خطبتي ( شلعت تسبدي) ؟؟؟!!!
خطبتي ( شلعت تسبدي) ؟؟؟!!!
.
كتب لي الله انّي لقيت لي وظيفه .. الله مير يسلمكم |10|
وكتب لي الله اني اشتري سويويره ( سوني ---> دفع امامي ) يقولون ما تغرّز ابد :)
وكتب لي الله ان الشيبان يدبلون قاعه تسبدي ويبوني ادخل القفص الذهبي من اوسع ابوابه ..... عاد هنا جاكم العلم
الوالده تبي بنت خالتها يم البدو.. :(
والوالد يبي بنت جاره اللي في ذاك الله يحييكم .. وصديق الشبّه :(
وانا رحت فيها ما ادري وين كوعي من كرسوعي
عاد ما يحتاج اتغلّى .. قلت الرأي راي امّي
ونطلع من الرياض يوم الخميس الفجر .. من الرياض ليم البدوا بالنفود .. يقولون ماهم بنفود طريقهم به عزاز ( صلابه ) على ذمة مصادر الوالده الله يحفظه.
ويالله .. تغدينا غداء مبكر بالطريق .. وانحرفنا بزاويه 90 درجه شمالا ( على ذمة الماجلان اللي على طبلون السوني :) ) ما ناقصن إلا السلوقي والطير .
ويالله .. اسمع بالبطانيج انه تقل مطاب خراشي .. هذي درج :(
وبعد مضي زهاء الساعه والنصف ضاعت علوم الوالد .. مرتن يقول هم بهانّازيه ( هضبه مرتفه :) ) ومرّة يقول امّك تقول حول مراحهم يوم انا اخطبه :( ما اطوّل عليكم لقينا لنا وغد يرعى بلوه بهم قلت يباه ترى النّشده ماهي حرام . قال انشد وانا ماسكن لسانك :( المهم قلت ياولد ما تخبر الفلان ؟ قال : انا وغد وتخبر الوغد ما نسئل :)
قلت يباه ،،،، هاه وش هذا . قال مدرّس ملعون العصب . بس رح راحت ريحك .
ومشينا حروه الربع ساعه ، وننشد لنا عرب من عرب ليا عرب لياما لقيناهم العصير :)
والله والكرم الحاتمي ،، ,شبة النار . ما ناقصني إلا الديجتال كاميرا :)
تعشينا هاكالفطح .. وأنا بس اترمّز تقل على سبرنق ( نوع من انواع الياي :) ) مثل اللي يجي بقم الحبر الناشف الباركل بس إكس لارج :)
والله ابوي يفاتحوه بالموضوع .. ويجيك الرد اللي يبرّد الكبد .. قال عمّي :) مار الولد ولدنا وحنا شارينه . بس خابرين لازم ناخذ راي امها والبنت.
وهمز ابوي يوم صد عمي . قلت يبه العلم وشّوي . قال : اركد لا اتوادّس بطنك.
نمنا نومتن الله يعلم به . والفجر نمتطي السوني رايحين يم لنا ربع لنا ثانين مستحي الوالد يقعد له بعد يوم .. والوعد باكر الفجر .
ليلي ليل ارنب ،، بس اتقامز وعين فاتحه وعين مغمّضه :) صرت ذيب
ما صبرت لياما تطلع الشمس إلا وانا مشابط السوني .. وعجاجته بالخضيرا
اقبل على عمّي إلا وهو ببيت الشعر .. كش احسبوه نيم قلت اختلس النظر واشوف على الاقل شريكه حياتي :)
المهم .. طاط ياعم .. صباح الخير ..نسيت ان الهواء متقفّيني شوي وتاري عجاجة ا لسوني وراي وهي تغشانا مع بيت شعرنا :(
قال عمي : يالله صباح خير
اشوفه واقف واروح ابي اسلم عليه .. اتاريه يحلق عوارضه :(
قال عمي : ياوليدي وش مطيّرك هالصبح .. مصبحنا مع الطيور .. تعال لنا الضحى كان ما انت مفطر
قلت : لا والله ياعم انا مفطر .. زين ابي اروح وارجع لك الضحى .
قال الله يحفظك .. تركد ترى الجروف واجد.
من الطفقه والإشتطاطه قلت يمكن انّهم يختلسون النظر لي :) وانقز تقل جني بالسوني وقبل ما احط رجلي الثانيه إلا وانا ماعط السياره ----> بزعمي حرّيف :)
ياخي .. ما شفت وش قدام السوني ... المهم تجشّمتوه اتاريه حبل - لا ماهو حبل إلا واير حديد رابطين بوه نص البيت ، والمهم انطلاقته عدّها كيلة بارود .
وأترجل من السوني بعد عدة امتار .. عشان اشوف وش اللي صار
وش شفت شوفتن ما تسر لا عدو ولا صديق :(
البيت واقع . وعمي يغلغل راسوه يبي يطلع . وصابروه دمّان من موس الحلاقه .
يالله صباح خير
والله وشوف اللي نطحن بالسب والشتم .. هقيت انها العمه ، ومعها لها خشبه .
لا ماهي خشبه إلا بارود :(
والله وانا اتماكن عمري . اسمع الطخ والقزاز يتناثر
شوي يوم طار ما جلان من الطبون صايرن قطع
والله وانا اطير فوق الارض .. حتى البطانيج ما عدّهن خلقن :)
وعلمي بهم العام يوم المطر طاح ***** اليوم عشب الوسم كلّن رعابه :)
نصيت شايبي .. وقلت لوه قل لمّي ان البنت تطلبك الحل . قال ابوه : ايه قسمه <<<< ما يبيهم
قال الوالد / وين قزاز السياره وش هالضربات .
قلت : راعي شاص سقط عليّ بالردمية ويجاكرن واجاكره وهذه الاثار :(
وابيك بعد باكر تنهج يم جارنا فيذاك الله يحييك وخلّك من شور امّي.
ما صدّق خبر .. الوالد . قال قايل لك خلّك من شور أمّك
.
صراحه ما رحت يم جارنا صارت عندي عقده من الخطوبة وحاله مستعصيه جدا جدا
منهم لله .
