شاعرات من البادية

شاعرات من البادية

هذا الموضوع برعاية: مجموعة الفراعنه

نوره الهوشان الرشيديه

هذه القصيده المشهوره وكانت تسكن عين الصوينع ومرت على مزرعة طليقها

فوقفت تنظر الى زرعه ومعاويده :

ياعين هلي صافي الدمـع هليـه ** والى انتهى صافيه هاتي سريبـه

وياعين شوفي زرع خلك وراعيه ** شوفي معاويـده وشوفـي قليبـه
لو مرني في بالدرب ما قدر أحاكيه ** مصيبـة يـاوى والله مصيبه
اللي يبينا عيـت النفـس تبغيـه ** واللي نبيه عجز البخت لا يجيبـه

محاورة بين الفارس الشيخ عقاب بن سعدون العواجي وبين إحدى نسائهم كان لها زوج وحصل على غزو

الشيخ عقاب معركة قتل فيها بعض من رجالهم وكانت هذه الفتاة تترقب الخبر وتتلهف على محبوبها عسى

ان يكون سالم وتوجه السوال للشيخ عقاب :

ياعقاب ياحبس الضعن باللقاء الشين ** ياللي حريبك بالهزيمـة يمنا

عينت ذيب الخيل يوم الأكاوين ** نور العيون غيبته الشمس عنا
هو سالم ولا رموه المعادين ** ياعقاب خبرني تراي اتمـنـا

الشاعرة غزيل

من قبيلة تميم من سكان القصيم تتغزل في معشوقها بلعوس :

واتل قلبي علـى بلعـوس ** تلـة ركــاب المقفـيـني

أقفى بقلبي يدوسـه دوس ** ياليـت ماهلـه دياحيـني
اشرية لو ينشري بفلـوس ** لـو يزعلـون القريبيـني
يفدا عشيري عرب مدهوس ** وعويشـه والجداعـيـني
غليـم يكسـب النامـوس ** ويكثـر الهيـل بالصيـني

الدقيس الجميليه

كانت تسكن وقومها في جوار الشيخ مانع بن سويط شيخ الظفير وعشقها اخاه فقام بطردها مانع

هى ومن معها من قومها فقالت :

يالله عسى ماتكره النفس خيره ** ياوالي القدره عليك التدابيـر

اللي فرق بين العشير وعشيره ** هو له وانا ليه ولي المقاديـر
وراك يامانـع تبتـن بجيـره ** زودن على تلطيخكم بالمعايير
انا صليبيـه ولانـي نحيـره ** وانتم نحايركم رقاب المناعير
حنا صليب ولاعلينا تحييـره ** عاداتنا ننزل خلاف الدواويـر
مانع اذا ركب الجواد الظهيره ** ماله مثيل يعلم الله سوى الزير
زير العراق اللي ربى بالجزيره ** شيخ كبير ووافي بالتشابيـر

الى ان قالت :

والله لا ابدل دارهم لي بديره ** نتبع مزون ماشيات محادير

و حين رحلت عن الظفير ارقبت الرجم وقالت :

عند الضحى عديـت انا رأس عنقـور ** اشرف على راعي العلوم الدقاقـه

ياونتي ياما بصدري مـن الجور ** ونـة ضعيـف ضاهدينـه رفاقـه
يايااه شفي واحدن منهل الهور ** هو عشقتي مـن ناقليـن التفاقـه
غديت له عوق وهو صار ثابور ** والكل منا صار شوفه شفاقه

وسمعتها امها ، فعذلتها بقولها:

برق مصد عنك لو كان بـه نـور ** بالك تخيله لو ربيعك شفاقـه

ترى الرجال ابهم تمازيح واغرور** ومن قبل بخصه لا يجي لك عشاقه

فردت عليها الدقيس بقولها :

من لا استشارك لاتبدي له الشور ** ومن لايودك نور عينـك فراقـه

وذهب هذا البيت مثلا مشهورا الى يومنا هذا .

الجازي السبيعيه

كانت يتيمه عند عمها رديني فزوجها من امير المجمعه ابن عسكر

على غير رضى منها فأكلت سما وماتت، وكانت قد قالت قبل موتها :

لقيت بأكل السم ياعـم راحـه ** اخير من رجل بليتـن بلامـاه

شفي سبيعـي بتالـي طياحـه ** اخير من قصر بن عسكر ومبناه
ان مت حطوني بوسط البياحـه ** قبري على درب المظاهير تاطاه

مويضي بنت زعيفر العتيبيه

كانت تعشق رجلا فرفضت الزواج لأنها تعتقد انه لايرغب الزواج بغيرها، ولكنها فوجئت

في اخر الأمر بنبأ زواجه من فتاة غيرها فعابت عليه عدم وفائه وأنشدت الأبيات التاليه تلومه :

ياسعود يوم أنك لحق العزيـب ** لاوهنيـك يالمقاطـي هنـيـاه

انتـه تدور لـك بكـار ذهيـب ** ونا ذهيبي ضايع وين ابا القـاه
اعوي توالى الليل كني صويـب ** كني صويب يسهر الناس بعواه
عيني تخايل كـل نجـم يغيـب ** الليل كله بس اهوجس بطريـاه
قالوا تطيب وقلت والله ماطيـب ** يافـري مولـع القلـب فريـاه
يفدى وليفي كـل قـرم تعيـب ** وشيوخ برقا كلهم مـن فدايـاه
ويفداه ابن هندي مجري الرعيب ** ولوكان شيخ والمراكيب تناصاه
ويفداه ابن سحمان سقم الحريب ** اللي نطالع ظلم مع درب شلفـاه
السود من عندي تنصا صحيـب ** اللي فهق حوضه وقدم ظمايـاه

هيا بنت عيادة الحربي

قالتها في مدح زوجها مبشر بن مرزوق المزيني الحربي الذي كان له

من صفات الكرم والجود الشيء الكثير رغم حالته المادية الضيقة

يامل عين ٍ حاربت سوجة الميل ** على عشيرٍ بالحشا شب ضـوّه

عليك ياللي طبخته نصفها هيل ** اللي سعى بالطيب من غير قوّه
المال ما طيّب عفون الرجاجيل ** والقل مايقصر براع المـروّه
يا عنك ماحس الرفاقة ولا قيل ** ذا مغثي ٍ ماينزل حول جـوّه
له عادة ٍ ينطح وجيه المقابيـل ** هذي فعوله بالمراجـل تفـوّه
أجواد نسل جيـل ٍ ورا جيـل ** الطيب فيهم من قديـم ٍ وتـوّه

شده بنت هملان الشمري

أحبت الشاعره رجلا من بني عمها حبا شديدا حتى أثر غرامها به على صحتها فمرضت

وهزل جسمها وأشرفت على الهلاك وراع أهلها ما أصابها فسألها أخوهاعيد عن سبب

انحطاط جسمها ومرضها الخفي فأجابته بقولها:

بي المرض الخفي ياعيـد ** اللي على الناس يدعابـه

ليا صار لك صاحب ٍ وبعيد ** وإلا عشيـرٍ إيعيـا بـه
أنا هوايه ماهو رعديـد ** قرم ٍعلى القـوم يعدابـه

احدى بنات السلقا من العمارات من عنزه.

وهي مجهوله .... تتغزل بحمود بن رميزان التميمى ..

يـازول أبويـه هـلا ياحمـود ** وان جيت من أقصى العرب عاني

يفداك أخويـه وابوي العـود ** واللي لنـا مـن العـرب دانـي
ويفداك مـن حـودروا للسـوق ** نجعـة هـيـازع وشمـلانـي
ويفـداك مـن علـق البـارود ** المـطـرفــي والمضيـانـي

وضحاء المشعان

وهذه الشاعرة من حرب عندما تتغزل بسعود البسيس وتجعل الناس فداء له ويقال

ان حبهما استمر عشرين عاماً وكان بنو عمها قد منعوها من الزواج منه ... تقول :

يا ونتي ونة قعـود الضعينـه ** ليا زفة المعصير واللي يحـده

لا ركبته خطو الهنوف الحزينة ** وقالت حلال القوم ماشي ٍ مشده
ويفداه من حط العصا في يمينه ** ويفداه من يركب بوسق الاشده
ويفداه من باب الحسا للمدينـه ** وماحده البحرين لقصور جـده

وقد ندمت على ذلك بان جعلت كل من ذكرت فداء له و تراجعت وقالت هذه الابيات:

قاف بنيته يالنشامـى غبينـة ** عسر عليه بالحواضر مـرده

هذا الهوى اهل الهوى عارفينة ** دايم على درب الرزالة يحـده

ولها ايضا

ياهيه انتم اهل البكار الضمر ** داروا عليهن ياهل العجلات

ردوا سلامي لو انتم من شمر ** ردوا سلامي لحامي الوندات
قولو عشيرك بالحديد يسمـر ** وانشهد انـه مـدرك مـوات
أنا اشهد انك ياسعود مقمـر ** تعطي هروج وتقفيـه زلات

وانشدت أيضا هذه القصيده في من تحب وهو من نفس القبيله ويدعى سعودالبسيس

عندما تقدم لاهلها بالزواج منها ومنعوه عيال عمها بسبب عادات التحجير وتقول

وضحا المشعان لفايز الفراج الذى كان ينهاها بعدم القصيد بمعشوقها :

يافايز الفراج قلب العنا ماج ** وتبينت باقصى الضماير فجوعه

عيني بها هزم ولاج ولواج ** عيني تنثر يالسنافي دموعه
تشبه لها غرب على جال هداج ** يوم السواني يالحبيب تزوعه
أقنب كما ذيب على جالهم داج ** اليا رفع صوته تعاوت ضلوعه
على عشير ما مشى درب الأعواج ** ولا هو من اللي قاصرات بتوعه
ما حطني يا محتمي الحرد مسهاج ** قوله صحيح وعايزات طبوعه
و الله ما انسى صاحبي يا بن فراج ** لو الشجر كله تصرم جذوعه

نزيلة الشمريه

من عقب ماني صايمه بس اصلي ** اعرضت انا من حر شي جرالـي

تسعين لحية كلهـم دنـوة لـي ** عوجان الالسن ذبحوهم قبالـى
مافيهـم اللـي ذل والا استذلـى ** ولافيهم اللـى يتقـي بالجبالـى
عيالنا بالشمـس ماهـم بظلـى ** وحريمنـا دجـن بليـا رجالـى

طفله بنت مشرف الجبلي الشمري

رغبت الشاعره بالزواج من أبن عمها شباط بن مرزل الجبلي ،فقالت هذه الأبيات

تعبيرا عما تكنه له من محبه حيث تمكن حبه من قلبها وأصبحت لا ترى له مثيلا

في البقاع التي تسكنها أو تنتقل إليها ولحبه العميق أحبت كل ما يمت إليه بصله

حبك بقلبي بنـى لـه سـور ** كان تفهـم العلـم وتطيعـي

وأمن الحسا إليا فريق اضمور ** معطـي بحبـك ولا بيـعـي
سمي خلي مضـى لـه دور ** قـبـل لـيـال المرابيـعـي

هدايه العطاويه

حين حالت المسافه بينهما وصعب عليها الوصول قالت:

قلبى كما شيهانةٍ بيضها فقش ** المحّ راح ولابقى الا قفوشه

وآصاحبي صيده دقاق المها العكش ** وله عادةٍ في كل ليلٍ يحوشه
والله يالولا الدرب من دونهم عفش ** ودرب الخلا ما ينوطي في عفوشه
لا فزّ فزّة واحدٍ موحي ٍ وقش ** يخاف من مخلاب شيٍ ينوشه

ضحيَّه الحماد

من شاعرات القصيم وبالتحديد رياض الخبرا تزوج زوجها ابراهيم الدواس من امرأه اخرى

ومال اليها كل الميل متناسيا عشرته مع زوجته الاولى .. فقالت له ناصحه:

لا تعاف العدِّ يجذبك الغديري ** والمطر مادام للي يشربونه

وكانت تقصد بذلك ان الغدير لا يوجد الا بموسم الامطار ولن يدوم لك كالعد وهو البئر دائما .

وحين حدث خلاف عائلي وكانت هي احد اطرافه قامت بأستشارة ابنائها

بهذه المشكله وكان لكل منهم رأيه فـقالت :

دوّاس ياجبرتي يامالي الغالـي ** ياما عيوني وراكم ماتردونـه

قال اصبري والزمن لا بد ميالي ** والنار تطفا الى قاموا يرشونـه
والا عبيّد وقفى وجه عذالي ** حلف وحرّم على امي ماتطبونه

وقالت تخاطب ابنها محمد :

محمد متى تكبر وتبني لي البيت ** والا تنهّج مع طريق الربوعـي

ابوك يشناني وانـا ماتردَّيـت ** ولا ضهته يوم سوق الدفوعـي

ايضا هذه شاعره من بني لام حين توفي زوجها وكان شجاعا

لا يريح مطيته من كثرة الغزو ,,, واخذت اخوه بعد وفاته ......
ولـــكــن ....... قالت !!!!

ينلاع قلبي كل ما اوحيت طرياه ** كما يلوع الطير شبك الحبايل

أخذت اخوه ابغى عوض ذاك منذاه ** البيت واحد من كبار الحمايل
الزول زوله والحلايا حلاياه ** والفعل ماهو فعل واف الخصايل

وهي اطول من ذلك .. واثبت زوجها لها العكس ثم مدحته بابيات اخرى

شاهة العبدالله العتيبيه

سكنت الزلفي و ألفت حياة الحضر فكرهت زوجها المطيري حسين الدويش

ورفضت ان ترجع معه للباديه فقالت تهجوه:

ياحسين مااحفينا عليك المراسيل ** ولا لك خطبنا يامروَّي السلايـل

ولابك على اولاد الجريسي تنافيل ** وساع الصحون مشعلين الفتايل

شعاع الاسلمي

عندما زوَّجها ابوها لبدوي رحال وكانت لاتريده

فأخذت تتوسل لوالدها قائله

لا يا يبه يا بعد حيي مع الميت ** إصبر علي لو كسوتي بالديوني

يا بوي من كثر المراحيل مليت ** البرد والمجهام زود جنوني
يا بوي في عمري شقيت وتشقيت ** يا بوي ماقوى للرحيل ارحمونى

مويضي البرازيه المطيريه

اللي يتوه الليل يرجي النهارا ** واللي يتوه القايلة من يقديه

و كانت مويضي تغني فأرسل الحاكم من يوبخها لعدم العودة مجدداً للغناء:

ياسّعد عينك بالطرب يالحمامه ** ياللي علىخضر الجرايد تغنين

عزي لعينك وان دراى بك سلامه ** خلاّك مثلي يا لحمامـه تونيـن
كسّر عظام يكسّـر الله عظامـه ** شوفي مضارب شوحطه بالجاجين
وأن كان ودك بالطرب والسلامـه ** عليك بالفرعه ديـار الوداعين

حصه العنزيه

تذكر جمال لحظات لقاء الحبيب في الخيال.... اما الواقع فلم يحدث

ياحلو رص الروح بالروح للروح ** متوالفيـنٍ كلـهـم لا بليـنـا

مالي بتفطين المحبين مصلـوح ** بالذكر والا عـن كـذا مادرينـا
قلته من نوع التماثيل وامـزوح ** مالى عشيـر ولالهـذا مشينـا
لوكان باب العشق للناس مفتوح ** نحمى شرفنا مع رجـال علينـا

بنت أبن رخيص من شمر

مات ابوها وباتت ترفض الزواج بحجة انها لاتريد الا رجلا بمعنى الكلمة

ويتحلى بالشجاعه فـارسلت هذه الأبيات لعمها)) شفاقة (( تقول :

يا راكب فـوق لحّاقـه ** حمرًا تقل واشعة دمي

اسلم وسلم على اشفاقة ** واللاش لايرسله يمـي
حلفت انا ما اخذ العاقة ** لو آكل العمر عند أمي
إلا لمن يحتمي الساقة ** لا درهم الجيش وألتمي

الشاعره مداهن في رثاء زوجها

وهذه شاعرة اخرى مجهوله ترثي اهلها وتقول :

هنيكم يااهـل القلـوب المريحـه ** ماالوم عيني لو جرى دمعهـا دم

ابكي هلي أهل الدلال المليحه ** اخواني اللي اذا بغوا لازم تم
يالعبد هاذي من حكايا الفضيحه ** خل السهر لي وانت يالعبد قم نم
من أول نأمر تجيب الذبيحه ** واليوم ياعصر الندم صرت لي عم

وقالت شاعره مجهوله

كان أنت في دو الخلا تمتنيني ** فأنا تراني كل يوم أتمناك

وإن كان بالخافي تجر الونيني ** ونيني أكثر نعنبو بطنن أضناك
حبك حرم عن كثرة النوم عيني ** ريفي مراعاتك وشفي بطرياك
لا عادعرف ٍ صار بينك وبيني ** أخاف حبك يوردنى حبل الإدراك

ولها ايضا

قصيده تتراجع فيها عن الحب بعد كبر سنها:

طرد الهوى عقّلت دونه ركابي ** لو كـان ماعلقتهـن ياصلنـه

ادور الغفران باتلـى شبابـي ** والاّ اوله قد فات مافيـه جنـه
الحب في ماضي شبابي سطابي ** لزوم تظهر شارته لـو نكنـه
يدريبه اللي صايبه ماجرابي ** يابين شاراته على اللي مشنّـه

بويتله الروقيه

تتخيل منازل اهلها وتحن اليها:

عديت رأس (جويّ) وقت الغطاليس ** واشوف شوف مايشفونه الجـن

اشوف عفر حسين مثل المقابيس ** وهو يلاوي مهرته مابعـد عـن
واشوف في نجد طوال النسانيس ** واوحي الحوير يرضع امه بعد حن
واشوف جربوع تطقّـه قرانيـس ** عني على قدّ النويـع اذا اهـون

وشاعرة رأت من زوجها مالايعجبها فقالت:

ياشوق ماتطلقن واجـزاك ** عـدك بنـا عامـل طيبـى

يوم اني عيني تبي لامـاك ** ماطعت انـاكـل خطيّبـى
واليوم عيني تبـي فرقـاك ** دايم دموعي علـى جيبـي
تلقى العوض عاشقه تشهاك ** والقى عشيـر يهلـي بـي

كنه الشمريه

وتقول مخاطبة اهلها:

لعيون من قال لعيونـه ** يجري اخلاف الردّيّـات

هذاك يابـوي مادونـه ** لو المواشـي قليـلات
ليا درهم الجيش ينخونه ** يوم الركايـب حفيـات

وتقول يوم عاد الغزو ولاكن لم ترى زوجها عبدالله؟

يهـل الركايـب ويـن عبـدالله ** لاوالله اللي غدا بالكون رجالـي

يبكي عليه الصحن والنجر والدله ** وتبكيه رملا عجوز مالها والـي
وتبكيه حمرا نهار الكون منتلـه ** يوم اشهب الملح غاد ٍ له تزلزالي
ياقلب اصبر على ماجا مـن الله ** كم واحد لاعته بقعا وهو غالـي

وقالت ايضا :

باقي العرب موتهم تخفيف ** مار البلا مـوت عبـدالله

مرحوم يا مهلي بالضيف ** يامكثـرالهيـل بالدلـه
إذا مسك زينة التوصيـف ** الدم من مضربـه شلـه
ياما صفقهن ووردن عيف ** وياما حمـى كـل منتلـه

يتبع......

نوره بنت هطيل الشمريه

نوره بنت هطيل بن خالد الزريقي من العطون من الجعفر من شمر ,,,,

كانت مع ابل والدها ومروا عليها اهل ركايب واسالوها عن اهلها وقالوا يمكن صلبه !! فقالت هذه القصيده:-

يايبه أهل الركايـب نشدونـي ** حش قلبي يوم قالوا ياصلبيـه

لعن ابوكم بحروا وسم العطوني ** لعن ابوكم والله اني ضيغميـه

كانكم بالوسم واهله تجهلونـي ** نوخوهن عند حامـي الونيـه
يالركايب لاتهجـن بالعفونـي ** ياحسيف فدكن كـل ضحويـه
والله لنشد عنكم ياما تعرفوني ** ماركب ركابكـم كـود الدهيـه
كلمة الحقران علي ما تهونـي ** ماني من صليب واصلي شمريه
الضياغم عزوتي مايرحمونـي ** يوم جلب الروح باسواق المنيه

صالحه العيسانيه العتيبيه

رات أخاها (غازي) وقد بانت عليه امارات عشق احدى الفتيات وكان ينشد قائلا...

يامرحبا ياللي على بيتنـا مـر ** رد السلام ولامعي فيـه حيلـه

يامرحبا عدة حصى كشب واكثر ** وعدد جراد طاير مـن مقيلـه

ياحلو زوله يوم لبس المشجر ** ياطى بمصبوب القدم في شليله

فلامته أخته (صالحه) في هذه الأبيات....

انهاك ياغازي عن الحب الأقشـر ** انهاك عن درب الهوى وتغديلـه

خل الهوى يامال جـوع المجـدر ** ترى الهوى ماهو خطاة الحليلـه

ترى الهوى حسك الوبر حلوة الدر ** ليـا بركـن حيرانهـا بالسليلـه
ترى الهوى رمح على حارك اشقر ** اللي على الركاب يكسر شليلـه
ترى الهوى عزمة ركيب الى مر ** عن بيت خمع ماينشـط مقيلـه
خل الشحم والسمن للربـع يكثـر ** مع منسف داف عليهـم تشيلـه
من ضيننا والا فضيـن المتجـر ** عطهم ثمنهـا نقـد والا محيلـه
ماهي ببنت اللي نعوله لهـا كـر ** اللي على متنه مدافـق صميلـه

هيـا الحربيه

هيّـا بنت عياده الرشق من بني سالم من حرب متزوجة من رجل فقير وفي يوم تخاصم مع والدها

وأخذها من زوجها دون رضاها وفي احد الأيام قالت هذه الأبيات فسمعها والدها فأعادها لزوجها

يا مل عين ما اهتنت نومة الليل ** على عشير ٍبالحشا شب ضـوه

عليك ياللي طبخته نصها هيـل ** اللي سعى بالطيب من غير قوه

المال ماطيّب عفون الرجاجيـل ** والقل مانقص بـراع المـروه
رجال ماحس الرفاقـه ولاقيـل ** ذا موذي ٍمايانّزل حـول جـوه
وله عادة ٍينطح وجيه المقابيـل ** هذي فعولـه بالمراجـل تفـوه
أجواد نسل أجواد جيل وراء جيل ** الطيب فيهم من قديـم ٍ وتـوه

موضي العبيدي

قصة موضي العبيدي شاعرة الكويت التي عاشت في النصف الثاني منالقرن الماضي

والنصف الاول من القرن الحالي في زمن الشيخ مبارك الكبير وحياة هذه الشاعره في حزن

وبؤس دائم بسبب فقدانها لأبنيها، أحدهم أخذه البحر منها والثاني تكفلت به الصحراء. ابنها

الأكبر عبدالعزيز فقد في رحلة الغوص حين غرق في قاع البحرأثناء بحثه عن اللؤلؤ ويوم

رجوع السفن للكويت كانت تنتظر على الشاطئ حالها كحال كل اهالي الكويت لأستقبال البحاره

تنتظر ابنها ولم يطل الانتظار فقد رأت النوخذه يوسف الفهد وعندما جاءت تسأله حتى بادرها

أحد البحارة بالخبر المحزن وقالت ترثي ابنها بهذي الأبيات :

يابو سعد عزي لمن ضاعت أرياه ** قلبه حزين ودمع عينـه يهلـي

يسهر طوال الليل والنوم ماجـاه ** في مرقـده كنـه بنـاره يملـي

على وليف عذب الحـال فرقـاه ** الطيـب اللـي للرفاقـه يهلـي
مدري درادير أزرق المـوج ودّاه ** والا كلاه الحـوت ياكبـر غلـي
ياليتنـي دميـت بالهيـر ويـاه ** موج البحر فوقي وفوقـه يزلـي
الله يسود وجه يوسف وجـزواه ** ماذكر دمعي وسط حوشه يهلـي
جتني هدومه بعد عينه مطـواه ** لاوفق الله محمـل جابهـن لـي
ليته ورا سيلان والهنـد مربـاه ** وأرجي يجيبه لي شراع معلـي
البندق اللي عندنـا لـه مخبـاه ** نقّالهـا عقبـه عينـه يـولـي
وصلاة ربي عد ماحـل طريـاه ** وأعداد ماسار القلـم بالسجلـي

وبعد مرورخمس سنوات على فقدان ابنها الاول كان ابنها الثاني مع الشيخ مبارك في حرب

الصريف وكانت تنتظر رجوع الأبن لكن قرينيس الرشيدى احد رجال الشيخ مبارك كان اول

العائدين ونقل لها خبر مقتل الأبن واشتعلت النار مره ثانية ورثته بهذي القصيدة :

قلت آه من علم ٍ لفا بـه قرينيـس ** ياليت منهـو ميـت ما درابـه

علم لفا به مرس القلـب تمريـس ** والنار عجت في الضمير التهابـه

والنو ماله عن موق عيني حراريس ** والحنظـل الممـزوج زاد بشرابـه
علي الذي قفا على ضمر العيـس ** واليوم ما أدري وين حد لفـا بـه
نصيت بيته قلـت لـه ياقرينيـس ** وين الحبيب وقـال ماعلمنـا بـه
اقفى مع البيرق بحرب السناعيـس ** وان سلمـه رب المخاليـق جابـه
رديت من كثر البكاء والهواجيـس ** دمعي كما وبل نشاء مـن سحابـه
يـاالله يافكـاك حبـل المحابيـس ** تفـك لـي محمـد مـن صوابـه
بجاه محمـد ويعقـوب وادريـس ** عسى طلبتي عنـد ربـي مجابـه
واعداد ماهبت هبـوب النسانيـس ** على النبي صليت هو والصحابـه

مرسا العطاوية

وتقول الشاعرة عندما تزوجت برجل من الحاضرة وفقدت نسيم الصحراء العليل وبيوت الشعر

ومساريح الأبل وشاهدت يوماً من الأيام أهل ركايب مروا بها في طريقهم إلى البادية

لاوهنيك بالهنا يابـو مـرداس ** مالوّعوك مدرهميـن المطيـه

القلب كنه يشرعونه بالأمواس ** منطين حضرٍ حوطوا به عليه

لاوهني من نط مزبور الأطعاس ** ومتع نظر عينه بنجد العذيـه

ولها ايضا :

ياجر قلبي جر غـرب علـى بيـر ** على ثـلاث ابكـار فيهـن زرقـا

ساعة يصبنه الـى هـن محاديـر ** تحرفـن ابسـرع والغـرب يرقـا

ويالجتي لجت ثلاث علـى ضيـر ** اكبودهن من حر الاخـلاج حرقـا
على ولدهن باختـلاف المقاهيـر ** لاعشوا الروقه على سـرح برقـا
عليك يامطلق صخاف المعاشيـر ** يوم المناسر تالـي الليـل شرقـا
الى شبت النيران مثـل الفنانيـر ** يضوي عليهن يدرق البيت درقـا
هرجه على كبدي حليب المصاغير ** وهرج العرب غيره على الكبد عرقا

حجت الشاعرة مرسا وسمعت بائع اللبن بمكة ينادي بأعلى صوته ( لبن لبن ) وعلمت أنه يبيعه

للناس فاستغربت أن يباع اللبن لأنها لم تعرف أنه يباع بل يعطى للطارق بلا ثمن لذلك سموا الإبل

بعطايا الله فيعطون من لبنها لخلق الله ممن مر عليهم في بلادهم فقالت :

ياللي تنادي باللبن مـا لنـا فيـه ** عان اللبن في سد عبلـة مـلاوي

خشم الي نوفي والحور بـارك فيـه ** مـرب خلفـات عليهـا العطـاوي

ومبهل وأبا الحيران كان أنت غاويه ** مرتاع بـدو مـا تلاهـم شـواوي
ووادي الجرير إلى حدر من علاويه ** وخشم الذنيبه والجذيب متسـاوي
ترى الدعيك هوالحفايـر حراويـه ** مربـاع خلفـات تـرب المطـاوي
تلقا مصلحة الدبـش كلهـم فيـه ** بالرجـع اللـي يذبحـن الهـواوي
وربعي ليا جاهـا المجنـي تلفيـه ** ريف الضيوف مزبنيـن الجـلاوي
كل جواده مع نحـي الـذود تتليـه ** علط الرقـاب معربـات العـلاوي

قمرا المرهوصه الدعجانيه

ياونتٍ ماسمعهـا النـاس وأهلـي ** ماسمعها غير الولـي يـوم ونيـت

على عشيرٍ يـوم مـد القـدح لـي ** بكا وقال إني على الهجـن شديـت

قفا ودمعـي فـوق خـدي يهلـي ** ماحدٍ يعوض عنه بالحـي والميـت
من عقبه امشي مل مشي الدبح لي ** وزرت رجولـي لاتودينـي البيـت
وزرا لساني عن محاكيـك يسلـي ** وزرت عيوني عن مراعاك واغضيت

وقالت ايضاً :

الفدغمي عني هل الجيـش ودوه ** أقفا ودمعي فوق خـدي سفايـح

عليه وجدي وجد شالح على أخوه ** يزعج عليه من البكـا والنوايـح

حطوه في قبرٍ وحيـشٍ وخلـوه ** تحت الثرا ركزت عليه الصفايـح
أو وجد من ربعه على الجال حدوه ** أونس من الربع القريبين جايـح
خلي بعيـد والمداويـر ماجـوه ** عسا على داره تهـل المراويـح
تسقي تراب اللي على الطيب ربوه ** أهل المـروه كاسبيـن المدايـح

ولها ايضا :

البارحة جفني سرا الليل مابات ** سهرت لين النجـوم احدبنـي

عقب الذي ودنه الصيعريـات ** متى علينـا ياهلـي ينكفنـي

ولها:

وجدي على شوفة زبون المقاصير ** وجد المريض اللي علاجه تعصـا

راع الـدلال المتعبـات المباهيـر ** ريف الضيوف اللي لبيته تنصـا

ولها:

ياطير سلملي على متعب النيـب ** طلق الحجاج اللي يحفظ الوداعه

اللي ضيوفه وسط بيته محاضيب ** مارافق إلا كاسبيـن الشجاعـه

ولها:

يامن لقلبٍ كل ماجيـت اداريـه ** ويليه من بين الضماير يزوعـي

زوعة خفوق الطير لاعاف راعيه ** وعانق غرانيق غدن له اولوعي

ولـن مسباقـه جديـد مسويـه ** تله وراح السبق بيده امزوعـي

ولها :

يامرحبا فـي طـارشٍ سـاع ملفـا ** ترحيباً أحلى من لبـن حـم الأوراك

ابكار يرعاً من زهـر نبـت حلفـا ** يرعن من الحلفا ويرعن من الـراك

ودي عليك اشكي الجفا عقب ولفـا ** من غيرك اشكيله الى أونست عجفاك

ولها هذه القصيدة تخاطب ابن عمها :

إن كان قلبك بايـنٍ بـه رقومـي ** امسح على القصة وتبرا مكاويـه

وانظر لردف مل شـط الردومـي ** وثليل اشقر فوق الأمتان كاسيـه

مرخوص مني في جميع العلومي ** الا الجسد واللمس خلـه لراعيـه
خله لمن ينطـح كبيـر اللزومـي ** اللي يعرف الحق والفرض يديـه
وإما أنت عندي غالياً ومحشومي ** وادرا حساب الرب عن شن اسويه

ولها هذه القصيده التاليه :

ياقلب ياللي كل ماقلت له أنهاد ** عاده بلاه اللي من العام يقزيـه

يالعين وان زاد العنا والسهر كاد ** اللي بقا من تالي الدمع هاتيـه

على عشيرٍ شاف طلعه بالأبعـاد ** لاهوب زيراني وأنا مقدر أرجيه
ياليت ساعة بالنظر يمنـا عـاد ** أبادل الأفكار بالـراي وأعطيـه
صحيح ماقالوا قديمين الأجـواد ** كلٍ يدافع دون عرضه وعانيـه
لعل عنوانه على روس الأشهاد ** ومن موقف الحقران ربي ينجيه
ياونتي ونـة خفـا كونهـا زاد ** ماظن تبرا من فـؤادي مكاويـه
رضيت في نفعه على كيف ماراد ** لاشك حظـه قاصـراتٍ مداليـه
حظه ربوضٍ يوم كسبات الأفواد ** طير السعد عيا نصيبه يباريـه
من لايزيده رازق الناس مـازاد ** عيا يوافقني عسـا الله يدنيـه

ولها هذه القصيدة التي اشتهرت بينالأوساط الشعبيه وقد سببت للشاعرة قصة ظريفه مع امير الجبل .

يامل قلب ٍمن هـوى زيـد مطـروق ** طـرق الحديـد ملـيـن بالضـويـا

أمسيت قلبي في وأصبحـت مسـروق ** وثـورت فـي قلبـي عميـلٍ وعيـا

يفدا عشيـري كـل برقـا مـع
روق ** واللـي بعيـد الـدار واللـي هنـيـا
ويفداه من يمشي على الأرض من فوق ** واللـي يشوفـون القمـر والثـريـا
ويفداه حضرٍ لجـوا العصـر بالسـوق ** وابن رشيد اللي علـى الحكـم عيـا

وقالوا لابن رشيد : سبتك اذبحها !!

قال : ماسبتنى مدحتنى!!

قرينيه بنت فاضل

وهنا الشاعره تتوجد على حبيبها في الاسر:

فريّت واشورف الضلعان ** فرّيت من بين خلق الله

انشد عن الارجح الدّيقان ** هو حـيّ والا نهـج لله

اللوم كلّه على دغيمـان ** وحمود ومدغم وعبدالله
خلّوه في ديرة الشجعان ** بنحور ربع لهـم غلّـه

ولها ايضا :

متى عل الله يهبّ الهيـف ** يومي بعشـب الزماليقـي

اذانزلنا ليالـي الصيـف ** يملا النظر شوف عشّيقـي

لو يذبحوني هلي بالسيـف ** حلفت لاسقيه مـن ريقـي
على النقا مبسمي ماشيـف ** مافتّشـوه العشاشيـقـي
قلته على المزح والتوصيف ** تفضاة بال عـن الضيقـي

وشاعره اخرى تقول في رجل عشقته:

ماتهارجن كود بعيونـك ** اهرج وهرجك على بالي

ان كان اهيلك يعذلونـك ** انا ترى السيف يحنى لي

ياليت من جوّد ردونـك ** من قبل قصاف الاجالـى

مريفه السليطيه

ياهذب ودّعني ترى الموت جاني ** من مبسم كن العسل بين اشافيه

انا ذبحني واحـد مـن ادانـي ** العفو كيف الخال يذبح بناخيـه

عشيبه بنت دغيم السليطيه

واخانة القلـب ياعمّـي ** عن لذة النـوم قزانـي

ياعيد لونقّعـوا دمـي ** مانساك كود انت تنساني

وضحا بنت السلات

لولا الحيا ياناس لالحف ذلوله ** الحف ذلوله عن ذواري الهبايب

من بعد سجّ البيد جات معلوله ** لكنهـا مسقـاة السّـم رايـب

زوله جميل وغير زوله فعولـه ** لاحلّ باطراف السرايا نهايـب

في قرية الجهراء التي تبعد عن العلا 130كم شرقاًعلى تقاطع طريق حائل العلا المدينة تبوك

هناك جبل يسمى ( برد ) تزوج شخص ابنة عمه وجميعهم شعراء، وحدث خلاف بينهم وطلبت

الطلاق منه، فقال طيب ولكن حتى يصغر برد، فردت عليه بهذه القصيدة منها :

يا برد ما تسمّح النيـة ** لعاد أنا وأنت بجهادي

والشوق حطك وعد ليّه ** وأشوفك بالكبر مزدادي

تزوجت امرأءة في قبيلة غير قبيلتها وكان اخوها يريد سرقه قوم زوجها وجاء ليلة قرب

الحي فعوى كما يعوي الذئب فعرفته اخته وقالت تدله على مكان الابل :

يا ذيب لا تبعدك عنا المخافـه ** وتطرد الغزلان في القفر يا ذيب

البل تراها يم قصـر النهابـه ** ما عندها الا لاعب الحل يا ذيب

فسمعتها عجوز وضنت ان الرجل صاحبها فقالت العجوز:

الذيب لا يعلق صوابـك بنابـه ** ترى صواب الذيب ماله تطابيب

فردت المرأة

وحياة ابويه ما بدا من شبابـه ** اني عذيّه ما دخل جيبي العيب

واني كما عدٍ غـذي ٍ شرابـه ** ما داهله بالقيظ حرش العراقيب

يتبع ...

وهذه مساجله بين صمد بن نقا الروقي وزوجته منيره


يقول صمد:

تكفين يا بنت الأجاويد تكفيـن ** تعيّني للعـود عنـدك وسـاده

العود وده بالتطـرف نهاريـن ** لو انها ماهـي للعـود عـاده
والا اكتبيها في رقبتي تجيدين ** لين ان يأتينا ربيـع وسعـاده

فردت عليه زوجته منيره

العام تبغى لك من البيض ثنتيـن ** ايضا وتبغى لك عليهـن زيـاده

العود لا منه وصل سـن ستيـن ** يروح مخه مثـل مـخ الجـراده
لا يقضي الحاجه ولا يقضي الدين ** ولا عاد تقبل منه حتي الشهـاده

جُريّه بنت صويلح المحقنيه العتيبيه


سافر اخوها واشتاقت له وقالت :

الليله امسى داخل القلب هوجاس ** هوجاس والهوجاس حرّق عليـه

يقوله اللي ما مشى درب الأدناس ** ولا قلبوه اهـل العمـال الرديّـه
واجر قلبي يا جمل جرالامـراس ** جر المرس من قاعـة العيلميـه
واخويه اللي حال من دونه اليأس ** ما عاد توصلنيـه صفـرا ثنيّـه
اقفوا به الحكام قطّاعـة الـراس ** يا جعلها للحي مـا هـي بِنِيًّـه

وضحا العبدالله


من بادية السر فى وسط نجد تتغزل فى معشوقها ابن دويرج فتقول:

البارحـة عديـت بالمستقـلـه ** في راس مزمومٍ طويل البياحـي

يايوه عزينـي بـدا فـيّ خلـه ** سدي على بعض المخاليق باحي
من يم قصر دويرج مدهـل لـه ** غليـمٍ ينقـل جديـد السلاحـي
اهلي مع اهله كلهـم فـدوةٍ لـه ** يفدونه الفرسان واهل المناحـي
والله يا لولا الخوف وادرى المذله ** لا حط له بين النواهـد مراحـي

هيا الطلال

السد باح وبان ما اخفيت كلـه ** ما ينجحد شيٍ على الناس باحي

على الذي ياخذ على الخيل عله ** تكسرت عنده طويل الرماحـي
والله يا لولا اللوم وادرى المذله ** لاحط لي بين النصايب مراحـي
وابني عليه البيت كله رضاً له ** واذبح على قبره ردوم اللقاحـي
الفٍ صباح الخير والفٍ مساًله ** والفين ما بين المسا والصباحي
لعل من هو لامنـي فـدوةٍ لـه ** ولعلهم ذلفة هبـوب الرياحـي

وضحا الجنفاوي

انحت رحاك وخل عنك القهـاوي ** شبابها بـا يسـر سنـام دفنـاه

اللـي لدقـة نجرهـا مايـداوي ** من حيث ضامين الشواريب تنصاه
اللي ليا جوا مضمريـن ومقـاوي ** يلقونهـا قبـل يجونـه مسـواه
ماهو على كيف النشاما غـلاوي ** بشريه لو هو بالثمن زاد مشـراه

نفلا المسرديه القحطانيه

ابا ارفع صميل القرم حامي عقاب القود ** اربـه إذا مـاراح يذكـر معازيـبـه

من خوفتي يظمى ليا درهـم الجلعـود ** ليا عرضوهن تختـخ عـاوي ٍ ذيبـه
وحالي عليهم مثل حال ازرق مضهـود ** وزادوا على حمله وكثـرت شواذيبـه
الله علـى مـاراك ياصاحبـي وتعـود ** متى عوض الانضا من جنوب تلفي به

الاميره نوره الرشيد

ابكي هلي اهل العلـوم المليحـه ** ولا لوم عيني لو جرا دمعهـا دم

اخواني ابكي والقصور الفليحـه ** اخواني اللي لا بغوا لازمـن تـم
ياما انتخوا باسمي ليا حل صيحه ** اليا انتخوا بي كافر الجن يسلـم
اسمي كما نجم ضرب قاع بيحـه ** او الصواقع يوم للضلـع ترجـم
نوره انا اخت الشيوخ الفليحـه ** ابوي حاكم واخوتي صفوة الجم
ياحيف حايل فارقن ريح شيحـه ** بذيك الشفايا ماتقل ريحها شم

صيتة التميميه


صيتة وكانت معجبة بأشعار سرور الاطرش فعشقته قبل أن تراه وصارت تنظم في حبه الاشعار


ومن ذلك قولها:

تقول صيتة واعيوني سهيـرة ** أنا عيوني عن كرى النوم شرّاد

شفّي سرور ولا تمنيت غيـره ** على النقا ما يلحقن كـل نقّـاد
قلبي كما بيـر ٍتزايـد حفيـره ** ذولي مصادير ٍ وذوليـك ورّاد
يا ما حلا شوف العشير لعشيره ** لا صار ما جا بين الاثنين ميعاد

وقالت فيه أيضا:

انا بـوادي الـرس داري ظليلـة ** وصويحبي يتلي المها بالصواهيد

ليته الا صاد المها عنـه اشيلـه ** أشيل انا عن صاحبي جملة الصيد
شفي سـرور ولا اتمنـى بديلـه ** عليه ضيّعـت الحيـا والمناقيـد
من لامني يلهـم دقـاق النثيلـة ** والا يطقّ بهامته نايـف الحَيـد

غزية العنزية

يحكي ان بنت عقاب العواجي العنزي وتدعى ( غزية ) فقدت أهلها ولجأت الى عمها وكان له


أبن أحبته ، فسافر في طلب الرزق مع صاحبه يدعى( عيـد ) فتغيبا قرابة الثلاث سنوات ثم


رجع عيـد وحده وكان بالحي رجل غريب يريدالزواج من هذي الفتاة غزية لكنه يعلم انها


سترفض طلبه لحبها لأبن عمها . وقابل عيـدوقال له لك عندي جمل ان اشعت ان ابن


عم غزية قد توفي .. لعلها تتزوجني بعد ان تأيسمنه فلبى طلبه وأشاع الخبر فلما


سمعت بالخبر غزية أنشدت الابيات التاليه :

تعززوا للـي عشيـره تنـوى ** يم الشمال وحط حوران دونـه

أقفى وخـلا لـه يتيـم يلـوى ** واليه عمام ليتهـم يرحمونـه
فات الربيع وعشب الاجراد لوى ** واخانة الطرشـان مايذكرونـه
ياعيد اسالك بالولي كيف سوى ** هو ميت وألا اهلـه يرتجونـه

فأجابها عيـد :

يابنت شوقك خابره ويش سـوى ** بالموس قصوا لك قصايب قرونه

أتلى الخبر به يوم قبـره يسـوى ** وخـام جديـد بينهـم يذرعونـه
وعلمي برواي العرب يـوم روى ** بايسر ( نوى ) علمي بهم يدفنونه

وقيل أنها ماتت حزناً على ابن عمها بعد سماع شعرعيــد ولما عاد أبن عمها وسمع بالخبر وبما فعل


عيــد بأشاعته وماتت غزية بسببه قتل عيـــد جزاء بفعلته .

عجايب الخريشا الصخريه


هذه القصيده للشاعره عجايب الخريشا وقالت هذهالقصيده عندما حضر اشخاص لخطبتها واختارت


ولد عمها سليمان حنيف الخريشا

قالت عجايب بنت مروي شبا الزان ** حيث ان ابوي ناشدن عـن خوالـي

ابوي فكاك الضعـن يـوم الاكـوان ** واخـوي حمـاي البكـار المتالـي
ما أريد انا باشا حلب وابن شعـلان ** مانـي حليلتهـم ولاهـم ارجالـي
ولااريد انا الجربا ولو ساق الاضعان ** ولو جاب غرسات الحسا للشمالـي
أريد انـا ولـد الخريشـا سليمـان ** ذبـاح طوابيـر العساكـر أقبالـي

شاعره من المحينات من عنزه


شاعره من المحينات من عنزه كانت ترعى ابل اهلها فتعبت وتمنت لو اغار


عليها (دبي النجباني الشمري) وياخد الحلال لكي ترتاح من رعي الابل فتقول :

يا شين ما تويق يادبـي ** على المحينات لك نوبـه

ماتشوف انا الزمـل عذب بـي ** هياج ٍ والهجـر عيوا بـه
خل المخابيـط تشتبـي ** والخيل والجيش له شوبه

الشاعره ذكر العنزيه


ذكر العنزيه تنخى اخوها لفعل المكارم وتقول له :

توي لقيت الهجن باكوارهن كيـف ** باكوارهن ينسى هـوى كـل غالـي

ياراكبيـن اكـوار حيـل مواجيـف ** حرايـر يزهـن جديـد الـدلالـي
حزة طلوع سهيل دنـوا شواحيـف ** يا اهل النضا خوذا سواهيـج بالـي
لاطالت الفرجه يجيهـن زعانيـف ** حيـل يجفلهـن سمـار الظلالـي
لاصدرن من مـارد عدهـن عيـف ** بوسوطهن ما احلا وسوم الحبالـي
يجفلن من قمع الحجار المشاريـف ** مثل النعـام اللـي حـداه الجفالـي
يلفن رباع اللي يهلـون بالضيـف ** مقلطة للضيـف مـن كـل غالـي
دلال كما الغربـان سـود مهاديـف ** من كثر ماهـي للسعايـر تصالـي
يا خوي وش ملهيك عن ديرة الريف ** والختـم تا***ـه عفـون الرجالـي
عوايدك تروي بها شـذرة السيـف ** يا زين حسك في عقـاب التوالـي

نفلا الشعلان


تزوجت نفلا بنت ابن شعلان الامير محمد بن احمدالسديري

يا محمد عقب الغلا وش جاك ** وشغير المذهـب الزينـي

كان انت زعل ٍ علي ارضاك ** من شانك امشي على عينـي
يوم ان قلبـي بغـى لامـاك ** حرمـت كـل الشعاليـنـي
واليوم بينـت لـي جفـواك ** تمرنـي مــا تحاكيـنـي

وتقول ايضا :

يا محمد صبري على شانك ** ومقابل الحضر يـا خلـي

ينفعنـي اقفـاك واقبالـك ** حيث ان شوفك ربيع ٍ لـي
واشوف ماني على بالـك ** منعقب يومين تفطن لي

فضه الحمود العنزيه


الشاعره فضه الحمود العنزيه سمعت ان شاعر يقالله ابو حمود المطيري

قال قصيدة هجاء في احدى النساء فقالت تدافع عنها :

يا ابو حمود ادمح الزلات ** واللي بقا يـاالله التوبـه

حنا علينـا بها مـدارات ** والا الرجل ينقـل عيوبـه
تراك ابو غوش وبنيـات ** وادر المناقيـد وعقوبـه
عرضتهن هرجة الشينات ** شبن على الكبـد لاهوبـه
ما اثني كلامي عقب مافات ** هرج القضا ويش ماجوبه

رحلت فضه الحمود مع زوجها الى مدينة طريف فلم يطيب لها المقام، فقالت :

لا عاد يومٍ نزلـت طريـف ** زود همومـي وغربـالـي

اطلب عسى ديرتي للريـف ** وديـار شوقـي للامحالـي
لوكان هم يكرمون الضيـف ** ماديار خلي علـى بالـي
القلب به مثل مسطى السيف ** ما اجرح شفيقٍ على بالـي

حصه العنزيه


الشاعره حصه العنزيه تهجو فتياناً من قومها لم يتحملو المشقه

والتعب في كسب الرزق فتقول :

يا عيال يا طول عنوتكم ** نصف الشهر ما تمضونه

خسارةٍ بـس روحتكـم ** مع راعي (الفرت) تتلونه
جيتوا وهـي ماتحرتكـم ** ترجي الفوايد تجيبونـه
حصيلكم بـس كروتكـم ** والزود للشوق صابونـه

زوجة عمعوم الرويلي


زوجة عمعوم الرويلي تنصحه عن شرب الدخان وتقول :

عمعوم لا تشرب من التتن مـره ** احذر ترى شربك من التتن يدمرك

عندك مجاهيم تقـل لـون حـره ** وبيتٍ كبير وضامر البطن ينحرك
ومهيـرةٍ بنـت العبيـه نـبـره ** ومشلشلٍ عود البلنزا على ظهرك
وخطو الولد لو جاك مابه مسـره ** اللي اليا كبرت علابيـه وخـرك
ان كان ربي ناويـن لـك مسـره ** انزل لك اسباب الأقـدار واظهـرك
وان كان ربي ناوين لـك مضـره ** لو كنت في عالي الشخانيب حدرك

نوره الحمود الظفيريه

يالله ياعـالـم ماقـلـت ** تفـرج لحـال الظفيريـه

ليا قيل هل العمر حزنـت ** هاذي سواة العمـر فيـه

انا بطرد الهوى غربلـت ** غربال يوسف وانـا حيـه
لولا معي من عشيري بنت ** عانقت من هو ضرب نيه
دام اللحد ما حفر ودفنـت ** انـا بخـلـي رجـاويـه
البلد سالت وانا ما سلـت ** دايـم عيونـي شقاويـه

هذه القصة اختلف الرواة فيها فمن الرواة من نسبها للشيخ مشعان بن هذال ومنهم من نسبها

للشيخ عبدالله بن هذال وتتلخص في أنه كان يشرب الدخان (التنباك) وكانت زوجته تتضايق من

رائحة التبغ وذات مرة وهي جالسة لوحدها عبرت عن رأيها في الدخان بقولها هذا البيت الذي

بدأت تترنم به في بيتها وهي لا تدري معتقدةً أن لا أحد يسمعها حيث قالت:

يا شارب التنباك شاربك لا طال ** اياك وإيـا واحـدٍ جـاز دونـه

مادام به نقصٍ على الحال والمال ** ايضا وشرّابـه يدمّـر سنونـه

فوقع هذا البيت على أسماع زوجها فنهرها والغضب يتقـد في عينيه بقوله: ماذا تقولين ؟

فاستدركت ذلك وأردفت قائلة :

شرّابة التنباك فيهم سعة بال ** واللي طويلٍ شاربه يقصرونه

يستاهل التنباك مثل ابن هذال ** اللي يصرّه في مثاني ردونه

لولوه العبدالرحمن الفهيد

شاعرة من اهل العين تحث زوجها بالمشاركه بالمعركه مع قومها وبمساعده جيرانهم قبيله مطير

ضد سند الربع الذى غزاهم واخذ حلاهم فتعذر بالمرض فهجته قائله :

صاح الصياح ومن على السطح طليت ** واشوف شوقي مع جلوس العـذارى

أشوف شوقي جالس بأوسط البيـت ** مامـرة يفـزع عـطـاه الكـسـارا

النفس شامت عنه واقسمـت واليـت ** رزقي على المعبـود مغنـي الفقـارا
شفي مع المطران كسابـة الصيـت ** عيال الفهود أهـل المهـار السكـارا
فكـوا قصيرتهـم قـرارا بتثبـيـت ** بعريـق بلعـوم ارخصـوا للعمـارا
سند وقع مـن بينهـم طايـح ميـت ** واللي سلم منهم على الوجـه نـارا

ساره الهليل

ساره الهليل تزوجت رجلا مكثت عنده مده ثم نشزت عنه كارهه له

وقالت تهجوه :

خطو الولد يزعـل اذا ماتعشـى ** ويضحك اذا ان ملا بطنـه الـزاد

ماتلتلنـه مبـعـداة المعـشـى ** ماجرب الغربـه ولامـرة ٍ فـاد

لاواحسايف جيبى اللـى تنشـى ** وارخصت له فيما مضى كل ماراد

سوده من بنى رشيد

كان لها زوج يسمى بن ملهاب وكانت تحبه كثيرا ولكن اخاها يكرهه اقسم عليها بان

تقاطعه فأطاعت امر اخيها كارهه مجبوره وذات يوم مر بها زوجها وسلم عليها فقالت له :

ياصاحبي جنّب عن الدرب لاهنت ** ترى ماهي بعلومك الماضياتـي

اقسمت لك بالله ماقط لك خنـت ** عليك ريقـي مايبـل الشفاتـي

لاشك اخويه قال عيفيه يابنـت ** وحرم على ملايمك فـى حياتـى

وعندما طلقها قالت :

ياصرخ قلبى صريخ الباب ** لاحركه واحـد ٍ عجلـى

عليك ياولد بـن ملهـاب ** لا واحـلالاه يارجـلـى

ظاهره الشراريه

للشاعره ظاهرة عندما طلب عبيد بن رشيد من اهل الجوف الغزو معه باسم الجهاد وقد

رقت لحالهم لعدم قدرتهم على تحمل مشقة الغزو فقالت :

ياعبيد راع الجوف سوى الاشـده ** واقرد عينـه ويـن ودك توديـه

ياعبيد راع الجوف راعـي مكـده ** وان حارب العربان ضاعت سوانيه

ولها ايضا في ابنتها المسماه (واجده)وقد نبغت في الشعر واخذت تفد على الامراء فغارت منها امها وقالت :

ياعبيد وحده من بناتي كوتنـي ** كوي المريض اللي تجدد مكاويه

عرفتها الحكام ليـن اغلبتنـي ** العفو كيف ال*** ياكل مربيـه

لاواحسايف نقلها فـوق متنـي ** غير الرضاع اللي لجسمه يغذيه

وضحا الدخيل العواد

رأت في يوم من الأيام أن الدلة مركات على النار إلى جانب قدر الطعام فقالت تحاور الدلة :

الدلة :

عقب ماهو مركبي قدم الرجالي ** قمت انقّل من محل اليا محلـي

صرت من حسبة قدورك عزتالي ** ول ياعصر الفلس جعلك تولـي

وضحا :

اصبري في صبرنا والعمر بالـي ** آه واويلاه ياعصور مضـىً لـي

ما جرى لك يادلالي قـد جرالـي ** والليال اللي مضن لك قد جرىً لي

الدلة :

يوم انا محشومةٍ قِدمِي مزالي ** ونجر ماوٍ يدعي الغادي يدلي

ما حلا الفنجال بايمان العيالي ** بين شيبانٍ وشبـانٍ تسلـي

وضحا :

ياعزيز الشان يا منشي الخيالي ** ارحم اللي دمعته دلـت تهلـي

كيف هيضتي جروحي يا دلالي ** اسمعـي يادلتـي والا فولـي

الدلة :

ما سمعنا لك وعندي لـك نكالـي ** باشتكيكم والمحاكـم لـي تحلـي

كيف يام حسين ما ترضينهـا لـي ** كيف اشوف الغبن واسكت واستهلي

وضحا :

الشرايع ما تقول الا العدالـي ** وكل ما قالت بشرعه جايزٍ لي

وان شكيتيني هجرناكم ليالي ** من ابريق بالترامس نانزلي

الدلة :

الترامس ذوقها ما هوب حالـي ** واعسى كل الترامس فدوةٍ لـي

إشري الرسلان لو هو كان غالي ** واركي الدله وبالرسـلان زلـي

شاعرة مجهولة

تناشد زوجها إصلاح أمره في كثرة الأسفار والغياب بحثاً عن الرزق :

إلى متى راحت حياتي وانا ارجيـك ** الله لا يقطـع رجـاً بـك رجيتـه

لو شفت دمع عيوني اللي تراعيـك ** هلت على المكتوب ساعـة قريتـه

إن كان جا مستقبلك مثل ماضيـك ** أقول يـا خـلاف سعـيٍ سعيتـه
وان كان تبغيني مثل ماني ابغيـك ** لزوم تاطـا بالوعـر مـا وطيتـه
وان كان حال الياس دون الرجا فيك ** أقـول ذا ذنـبٍ لنفسـي جنيـتـه

الشاعره ذكر بنت شويحط الشمريه

قصيدة في ابنها دهش تأخر وطال غيابه في سفره وصارت تتحسس اخباره من المارين المسافرين :

نطيـت انـا راس ملمومـه ** وادمـوع عينـي ذواريفـي

ارقب على اللي ورى الحومه ** اقفـا ولا مـن مصاريفـي

قمت اتنشد عـن اعلومـه ** راع البكـار المواجيـفـي
والنجر عقبه علـى نومـه ** هـو والـدلال المهاديفـي

وايضاً لها توجد على ابنها دهش عندما طول غيابه :

لايادهش علمي بكم بالضحيه ** واليوم هذا التوم بيـن هلالـه

ودموع عيني سيلن الشغيـه ** مثل صبيب السحب سود خياله

البارحة عيني عن النوم عيـه ** حتى ضحى اليوم مما جرالـه
عقلا وربعه لارمتهـم بسيـه ** حين اركبوني يوم طول محاله
هو راعي اللزمه وراع الحميه ** امزبن المضيوم واللي عنالـه

حصة المحمد الفوزان

وتنتمي الى قبيلة عتيبة نشأت في قرية الخضيرا القريبة من بريدة لها قصيدة مشهورة عبرت فيها

عن معاناتها من سفر ابنها مع العقيلات تقوله فيها.

يامحمد روحت في الزمـل ملحـاق ** وبعـدت عنـا يـا ظنينـة فـؤادي

من اول ترجـي تجينـا مـن اوراق ** واحسـب الأيـام عـدد عــدادى

لولا الحيا صبيت صوتي بالأشـواق ** اكالمـك واصيـح ثــم انــادي
طلبت انا من المسبور سماك الاطباق ** حيـثـه رب وفــوق العـبـادى
يلطف بحالي اللي ضعيف ومشتـاق ** ويطير من قيلـه سـواة الجـرادى
بقـر عينـي بـك ولابيـك تنعـاق ** عسـاي اشوفـك لافـي بالبـلادى

زينب المحمد

ولدت في الرس واشتهرت بكنية والدها "مخراق" أي شديد الكرم فكان يطلق عليها مخراقة..

وهي تفتخر بهذا اللقب فتقول:

ان قيل مخراقـة فلابـه معيـره ** عمهوجة تزهي جديد المياديـج

الى اقبلت مع ناسمات الجديلـة ** ماهيب من خثل البطون الجوابيج

برعت زينب في قول الشعر وكانت غزيرة الانتاج لها قدرة على تصوير احاسيس المرأة في

مواقف حياتها المختلفة وحين تزوج زوجها عليها قالت:

سيرت ابنشـد سالـم كيـف ودي ** الطارش اللي غايب لـه زمانيـن

قال إن شوفك عن علومك يصـدي ** من يمكم ماهوب طلق الحجاجيـن

تـزوج لـه وحـدة لـه يكـدي ** وانتي يبيك الى رسـة المعاطيـن
تهت الطريق وجيت انا سوق سدي ** غديت ما اميز طريقي من البيـن

المصادر :

1- شاعرات من الباديه – عبدالله بن محمد بن رداس

2- مصادر اخرى متفرقه

اضاءة رائعة
هل هناك المزيد فأنتظر
أو أقوم بحفظ صفحة ويب
لاحتوائها على معلومات جديدة بالنسبة لي
مشكور يا دكتور
جهد طيب . وعطاء كريم
دمت بحفظ الرحمن

الله الله الله عليك ياصلفيق

وين هالدرر عنا

صراحه استمتعت وانا اقرا

حزنت للفتاة اللي شربت السّم

والشاعره اللّي فقدت اولادها

وضحكت كتيرا على المرأه اللي

وبخها زوجها المدخن ههههه

رووووائع من شاعرات لم اكن اعرفهن


لولاك فتحية شكر وتقدير لك


بارك الله في جهدك

وشكرا لك من كل قلبي


احترمي لك

رحمهم الله جميعآ

لاهنت يالطيب على نقلك وتميّزك

يازين قصايدهن والله
استمعت بهالروااائع الله يديمك

لاهنت

احترااامي لك يالمحترم

اوووووووووب اوووووووووووب اوووووووووووووب اووووووووووووووب

دقيقه يادكتور صلفيق .......................>


7
7
7
7
7
7
على خشمك طال عمرك ايه ايه اكوي اكوي اكوي يامال العافيه
7
7
7
7
7
وش تبي بسسس ياربي يادكتور مافيه الا كوي كوي يسسسلم راسسسسك ايه كذا الديوان كذا تخلينا نبحر فيها تدري لي يوم اقرا ء فيه وحده وحده لاهنت لاهنت يادكتورنا الغالي .>
7
7
7
برق مصد عنك لو كان بـه نـور ** بالك تخيله لو ربيعك شفاقـه

ترى الرجال ابهم تمازيح واغرور** ومن قبل بخصه لا يجي لك عشاقه

لاهنت يابطل لبى والله راسك يالغالي

شام
شكرا لك فاضلتي
وشكرا لكل دقيقة أمضيتيها بقراءة هذا المتصفح

كعادتك شمس المضايف دائما مفيدة في حضورك


هناك الكثير مما تبقى .. ولكني سأحتفظ فيهم لحلقة أخرى.

شكرا لحضورك سيدتي شام
بارك الله فيك وحفظك


احترامات شامووو

هههههههههههههه

هؤلاء ياراقية أعتبرهن عظام عصرهن
تماما كما هو الحال مثلك وشام في زمننا
نساء ضربن أروع الأمثلة للأجيال ،، احتوى شعرهن
الكثير من الحكم والنصائح والتحذير.
بلغن قمة الوجد في الحب العذري


مشكورة اختي راقية لمرورك الكريم
بارك الله فيك وحفظك


احتراماااااااااااااات راقية

مشكووووووورة مشرفتنا شموخ
مرورك الكريم أسعدني
وسعدت أكثر لأنها لاقت استحسانا منك
بارك الله فيك وحفظك


احترامااااات شموخ شمالية

ناصر..
لحظة بالله ابتفرغ لك انت
*
*
شرهه كتبت من كم يوم لتثبت اننا فراعنة
ومهو معقول عاد الفراعنة مايجيبون موضوع
عليه القيمة...!

عاد اخوك مالقى أحلى وأفضل من سيرة امهاتنا
وقصائدهن.
أرجو ان تكون حازت على رضاك

مشكووووور يالغالي على مرورك الراقي
بارك الله فيك ناصر وحفظك

شكرا لك


احتراماااااااات ناصر

لاهنت ياصلفيق


شاعرات مميزات واختيار اكثر من رائع


تقديري

اللي يتوه الليل يرجي النهارا ** واللي يتوه القايلة من يقديه
ماحد سبق على هذا البيت

الله الله ياصلفيق
وين انت مغيبن كل هالمعلومات

الله يعطيك العافيه

أهلا بمشرفتنا القديرة قمر

وحياك الله بمتصفحي

مشكوووورة لمرورك الكريم الذي عطر الموضوع


يعطيك العافية قمر


احترامااااات

هلا والله باخوي الحيمري
ويامرحبا فيك يالعزوة

الحيمري...
كل هذا مايطلع الا وقت اللزوم
ههههههههههههه

الله لايهينك يالغالي
مرورك اسعدني وشرفني
بارك الله فيك
وابشر ان شاءالله باللي يرضيك بالجاي


احترامااااات

صلفييييق



مجهووود جباار جدا..




و راائع




والله عندي ملاحظة ولا ودي اقوله



لكن لحجم العمل و ضخامته كنت اتمنى لو كان الخط بغير هذه الالوان



و لك الشكر

[align=center]
الله يعافيك استاذنا المبدع
دائماً ماتثري المضائف بما يفيد
لك كل الشكر والتقدير
[/align]

اهلا بشاعرنا الكبير هايس
شرفني مرورك متصفحي
وشرني توجيهك وابداء رأيك..

والله ياهايس حتى انا مهو جايزن لي الخط والألوان
لكن يالعزوة والله من التعب والأستعجال >> خوف ان
أحد يرد قبل اكتمال الموضوع ..

بارك الله فيك اخوي هايس
وشكرا لك لمرورك الكريم


احترامااات هايس

حياك الله اختي بعد ملي
وشكرا لك ولمرورك العذب

حضورك أضاء المتصفح


لاهنتي


احتراماااات بعد ملي

أخي صلفيق

يبيله وقت


شكررا لك على النقل

يالله عاد لاتطول ياسيف..!!

خذ راحتك يالغالي
ومشكووور على مرورك الكريم
بارك الله فيك وحفظك


احترامااااات لك

مقتطفات رائعه ومميزه

استمتعت كثيرااا وانا اقراءها



بارك الله فيك اخوي الغالي صلفيق

مشكور أخوي عبدالواحد
وبارك الله فيك

شكرا للمرور الكريم الذي أضاء المتصفح
حضور مميز سرني جدا عبدالواحد


احتراماااااات لك،،،

يعطيك العافيه اخوي صلفيق


ومجهودات تشكر عليه


قصائد رائعه لشاعرات الباديه



لاهنت يالذيب

مرحبا فيك أخوي سلطان
هلا والله وغلا

هذي والله الساعة المبروكة
وكل الموضوع بركة اللي جابك

تشرفت بحضورك


احتراماااات لك،،،