بسنتن من السنين
يوم كنت عفريت معفرت ( يعني الحين اسكت يهالوليده )
رحت مع ناسن من خوياي يم الشرقيه
واستأجرنا شقه
وتعشينا وعينا من الله خير
قال واحدن معنا ابتصل على ولد عمي هنا يجينا
قلنا وشوله يا فلان اخاف مشغول ولا مهو فاضي
قال لاااا هذا ولد عمي واذا مانفعنا الحين متى بينفعنا
قلنا حنا وش نبي منوه
الوكاد الرجال صمل على رايوه واتصل بولد عموه
الرجال ماقصر وجانا بسرعه
وعقب ماسهرنا قال الرجال انتم الحين ناموا وباتسر ان شاء الله نبي نروح البحر
قلت ليه مانروح الحين يافلان ( مستعجل بحياتي ماشفت البحر )
قال لا باتسر احسن
المهم قضبت الارض وبلعت العافيه ونمت
ويوم جاء باتسر جانا الرجال قال يالله مشينا
والله وحنا نتطابق مع الدرج مستعجلين
ويوم جينا البحر ليمار كل الشاطئ عوايل
ونفر يمين ونروح يسار ولا فيه فايده ( اكيد عرفوا اني جاي وسبقوني )
الوكاد قررنا نصير بين هالعوايل
ونزلنا من السيارة
طبعاً اخوكم شبيثان اول شين نزلوه سروال السباحه
ومثل ما انتم عارفين ( سقطة رضمه ) يعني برحه بالسباحه
الوكاد اني قمت اخبص بالشاطئ ولا ابعد
وفيه عايله جالسين عندنا ( يعني بيننا وبينهم حوالي 200 متر )
وعندهم بنات يخبصن مثلي بالماء
وهي تصيح امهن عليهن يابناااااااااات لا تلعبن بالماء اخاف تغرقن
وانا اسمع حديهن تقول ( لا يا ماما مانغرق شوفي هذااااك سباح ينقذنا )
طبعاً تقصدني ام الشباب
انا طرت بالعجه في هالاثناء
وهم يصيحون العيال ياهووووووه يالسباح
والله منت هين
الوكاد انا قمت احبي بيديني ورجليني بالماء وبس مطلعن رقبتي ( يعنني اسبح )
وشوي وهم يصوتون العيال ياشبيثااااااااان تعال تغد
الوكاد وحنا على غدانا قلت لخوياي تكفون ياعيال ابي اسبح صدز مهو تسذب
قالوا انت تحسبه هاللون من الباب للطاقه
لازم تكون عندك شجاعه
قلت انا شجااااااااع بس خلوني اسبح
قال واحدن منهم انت بالذات ماتسبح لو تطير
قلت ليه يا حضرت الدغلوب
هذا انت رخمه وتسبح
وهو ينقز حديهم قال شبيثاااان انا اخليك تسبح
قلت تكفى واللي يرحم اثنين جابوك
قال رح اشتر نظاراة ماء ومعه حق التنفس
والله وقبل اغسل يديني وانا اروح واشتريهن ( تخبرون ابي اغسل يديني بأعماق البحر )
واجيبهن لخويي هذا قلت هاه يافلان جبتهن وشهي الخطوه التاليه
قال البس النظارة وحط حق النفس بأفمك
قلت هذي هينه وش عقبه
قال حط جسمك على الماء وتبي تسبح وانت ماتدري
الوكاد اني لبستهن ورحت للماء وتمددت بالماء
والله يالربع وانا اوم اسبح صحيح
وانا اقوم اتفرج على السمك ( الوضع ماشي زي العسل
واقول بنفسي طبدزن بالبحر يا بناااااات سهوووود ومهووووود عندكن الحوت البشري
وعلى هالوضع لمدة حوالي ربع ساعه
وهو يقطع حبل افكاري ابليس الرجيم وهو يقوم يحتسي علي
قال بالله راع لخوياك وينهم عنك الحين
وانا التفت يمهم ليمار ماحولك ديره ( فيه لوحه البحرين 15 كيلو )
ويالله اشوف خوياي
وهو يقوم خويي اللي يعلمن للسباحه قال لاترتبك خلك هاللون ماااااااعليك
بس من حتسي عليه
وانا امد رجليني حدر ليمار ماحولك ديره
الله يجيركم وهي تصفقن ام الركب
وانا اقوم ارفس بالماء
واسمع خوياي لهم صيااااااح
وحديهم فضحن الله يفضحوه يقول ( يانااااااااااااااس خوينااااا ماااااااات افزعوا )
والثاني يركض على طول الشاطي ويقول ( ماااات مااااات مااااات )
وهي تختبص العالم فوق حدر
والحريم لهن صياااح ( يشوفن هالادمي يموت وهو حي )
ويالله يفزعون اهل الخير ويلحقوني بأعماق الماء
والسمك مجتمع على يدي ( تخبرون الولد ماغسله من الغداء )
وهم يجروني للشاطئ ويبطحوني وخوياي يبتسون
والحريم يصيحن
والرجال يواسون ويقولون (سليم مابوه شين ماعليه )
والوغدان يصورون ( ملعونين الرقبه فضحوني )
الوكاد يوم صحيت واسمع جارتنا تقول لبناته لا لا يبي يفزع لكن
هذا مافك روحوه هالحين
والله يتسفينا شر من فيه شر
وتقلدوا تحيتي
