مد النظر

[عبدالله المفضلي]

انا ان رسمت الشعر بالفكر فنان = مثل الجواهر يقصر النقد دونه
اذبح فدي وادفع مع الفدي قربان = اليا عرضته عند من يجهلونه
اللي معاديني على غير برهان = شعري مزعّلهم ولا يرغبونه
يبوني اطبّل مع فلان وفلان = وانا قصرت خطاي عن هالنمونه
شيبان كثر اسنين وعقول صبيان = في مجلس ابو الهول ويقّدسونه
بيض الفجوج وساع والكون ميدان = تسوى مجالسهم رموز المهونه
مد النظر في صحصحاً يفرح الجان = وصفة علاج اللي تزايد شطونه
سقوى سقى الله لأهمل الغيث هتان = وبل المطر قامت تشكّل فنونه
تطغى ترانيمه على صوت الانسان = تنزل على روس الروابي مزونه
فضلاً من المعبود يعطيه بإحسان = للمستغيث اللي يبوسً شنونه