سلام عليكم بعد طول غياب
كيف حالكم يالقاطعين ؟ كيف الله يدفع البلاء بغت تقضي علي الكحة ولافيه واحد سأل أو قال الحمد لله على السلامه مع إنني ذكرت ذلك في بعض ردودي على بعض مواضيعكم يعني يهون عليكم شايبكم إلى هذه الدرجة وإلا إعتبرتونن مثل لبن المراعي الي منتهي مفعوله؟
خويي الي كنت أشتكي منه بسبب عزائمه للناس على الناس خويي ذاك الإجتماعي الي يجيك ثم يتصل على باقي الربع ويقول لهم القهوة والقدوع الصاخن عند فلان أو ابو فلان من شدة الأدب والإحترام تعرفونه قلت لكم عنه من قبل .
ماعينت إلا هو في هذه المرضة التي المت بي مادريت إلا التلفون يدق هلو هلو مرحبا فلان وينك الربع متواعدينك الليلة ، قلت كح كح كح والله يافلان إنني مريض طايح من هالكحة ولا أستطيع الكلام من شدة هالقحة ولاحتى الصلاة بالمسجد.
فقال لا لا بأس عليك ماتشوف شر إسمحلنا والله ماعلمنا بمرضك لا لا مسافة الطريق والربع كلهم عندك مايصير يخوي الصديق وقت الضيق .
خمس دقائق والربع كلهم على الباب سلام سلام ماتشوف شر الشر مايجيك طيب طيب إن شاء الله كح كح كح آآآآآآآآآآآه واصدري تفضلوا للمجلس إقلطوا ياهلا بكم وسهلا كح كح كح آآآآه
قال خوينا ترني مابغيت أخوفهم على صحتك وقلت لهم ابو فلان شاب لكم وأنت هالحين تدلل أنا بالخدمة أطلب الي تبي للربع وإزهل الباقي .
جلسو ا تقهووا وقال خوينا تدري يا أبو فلان أن كحتك هذه ما تبراء إلا بشيء واحد ، قلت وشو هذا الشيء ؟ قال لحم رخلة طلية ماعلاه الفحل جذعة وأنا أخبر من هي عنده وأعرف كيفية طبخها وماعليك إلا أن تعطيني تسعمائة ريال والقابلة أجيبه لك ونطبخها سواء وترشف من مرقها بالمدحرج والباقي يأكلونه الربع يستأهلون .
قل تم قلت تم هذي 900 ريال ويوم جاء العصر هلو قلت نعم قال راعي الطلية رايح للبر وأشتريت صخلة ثنية حايل 650 وبكرا إن شاء الله يجي راعي الطلية قلت يمكن تكفي الصخلة ، فقال أفا عليك يا أبو فلان تبخل على نفسك مافيه أهم من صحتك والله إلا تموت إن ما تعالجت بهالطريقة والحمد لله ماضايع شين الي ماتأكله يأكلونه الجماعة.
قلت زين جاء الليل وجا العشاء ومعه السوب المرق بالمدحرج يتدحرج ورشف وكح وشفط وكح حتى تعبت تعشوا الربع فقام أخينا ونبه عليهم القابلة العشاء هنا عند ابو فلان على الطلية وطلب زيادة الف ريال مع الطبخ له واسطة.
وبالليلة الثالثة زهم وقال يا أبو فلان وشلونك الليلة نجيك بعد العشاء نونسك ، قلت لا لا والله إني مثل الغزال كح كح كح آآآآآ÷ بس ريح بالك يوم طبت أبي أسافر للديرة بعد العشاء مباسرة أبي آخذ لي عشرة أيام هناك وقفلت الجوال وعشرة أيام ماطلعت البيت وأنتم ماسألتوا عن شايبكم الله يدفع البلاء,
سلملم ويش علاج الكحة الناشفة الحاده لاتقولون خروف نجدي بعد.
