نتيجة مسابقة (فلّة الحجاج).. ألف مبروووك للفايزين

[مفتاح14]

بسم الله الرحمن الرحيم

والله ياجماعه مادري وش اقول لكن اللي اقدر اقوله اني فرحان(ن) فرحت(ن) ما توصف بنجاح المسابقة وبتفاعلكم معه سواء بالمشاركه او بالترشيح :)
ويكفي كاثبات على قدراتكم وابداعكم ما قدمتوه من مواضيع خلال الشهر الماضي ونتمنى ان هالمواضيع الرائعه ما تتوقف بمجرد انتهاء المسابقه !!

لاننا بصراحه بحاجة مثل هالمواضيع اللي توسع الصدر :)

(( أكيد كلكم تقولون اخلص علينا نبي النتيجه :) ))

<<---- شرهتك على اللي قرا كلامك اللي فوق..هالحتسي وهم يقرون النتيجه :D

======================
بس احب ابلغكم ببعض الملاحظات :
- تم حساب النقاط كالتالي: ثلاث نقاط لكل موضوع تم ترشيحه للمركز الاول
ونقطتين للمركز الثاني ونقطه لكل موضوع تم ترشيحه للمركز الثالث..
وبعد حساب النقاط كان هناك تعادل بين موضوع (سبب تسمية الفوتو شوب) (وموضوع الحسناء والمقرود).. وبعد ان اجرينا القرعه (نحن الشيوخ محارش ومفتاح14 :D) كانت من نصيب الحظيّظ ابو شهااب:p بموضوع الفوتوشوب :)


- تم الغاء الترشيحات اللي ما تنطبق عليه شروط الترشيح وكذلك الترشيحات المكرره

والنتيجه هي كالتالي:


الأول

يسلـــــــــــــموووووو................ للمقلع :D فيصل اللويش
والجائزه : اشتراك انترنت لمدة ثلاث شهووور مفتووح

الثاني

يوميات الفاضي(6).................. للزّاحف :D الفاضي
والجائزه : اشتراك انترنت لمدة شهر واحد مفتووح

الثالث

سبب تسمية الفوتوشوب.......... للمصرقع :D ابـــو شهــــاب
والجائزه : اشتراك انترنت لمدة شهر واحدمفتووح


وسيتم ارسال الاشتراكات على البريد الخاص لكل فايز خلال يومين على
الاكثر انشاء الله
===================

مبروووك للفائزين والف شكر لكل من شارك والود ودي اعطيكم كلكم جوايز لانكم بامانه تستاااهلوووون:)

<<--- ودّوه يعطيهم كلهم جوايز ويحطّهن بظهر محارش :D:D


width = 450 height = 250

ولا يفوتني ان اشكر المشرف الرائع الشيخ محارش واللي
بذل جهد كبير في سبيل انجاح هالمسابقه .. والله يجعل خشته
دايم كذا (( :D ))
<<--- ما يصبر الا يخرّبه بالاخير :p

هذا وصلّى الله وبارك على نبينا محمد وعلى آله وصحبه وسلم..

واستروا ما واجهتووو :) <<-- من مبطي وانا ودّي اقول هالجمله بس مالقيت فرصه :D

[دردب00]

مبروووووووك

للفايزين

<<<<<<< من قده اول واحد يهني

[ابو مشاري الشمري]

الف الف مبروك
للفائزين
ويستاهلون كل خير.

[محارش]

الف الف مبروووووووووووووووووووك للفايزين وعساهم من عواده :D

ومليون شكر للاخ الشيخ :D مفتاح 14 على مبادرته ودعمه :)

وهذي فرصه لي اني اشكر كل من تفاعل مع المواضيع وكل من رشّــح لاني بصراحه كنت متخوف من مسألة الترشيح وبغيت اختصر الترشيح علي انا وابو اربع طعش ونفسي بس :D

وبالمناسبه فالاخ مفتاح 14 لم يرشح مع ان صوته بصوتين ويوم نشدته وليه ما يرشح قال مخشوش ( الله من زين التصريفات عندك يابو جلنبو <<< نذل يوم انتهى كل شئ خربه معوه :D ) لا عاد من جد قال انه مستحي ( <<< على باله تصريفه اسنع :D )
الصحيح عاد انه عيـّـــا وبس ما ادري وش علمه ( تسان قايل من اول )

واما لو نشدتوني انا يامحارش عن رأيي فأنا والله والصدز حبيب الله اني مستانس مره وكل اللي فازوا يستاهلون بس الله حق كنت اتمنى يفوز موضوع يوم كل شئ يحتسي ولو انا مرشح تسان رشحته اول واحد وهذا رأيي الشخصي .
واعتقد اننا كسبنا الكاتب ابو طنب كموهبه جديده تستحق الاشاده فياليت يابو طنب لو تسجل اعجابي عندك وكثر الشطه الله لا يهينك :D

طبعا هذا ما يقلل من قيمة المواضيع اللي فازن بالجوايز واللي شاركن لا والله بالعكس مواضيع ممتازه لكن للناس فيما يعشقون مذاهب وانا هالموضوع بالذات جاز لي بالحيل بالحيل بالاضافه للمواضيع الاخرى .

شكلي طوّلته وهي قصيره عاد لا تنسون جوايزكم من ابو اربع طعش واذا ما عطاكم اياهن مالكم الا الحقوق المدنيه هي اللي تفصل بينكم :D

وبالنهايه احب اكرر مباركتي للاخوه اللي فازوا وهم

الشاعر والكاتب الساخر والعملاق الاخ ابو طلال ( اذا بوه واحد ينافسن على الالقاب فهو ابو طلال والظاهر اني ابي ازود لي لقب هالليومين علشان افرق عنه :D )

الكاتب الساخر والفاضي جدا جدا جدا الاستاذ الفاضي ( ماحد يعرف انه فاضي صحيح الا اللي مضيفه معه بالمسنجر لعنبوا بليسه بكل حزه تلقاه )

الكاتب الساخر ابو شهاب ( عاد هذا لا هاللحين ما طيحت الميانه معوه ولا تسان حشيته , قهر والله بس يالله اسمي مطيّح الميانه الله لا يعوق بشر :D)

وكذلك الكاتب فليحان اللي فاز بالثالث مكرر بس ما خدمه الحظ يوم تنافس مع الحظيظ ابو شهاب ولكن خيره بغيره يافليحان ولك جايزه من عندي كرتونين بسكوت ابو ميزان حويل :D

وتقبلوا اشنع واشرس التحيات من اخيكم

الشيخ الشاعر الرائع والكريم المتواضع
محارش_محارش

[اليم]

مبروك للجميع ويستاهلووووووووووووون

k14 ماقصرت على هالدعم ويعل هذا طبعك

خاص للفائزين اذا فيه احد مايبي جايزته يرسل لابو اربعطعش ويعلمه

يحوله لي:D

<<<<<<ما يخلي الشحذه:D

[طوفان]

مبروك الف الف الف مبروك
للفائزين
اخوكم ابوحمد

[المشرف العام]

شكرا اخي الكريم والفاضل مفتاح 14 على هذه المبادرة الغير مسبوقه..

وكذلك الاستمرار بنفس الروعه للنهايه..

لك شكري وتقديري وكثر الله من امثالك

مبروك للفائزين ..

وشكرا للشيخ محارش على الدعم اللوجستي :)

بس رد توقيعي وإلا ترى العد التنازلي .. بدا ...100-99-98-97....

[بشير اللويش]

الف مبروك


للجميع


للشبكه


للمضايف


للفائزين

وشكر خاص لاخي محارش


هنيئا لنا بكم ياكوكبة العمالقه

الى الامام دائماً يارب


تقبلوا تحيات اخوكم الصغير

الراسي

[الكتراز]

الف مبروك للفايزين
يستاهلون الشباب وبصماتهم واضحه في مضيف فلّة الحجاج سواء بالمسابقه او بغيرها
الف مبروك
فيصل اللويش
الفاضي
ابوشهاب
شكر خاص للقائمين على المسابقه


width = 435 height = 300

[عبدالله الجعيثن]

الف مبروك للفايزين

وشكرا محارشكو وصديزه مفتاح سرندل على الجهود اللى تخرع.

بالنسبه لي انا متنازل عن جايزتي للمحتاجين.

محارش ترى مرسليني الربع يقولون " عانيتك الله لايهينك"

ومشكور على النصيحه لاني اول ابضيفه على المسنجر!!!!!!!!!!!(مايدري يحسبه مضرب للشتاء). لكن هالحبن هووونت.

[ميزان]

مبروك للفايزين وعقبال الدوري >>>>>>> مصخن الحبيب

والشيوخ صراحه ماقصروا في بذل النفيس والغالي للارتقاء بالمضيف


خاص - محارش وشو البسكوت اللى تقول :eek:

[أبــ شهاب ــو]

بسم الله الرحمن الرحيم
وبعد شكرا شكرا(<<<--- صار هندي) :) على المسابقة يا مفتاح اربعطعش انت والشيخ محارش_محارش <<<---- علشانه فاز بس :)

والصراحة مدري شلون فزت وانا اصلا دايم حظي مثل وجهي بس الظاهر أن فليحان اقل مني حظ علشان كذا فزت :)


على العموم أبي أقول لمحارش حاجه لا احد يشوف غمضو

ترا أي واحد عدد ردوده أكثر من (1) بمكان ينقاله مضايف شمر تره يمون زي مونة أبوي علي :):) <<<--- عمركم شفتوا أكبر من مونة الابو شي

ويعني أكيد كل من بالمضايف يمون علي تحياتي

وأشكر مفتاح اربعطش على المسابقة وأحب أقول لفليحان هارد لك انشا الله بالمرة الجاية :)

[الفاضي]

طااااااااااااااااااااااط
السلام عليكم
صراحه شعوري شعور اي مواطن واي مقيم:D <<<<<بالله به احد ساله عن شعوره:D


الصراحه انا اشكر الشيخين محارش ومفتاح 14 على الجوايز القيمه والي تستاهل:D <<<<<بس عشان اشتركه قرب يخلص:D


وانا مادري وش اقول لكن مشكورين

وعموما تروا محارش ما تسذب بالي قاله ترون(ن) 24ساعه موجود على الماسنجر والي فااااااااااضي مثلي يسير وانشا الله يلقان(ن) هناك :D

بعدين يامحارش ترك خربت على ابو غازي كان يبي يضيفن وانت خليته يغير رايه والله قهر

وعموما ابارك للجميع

وتقبلوا تحياتي الفاضيه

[فليحان]

مــــــــبـــــــــروووووووك
لكل اللي فازو

ويـــســـــتـــــاهـــــلــــــون

وان شاء الله بالمسابقه الجايه اذا تنافست انا واياك يابو شهاب ما تشم الجايزه ;)

تـــــــحـــــــيـــــــــاتي
اخـــــــوكـــــــــم
فليحان

[ابو غازي]

الف الف الف مبروك للاخوان الفائزين

الحقيقة إنهم يستاهلون الجوائز

وكل الشكر والتقدير للشيخ محارش والشيخ ابوجلنبو اسف قصدي الشيخ k14 حيث هم شمعت المضايف ولا يهون الرائع طاااااااط قصدي الفاضي

تحياتي للجميع

ابوغازي :( :o

[سالم]

مبروك للفائزين ,,,,

فيصل اللويش _ الفاضي _ أبو شهاب

مبروك لكم وعاسكم على القوه ,,,




ملاحظه : اللي شبعان من الـ..................

يعطيني أشتراكه ,,,,,,,,,




ههههههههههههه

هههههههههههههه

هههههههههههههههه

ههههههههههههههههههه


_______________________-



تقبلوا تحياتي

سالم الشمري

الدمام

[نهّاااش]

مير مبروك ..

ويقطعون الجايزه بالعافيه

واتقدم بأسفي الشديد للشيخ محارش عن الانقاع المفاجيء

ولكن عساها تنفرج إن شاء الله

ويستاهل جميع الفائزين


تحياتي

[فيصل اللويش]

الغالي

مفتاح 14

والغالي

محارش

كل الشكر لكم ايها المبدعون

والشكر لكل من عقبوا او رشحوا موضوعي للفوز

كما ابارك للفائزين

واقول هاردلك للي مافازوا

وانا والله العظيم حطيت مو ضوعي بالبدايه ليس لهدف الفوز وانما لا عجابي بفكرتكم

وان كان هاالموضوع فاز اجل عندي اشياء ومواقف اكثر منه:D :D

بالعربي بغثكم بهاالمواضيع:D :D

وعلى فكره ترى الجايزه للحين ماوصلت

لا يكون هونتو:D :D

اشتكيكم عند الصارم ( وزارة التتجاره بالمضايف ):D :D


اخوكم 000 فيصل اللويش

[مفتاح14]

الف مبروك مرّه ثانيه..
لقد تم ارسال معلومات الاشتراك على الصناديق الخاصه للفايزين
واللي ما شيّك على صندوق رسايلوه يشّيك على صندوق رسايله :)

<<----- الله من زين الأسلوب :p

[سنجار]

مفتاح 14

الشيخ محارش


شكرا على جهودكم الرائعه

وهذا التفاعل الحي


واهني الفايزين

بهذه المسابقه

ونتمني للجميع كل نجاح وتوفيق


اخوكم سنجار

[أبو طنب]

اااااااااااااي
من مبطي وانا قرين مدحت (تروه مهو اسم واحد مصري... عكس سبّت) محارش
بس متعاجز ارد
<<< زول بعيد عنكم
المهم يا محارش مدحتك لي رجعت الثقه اللي كنت فاقده من ايام الطفوله يوم نذهب الى الرياض ونشاهد فيها سيارات كثيره وشوارع فسيحه وانخالن طويله
خش جو مع التعبير
المهم اني انا انا مهو هو انا ( اتحداكم ان كانكم فهمتو شي)
بنصوا
(يبي يعلمكم انه يعرف فرنسي)

[مفتاح14]

8
8
8
8
8
8
8

كح كح كح .. هالمغبّر منين طلع ؟!!! :P

من طول الغيبات جاب الغنايم :)

[أبو طنب]

اكيد من طول الغيبات جاب الغنايم مثلي
جبت دكتوراه في
رفع الضغط والضرب والمحط
واللي حضرته من سيبريا جنوب السودان 200 م عن كوالالمبور




ملاحظه / اللي فهم شي يفهمن ولامؤاخزه.