الخاتم السحري جاب مردخاي....
( هذا الموضوع كان رد على الشبث بس ما وفق هناك قلت عاد ابي افرد له موضوع لحيله)
.........................
قاعدن ليلتن بهذا مع دخلة هالبرد وشابن لي نويرة واحط عليه من هشيم الاراطي .. لحالي مالي دبرتن الا تقليب الحطب على النار بالملقاط.. وانا شوف لي شي يلمع بغت تاكله النار .. وانا لك القطه بسرعه .. يمار خاتم مغبر ... وانا لك احكه واحكه واحكه ... وهو تطلع هكا الدخنة وترتفع فوق فوق .. واغمض وافتح .. الا قدامي عفريت مهرقل ...
قلت من انت .... قال انا مردخاي يا بعد حيي وميتي .... قلت هالاسم مهو غريبن علي ... قال انا اللي مرمطبي شبيثان .... قلت ياشين ما غير ثلاث نوبات اللي دجتبه .... قال اي ثلاث اي ثلاث .... هذا ما خلا محل ما داجبه ... وديته بانكوك ... وديته شاطئ العراة باليونان .. وديته هوليود وديته موزنبيق وديته راس الهملايا وديته .... قلت بس بس مصدقك .. وانا الحين متمصع ما اقوى اشيل روحي .. عشان كذا هجيت عن الابريق .. ولبدت بالخاتم .... وقعد يترجانن اني اعتقه ...
قلت ترن مني مثل شبيثان يمذرحبك باصقاع الارض القديم والجديد يحسبك فاوتشر ... لا انا انسان متحضر ولا ودي اتعبك .. بس ابيك تدينن ابي اشوف اجدادي الاولين لو شوين وارجع ... قال ابشر اركب ...
وانا لك اتوشلعه .. ويطير بي ويحط بي ... يمار انا بين لي بدوانن مفتلين الشوارب ... قالو يالله حيه .. من اي عرب انت .. قلت شمري .. قالوا انت زابنن عندنا .. قلت مدري .. من انتم .. قالوا هذا الشيخ عقاب والشيخ حجاب ... قلت تشرفنا .....
انا وش جابن عندهم .. وانا لك اتذكر ان ابو جدي امه عنزيه .. ومولودن هكا اليوم ... الله لا يربحك يامردخاي ...
قلت ياعقاب وانت ياحجاب يا خوالي ... تراكم مذبوحين مذبوحين .. ويبي يجيكم هايس القعيط ويدق فرتكم .. ويذبحكم ذبح شاة ... قالوا اعقب والله انت المذبوح .. وهم يتولجونن ... وانا لك اتوشلع مردخاي والكزه برجلي ... وهم يركبون الخيل وراي وعندك عندك عندك عندك ...
قلت يامردخاي طر بي يامال الهشله ... قال ما اقوى اطير ... انا متقفين الهوى ... قلت له ليه انت نسر ... قال لا ما بي حيل ... وعندك عندك اشوف رماحهم يميني ويساري ... قلت افتر بسرعه وانطح الهوى خيلهم ما تقوى تلف بسرعه ... واشوى وهو يتنطح الهوى ويطير بي فوق سما ... وطاح شماغي وعقالي ونعولي بس الطاقيه ماطاحت ... وهن يرحن كسب لعنزه...
يوم وصلت لدويرتي عند نويرتي .. وانا لك امسك الخاتم .. واطلع بالشارع .. الا هكا الصلبي محملن ددسنه حطب ارطى .. واوقفه .. واقعدلك ابرم على الحطب .. وادعس الخاتم بشق هكا الارطايه .. قلت توكل على الله ....
بس خلاص ...
