مشاهدة النسخة كاملة : معركة الجميما
كون الجميما
اخواني الاعضاء اعطيكم هذه القصه ولا احط بذمتي شي وانما بذمة الراوي,
بسم الله ابدأ...............
هذه الواقعه بين شمر وعنزه قبل سنة الجوف بسبع سنوات وناس تقول بخمس طعش سنه والله اعلم , وهذه المعركه لو انتصرت عنزه ضاعت شمر الشمال الحفر ورفحاءولاكن الله كان في عون شمر والقصه كالتالي :
كان ابن شعلان امير الروله جامع اهل الشمال وهم الروله وعنزه والشرارات والحويطات وغيرهم في الشمال , واتى ابن هذال من العراق ومعه اهل العراق
ليتقاسمو حلال واراضي شمروكان لشمر بيرق صغير لا يذكر مع زامل واتى من الصقور جيش كبير مال ورجال وغزوهم شمر واخذو حلالهم لان قبل جوع وهم داخلين في حرب وبدئة الحرب من عند ابن هذال لقد اتى ابن هذال الى الشيخ
سالم بن طواله زهو مع ربعه الاسلم وهم في رحيل واتى واخذ حلالهم وهرب
اما الحرب الحاميه وهي في الجميما وهي بركه في رفحاء وكان امراء شمر يتشاورون بينهم في هذا الحرب وقال مير من امراء عبده وقال اذا عقلو ابله نغزيهم ولم يايده احد وقال الشيخ برغش ابن طواله لا اذافكو ابلهم وضحت الابل نغزيهم وقال مانبي الابل نبي ديارنا وايدوه شمر كله وغزوهم شمر وذبحو ابن شعلان وذبحو الكثير في تلك المعركه واما ابن هذال فدخل على الشيخ سالم ابن طواله الذي اخذ ابله ابن هذال وقال الشيخ سالم ان ابن هذال دخيلي لاحد يجيه ولم تاتيه شمر وهرب ابن هذال وترك زوجته بنت ابن مهيد واكرمها الشيخ سالم وردها الى اهلها معززه مكرمه...
ورد الله كيد الاعداء في نحورهم والحمد لله رب العالمين ,,,,,
اخـــــــــــــــــــــــــــو حــــــــــــصــــــــــــــــه
الشيـــخ من له لابــتـــن يتبــعــونه = ماهو من الي كثرت فلوسه غدا شيخ
طلال صعفق الحافظ
11-11-2002, 10:26
شكــرا لك اخـــــوي اخو حصه على نشاطك البااااارز...
ذياب بن غانم
12-11-2002, 22:35
ياهلا باخو حصه ,,,
العهده على الراوي , ودايم ياخو حصه تختلف الروايات ,
بالذات مايخص االأحداث القديمه؟!
لدرجة اني شاك انك فعلا ً قاعد تتكلم عن كون الجميمه ..؟!
وهالكون صار سنة 1910/م1328هـ
بين الامير سعود بن عبدالعزيز الرشيد(ابو خشم)
والحاكم الفعلي خاله .
ومعاه شمر ومطير وغيرهم من بادية وحاضرة نجد .
اما عنزة فهم : فهد البيق ابن هذال ومعه(الجبل) من العمارات من عنزه
(الدهامشه ماحضروها).
والنوري ابن شعلان ومعاه (الروله) من عنزة , ومامعاه لا الشرارت ولا الحويطات .
يمكن الرواي خلط بين هالكون وبين غيره من معارك بن رشيد والشعلان.
وهم نازلين على الجميمه , وهالديره تبع لشمر .
اما ان ابن هذال غزى على شمر واخذ منهم , مادري عنها
ولكن طبيعي انه يغزي ويرجع , في احد ينهب ويجلس؟!
وفعلا ً كلامك صحيح قالوا مانجيهم وهم معقلين.
واتفق ابن رشيد ومن معاه من شيوخ القبايل
انهم يهجمون لااستفلت ابل عنزة , بعد مايضربون الدمام
حتى تهج البل , لأن كل عنزي بهالحاله يبـي يلحق ذوده ,
ويحاول يلمه ثم يوقف عليه ويدافع عنه مع بنيخيه ,
كن عليهم غزو؟!
لأنهم مايبون يواجهونهم جيش لجيش؟!
انما القصد انهم يجلونهم عن الجميما.
وهذا اللـي صار , ونزل بيرق ابن رشيد على الحله
وعنزة لحقت البل , ونهبت القبايل حلتهم.
اما قولك " وغزوهم شمر وذبحو ابن شعلان وذبحو الكثير في تلك المعركه ".
من المعروف ان شيخ الروله النوري بن شعلان مات امس بسوريا؟!
بعد وفاة ولدة نواف الشعلان(قائد الروله بكون الجوف اللي حصل بعد الجميمه)
قلت توفى ودفن في عذرا بعد وفاة ابنه الأكبر الأمير نواف بسنين عديده.
وكان نائب في البرلمان السوري؟!
ولم يقتل ابن شعلان؟!
ولم يذبح من عنزة الكثير , لأنهم - مثل مانت عارف -
من الأساس مخططين انهم مايواجهونها
وانما هدفهم اجلائها عن المكان , وتم لهم ذلك.
واما قولك : " واما ابن هذال (فدخل) على الشيخ سالم ابن طواله الذي اخذ
ابله ابن هذال وقال الشيخ سالم ان ابن هذال دخيلي لاحد يجيه " .
فينقضه قولك : " (وهرب) ابن هذال وترك زوجته بنت ابن مهيد واكرمها
الشيخ سالم وردها الى اهلها معززه مكرمه... " .
اولا ً : اذا حصلت الهزيمه على الجيش مجبور اشنع الفريس انه ينهزم بنفسه ,
حتى ايش لو هو مشعان بن بكر اخو جحله , ينهزم ينهزم , تاطاه الخيل ونذبحه؟!
وابن هذال وش سالفته ؟!
هو هرب وخلى مرته على قولك ,
او دخل على ابن طواله دخاله
من خوفه لايذبحونه؟!
ياخو حصه ابن هذال وعياله اذوادهم فاليه ,
وهجت من صوت الدمام ولحقوها
أو تبيهم يجلسون عند الحريم؟!
وش يبي بمرته يجلس عندها ؟!
كل خيال يركب فرسه وينطح عند نياقه؟!
وفكت عنزة حلالها , وما انوخذ منهم شي؟!
ابن هذال وبن شعلان ركبوا يطلبون اذوادهم
متى انذبحوا مدري انحاشوا مدري دخلوا
لا بالله الرجال وقفوا عند اذوادهم وفكوهن؟!
ثم ان حريم فهد بنات التمياط ثنتين وحده عنده ووحده مطلقها؟!
اللي مرته بنت ابن مهيد هو محروت ولد فهد!؟
وهكاللحين محروت عند خواله ورع صغير , وهو اصغر عيال فهد؟!
وما جا من خواله الا وعمره حول العشرين؟!
الـلـي قايلك السالفه مضيـع؟!
وعقب الجميما , جلا ابن شعلان لسوري
وابن هذال نزل الوديان على ابن مجلاد شيخ الدهامشه
وهاكالحين ابن مجلاد متعاشر مع واحد اسمه الاشقر
وهالاشقر من اهل العراق , مجمع الخلايق يبي يفني
بزعمه الهذال ويحكم مكانهم ومعه اهل العراق خلايق تخلق
وغيرهم من الترك , وصار بينهم كون الأشقر الكون المشهور.
قرر ابن مجلاد انه يفزع مع الهذال بعد ضغط شديد
من ابن ظبيان(من شيوخ الدهامشه) ؛ نتج عن المعركه فناء جيش الاشقر فناء
تام , لم ينج من جيشه سوى عشرة اشخاص , كان الأشقر أحدهم ؟!
وهالمعركه كارثه بشريه على اهل العراق , وهي مشهوره ومعروفه .
بعد الجميما بكم يوم , وهي الـلـي صار بها ذبح على العمارات
لكثرة اعدائهم .
اما الجميمه , ماصار عليهم ذبح كثير , وانما الـقتـلـى من الطرفين
وهذا صار عند البل , يوم طمعوا بها , لكنهم حموها , وكذلك عطفة ابن شعلان .
بل واخذوا عطفة ابن رشيد منه , ياما ردها منهم فيصل بن سقيان المطيري.
وقد قال احد شعراء مطير قصيده يذكر بها هـالـشي وهي قصيده
حديثه يقول بها على ماذكر : حنّا عاونّا شمر على الويلان ,
وقد رد عليه منصور الرمالي الله يرحمه بقصيده طويله تتجاوز
المائة بيت يذكر بها مفاخر شمر .
اما روايتك للجميمه والله مادري وش اقولك يارجل؟!
عسى ماطولنا عليك بس,,,
تحياتي لك ,
اشكرك على هذا التعليق وانا كما ذكرت في السابق انها على ذمة الراوي ماحط شي بذمتي , واشكرك على هذه المعومات القيمه التي كنت لا اعلمها . ذياب بن غانم مشكور,,,,,,,,,,,,,,,,,,
ذياب بن غانم
13-11-2002, 05:36
لاشكر على واجب ياخو حصه ,,
وحنا هنا نسامر بعض , ونصحح لبعض , ونستفيد من بعض
والقصد المعرفه والوناسه , وكل واحد يكمل الثاني .
ومثل مانت عارف الروايات تختلف عن بعضها كلن يرويها بشكل
وكذلك المراجع التاريخيه .
ويمكن يفيدنا عن هالسالفه أحد الأخوان ويجيب كلام
أحسن وأوثق من كلامي , رغم اني متأكد من اللي قلت .
ولكن كل ماتنوعت الأراء والمشاركات كل ماعمت الفايدة
على الجميع ...
وعساك سالم ,,,
طلال صعفق الحافظ
13-11-2002, 11:29
شكرا لكم على هالحوار اللي يضرب به المثل..
خوالي عنزة كلهم خير وبركة وأهلي شمر كلهم خير وبركة والحمد لله
وعزيزي >ياب ابن غانم.
بالنسبة للشاعر اللي يوق ل .
على الويلان ساعدنا الطنيا**** وردينا لعظمتهم يقينا..
فالقصيدة ل هايف ابن نعيم.. المطيري.. عليه من الله ما يستحق
والقصيدة . به الك>ب كثير ويكفي قصيدة منصور الرمالي بتفنيد ما قاله ..
وشكرا لك
Powered by vBulletin® Version 4.2.5 Copyright © 2024 vBulletin Solutions, Inc. All rights reserved, TranZ by Almuhajir