!!!!!!!!! هههههايلي ياسر و موبايلي !!!!!!!!!
السلام عليكم يامعشر الفلة
أكيد اللي قرا العنوان قال أبوطروق صار ناصري<<-نسبةً لحمود الناصر ومضيفه:)
هذا سلمكم الله قبل شوي رحت أنا وبناخيكم طروق(أولى إبتدائي) للسوق نبي نتقضى (رياضة):)
قال أيش يبي ملابس رياضة جديدة مع إني شارين له طقمين أول أسبوع من الدراسة وتخبرون ماودي أعقد جنيني<< إلا بعد ماجابلك الصمرقعshlwee7
قلت أبشر حنا كم عندنا طروق
وهو يقمز كالعادة ويلقط مفتاح السيارة وركض للسيارة وكالعادة أيضاً سمعت قرشة وقربعة بالحوش<<-مايطلع إلا هو صادمن كم شين بالحوش من العجلة
(الله يصلحه حرتس)
لبست الطقم حقي وهو عبارة عن ثوب وطاقية وشماغ وعقال ولحقته للسيارة يوم جيته إلا مشغل السيارة وحاطن رجل على رجل ومشغل أم كلثوم ومعلي الصوت ويهز رويسه
وانا أركب واطفي المسجل وخانقته:-
ليه مطول المسجل؟ تبي تفضحنا عند الجيران؟
قال:-
مزاجي!!!!!!!!
قلت بس هذي أم كلثوم ماينهز الراس على أغانييه
(بالله عليكم وش أعملبه)
الوكاد رحنا للسوق وحنا متزاعلين ودخلنا أول محل حق رياضة
وهي تطيح عيني على لبس تمنيت اني أرجع وغد عشان ألبسه:315r:
قلت لليماني راعي المحل بكم هذا؟ وهو يراعيلي الولد بعين قشرا وقال:-
هذا منهوله!
قلت لك انت ووجهك وحنا وش جايبنا بهذا إلا حضرتك
قال: أنا أبي لون الهلال:148r:
وانا أراعيله ولوماعندنا أحد كان صاطره طراق
قلت أنت وش عرفك بالهلال
وبعدين أنت تدري ان الشبث مايداني الهلال وإذا دري أن ولدي هلالي يبي يزعل علي
قال ليه انت ماتعرف فريق الهلال!
قلت لا ماعرفه
قال هذا فريق البطولات هذا أحسن نادي حتى يوسف يشجعه
قلت انت وش عرفك بيوسف بالعطاوي لايكون مسجل بالمضايف معنا وانا مادري
قال منهو العطاوي! قلت يوسف اللي انت تقول! قال لا يبه يوسف خالي<<-نسيت ان له خال اسمه يوسف
اتريه متأثر بخاله من كثر مايسولف بالكورة
المهم قلت لأبويمن عطنا الهلال وهو يجيب اكا الخرقة اللي مكتوب عليه من قدام (موبايلي) ومن ورا (ياسر)ورقم20<< وانا كنت أحسب ياسر رقم100 من كثر ما أسمعبه اتريه بس عشرين
وانا اتلمس القماش الا والله من أردى أردى أردى الخامات (وأخوكم خبير بالأقمشة)
قلت مافيه غير هالخام
قال اليماني لأ وانا أهمس باذنه قلت شف أي لون أزرق بس تكون الخامة نظيفة
وهو يجيب اثنين وهو يقمز طروق قال هذا هلال؟ وأبو يمن من زود الذمة قال لأ هذا إيطاليا وهذا فرنسا
وعندي ريال مدريد كان تبي<< ياملا القطع يابويمن ذابحك الصدز
قال الولد لأ أبي الهلال
حاولت أنا واليماني نقنعه ان إيطاليا أحسن من الهلال بس ماش هو اللي أقنعنا ان الهلال أحسن فريق بالعالم
(وماني قايل وشو الفريق اللي قام يسبه حفاظاً على شعور أخونا أبوماجد)
قلت طيب نروح لمحل ثاني يمكن نلقى هلال أحسن وخام أزين(وأشوى هالمرة إقتنع)
ونقعدلك انا وياه نفر بالسوق وكل محل نجيه إلا وهو سابقن للمحل ويقول عندك هلال أحسن من الهلال:d:
الوكاد ماخلينا محل رياضة ماجيناه وكلهم عندهم نفس الفنيله (موبايلي وياسر) وحتى الرقم ماتغير20:a:
وفي النهاية أشترينا ياسر وأنتصر بناخيكم
بس مشى عليه السروال (عليه شعار ريال مدريد)
ياهنيك يا ياسر وياهنيتس ياموبايلي بهالدعاية المجانية المدفوعة التكاليف من قبل أبوطروق
وسلامتكم وسامحوني إذا غثيتكم
""""""""""""""
