السلام عليكم ورحمة الله وبركاته
ومبروك ماتبقى عليكم من الشهر من الشهر الفضيل وعساكم تعودونه
شلونكم وشلونك يابن غسلان عساك بخير دوم
أبنشدك عن قصة عبدالله بن رشيد قبل لايتسلم الحكم
وعن الأحداث اللي مر فيها وعن جلوته الأولى وين راح وجلوته الثانيه وين راح بالضبط وقصيدته
اللي يقول فيها " أرم النعل لمغيزل العين ياحسين" يقصد بها منو من زوجاته
وقصيدته " ياهيه ياللي من الناس وداد " بأي جلوه قالها
مثلك يابو فهد تواجده معنا غنيمه
مع الشكر
عليكم السلام ورحمة الله وبركاته
ومبروك علينا وعليك ان شاء الله وياعلنا واياكم من صوامه وقوامه
وهذولا حنا ننتظر الغالي الراوي ابو فهد يفيدنا بالمطلوب
وحياك الله يا ذيب سلمى
لك التحية
اقتباس:
المشاركة الأصلية كتبت بواسطة ذيب سلمى
[align=center] هلا وغلا يالعزوه ومبروك هالشهر علينا وعليك000
انت ضربت على الوتر الحساس يالغالي لان الفتره هذي فيها احداث يتهرب الرواة عنها وعن ذكرها لكي
لاتثور الناس عليهم لسببين: 1-ان هناك امور مختلف فيها
2-هناك امور لم يتكلم بها احد قبل هذه الان ويخاف الشخص من تكذيب
الناس مثل ذهاب عبيد بن رشيد اثناء اختفائه عن العلي في غياب عبدالله ذهابه الى العواجيه من عنزه
وبقاءه عندهم ثلاث سنوات على حياة عقاب وحجاب0000
لذلك سوف اجمع خيوط الموضوع واقول مالدي قريبا000 واتمنى استماع مشاركات الاخوه00[/align]
لاهنت ياراعي الوقيد مشكور على مرورك العطر
ماتقصر يابوفهد والربع مايقصرون
والموضوع انشالله الموضوع مابه اختلاف
خصوصا اذا جت الرواية منك شخصيا
ولايهونون بقية الأخوان
اخوي العزيز ذيب سلمى0000
(( الجزء الاول ))
طبعا حدثت معركة ظفره بين من بقي من شمر بعد رحيل الجرباء ضد العواجيه في حدود عام 1238للهجره
والتي صمدت شمر فعلا امامهم لكن عنزه قتلت الكثير من شمر وزادت سلطتها واقتربت كثيرا من حائل00
واصبحت رعايا عنزه ترعى في طوارف الظلع وتاطى مزارع شمر ونخيلهم لمدة اربع سنوات حيث وقعت في
هذا الوقت معركة ظفره الثانيه المسماه (قمعه) في حدود عام 1242للهجره حيث وصل العواجيه الى اقل
من عشرة كيلوا مترات من حايل وهو المكان اللي فيه بلدة ( الخطه ) المعروفه وذلك عندما ربعت الارض
اللي حول حايل فقط فتقدمت عنزه جميعها بحلالها وقالوا لمفتاح الغيثي نبي نتعاهد بالله وامانه ونكون
جميع علشان نرعى هالخطه (يقصد اللي فيها الربيع) وهذ سبب تسميتها الخطه000
فقال مفتاح موافقين لكن مالنا حكم باللي يجي من شمر بالشمال(قالها لان عنده علم ان التمياط والطواله
مقبلين بالطريق ) فقال عقاب التمياط يكيل من حنطة العراق ماطريت عليه وماهو جاي 00 وفعلا ارسلت
شمر لهم تخبرهم بوجود عنزه قريبا منهم فهاجموهم على حين غره وانتصرت شمر فعلا بهذه المعركه التي
سمتها شمر ( قمعه)لانها قمعت اطماع عنزه في ارض الجبل وانتزحت عنزه بعيدا الى اراضيها التي اخذتها
من التمياط والدغيرات وهي بيضاء نثيل000
خلال هذه الفتره كان عبدالله بن رشيد اللي شارك في ظفره مع عبيد كان قد هرب عن العلي للشمال00
واما اخوه عبيد فقد اختفى عند
الغيثه تسعة اشهر ثم عند الاسلم ثم ذهب الى العواجيه واقام عندهم ثلاث سنوات الى عام 1250للهجره
اللي جاء عبدالله بن رشيد اميرا للجبل من قبل الامام فيصل بن تركي وهنا خرج عبيد من هروبه وقتل العلي
كما هو معلوم000 وخروج عبدالله هذا هو اللي قال فيه قصيدته الشهيره:
[poem=font="Simplified Arabic,6,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
ياهيه يامــن لـي من الناس وداد=ماترحمـون الحال ياعزوتي ليه
ماترحمون اللي غدى دمعه ابداد=طال الزمان وحرق الدمع خديه[/poem]
واما القصيده : ارم النعول لمغيزل العين ياحسين000 فهي حسب مااراه للتبيناوي وليست لابن رشيد وكذلك
القصيده : ياعبيد عفنا الدار ياعبيد عفناه000 عفناه جعل البوم يلعي بجاله
فهي لسميحان الوبير وليست لعبدالله بن رشيد حسب ماشهد عندي الثقات من الرواة000
وسوف نتوقف لنناقش مامضى بكل حياديه ووضوح ثم نكمل الجزء الثاني وارجوا مشاركة الجميع بعيدا عن
التعصب للبحث عن الفايده والحقيقه0000
تحياتي لكم000
يسلمووووو يالراوي
لي عودة للموضوع:)
لك التحية
[align=center]متابعين لك يابوفهد
وودنا لو توضح كيف اصبحت قصيدة عبدالله الرشيد للتبيناوي ؟
تسلم يابو فهد[/align]
[align=center]^
^
الله العالم ان راوينا شيّب:)
قصيدة عبد الله ابن رشيد معروفه ولا فيها شك !؟
اما قصيدة التبيناوي فهي بدرعه بنت ابن لويش زوجته
[poem=font="MS Sans Serif,5,white,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
الخد قرطاسّ قـروه المصليـن=شفته مع اللي يقبلـون الديانـه
او زبد يشبهله بياضٍ مع الليـن=قطنٍ مع اللـي يندفونـه بعانـه
سميها اللي يلبسـون الغلاميـن=مايلبـس إلا في نهـار الكيـانـه
ماقلت من باقي العذاريب به شين=عذروبها يا حسين قل أحصلانه[/poem]
ويالله حسن الخاتمة:)
لكم التحية[/align]
متااااااااااااااااااااااااااااابع لك يابوفهد وعوايدك هالمفاجئات اللي ماتخلا بالعادة من التحليلات المنطقية ..
انا رأي مع ماقاله الاخ راعي الوقيد انه قصيدتين وحده لعبدالله ابن رشيد وهي معروفه ومشهوره والثانيه للتبيناوي كما قال اخونا ابو فيصل لكن الناس خلطو بينهن
كذالك خلطوا الناس بين قصيده عبدالله ابن رشيد (قل هيه ) وبين قصيده راعي العوشزيه الاسلمي لانهن على نفس القاف
ومنتظرين اخونا الفاضل ابو فهد يكمل لنا هذه النبذه من حياه الامير عبدالله الرشيد
هلا وغلا بجميع اعضائنا الكرام بمنتدانا الغالي000
انا يوم احط الموضوع اجزاء ابي علشان يصير فيه نقاش بكل سطر نجيه لان الموضوع
بدون نقاش يصير كالطعام بدون ملح والنقاش هو اللي يخرج دفائن الموضوع ويزيد فائدته00
لاسيما اذا دخل بالنقاش والحوار اخوان من العيار الثقيل كما يقال وذلك بمالديهم من خلفيه تامه
في التاريخ مما يفتح المجال امامي لاكتساب اكبر قدر من الفائده بوجودهم معي00
1- قصيدة ( ارم النعول لمغيزل العين ياحسين )
كان الاخوه سابقا لايقولون باحتمال كونها قصيدتين على قافيه واحده وانما يقولون ياللتبيناوي او لابن رشيد
وفي هذه الحاله ساكون بصف من قال للتبيناوي لان شيبان التبانا الاحياء يجزمون بذلك وقد توارثوها من
اجدادهم000
وكذلك لكونه ذكر ان اسمها ( درعا ) وزوجة ابن رشيد لم يكن هذا اسمها كما هو معلوم000
وكذلك قوله ( عذروبها قل احصلانه ) كيف يكون عذروبها قل الحصول عليها وهو عندما هرب من حايل كانت
زوجته على سنة الله ورسوله وبين يديه في اي وقت؟؟؟
ولكن في حالة وجود من يرجح كونها قصيدتين على قاف واحد فليس لدي اعتراض بشرط ان يستطيع من
جزم بذلك اثبات من صاحب البيت ( مايستشك ياحمود كود الرديين ) لان البيت هذا مثل شهير وهو سبب
اشتهار القصيده000
وبذلك نقول كون الاصل للتبيناوي هذا هو الثابت للاسباب التي ذكرت 0 وونسبة قصيده شبيهه لابن رشيد
فهذا شي لم يثبت حتى الان (وان كنت لااعارضه بل اراه احتمال قوي) لكن من سيعزل الابيات عن بعضها
ولو لم تكن جميعها وانما الشهيره منها 0000 وهذا هو رايي انا الخاص 0000
2-قصيدة ابن رشيد ( قل هيه يامن لي من الناس وداد )000
جمعت كل الروايات التي يتناقلها الناس والرواة لكي اعزل وحده عن الثانيه لكني مالقيت روايه ترتاح لها
النفس بالعزل الصحيح 0 حتى من الهديرس اهل العوشزيه اخذت الروايه لكن في النفس شي000
واعتقد انه بماان ابن رشيد بالعراق وابن هديرس بحايل فجميع الابيات التي تذكر ماذا حدث بحايل والتي
فيها ( يذكر فلان000 وابن فلان000 وفلان قال000) فهذه تكون لابن هديرس لانه هو اللي بحايل ويخبر
ابن رشيد وش صار عقبه بحايل من اخبار ماتسر0000
كما اني اشك بالبيت اللي فيه ( حمر الطرابيش ) لاني وجدت اكثر الروايات لاتحتوي هذا البيت ونفى صحته
لي العديد من الرواة000 وان كنا لانستبعد شي 0 لكن بماان فيه اساءه واضحه للقبيله والجماعه فلانثبته
الا اذا ثبت يقينا واما بوجود الشك فنكون ضده 0 وهذا هو الاصل عند العقلاء000
3- موقعة ( ظفره ) الاولى او كما يقال ظفرة مفتاح 000
طبعا هي مناخ استمر خمسة واربعين وتفرق الجمعان من طول المقام دون ان ينهزم شخص هزيمه واضحه
وهي الهروب من ارض المعركه والطرف الثاني يطرده مثلا000 لذلك نتيجتها الحقيقيه كالتالي:
طبعا كان الثلثان من شمر قد رحل مع الجرباء شمالا والثلث الباقي كان اكثرهم يشير بالهروب واللحاق بمن
رحل من شمر ولكن حصلت مقولة مفتاح الشهيره ( كلنا سوادين ) وصمد هذا الثلث بوجه عنزه في قوة
العواجيه وصولاتهم في القتال لذلك عندما انتهى المناخ كان شعراء شمر يقولون الشعر بالنصر وهو نصر
معنوي لان مجرد ثبات وصمود هذا العدد القليل من القبيله في ديارهم امام عنزه ومحافظتهم عليها تعتبر
نصرا بحد ذاته0000 وعلى هذا تحمل اشعار من تغنى بالنصر من شمر000
لكن اذا اردت معرفة المنتصر في مثل هذه الحاله التي لم ينكسر فيها طرف انكسارا واضحا 00 فالمنتصر
تستطيع معرفته بالقياس على الارض بعد المعركه ماذا حدث؟؟
والذي حدث ان عنزه صالت وجالت في اراضي الجبل وكانت تترك حلالها يدخل الزروع والنخل مثل ماحدث
في موقق وكان السواريح من شمر واهل حايل يخافون من فلول عنزه المتناثره حول حايل 000
وهذا يدل على ان عنزه اثخنت القتل في فرسان شمر في المعركه فتضعضعت قوة شمر بعد مقتل النوادر
منها وهو الذي جعلها تنكمش قليلا وفي المقابل اعطت عنزه دافعا للحركه في اراضي شمر بحريه وارتياح00
اما المكابره في ذلك من البعض فليست ذات جدوى اذ كيف يقال شمر انتصرت نصر مؤزرا ثم بعدها عجزوا
عن حماية نخيلهم من عنزه000 وكيف انتصروا وعنزه تسوح وتروح بوسط اراضي الجبل بكل راحه000
فالصحيح للعاقل المنصف ان انتصار شمر معنوي لثباتهم وعدم التفريط بديارهم على قلة عددهم امام الخصم
واما على ارض الواقع فهو يشير ان عنزه هي المستفيد الحقيقي من نتائج مناخ ظفره الشهير والله اعلم00
اقتباس:
المشاركة الأصلية كتبت بواسطة عبدالعزيز
هلا وغلا اخوي عبدالعزيز 000
بغيت اقول لك اننا اشتقنا لك يالعزوه 000 مالك حس ولا رس 00
واصلنا والا نخيت ريال وليد فسحه يحط بك موضوع بفلة
الحجاج وانا ادعمه بكم قصيده غثيثه يالغالي000
اسلم وسلم يالغالي000
السلام عليكم
متابعين معكم وجزاك الله خير يا بو فهد
تقبل الله طاعتكم
[align=center] بما اننا نتكلم عن تاريخ اقوام مضوا فمن المناسب ان اتحفكم بهذه
تفيدنا خلال البحث والتفكير والردود يالعزوه00[/align]
[poem=font="Simplified Arabic,6,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
خـفــوقــي ضـاق يـاراع الــجــزيــره=وهــاض الـجــاش مـن نـارن تــديـره
وصـغـت الـقـاف مـن زيـن الـمــثــايـل=لـعـل الـقـاف فـيــه الـيــوم خــيــره
بـيــوتـن مـانـظـــمــهــا كـل شــاعــر=تـبـي لـه شـاعـرن روحــه خـبــيــره
يـصوغ الـلـي يـهـيـض بـوسـط جاشـه=ويـنـثـر مالـجـى وســـط الـســريـره
لـو ان الـقـاف تـغــنـيــنــي حــروفــه=تـحــديـــت الـفــرزدق مــع جـريـره
لـقـى بالـقاف وقـت الـضـيـق راحـــه=عـلـى روحـن مـن هـمـومـه حـسـيـره
شــرب مــن سـكـــر الـدنـيـــا ومــره=وصار الـشـعـر لـهـمــومــه ذخــيـره
وانـا قـاسـيــت بـالـدنـيــا عـجـــايــب=ورافـقــت الـمــوظــف مــع مــديــره
وشـفــت طـبــوع تـجــارالـخـــلايــق=وخـالـطــنـا مـن الــعــالـم فــقــيــره
وجـيــت دروب دنـيــاي الــغــريـبــه=وذقـت سـيـوف دنـيـاهـا الـشـطــيـره
ولاجــربــت زيــنــات الـــمــبــانــي=ولانـامــت عــيــونـي فــي حــريــره
حــيــاتــي كـلـهــا كــد ومــتـــاعــب=هـمــومـه بـالـحـشـى مـثـل الـسـعـيـره
اشـوف الـنــاس فـرحـانـه بـجــنــبــي=وريـح ثـيــابـهــا ريـحــن عـطــيـره
اغـسـل الـثـوب بـكـفــوفــي لـروحــي=ولافـكـرت عــمــري وش مـصــيـره
لـك الـلـه كـم رجـف جـسـمـي بـثـلـجــه=نـصوف الـلـيـل والـدنـيـا مـطــيــره
فـطـوري مـن عـشـاء الـبـارح حـفـظـتـه=ولا اعـرف الـفـطــايـر والفـطـيـره
ولا شـفـــت الـدراهــم وســط جـيـبــي=واخــلــط الـكـيـك مـع لـذة عـصـيـره
وراح الـعـمـر فـي ضحـكـه وضـيــقـه=مـع الـعـالــم وانـا عـيــنـي بـصـيــره
وعـقـب اربـع عـقــودن مــن حـيــاتـي=فـهـمــت دروب وقــتـي فـي مــسـيـره
هـبــيــل الـنــاس لاكـثــرت فـلـوســه =غـدى شـيـخ الـمـجــالــس مـع وزيـره
تـقــوم الـنـاس عـن وجـهــه بـسـرعــه=لـو انـه مـاعــطــى مـخـلــوق نـيــره
وتـصـغــي لـه رجـالــن شـاب راســه=ويـقــعـد وسـطـهــم تـسـمــع هــديـره
وهــو هـيـســن ولـد هـيـســن تـسـلـسـل=ولايـفـرق غــنـمــهــا مـن بـعــيــره
مـدامـــك مـاتــراجــي نـفـــع مــالـــه=ولاتـطــمــع شـيــاهــــك ورد بــيــره
عـلامــك هــنـت نـفـسـك وانـت شـايـب=وهــون الـنـفـــس رايـاتــه خـطـيـره
مـــدام ان الـكـــرامــه راس مـــــالـك=سـيــوف الـطـيـب شـلـهـا مــن جـفـيـره
لـحى الـلـه مـن يـهـيـن الـنـفـس راضي=ويرضى الـهـون والـنـفـس الـكـسـيـره
لاجـل قـرشـن مـن كـفـوفــن بـخـيــلــه=يـلــو تـاكــل قـشــاشـن مـن شـعـيــره
وشـفـت اجـنــاس مـاتـفـرق طـبـوعــه=وطـرق الـنـاس بـطـبــوعـه كـثـيــره
وفـيـهـــم مــن يـغــثــك فــي شـعـيــبـك=لـو الـوديــان سـالـــت فـي غــديــره
تـحــســدك لـو كــســبــت ريــال واحــد=لـو ان اربـاحــهــم تــمــشــي دريـره
يـظـــن الــرزق يـنـقــص مــن حــلالـه=تـضـايـق وابـتــدى تـسـمــع زحـيـره
وكـل الــنــاس تـلــقــى فــيــه صـالــح=ولا تـلــقــاه بـالـلــي فــيـــه غــيــره
وغـيــرات الــمـــراجــل شــر غــيــره=خـطــرهـا زاد عــن عــذرى غـريــره
اذا غــارت هـــنــوفــن راح تــبــكــي=وهــو يـنــقــل سـكـاكــيــنــن طـريــره
وفـيــهــم مــن يـبــي تـنــفـــيـــذ رايــه=يـريــد الــنـاس كـلـه تــســتـــشــيـــره
وهــو مـالـــه مــن الــدنــيــا تـجــارب=وعـنــد الـكـود يـظــهــر لـك صـفــيــره
شـبــيــهــن لـلـنــعــام ان شــاف زيـلــه=هــبــوب الـصــيـف فـي لـيـلـه يـذيــره
وفـيــهــم مــن رفــع بـالـكــذب نـفــســه=وحـيــن الـلازمـه تـســمـــع شـخــيــره
اذا شــــافـك ضـحــك لـك فــي مــــوده=ونـيـــران الـعـــداوه فــي ضـــمــــيــره
خـبــيــث الــنـفــس مــنــبـوذ الـسـجــايـا=جـفـولــن بـالـطــواريــق الـعــســيــره
تـرى الـخــســران مــن يـاخــذ بـنـــاتـه=يـجـــيــه عــيــال لـلـــعــالــم مــعــيـره
وبـعـــض الــنــاس يـتــبــع راي حـرمــه=عــنــود الـريــم بـالـبــيــت الامـــيــره
وهــي تـامــر وتــنـهــى فــي حـــضـوره=وهــو مــثــل الــذي وســـط الـحـضـيـره
والانــثــى دايــمــن حــكــمــه بـقــلــبــــه=وشــوره عــنــد نــوره او مــنــــيــره
مــع ان الــراي بــعــقــول الــنــشـــامـــا=وبــعــض الـبـيـض بـالـشــورى جـديـره
ولاتــركــن عــلــى عـهـــد الــعـــــذارى=ولــو ســاقــت مــواثــيــقــن ضــريــره
ولــو قــالـــت غــلاك بــوســط جــوفـــي=وقـالــت خــذ عـيــونــي مــع نــظــيــره
اذا طــــال الــزمـــان يـخـــور عـــزمـــه=ولاتـصــبــر عـلــى طــول الـجــبــيــره
وفــيــهـــم مــن يـجــي درب الـصــداقـــه=ويـصـــدق فـي امـــوره مـــع خــشــيــره
ولـكــن مــــن غــلــط واحـــد يــعـــافـــك=ويـعــلـــن عـــنــك بـالـتـــالــي نـفــيــره
ومـــاتـلــقــــى الــــذي مــاداس زلــــه=يـقـــولـه مـــن فــرض ركـــن الـشــعــيــره
ولازم تـــدمــــح اغــــلاط الــرفـــاقــه=قــبـــل تـقـــعـــد وحــيــدن وســط حــيــره
اذا رب الــبــشــر يـعــفــوا ويـصــفــح=عـــلام الـــعــبـــد مــايــرحــم عــشــيـــره
وبـعـــض الــنــاس رفـقــتــهـــم ونـاســه=ســعـــادة واحــــدن روحـــــه كـــديــــره
ونـاســـة سـاعــتــن لاصـــرت ضــايـق=وبـالـــشـــده ســريــعـــن كــســـر زيــره
اذا شـــافــك طــريـــح بـوســط شـــده=تــعـــذر مــنـــك فـــي لاهـــب هــجـــيـــره
ولـلــشــــدات نـاســـن تــرتـــكـــي لــه=اذا ثــاروا غـــدت عــــيـــنــــك قـــريـــره
زمـــولـــن لانـخــيـــتــه جــاك هـــادر=مــاهــي رقــصــن عـلــى نـغــمــة سـمــيــره
وكــل الـــنــاس بـالــدنــيـــا مــــعــــادن=كــريـــم الــنـــاس او راع الــثـــبـــيـــره
كـريــم الاصـل تـلــقــى الـفــرع طـيــب=وتــرى الــويــلان فــزعـتــهــم شــهــيــره
بـلا هــونــن بــربــعــي نـســـل شـــمـــر=هـــم الـمــيـــراد لاكـــثـــروا صـــديـــره
وفــيــهـــم مـسـلـــمــن والـخــيــر دربــه=غـــدى ســيــل الـرحــامــه مــع مـحــيــره
اذا جــيـــتـــه لـقـيــت الـخــيــر عــنــده=ولـو انــه عـايـشـــن عـيــشــــه ســتــيــره
فـقــيــر الــمــال وطــبـــوعـــه غـنــيـــه=زبـــون الــضـيـــق حـــمــاي الـجــريــره
واذا جــت سـاعــــة ظــهــور الــمـراجــل=شـجـــاعـــن بـالـلـقـــاء مـاطــار طــيــره
بـيــوتــن قـالـــهــا الــراوي بـضــيــقـــه=عــســـى مــولاه مــن نـفـــســـه يـجــيــره
نـظـــمـــتــه شــعـــر لـلـنــاس الــعــوارف=لان الـــنــصــح لـلـــعــاقــل بـــريـــره
وانـا مــانــي رفـــيـــعـــن فـــوق ربــعــي=وهـــوزاتـي مــــع الــعـــالـم قـــصــيـــره
ولـكــن مـــااتـــعــــمـــد بـــوق غــــيـــري=لان الــبــــوق وربــوعــــه نــكـــيــــره
ومـــن يـنـصـح ويـكــشـــف لـي عـيــوبــي=عـطـــى روحـي عــن الـغـــلــطــه نـذيـره [/poem]
(( التمثال في الحكم والامثال )) للراوي ابن غسلان
مشكور يابو فهد على سرد القصه الله لايخلينا منك يالغالي
وأشكر جميع الأخوه على مرورهم الطيب وتفاعلهم مع الموضوع
وزين ماسويت يابو فهد انك جزئتها علشان أي نقطه فيها غموض اناقشها معاك ومع الأخوه
أولا
عندك قصيدة عبدالله بن رشيد اللي يقول فيها "" أرم النعل لمغيزل العين ياحسين""
مرجحه أنها له لأنها أصبحت من الموروث الشعبي المعروف
ومتداوله بكثره مجرد ماتسأل عنها قالوا لعبدالله بن رشيد
ثانيا
قالوا عبدالله بن رشيد وأخوه عبيد جلو للعراق عند الجربا وراحوا لسكاكا وراحوا لقفار
ياليت يابوفهد أنت والأخوان الأعضاء تذكرون مراحل ذهابه من البدايه لين استتب له الحكم
وقصيدته اللي يقول فيها "" ياهيه ياللي لي من الناس وداد ""
هل قصدها في جلاه الأول أو الثاني
الله لايهينكم
تحياتي لكم جميعا
[align=center]مايستشك ياحمود كود الرديين !!اقتباس:
بشرط ان يستطيع من جزم بذلك اثبات من صاحب البيت
( مايستشك ياحمود كود الرديين ) لان البيت هذا مثل شهير وهو سبب اشتهار القصيده000
هالشطر اول مرة اسمع بوه:)
ولاهو مشهور الى هالدرجة اللي انت ذكرت ؟
ولكن المشهور
ما يستشك يا حسين كود الرديين ** والا ترى الطيب وسيع بطانه
ابو فهد !!
ارم النعول لمغيزل العين ياحسين
لعبد الله العلي آل رشيد ولو تنشد القاصي والداني سواء شمري
او غير شمري سيجيبك بأن هذا من قصيدة عبد الله ابن رشيد .؟
لك التحية يالعزوة:)[/align]
انطح عن روحك يابن غسلان:(
واجلي قصايد أخو نوره غنايم حرب يوم توزعه يمين شمال:(
وش طاريلك اليوم يبو فهد؟
بصراحة أكاد أخالفك بأكثر ما قلت بس مامن وقت هالحين للنقاش.
لي عوده لهالموضوع وللغالي على قلوبنا جداً ابو فهد:)
تحياتي
[align=center]الغالي ابو فهد
الله يعينك علينا:)
لكن مانحن هنا الا للاستفاده منك طال عمرك
عندي استفسار الله لايهينك
انت ببداية كلامك تقول ان قصيدة " ارم النعول لمغيزل العين ياحسين"
للتبيناوي
طيب من خلال ابيات القصيده نلاحظ ان صاحب القصيده يروي لنا القصه:
من ضمنه يوم هو يقول شيب بالضمير هكعانه وهذا دلاله على خروجه وراوه بدون نعول
وكذلك قوله لابد ماحنا عن الدار مقفين وغيره
فاذا هي كما قلت انه للتبيناوي ونفيها عن بن رشيد فهناك احتمالين :
اولا: ان التبيناوي حصلت له قصه مماثله لابن رشيد ونود ذكره؟
ثانيا : ان الابيات هذه ليس لها وجود وهي ملفقه على القصيده؟
فنرجو التوضيح لو سمحت
لاني بصراحه ارى ماراه الاخوان ابوفيصل وابو فراج انه قصيدتين والقافيه متشابهه[/align]
هلا وغلا بالاخوه جميعا0000
والاخ راع الوقيد سوينا تصويت عند الاخوان اينا اللي احلى عيون من خويه وغلبته وانا ابوفهد
هاللي تشوفونه يشن علي حملات متتاليه من اللي بكبده00
حتى ابوسلطان قلت له منهو مزيون المنتدى قال مافيه غيرك يابوفهد000
بالنسبه للقصيده مافيها الان اي اختلاف طالما انها اثنتين على قاف ويحدث كثيرا مثل هالاختلاف عند
التداخل بالقصايد 0000
وللفائده العامه اشتهار القصيده عند الناس انها لفلان من الناس غير كافي للترجيح كما هو معلوم للجميع
مثل اشتهار ( البارحه يوم الخلايق نياما ) انها لنمر بن عدوان مع اني من زمان وانا ارجح انها اما لابن مسلم
او لزيد بن غيام 0 والناس سمعوا القصيده ووجدوا رثاء للزوجه ومايدرون لمن القصيده فتبادر للقلب انها لنمر
لكونه اشتهر برثاء زوجته ونسبت له00000
اما انت يالاصمعي حنا فاقدينك ونبي طلتك حتى لو تخانقنا يالغالي0000
حياك الله يالغالي وزين انك حولنا نحتاج لك اما هوشه او مثلها0000
اما سالفة (ياحمود) هي ياحسين لكن من كثرة ماقصدت انا توجيها للشاعر حمود التميمي لصقت بالعقل
لكن اياني واياكم تقولون شيب الراوي مثل علوم راع الوقيد000
[poem=font="Simplified Arabic,6,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
ياحـمـود حـسـبـي علـى الـغـالـي وجـوالــه=وحـسـبـي عـلـى الـلي خــذى قـلــبــي وخــلاني
يـاحـمــود قـلـبــي مـن اول حـالـتــه حـالـه=لاطــاب جـرحــي جـرحـنـي صـاحـبــــن ثـانـي
لـيـتــه تـركـنــي مــدام الـجـرح مــنــــوالــه=او عـقــب جــــرحــي رحـــم حــالــي وداوانــي
قـلـت الـحـشــى زاركم غـافــل عـلـى فـالـه=جـاكـم غـــشــيـــمــن بـلا مــوعــد وعــنــوانـي
والــريــم شـالـت بـهــجــر الـقـلـــب مــوالــه=مـع جـور وقــتــن قـبــل شـرحــي تـوطـــانــي[/poem]
اما من ناحية جلوة ابن رشيد اخوي العزيز
فاللي اعرفه ان الجلوه الحقيقيه هي الاولى اللي قعد فيها بالجوف فتره ثم طلع للعراق وهي اللي فيها
قصيدته الشهيره ( ماترحمون الحال ياعزوتي ليه ) اما الثانيه فهي لاتعتبر جلوه وانما ابتعاد عن مواجهة قوة
حملة الاشراف وقام عبدالله ابن رشيد وشال اهله وراح الى جبه وعقبه رجعوا لقفار لين رجع للاماره ابن
رشيد مره اخرى وراح نتطرق لها بالجزء الثاني000
واصلا اكثر الناس ماعنده خبر منها لكون مدتها قصيره لاتزيد عن تسعة اشهر ومنهم من قال اكثر بقليل00
والحقيقه ان ابن رشيد بالعراق لم يجد اهتماما كبيرا لكون سمعته قد بلغت شمر العراق انه راعي فتن
ومشاكل بسبب ماحصل منه في حايل مع ابن علي وهو امر جعل رؤساء وكبار العشيره بالشمال لايكونون
مسرورين جدا بقدومه للاخبار السابقه عنه كما قلت00000
واما مايرويه البعض من اكرام ابن رشيد والهدايا فانا اظن ان اي منصف عاقل محايد يعلم ان ابن رشيد لو وجد
فعلا مثل قولهم من الاكرام لما اضطر للجوء الى الامام تركي بن سعود عام1244 للهجره مع انه عدوه اللدود
وانتم ان حاكم حايل ابن علي اللي يبحث عن قتل ابن رشيد يعتبر من الامراء التابعين لسلطة الامام تركي
ومع عداوته اضطر ابن رشيد ان يلجأ اليه ويقدم له الهدايا حتى رضي عنه 000
وابن رشيد لولا انه وجد ان فعله يعتبر الحل الوحيد لما اضطر للتنازل عن كبريائه ليسترضي شخصا يعتبره
عدوه اللدود 0 لاسيما ان الشعار اللي رفعه ابن رشيد ضد ابن علي ليكون مبررا للخروج على امارته هو دفعه
للزكاة لابن سعود كما هو معلوم000
وكيف بعد رفع شعاره المعادي لابن سعود كيف يضطر للتنازل واللجوء اليه وطلب رضاه؟؟؟ اعتقد لو كان ابن
رشيد يبي ابن سعود من اول كان مااضطر للبقاء في الجوف قرابة ثمان سنوات ثم للعراق ولكان اتجه لابن
سعود مباشره0000 والكلام واضح ومنطقي لمن ابتعد عن التعصب وقاس الامور بمقياس العقل000
اما عبيد بن رشيد0000
فهو لم يرافق عبدالله في جلوته حسب علمي وانما اختفى حول حائل عن العلي قرابة السنه عند الغيثه
وبعدها عند الاسلم وبعدها رحل الى عنزه ( العواجيه ) وبقي عندهم ثلاث سنوات000
وبقي متنقلا هاربا بعمره عن القتل الى ان عاد عبدالله اميرا لحايل000 وبقاء عبيد المده التي قلت كانت
من اهم الاسباب للحلف بين عنزه غرب حايل وابن رشيد فيما بعد 0 وسوف نتطرق له في حينه لاحقا000
علما والحق يجب اظهاره ان ابن علي دخل في الدعوه السلفيه ايمانا واعتقادا وكانت طاعته لابن سعود من
باب كونه يراه امام المسلمين فهو داخل في طاعته تدينا واعتقادا دينيا وليس لسبب سياسي او مخافه
واكبر دليل ان محمد ابن علي هو اللي هجم بجيشه لفك حصار ابن سعود وشيوخ الدعوه السلفيه عندما
حاصرتهم بالدرعيه فرقه للدوله وقتل منهم مقتله كبيره وفك حصارهم000
كما ان امارة العلي كانت قبل الدوله السعوديه الاولى بكثير فالامير الاول للعلي بحايل كان عام 905 للهجره
في حين قامت الدوله السعوديه الاولى بعد هالتاريخ بمائتين سنه00 فليس ابن سعود هو من وضع العلي
امراء بالجبل بل كانت امارتهم قبله بكثير0000
وقد كتب شيوخ الدعوه السلفيه على قبر ابن علي ( امير المسلمين ) اعترافا بفضله وجهده وجهاده في
سبيل توطيد دعائم العقيده السلفيه الصحيحه حتى بلغ بجيشه القريات وعرعر والشمال رحمه الله000
ولااعلم ماهو السبب في اغفال تاريخ امارة العلي بين الناس بطريقه ظالمه حسب اعتقادي المتواضع وقد
نظمت انا ابيات متواضعه توضح بعض مراحل امارة العلي فقلت:
[poem=font="Simplified Arabic,6,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
انا مااضيق وسط جبال حايل=وشيخان الجبل تسمع هـديره
شيوخ العلي وافين الخصايل=لهم تاريخ وامجاد ومـسـيـره
حماة الدار في حدب السلايل=هل التوحيد مع شيخ الجزيره
ثلاث قرون ورفاع الحمايل=شيوخن في جبل شـمر تـديـره
تهاب سيوفها كل القبايل=وراع الظـيـم بالحـسـنـى تجـيـره
ظلال الدار عن نار القوايل=نهورن بالجبل مـنـثـور خـيره
زمولن ترتكي عند الـثـقـايل=سـباعن باللقاء ماطار طـيـره
ثقالن ماتجي مع كل قايل=ومن ضاعت دروبه يـسـتـشـيـره
عدودن خيرها بالطيب سايل=ونار الحرب ماتـقـدر تـذيـره
سناعيس اللقاء عند الصمايل=حمولة خير خيرن وسط ديره
بهم من صارت فعوله مثايل=نهر نجـد الـعـذيـه مع غـديـره
امير المؤمنين اعلى الدلايل=هو اسم اللي حمى حق الشـعـيـره
على قـبـرن خذى شيخ العوايل=سقاه الله من مزونـن مطـيـره
واخو خنساء شفى كبد العلايل=امـيـر الطيب مرباه وسـفـيره
يصب السمن يشدى للمسايل=وطفى الجـوع بالكبد السـعـيره
يمينه خير مع خير الشمايل=وشيخ العـدل حـمـاي الجـريـره
مثل حاتم بضيعات المحايل=دفن جوع العرب في وسط بـيـره
مثل طـيـبه من العالم قلايل=لك الله كـم جـبـر سـاقن كسـيره
فخر شمر مثل وبل المخايل=بروقه للعرب صارت بـشـيـره
ومن جاء دارهم فيه الغلايل=سيوف العلي باليـمنى شـطـيـره
سطام اللي يريد الجور عايل=ولا ترقـد سـيـوفـه في جفـيـره
لهم في ماضي الدنيا فـعايل=وبالحاضر تواريـخـه عـطـيـره
وحبل العلي للناموس طايل=اذا قصرت حـبـالـن عـند غـيـره
ولا داسوا طواريق الرذايل=ولا طقوا ورى نغـمـة سـمـيـره
بهم معدال دربن صار مايل=وراع المـيـل يـسـقـونه مـريـره
شيوخ المجد نـطـاح الجلايل=خـيـولـن بالـكرم دايـم مـغـيـره
ولايطمع بهم راع النقايل=هل البلـسـات والـنـفس الحـقـيـره
مواقفهم غدت تشعل شعايل=وهبايب طـيـبـهم تـنـثـر عـبـيـره
ولاشـفنا من اصغرهم خمايل=وبياض الوجه بوجيه الكـبـيره
اصايل طي بظهور الاصايل=وشوفـتـهم على كـبدي بريـره
ولاتحصي مزاياهم رسايل=عسيرن وصف صافين السريره
عطاياهم على العاقل جزايل=وشـلـفـاهم على العايل خـطـيره
وحـكـمن غـيـر حكم الله زايل=ودار الحـكـم كوره مـسـتـديره
وهم صادوا من الحكم النفايل=وعقبه شف مواقفـهـم شـهـيـره
سلام القلب ياخـيـر الحـمـايل=عـدد ماداج بالـبـيـداء نـشـيـره
ولاقـلـته على رجـوى نوايل=ولاارجي نـاقـتـن والا بـعـيـره
ولكن حب راعين الجـمـايل=شـهادة شـاعرن يـدرى ضـمـيـره[/poem]
يعطيك العافيه على هذه الابيات الجميله
صورة حاضرنا بدقه متناهيه جدا ....وفعلا قد اصبت الهدف 000واشكر لك على هذا المجهود الطيبب والنيه الحسنه....
تحياتي وتقديري لك
أخوي ابن غسلان الله يعطيك العافيه
في ناس تقول أن عبيد الرشيد راح معا
أخوه عبدالله للعراق وشارك بنهبة الحله
ومافي دليل للراويه هذي الا روايات الشيبان
ولافي شي يأكده ولا دليل ينفيه
والشي الثاني عبدالله بن رشيد بقصيدته
يقول "" جبه سقاها من الوسم رعاد ""
هذا دليل أنه أستقر بجبه يوم جلا
وودنا تذكر
يوم راح للجوف وجبه والديار اللي جاها
منهو اللي أستقبله وسكنه
وحنا ماودنا نسبق أحداث القصه
ياليت تذكرها بأجزائك القادمه يابو فهد
وبالنسبه لأسرة العلي الكرام وستين نعم
ماحد ينكر تاريخهم وامارتهم والشمس
مايغطيها المنخل تاريخهم ساطع ومعروف
وأنا اكن لهم كل محبه وتقدير
لكن قصصهم وتسلسل حكامهم وتاريخ
تسلمهم الحكم فيه غموض
ولاحد يقدر يضبطها ماني عارف السبب
كل الشكر لك يابوفهد وللأخوان على مرورهم ومداخلاتهم
اخوي العزيز ذيب سلمى0000
العلي والحق يقال حكموا ثلاثمائة عام في الجبل وهم كالتالي:
1. علي الأول (30 )905-935
2. صالح بن علي(32)935-967
3. عبدا لمحسن بن صالح(18)967-985
4. مهنا بن حسين بن صالح(32)985-1017
5. علي بن عبدالمحسن (33)1017-1050
6. عيسى بن علي بن صالح (35)1050 -1085
7. محمد بن عيسى بن صالح(35)1085-1120
8. فايز بن محمد (15) 1120-1135
9. عبدا لمحسن بن فايز(37) 1135-1172
10. محمد بن عيسى بن فايز(34)1172-1206
11. محمد بن عبدالمحسن(28) 1206-1234
12. صالح بن عبد المحسن(16)1234-1250
13. عيسى بن عبيدالله (2)1251-1253
نبذة عن حكام آل علي:
ما يظهر لي أن علي الأول و يلقب بعلي الكبير هو مؤسس حكم العلي في الجبلين و أليه ينتسبون و زعامته
ممدة لآبائه قبل قدوم آل علي لحائل.
وهذه الإمارة مرت على مدى 12أميراً (هناك من لا يعد عيسى بن عبيد الله أميراً على حائل) توالوا على
سدة الحكم في مد و جزر فتارة تسمى بإمارة الشمال و تارة تسمى بإمارة جبل شمر أي أن نفوذها تارة
يتعدى منطقة الجبلين لتخوم الشام و تارة يبقى في حدود الجبلين.
و يعد أميرها مهنا بن حسين من ابرز الأمراء الأشداء و كذلك الأمير علي بن عبد المحسن بن صالح و الأمير
عيسى بن علي و أبنه الأمير محمد "الأشمل" و الذي كسب هذا اللقب لشمول حكمه كما يروى لنا، يعد
بحق العصر الزاهر للإمارة. ففي هذا الوقت كانت إمارة آل علي في أوج اتساعها و كانت عاصية على كل
طامع و غازي و منها عصيانها على الشريف أدريس أمير مكة الذي أتي غازياً جبل شمر عام 1043هـ و رجع
جيشه مهزوما ومات هناك في ياطب كما ذكرت المصادر. و أعقب ذلك غزوات الشريف محمد الحارث عام
1088هـ و لقي هزيمة ساحقة كما هو معلوم.
وفي الفترة التي تولى فيها فايز بن محمد و أبنه عبد المحسن كانت فترة رخاء للإمارة ولم يصلنا من أخبارها
شيء إلا أنه مع بداية حكم محمد "الثاني" بن عيسى بن فايز بدأت ظهور الحركة الوهابية و قد أتصل الشيخ
الجليل المجدد محمد بن عبد الوهاب بالجبلين مبكراً فقبل عام 1178هـ كان أمراء جبل شمر قد اقتنعوا
بدعوة الشيخ المجدد و حالفوه على النصرة و لم يدم هذا الحلف كثيراً ففي عام 1201هـ جاء حجيلان بن
حمد أمير القصيم من قبل آل سعود و أقر شيخ الجبل محمد بن علي فمن هذا الوقت اصبحت الإمارة خاضعة
للدولة السعودية الأول و ليست حليفة.
بداية من عام 1201هـ بدأ امتداد الحكم السعودي لجبل شمر و يقال أن الأمير عبدالعزيز آل سعود قد عيّن
محمد بن عبدالمحسن بن فايز آل علي أميراً على جبل شمر وهو يعد أول رجال آل علي في زمن الحكم
السعودي فمحمد من الرجال الأقوياء في زمن الدولة السعودية الأولى و كان أميراً مخلصاً لها أفنى عمره
في خدمتها و في حكمه تصدى للترك في معركة الصفراء التي قادها علي بن عبدالمحسن بن فايز آل علي
عام 1226هـ و معه 150 رجلا من الجبل و انظم أليه رجال من البادية و سار جهة البحر الأحمر حيث رابغ و
كان السبب الحقيقي في الأنتصار على الترك التي زج بسببها علي باشا أبنه في السجن مع قادة جنده.
لكن تركيا لم تسكت على هذا ففي عام 1234هـ ارسلت جيشاً تركيا ضخما و قتلت فيه أمير حائل محمد
بن عبدالمحسن آل علي و قطعت رأسه و ارسلته للباب العالي بأستطنبول.
بعد ذلك بدأت فوضى في نجد بعد سقوط الدرعية معقل آل سعود و جاء في هذه الفترة صالح بن عبد
المحسن آخر حكام آل علي بإستثناء فترة عابرة لعيسى بن عبيد الله آل علي و قد واكب طموح الفارسين
عبدالله و عبيدالرشيد للحكم وهو ما تحقق بعصامية شجاعة و مساعدة من تركيا و مباركة من آل سعود
لمعروف لهم عليهم.
ألقاب أمراء آل علي:
يلقب آل علي بـ مكاسر العنبر و السمن العرابي
علي الأول: (الكبير)
محمد بن عيسى بن صالح: (الأشمل)
محمد بن عيسى: (أخو خنسا)000
واما السبب في عدم اشتهار تاريخ العلي كما اشتهر تاريخ الرشيد
فهناك عدة اسباب كالتالي:
1- العلي لم يضربوا على الوتر الحساس الذي بثير الناس ويحمسهم وهو الاعتزاء في ولاجل القبيله وقد
منعهم من ذلك التدين ومتابعة الدعوه السلفيه الصحيحه وهو امر حماهم من الكثير من معارك جاهليه في
السلب والنهب او لاسباب لاتستحق واقتصر قتالهم بالدفاع عن النفس او لنصرة الدعوه000
في حين ان الرشيد كانوا يقررون اعتزائهم بالقبيله في جميع اشعارهم وامورهم وهذا شي له مكانته عند
العامه يفعل فعل السحر000
2-مكانة عبدالله وعبيد الرشيد الشعريه وكونهم من فحول الجزيره جعل ذلك دافعا للتغني بشعرهم وكذلك
بشجاعتهم المشهوره فوضعوا الاساس القوي لقبول امارة الرشيد بكل حال ايجابياتها وسلبياتها000
بل ان تعلق الناس بهم كان هو الدافع للناس بالعزوف اصلا عن الاستعداد للحديث بتاريخ العلي لكونهم
يرون انهم اعداء الرشيد سياسيا000
لذلك بعض ماقام به العلي لو قام به غيرهم لسمعت الناس يسولفون بهن كثيرا0000
والناس اذا قبلوا شخص تغاضوا عن سلبياته وتكلموا في ايجابياته فقط والعكس صحيح000
والانسان عندما يبتعد عن الحروب البدويه تدينا وخوفا من الله وليس جبنا فأنا اعتقد ان ذلك من ايجابياته
ان الله حماه من الدماء المسلمه0000
والعلي لابد ان يفهم القاري الكريم من خلال التواريخ التي ذكرت ان امارتهم قبل ابن سعود والدوله السعوديه
الاولى بكثير جدا وليس كما يظن البعض انهم اخذوا الاماره من ابن سعود00000
وخلاصة الامر ان الناس لايريدون اصلا ان يتكلموا بتاريخ العلي لانه باب اصبح
مقفلا مبدئيا بالنسبه لهم وهذا هو السبب يالغالي000000
تسلم يابوفهد على على النبذه عن تاريخ العلي حكام حايل
وأنا شغوف بقصصهم وتاريخ أمارتهم
وانشاالله راح نتاوله بموضوع آخر
[align=center]الأخ العزيز فواز الغسلان
سأوجز لك رأيي حول بعض ما طرح:
[align=right]1)أولاً معركة ظفرة :[/align]
ابو فهد ظفرة مناخ بدأه مفتاح الغيثي الذي أناخ لعنزة محارباً قبل أن يتتالى وصول باقي شمر ولم يعاهدهم بالله ويخونهم ولم تؤخذ عنزة على حين غرة بل بقوا متناوخين لشهور يوماً ترجح الكفة لهؤلاء وآخر لهؤلاء حتى تحقق انتصار شمر الصريح الذي وثقه الشعراء :puzzled:
وظفرة انتصرت فيها شمر نصراً كبيراً وهناك أشعار تدل عليه وليس صمود فقط والدليل أن عنزة لم يقتربوا من ديار شمر بعده حتى مقتل عقاب وحجاب العواجيه في زبار وريك الذي يبعد حوالي 150 كم عن حايل.
وغزوات الشويهري وقتله لفهيد ومحمد العواجي على عهد عقاب كان على موارد عنزة البعيدة عن حايل ، فكل ذلك يبين كم هي قيمة انتصار شمر في ظفرة
[align=right]2) ارم النعول لمغيزل العين يا حسين:[/align]
القصيدة مشهورة بكونها للأمير عبدالله الرشيد وقصة القصيدة والحال الموصوفه فيه الزوجه بالقصيدة لا ينطبق الا على امرأة حضرية تتأذى من وعورة الطريق وغير متعوده على المسير وليس لبدوية تقمز الجروف ولا تعرف النعول الا بالمناسبات السعيدة:thumb:
فالقصيدة بالتحليل المنطقي لقصتها لا تنطبق على التبيناوي ودرعه اطلاقاً:)
[align=right]3)التجاء عبيد للعواجيه:[/align]
القول بالتجاء عبيد الرشيد الى عنزة وخصوصاً العواجيه لمدة ثلاث سنوات وبعد مدة وجيزة من فاجعة عنزة بشيوخها وفرسانها (عقاب وحجاب والمرتعد) الذين قتلوهم شمر تخالف المعقول فلا أظن بأن الشيوخ سعدون الذي بقي سنين وهو يردد أذكار أبناءه ويحرض على أخذ ثأرهم من شمر بالملجأ المناسب لمثل عبيد الرشيد والذي هو وأخوه ثاروا على أميرهم حميةً لشمر ضد العواجي وقومه عنزة!
اضافةً أن أغلب بادية شمر هم من المرحبين والمناصرين لعبدالله وعبيد ضد آل علي فلما تجاوز كل أولاءك واللجوء الى العواجيه سيما وخصومه (العلي) بتلك الفترة لم يكونوا من القوة لمطاردته والبحث عنه بعيداً عن حائل!
وأخيراً عبدالله مر الجوف وجلس فيه مدة بسيطة وانظر الى تفاخر عوائل أهل الجوف باستقبالهم له وكيف كلٍ يقول نحن أكرمناه وعملنا كذا وكذا وينسحب الفخر الى القبائل التي تنتمي لها تلك العوائل الحضرية بالجوف ، فلما لم نسمع بتواتر من عنزة عن استقبالهم لعبيد وحمايته من آل علي وهم من هم بالتفاخر خصوصاً ضد شمر لما بينهم من تنافس لتجاورهم ولقوتهم!
[align=right]4) آل علي والرشيد[/align]
هما عينان في رأس القبيلة (الحكم ما بين الضياغم تدالاه) وكلٌ أخذ نصيبه من الشهرة والعلوم الغانمة ، فلكلٍ دوره ، وكلٌ تتحدث عنه منجزات وأحداث عصره سواء لما جلبوا من فخر لأنفسهم أو لقبيلتهم (شمر) .
تحياتي واحترامي للجميع[/align]
[align=center]
هلا وغلا اخوي الاصمعي وحياك انت وحوارك الجميل والموضوعي000
لكنك حسب مقالك الماضي ربما فاتك بعض الكلمات في مقالي الماضي واقول:
اولا-
لجوء عبيد بن رشيد لعنزه كان قبل مقتل عقاب وحجاب وقبل وقت التفكير بالثار اللي تقول انه يمنع اقتراب
عبيد للعواجيه 0لان عقاب وحجاب يالغالي مقتلهم كان في حدود عام 1253 للهجره يعني على ايام حكم
عبدالله بن رشيد وهذا هو الامر الذي يتهرب الرواة عن البوح به علانيه000
قال الشمسي من مطير:
عقاب العواجي :
قال الكاتب : [ قتلته شمر عام 1245 ] .
وهذا غير دقيق ؛ فعقاب العواجي له ذِكر في أحداث سنة 1253 00000
بذلك يكون من الواضح ان ذلك حدث قبل مقتل العواجيه000 وحتى لو كان ذلك بعد مقتل العواجيه فعادات
العرب معروفه بعدم التعرض لمن جاء العرب مسالما 0 وشمر وعنزه طول عمرهم يجلون عند بعضهم بالرغم
من الحروب بينهم0000
واما القول ان شمر عنده ومايحتاج لعنزه000 فهو فعلا ذهب لشمر وكلما اختفى بعض الوقت بلغ الخبر امير
حائل الذي يبحث عنه وكان يغادر خوفا من الاغتيال من جهه وخوفا من نشوب حرب بسببه000 واما قولك
ان اهل حايل كلهم كانو يبون ابن رشيد فأنت تقول ذلك اعتمادا على الحب والشهره والقدر بعد ذلك0 اما
في ذلك الوقت فلم يكن الامر كذلك والدليل هو ان ابن رشيد عقب ماحكم سنتين ونصف ووصلت حملة
الباشا قريبا من حايل واضطر عبدالله ابن رشيد للهروب عن حايل0 في ذلك الوقت رجع ابن علي للحكم مره
اخرى واستقبلوه اهل حايل بكل ود وتقدير0000
والشي الذي في صدورنا نحن الان من محبه للرشيد لم تكن هي نفسها في ذلك الوقت وهو بداية حكم
ابن رشيد ولم تتضح معالم امارته000
واما قولك عن اهل الجوف ليش ماافتخروا في ايوائه فالجواب ان اللي صاروا مزبن لابن رشيد هم اهل جبه
واما بعد خروجه من منطقة نفوذ العلي وسلطتهم فهو لاخوف عليه ولايحتاج مزبن وانما يحتاج الاكرام كضيف
والمده التي ذكرت لم يكن عند اهل الجوف انفسهم وانما كان عند الوالي ( عباس ) وفي ضيافته:
اللي قال فيها عبيد: العام خليتك علشان عباس000 واما لابن شعلان ماني مخليك
فالبعض يفسر البيت انه خوفا من عباس والحقيقه انه يقصد لضيافته عبدالله تسع سنوات اكراما وتقديرا000
ثانيا-
قولك عن ظفره انها طردت عنزه عن ديار شمر فهذا كلام غريب اخوي الاصمعي0 الا اذا قصدت ظفره الثانيه
اللي هي قمعه 000
والا فبعد ظفرة مفتاح وحتى قمعه اربع سنوات كانت عنزه تتخبص بحلاله نخيل اهل حايل وزروعهم وهو الذي
اوصلهم الى الخطه والتيم حيث وقعت قمعه 00
والا كيف وصلت عنزه لموقع مثل هذا لايبعد سوى عشر كيلوات عن حايل لو كان الامر حسب ماقلت000
واما مقولة مفتاح لعقاب الشهيره ( نعاهدك بالحاضرين واما اللي يجي من بعيد مالنا عليه حكم) فهي اشهر
من نار على علم وكان الدافع لمفتاح في ذلك علمه ان التمياط وابن طواله مقبلين من العراق والذين اتاهم
الخبر واستغلوا عنصر المفاجأه وفعلا انتصروا انتصار حقيقي000
واما استدلالك على القوه بغارات الشويهري فاقول والنعم لكن الشويهري كان يروح مامعه الا عشرين رجال
على خفيه للتمكن من كسب الحلال ولم يكن جيشا مدويا تسمع اخباره من البعيد ليدل على القوه الظاهره
وهذا واضح يالغالي000
والحقيقه هي ان سلطة عنزه على اطراف الجبل القريبه وكون مغزى هايس القعيط كان على وقت حكم
عبدالله ابن رشيد هو الامر الذي تتهرب عنه الرواة دائما وهو الحقيقه000
وسوف افصل فيهما بالجزء القادم انشالله00 اشكر لك حوارك المفيد والسلام00[/align]
[align=center]حوار اكثر من رائع
بين الراوي ابو فهد
واخونا الاصمعي " ابوخالد"
ولكني بناء على مانسمعه من كبار السن
والمعروف ان ظفره ظفرتين وليست معركه واحده
الاولى انتصرت فيها عنزه
والثانيه انتصرت فيها شمر
هذا والله اعلم[/align]
بسم الله الرحمن الرحيم
اولآ اشكر الاخ / ذيب سلمى على طرح مثل هالنقاش مع الراوي ابو فهد
ثانيآ راوينا وشاعرنا الغالي ابن غسلان من الثقات ويعلم الله اني كتبت الرد قبل اكمال القراءه لثقتي بأني سأقرا لمن يستحق ان تنمنحه الكثير من وقتك
والاحظ بعض التحفظ من ابو فهد لذلك اؤكد للجميع اني اصالتآ عن نفسي ونيابتآ عن ابناء عمي اسرتي ال رشيد وال علي مع مايقول راوي الجبل وضد من يعارضه فقد عرف عنه الحياديه
متابع
[align=center]ابوفهد اما هوشه والا شين تخبر الجوال عطن دقه بس :)
متابع معكم ...[/align]
اقتباس:
المشاركة الأصلية كتبت بواسطة مشعل الغفيلي
[align=center]
هلا وغلا اخوي الغفيلي000
وهي كذلك كما وضحت سابقا لكن ظفره الثانيه حنا نسميها ( قمعه ) وهو اسم خاص بشمر لانهم يرون
انها قمعة اطماع عنزه بحايل واللي حولها000
ظفره الاولى هي المشهوره لمفتاح الغيثي وظفره الثانيه هي المسماه قمعه وبينهن حوالي اربع سنوات
يالغالي000
وعندما يقال في الاولى ان شمر انتصرت فهي تقال لسببين:
ا- صمودهم في ديارهم رغم القله وحمايتها00
2- ان الخصم لم يظفر بمبتغاه منك الذي حضر من اجله00
اما هزيمه لعنزه واضحه وهروب فلم يحدث وانما طال عليهم الوقت 45 يوم لين عافوا بعضهم وكان القتل
اكثره في صفوف شمر لفارق العدد والقوه000
وهي تشبه معركة ( نطاق ) اللي تعتبر من معارك النصر لعتيبه على محمد ابن رشيد مع ان محمد لم ينهزم
ويهرب من ارض المعركه وانما غابت الشمس دون ان يظفر بشي من حلال عتيبه وكذلك كان اكثر القتل
في جيشه000
والله اعلم وتقبل تحياتي00[/align]
[align=center]وبك أكثر يابو فهد ويسعدني محاورة أمثالك لأني حتماً سأخرج بفائدةاقتباس:
المشاركة الأصلية كتبت بواسطة فواز الغسلان
طيب وش رايك يبو فهد نتحاور حول هالنقطة هذي أولاً؟اقتباس:
المشاركة الأصلية كتبت بواسطة فواز الغسلان
لأني أرى أنها ستكون مفتاح لغيرها من النقاط بما أني أقول بأن مقتل العواجية في تاريخ 1245 حسب ما قرأت وأنت تقول عام 1253 وبين هذان التاريخان دارت أكثر الأحداث التي نحن في مدار النقاش حولها واستنتاجنا التاريخ الصحيح من الكتب ومن الأحداث المعاصرة الموثقة سيبين لنا امكانية أن يكون عبيد لجأ عند العواجية أو لا!!
فأرجو أن توافقنا لبحث هذه النقطة أولاً ومن ثم الذهاب لغيرها لتعم الفائدة ولنصل للحقيقة المطلوبة.
لم أقل ذلك يا بو فهد أنا قلت:اقتباس:
المشاركة الأصلية كتبت بواسطة فواز الغسلان
((أغلب بادية شمر هم من المرحبين والمناصرين))
وهو استنتاج من لجوء عبدالله وعبيد عند الأسلم أولاً وذكر عبدالله لأبن رخيص وأهل جبة (سنجارة) وكذلك من خرج معه من المناصرين من حايل نفسها ومن اتصل بهم خلال مشاركته لشمر بضفرة والتي امتنع حاكم حايل من المشاركة فيها وغيرها من الأحداث.
أنا قلت يابو فهد ان أهل الجوف افتخروا باستضافتهم لعبدالله وليس العكس.اقتباس:
المشاركة الأصلية كتبت بواسطة فواز الغسلان
وقلت ليه عنزة ما افتخروا بحمايتهم لعبيد بما أنك تقول أنه لجأ عندهم هذه المدة الطويلة؟؟؟
من رأيي أن نناقش ظفرة (والتي هناك كلام كثير حولها ) بعد انتهاءنا من تحديد تاريخ وفاة عقاب العواجي حتى لا يتشتت الجهد وتتداخل النقاط دون حسم موثق!اقتباس:
المشاركة الأصلية كتبت بواسطة فواز الغسلان
سنتفق على ذلك عند تحديدنا لتاريخ مقتل عقاب أما حكم الأمير عبدالله فهو موثق ولا خلاف عليه:goooood:اقتباس:
المشاركة الأصلية كتبت بواسطة فواز الغسلان
فأتمنى الآن أن تورد أدلتك عن تحديدك لتاريخ مقتل عقاب بعام 1253 أما أنا فهي الكتب التي أنت قرأتها وتقول بخطأها:goooood:
تحياتي[/align]
متابعين وننتظر البقيه :) ...
موضوع شيق بصراحه ننتظر مزيدا من الحقائق والأدله عليها ...
تحياتي
شموخ
[align=center] هلا وغلا اخوي الاصمعي بارك الله فيك00
ولاباس من الوقوف عند النقطه التي ذكرت طالما اننا سنجني فائده رائعه00
واتمنى عدم انحصار الحوار بين اثنين بل نحن بحاجه لكل من لديه
فائده او معلومه لان حوارنا هذا ليس لاثبات من يقرر صحة كلامه
وانما لفائدة تاريخنا وتاريخ منطقتنا فلا تتركوننا من الحوار يالعزوه00[/align]
أشكر جميع الأخوه على مرورهم الكريم
ونتمى مشاركتكم الموضوع ومناقشته
أخي أبوفهد مساك الله بالخير
العواجيه مذبوحين قبل وقت عبدالله الرشيد
وتالي تقاظوا عيالهم من هايس القعيط
قبل تسلم عبدالله الرشيد الحكم بوقت
يدلك عليها زيارة غنيم الربضا
عبدالله الرشيد على أول حكمه
وكان رشيد بن طوعان حاضرن المجلس
وقال قصيدته اللي فزّع فيها ابن رشيد على غنيم الربضا
اللي قال فيها
يا غنيم عندك هايس نطلبك دين = خيال تالي شمر بالسنودي
ان كان ما جازاك عنها صباحين = ماهو ولد علي عريب الجدودي
وأتمنى أنك اجاوب على استفساراتي رد رقم 21
اقتباس:
المشاركة الأصلية كتبت بواسطة ذيب سلمى
[align=center]
هلا وغلا اخوي ذيب سلمى000
والقصه اللي ذكرت حدثت على وقت محمد العبدالله الرشيد المهاد ماهو عبدالله وربما حصل
لبس 00 لان محمد هو اللي اعطاه المهربات الثلاث وغزاه عقبهن اي بعد عبدالله
بحوالي 26 سنه يالغالي000 تحياتي العطره[/align]
مشكور يا بو فهد وما قصرت ويعطيك العافيه وربي من مستمعينك ومتابعينك يا بو فهد عجبني بالقصيده ((( بلا هونن بربعي نسل شمر
هم الميراد لاكثروا صديره ))) وشكرااا عبدالله البادي ابن جشعم
اقتباس:
المشاركة الأصلية كتبت بواسطة عبدالله الجشعمي
[align=center]
تسلم اخوي عبدالله وشهادتك اعتز بها يعلم الله00
تقبل تحياتي العطره000[/align]
اقتباس:
المشاركة الأصلية كتبت بواسطة عواد العلي
[align=center]
هلا وغلا اخوي ابوصالح الله لايهينك000
ولاتتصور كم اثلجت صدرتي حروفك وشهادتك والمكانه الغاليه والثمينه
التي وضعتني بها كرما منكم ونبلا في اخلاقكم كالعاده000[/align]
[align=center]ابو فهد !!اقتباس:
المشاركة الأصلية كتبت بواسطة فواز الغسلان
اشوفك عكست كل المفاهيم والثوابت اللي بروسنا !؟
فـ غير قصيدة " ارم النعول لمغيزل العين ياحسين " والتي نسبتها للتبانا .؟
ما جاء بكلامك اعلاه:puzzled:
فالثابت والمتعارف عليه والمثبت في الكتب ان المقصود بقصيدة رشيد ابن طوعان
[poem=font="MS Sans Serif,5,white,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
يا غنيم عندك هايس نطلبك دين =خيّال تالـي شمـر بالسنـودي
إن كان ما جازاك عنها صباحين =ماهو ولد علي عريب الجدودي [/poem]
صباحين = ولد علي هو عبدالله العلي ابن رشيد
وكان ذلك إبّان تولي الأمير عبد الله الرشيد الحكم في حائل وتوافد شيوخ قبائل
الشمال اليه لتهنئته وكل منهم يقدم الهدايا للأمير الجديد , ومن بين الذين قدموا إليه
غنيم بن بكر الربضا , وكان مهديا إلى ابن رشيد ثلاثا من الخيل , وقد قبلها عبدالله بن رشيد ,
وعندما كان غنيم الربضا جالسا عند أمير حائل , كان مع الجالسين شاعر شمر ابن طوعان ,
وكان مكفوف البصر , وطاعنا بالسن , فقال له الأمير عبدالله بن رشيد : هذا غنيم الربضا يا ابن طوعان
قم وسلم عليه , وعلى الفور أجابه ابن طوعان بهذين البيتين من الشعر , موجهها لغنيم الربضا يحرض
فيها عبدالله بن رشيد عليه .. وقال الأبيات المذكورة اعلاه:)
وهذه قصيده للشاعر المعروف رشيد بن طوعان يتوجد بها على عبدالله وعبيد ابناء علي بن رشيد
حينما غادروا حائل مجلين عن الديره ..وهذه القصيده هي سبب علاقة الأمير عبدالله بعد ماحكم حايل
برشيد بن طوعان ..
[poem=font="MS Sans Serif,5,white,bold,normal" bkcolor="black" bkimage="" border="none,4,gray" type=0 line=0 align=center use=ex num="0,black"]
ياسـيـف وشوا له تنادون لرشيـد=الله لايبلى بيوم ٍ جرى لي
دار ٍ جفت ريف المرامـيل وعـبـيـد=تعطى الخراب ويذهبون الرجالي
وش لي بكثر الملقحه والـكواديد=ياراح عبدالله وعقيل القبالي
صيور ماينزل غنيم ٍعلى فيد=تشوف من ينحى عذوب القتالي
تولموا للباج يأهل المعاويد=من له معيد ٍ يحتفظ بالريالـي [/poem]
ولدينا مزيد:)
ولكم التحية[/align]
ابو فهد
السلام عليك وشلونك يابو فهد
والله اني من المتابعين لك ومن المعجبين بحياديتك بالطرح لكن هالمره اسمح لي يابو فهد ابي اعارضك بأمرين
الأول : تقول ان عبيد زبن عند العواجية وانا اقول لا والدليل
اولا ً : الرشيد ما ينسون الجميل ابد والدليل ان عبدالله يوم جلوته ذكر كل اللي تجملوا به وشلون عبيد ما ذكر العواجية ولا بقصيده وحده
ثانيا ً : رواة عنزه ومنتدياتهم ما ذكروا ابد ان عبيد زبن عند العواجية والحدث هذا ما سهل لو هو زابنن عندهم كان كل عنزة دريو به وتفاخروا به الى يومنا هذا
الأمر الثاني : ان عبدالله اقام عند اهل الجوف تسع سنوات وهذا ماهو صحيح حسب ما سمعت من رواة شمر يقولون الرواة انه اقام عنهم عدة اشهر فقط .
اما القصيده ( ارم النعول لمغيزل العين ياحسين ) فأنا اوفقك الرآي انه للتبيناوي ماهي لأبن رشيد وهذا اللي سمعت من بعض رواة شمر .
واللي تقاضى لهايس من الربضا يقولون انه طلال العبدالله ماهو محمد المهاد .
[/B]
اقتباس:
المشاركة الأصلية كتبت بواسطة راعي الوقيد
هلا وغلا اخوي راع الوقيد000
وهذي من بركات اخوي اللي فتح الموضوع لان اختلافنا دليل على ان الموضوع يحتاج فعلا لتدقيق وان احدنا
كان فاهم غلط وسيستفيد من هذا الحوار واتمنى ان اكون انا اللي كنت فاهم غلط علشان تكون الفائده لي
وكما ترى اخوي العزيز انت قلت وقت عبدالله وانا قلت محمد واخوي المطني قال وقت طلال 000
والابيات مافيها توضيح للامير بالضبط وقوله ماهو ولد علي ماتدل على ذلك لانهم كلهم تنطبق عليهم لذلك
سننظر الى دلائل اخرى000
فكما تعلم عبدالله ابن رشيد كان حكمه ليس واسعا وانما شمل حائل والجوف في بعض الفترات وبذلك
تكون الاراضي التي خارج سلطته كبيره وواسعه جدا وشيوخ القبائل وامرائها ليسوا بحاجه للتودد لابن رشيد
واسترضائه بالهدايا ويكفي انهم يصيرون غربه او شرقه ويلقون الاراضي ليست خاضعه له000
عكس محمد الذي شمل الجزيره حكمه فهو الذي اشتهر ان الكثيرين اتوا اليه وتوددوا له ومدحوه بالقصائد
لكون الارض تحت سلطته وحكمه000
هذا من وجهة نظري وكنت اسمع طول عمري انه على وقت محمد المهاد وهذه اول مره صراحه اسمع من
قال انها على وقت غيره وسنجد الصواب انشالله من خلال النقاش والبحث العلمي الصحيح 000
ولعل احدنا يجد دليلا يحدد الوقت بالضبط والسلام000