كان والله لـ افيقه
وش ذا الزمن ؟؟ متعب: وقاسي : وينلام:
دام الاخو .. يطعن بيًده شقيقه
تعبان : عادي !! ذي هواجيس وآلام
قبله .. اعاني من جروح ٍ عتيقه !!
الوصل : يشفي ..والجفا : يـ اخي اجرام
والموت : قلبك لاانخدع في عشيقه
الصمت : يذبح ..والغلا : منك منظام
اما التغلي : شب فيني حريقه
الصبر : ملجأ لاقست سود الايام
ازبن عليه .. يعِز منهو رفيقه
ياصاحبي .. طول غيابك واذا دام
بيموت حب ٍ به مشاعر رقيقه
انا دخيلك ..روف من باب الارحام
دام جمعتنا عروق ناس ٍ عريقه
العام مر ..ومره اجرعه من عام
وياعامنا هذا .. مواريك ضيقه !!!
