من عزّ نفسه وجدها

[رشيد]

.
.
ياربي المعبود جلاب الأرزاق
محيي العظام البالية من لحدها

الواحد اللي مالكٍ كل الأفاق
قاضي حوايجها ومحصي عددها

محيي الهشيم ومنبتٍ خضر الأوراق
في نوض بارقها وحنة رعدها

لي في رجاك ان كشّر الوقت معلاق
وفي رحمتك عيني تحرا سعدها

ان جا لعيني من حلا النوم سراق
وتعذرت حلو الكرا من سهدها

كبرت محاملها على كل الأطواق
يصدر بها همٍ والآخر وردها

عجزت عن الحيلة ووقف بها الساق
والنفس شامت لين كمل جلدها

اليوم سايقني من الغبن سواق
كيد الليالي نزعة من كمدها

والله خلقنا روس وانفوس واعناق
قال المثل من عز نفسه وجدها

عزم ماهوب لغبة العز شقاق
سابق بيوت العز يكسر عمدها

وقلبي مجريني على بعد وفراق
ظلم الوجيه السود للي عبدها

ولولا اختلاف الناس نظرات واذواق
مادبرت عوص النضا من بلدها

رجلي على البيداء لها كم مطراق
تسوج لين الله يقرب وعدها

مانيب طير يمسكه كل مسباق
حرٍ الى شاف الخضيرا بجدها

-
#شعر // #شايع_العيافي
.