قصر مشرفه .. الى ابن العم فهد مزيد الجنفاوي

[عبدالله الوريكي]

حداني زماني يوم ضاقت بي الاقطار
على ضيقتن ماله علاجن يداويني

لهيبه على قلبي حرارة لهيب النار
احسه معي باقصى حناياي تكويني

تسمرت مثل اللي غدا بين غار ونار
تحيرت في حالي وضاعت عناويني

اغنّي على المنكوس واجاذب الاشعار
اسلي بها نفسي وانا الهم طاويني

علي ضاقت الدنيا كأنه متر واشبار
اسج القدم مدري على وين تديني

طلبت الله الرحمن والنافع الجبار
يسوق القدم لـ الديره اللي تسليني

وهداني على اللي مابعد دار مثله دار
ابغنم زماني بين خضر البساتيني

اخاوي طويل الدرب ضاري على الاسفار
عسى ربنا يبعد عمس خاطرن شيني

على اللي نشوفه دوم في نشرة الاخبار
يسوقه ولد سلمان نسل السلاطيني

ليا جاب طبلونه عن ارضه تضنه طار
تقول الرفارف طالعن له جناحيني

تولاه نازين وصمم عليّه اشعار
مثل نجمتن بكتوف ضباط برليني

ليا مر بالسكه وحيفه تقول اعصار
تحدوا به امريكا مع الروس و الصيني

مصمم لجل طرقه ولاهو لجل مشوار
في سوق البلد ولا مدارس وراعيني

على مورسيدس مايصيدونه برادار
ليا طاح طبلونه تحت خط ميتيني

ركوبة طنيخة قوم ماجمع الدولار
بسعره يسوق الكاش ماياخذه ديني

انا يوم اتله شوق والشوق جدن حار
على جموع ربعي لابتي والمحبيني

ديارن عسى ماتنقطع عنه الامطار
ديار الشرف ماتقبل الا شريفيني

جبل شمر اللي شاع ذكره مع الامصار
وشمر كرامن يمدحونه كريميني

طنايا هل الردات والصارم البتار
ارموز الشجاعه والكرم له عناويني

هل اللحيسه اللي تكرم ضيوفها والجار
على مارث الاجداد للحين باقيني

قبل راعي العوجا يوحد ركون الدار
واخذ بيعة الشجعان للحق والديني

عليها الامان بظل شمر عن الاشرار
حمينا ثراها وارتعن البعاريني

من خشوم صبابه وسلمى ليّا سنّار
ورمان حامينه من اول الى اللحيني

معاقل اسودن تدقم العايل المكار
على مثلنا زانت لحون المغنيني

من رجالنّا خصيت من شاع بالاذكار
عروقه جحيشيّه ترى منّي وفيني

هل الجيره اللي جارنا سالمن ومجار
ونحمي جنابه ساعة العسر والليني

مضيفه غدا متحف تعناله الزوار
وانا واحدن منهم ولا صدقت عيني

محله مثل حبشي شمخ عالي الاسوار
مضيف وغرف هوتيل ماهي من الطيني

نوايع نخل واشجار بغضونه الاثمار
وماسر عين الادمي ياجد الزيني

يغدي يعشي والضحى وجبة الافطار
تعلّى بها ذكره على راس علّيني ‏

ياليت الاماره لو يحطونها وجهار
على خط حايل لوحة ارشاد وتبيني

قصر مشرفه يبعد مسافة كذا وامتار
وحياكم الله عند طلق الحجاجيني

ويصنف معالم تابع لهيئة الاثار
سعودي بناه ابلا اختلاسن ولا ديني

و زوار حايل كلها كبارها وصغار
من اقصى البلد ولا من ديار الادنيني

يجونه قبل حايل يشوفون عز الكار
دلالن مثل صفة صفوف المصليني

بناه الكريم اللي مايحُسْبَ من التجار
لأن التجارةّ كنّز قرش وملاييني

وبانيه والله ماجمع صِرّة الدينار
نثرها بسم ربعه على فعله الزيني

فهد مزيد الهدمول ياوجهة الخطار
عسى الله يطول عمرك سنين ودنيني

وعسى مثل ابو مزيد معانا دبل وكثار
واعيذه من اعيون البشر والشيطايني​