ورّدوهن هيت

[عبدالله المفضلي]

ورّدوهن هيت والساري خلاوي = والموارد دونهن ذيب المغاره

ما يرد المندفع واوي وعاوي = كان ما صلى صلاة الاستخاره

ما بلغت مناك يالراس المراوي = راح كل العمر من عمرك خساره

ماتت الاحلام من كثر البلاوي = بين جال وجال طيحه وانحداره

وين مجلسك المزخرف يالفداوي = عن يمين الشيخ والا عن يساره

يا خسارة لبست البشت الحساوي = كان ما راعيه تزهاه الاماره

في بيوت اهل الردا شرب القهاوي = علقماً ما تنجلي لذعة مراره

ليت ظلم الوقت يأتي بالتساوي = كان بعض القوم ما ضيّع وقاره

استهان الديك بالحر النداوي = اعتلى وكره ويكفخ بالصداره

الفعايل غير تنميق الحكاوي = والخداع المفتعل ماهو شطاره

في متاهات الظما ضيعت هقاوي = والسراب يغطّي البيد بغزاره

عز نفس الرجل ما يبغى فتاوي = دوس جمر الذل في عزم وجباره

الخطا ياللي على الجزله شفاوي = يوم بعت برخص في سوق التجاره

كان ما طاوع لنا الوقت القصاوي = ما يساوي عندنا قطف الزقاره