قوى العزوم

[رشيد]

.
.


لا جفاك الزمان وحاصرتك الهموم
دور اللي يشيل الحمل وشتك علاه

واحدٍ لا نصيته في اللوازم يقوم
قومته تبهج الخاطر وتروي ظماه

ما يشيل الحمول إلا قوي العزوم
والضعيّف ضعيّف ما ربح من نخاه

الرفيق الوفي تلقاه عند اللزوم
مثل بيتٍ إلى احتجته يذري ذراه

جاهزٍ للدفاع وجاهزٍ للهجوم
يا الله تكثر أمثاله وتحيي نباه

ثابتٍ مثل ضلع (طويق) بين الرجوم
لو تهب الهبابيب ما تحرك حصاه

وفاهمٍ في العوايد فاهمٍ في السلوم
طيب الساس حرٍ ما يبي له وصاة

ذاك والله رفيقي جعل عمره يدوم
يسعد الله صباحه يسعد الله مساه

أتشرف بمعرفته وأقول محشوم
حشمته عندي اكبر من جبال السراة

اذكره كل ما هبت عليّ السموم
هو رصيدي وبنكي في بنوك الغناة

يا عساهم تحت ما طاه كل الرخوم
ويا عسى الله ف ها الدنيا يطوّل بقاه

القصايد بمدحه تحتفل كل يوم
ولو مدحته بشعري كيف بلحق جزاه

والمراجل صعيبة ما تجي بالعلوم
ما تجي كود بالمجهود طول الحياة

يتعب الرجل ما حقق كثير الحلوم
والصبر يوصل الرجال غاية مناه

والليالي تراها لو صفت ما تدوم
مير يا الله توفقنا طريق النجاة
.
.
#شعر// سهل بندر المقاطي
.
.