% نقاط تهم المستجدين في مجالات الحياة %

[الشبث]

السلام عليكم


اسعد الله جميع اوقاتكم بالمسرات


من واقع طبيعة عملي


كلفني مديري بأن استقبل اي موظف سعودي جديد

يستمر معي فترة التجربه ( ثلاثة اشهر )

يكون في غالبها معي ( من قرد حظوووه :) )


احد الاخوان الجدد


وجدت صعوبه بالغه معه في كيفية تطوير ذاته

اقوله يمين

يروح يسار


اقوله تحت


يروح فوق


احياناً اعانده اقوله رح يسار ( ابيه يروح يمين )


ويروح يسار مثل ما قلت له :)


المهم ان هالاخ الله يستر عليه ما يعرف مصلحته نهائياً


اخر شي اليوم مديري قالي ابي ارفع اوراقه للاداره يبي ينتفه :)





سواء كان في مجال عمل

او حتى هنا بالمنتدى

او في تربية الابناء



من وجهة نظركم اخواني واخواتي


ماهي اهم النقاط التي يجب على الشخص عملها ليطور ذاته ؟



قرأت عن الاخلاق

والاهتمام

والحماس

والابتسامه

و .. و .. الخ



امور عديده



اريدها منكم انتم


وفي اي مجال




وتقلدوا تحيتي

[الشبث]

:)


بالخير يا ريال



بالخير يا بالمختصر



ولا كلمه


قسم بالله تقبس :)



كأنكم ما شفتوا شي :)




وتقلدوا تحيتي

[ريال الفسحه]

هههههههههههههههه

اثبت ع مذهب نشارك والا
نبله العافيه :)

[سالم الظفيري]

تطوير الذات هو مهمة مستمرة دائما لا تتوقف عند حد أو عمر


أهمية التطوير الذاتي للإنسان وأنه جزء من حياتنا
وإهمال الإنسان له قد ينتج عنه مجتمعات متقهقرة لذا وجب علينا الاعتناء بالتطوير الذاتي
حتى نسمو بذاتنا ونصبح عنصر فعال في أسرنا و مجتمعاتنا وعالمنا

طيب انت ليش ماحاولت ان تطور ذات المسكين
وتخلي المدير يصبر عليه شوي


طرح رائع ومميز

لاهنت


لك تحياتي

[-------]

موضوع مهم جدا جدا..

تعجبني مثل هيك مواضيع

راجعة ومعي عدة استفسارات للمناقشة

مشكور ابو ماجد


تقديري

[الشبث]

ريروو << يعني تدليع ريال :)


شارك يابخت البيوت اللي تكسرها :)


وتقلد تحيتي

[الشبث]

أهمية التطوير الذاتي للإنسان وأنه جزء من حياتنا
وإهمال الإنسان له قد ينتج عنه مجتمعات متقهقرة لذا وجب علينا الاعتناء بالتطوير الذاتي
حتى نسمو بذاتنا ونصبح عنصر فعال في أسرنا و مجتمعاتنا وعالمنا


كلام حلو يابو زياد

بس للاسف انا ما اقتنع بهالكلام لانه وكما يقال عنه كلام انشائي

ياليت لو تفصل شوي وتذكر بنقاط محسوسه يكون افضل





طيب انت ليش ماحاولت ان تطور ذات المسكين
وتخلي المدير يصبر عليه شوي

طيب انا ليش منزل هالموضوع

علشان تفيدوني

واستفيد بالمرات الجايه كيف اجبر الشخص يطور نفسه







لاهنت يابو زياد



وتقلد تحيتي

[الشبث]

اهلين ايثار


انتظرك


وانتظر من الاخوان يجيبون على استفساراتك :)



لاني مثلك لا اعلم :)




وتقلدي تحيتي

[الاصمعي]

يصار مامرٍ يزغرت بالأكباد**ترى الموصي يسفه الي موصيه

المشكلة هالحين يظل الشاب محفول مكفول وبدون أي مسئولية ولا انتاجية لين يكمل تعليمه همن هو وحظه ان حصل تعيين سلك مثل الي قبله ولا يظل يصافق هالدنيا لين تشيب به أو تقوى مناعته ويشتد عوده وينجح

يعني الي ما يتعلم من نفسه تعلمه صكات بقعا

تحياتي

[الشبث]

^

بعضهم صكات بقعا يخبلنوه :)




المشكلة هالحين يظل الشاب محفول مكفول وبدون أي مسئولية ولا انتاجية لين يكمل تعليمه


طيب بهالوقت هذا يابو خالد مو المفترض على ولي الامر تعليم ابنه ؟

اقل شي يحاول يحسسه بالمسءوليه ويشركه في كثير من الامور


ويحاول يعلمه الاعتماد على النفس ؟


هي نقطه سلبيه ان يدع الاب ابنه حتى يتم تعليمه وينتظر صكات بقعا



مهو حرام هاللون :)




مرور رايق على هالصبح




وتقلد تحيتي

[ريال الفسحه]

راح أتكلم عن التطوير فـ العمل :

• الشخص إذا ما كان مُحب لعمله لن
ينجح ولن يكون إنسان منتج كما هو
مطلوب منه ،

• عدم التحكم بالمشاعر يعيق إنتاجيّة الموظف
لذلك تجد الشركات الكُبرى تهتم بنفسيات
موظفيها وتوفّر لهم الراحه حتّى خارج
العمل ،

• العدل والإنصاف في العمل يجعل الموظف
يطوّر من نفسه سعياً للافضل .


كل هذه النقاط وماشابهها يعيق تطوير
الموظّف ويحد من انتاجيّته ،

نقطه أخيره بخصوص الموظف اللي جابوه
لك أنا طالبك دلّوه على مخارج الطواري لان
اتوقع مصنعكم راح يحترق :)


اعذرن ع الاختصار كيبورد الجوال متعب


متعب والا راشد << براااا ياتسلب

[بالمختصر..]

،





أقترح عليه يقرأ كتب عن الإداره ..

درسنا مادة الإدارة العامه بـ الكليه و بصراحه تنفع كثير للموظفين المستجدين ..




.
.

[الشبث]

ريالي


ما تشوف ان هالنقاط موجهه لجهة العمل

يعني الضعيف راح يكون تحت رحمة هالجهه


وش يسوي لو جهته ما طبقتها ؟




وتقلد تحيتي

[الشبث]

اختي بالمختصر


الرجل كتب لي رساله ومن ضمنها فيه كلمة رصيدي

كاتبها كذا ( رسيدي ) :)


الرجال ما يطيق شي اسمه قرايه

يبي له حقن :)





وتقلدي تحيتي

[الجازي]

وأنت ليش قاطعن قلبك تبي رسيدي يتطور :)

شوف يابو ماجد التطور غريزة فطرية نشيطة

اذا شفتها خاملة عند شخص اعرف انه هو بإرادته مقتنع بخمولها

عاد يعرف مصلحة نفسه والا مايعرف هذا شيء مايجهله

هو عارف إن التطوير سبب النجاح

فخل بقعا تصكه لين يطلع له قلب وتنشط هالغريزة فيه :)

وأنت اشتغل على نفسك وطورها واستثمر كل ثانية دام فيك حيل ورغبة

ماتدري عن الدنيا ترى :)

[الشبث]

^

شقصدتس


يعني قرب يومي << بلع العافيه :)


بس يا خالتي شلوون يدري ويطنش ؟


وش الداافع له انه ما يطور نفسه ؟


او انه بس اتباع اهواء نفسه ؟





وتقلدي تحيتي

[الجازي]

أبد وأنا خالتك

زوالة

ليش العالم كله يتطور الا مناطق الزولة في أفريقيا !!؟

لأنهم مايبون يحركون ساكن

عاجبهم وضعهم لأنهم يحبون الكسل

والتطوير يبي حركة وشغل وهم مامن حركة لبى قلوبهم فديتهم :d: <<<<< طلع الصدز :)

[الشبث]

^


فديتيهم :puzzled:


اهااا علشان صديقتس ريم

توي فهمت :)




ممكن الزواله له دوره



وتقلدي تحيتي

[غالب الجعفري]

؟؟
أنا من بداية الموضوع وقراءته كامل كاتب الموضوع فاهم أخطاء
بالتطور على باله أن هذا الموظف أذا ما تطور المدير ينتفه من وظيفته

وش ينتفه هذي, لا أخي بنود العقود الجديدة من عام 2001 م تغيرت

أول بند الشركة أو المؤسسة تحول الموظف قبل يباشر عمله إلى مركز

تطوير يعطى كورسات حسب مهنته وعمله اللي يزاوله وله فرصه تكرار

الكورسات أذا لم يجدي في الفترة الأولى ولا حد يغير وظيفته إلا

بتقرير مفصل من مركز التطوير وتصادق عليه الجهة التابع لها المركز

تحت توقيع ثلاث من المطورين أن المذكور لا يناسب هذه الوظيفة ذلك

نوصي بتغير وظيفته إلى الوظيفة كذا ....................

والآن ما فيه تفصل موظف على مزاجك إلا شي يخل في الأمن والخيانة

والشرف فيه حقوق إنسان ومؤسسات الدولة اللي تختص في هذا الشأن أخر شي المظالم.

[ريال الفسحه]

رسيدي خلوه يفصل ويجي عند سالم
يدرسه كتاب الادب المنهلس للاديب خالد مسعد هههههه

[سالم الظفيري]

ريال

الحين انت مستنقد خالد معسد

اقل شي احسن منك قال له بيتين

ريال من اقوال خالد مسعد

نقاط مهمة لتطوير الذات
1-حدد نقاط ضعفك و اجتهد في تغييرها
2- حدد نقاط القوة لديك وركز عليها
3- تخلص من عيوبك
4-حدد اهدافك في الحياة
5- نظم وقتك ورتب اولوياتك
6-اقرا احسن ما كتب عن الناجحين
7- تلعم فن الحور و الاستماع
8-نم قدرتك على التفكير والابداع
9- تعلم بعض المهارات الجديدة
10-ثابر و اصبر

[الشبث]

أنا من بداية الموضوع وقراءته كامل كاتب الموضوع فاهم أخطاء
بالتطور على باله أن هذا الموظف أذا ما تطور المدير ينتفه من وظيفته




هلا اخوي غالب


لا والله يالغالي ماني فاهم خطاء

الا ينتفه وينتفه عشره مثله

وياما تنتفوا قدامي وانا اشوفهم :)

انا اول مره اسمع بنظام التطوير اللي انت تقوله

اللي اعرفه ان نظام مكتب العمل لا يجيز لاي مؤسسه فصل الموظف السعودي الا في بعض الحالات

ولكن الاهم واللي لازم تعرفه اخوي غالب

ان لكل موظف جديد فترة تجربه ثلاث اشهر يحق للشركه انها تمشيه اذا مو صالح للعمل

سواء لسبب سلوكي او انضباطي

وللشركه الحق غي غصل الموظف السعودي اذا اعلنت الشركه افلاسها

وفي هذي حيله او ثغره قد تلجأ لها بعض الشركات

ايضاً تراكم الانذارات وهذا شي ثاني


ولكن كموظف جديد يحق للشركه تمشيه خلال فترة التجرب اللي هي ثلاث اشهر

بدون ما يكون على الشركه اي شي




وتقلد تحيتي