من حاير دونه عن الذاري ذرا ..!!

[راعي الوقيد]

http://www.haljaber.com/images/stories/huzn3.png



من حاير دونه عن الذاري ذرا
بين الضماير ما بعد سار وسرا


ماله من الأسباب ماجوب دعاه
عن غفلته ينهض بعد طول الكرا


إلا على علم من الراوي وكاد
مثل العلم فوق الطويل الأسمرا


من شان يدري من عرف معنى الكلام
إن المعاني ماتجي تدرج عرا


لولا إحساسي بالمصيبه ماظهر
مكنون نفسي شارته دمع جرا


إن قيل منهو قلت معلوم حمد
ابن محمد من جهل مني درا


من سلسلة جابر بلا شك وريب
الخالدي من روس قوم تذكرا


عاش بحياته مثل ماعرفه عفيف
عن الرذايل كلها منها برا


من شبته مصيون من فضل الإله
ما فاوهت نفسه لْشيٍّنْ منكرا


كل إلى منه سمع يذكر بخير
بسمه إلى منه به المجلس طرا


أمْسا مع الربع المشاكيل الحشام
ربع تقل بالطيب والجود خشرا


أمسو بخير وفي هنا ليل سعيد
والصبح من باكر حصل ما كدرا


جاهم خبر ما غيًّر مْزاج الجميع
عقب ارتفاع الشمس والصبح أسفرا


أمسٍ وهو معهم على البيدا جميع
واليوم عنهم غايب تحت الثرا


لاجيٍ بْجيرة خالقه رب رحيم
في منزل فيما يريد وقدرا



قصيدة قالها الشاعر : محمد بن ابراهيم السلمان رحمه الله
في رثاء الشاعر حمد بن محمد الجابر

[عبدالرحمن]

رائعة يسلم ذوقك الراقي العزيز ابو فيصل.
رحم الله تعالى الراثي والمرثي.

[سالم الظفيري]

صح لسانك ولسان الشاعر

لاهنت يابو فيصل على النقل والاختيار

الرائع


لك تحياتي

[راعي الوقيد]

ياهلا والله ابو يوسف
تشرفنا بمروركم الكريم يالعزوة
ولاهنت

[راعي الوقيد]

صح بدنك اخوي ابو زياد
لنا الشرف بمروكم الكريم
دمت

[ام الرغفان]

صح لسانك ..


ورحمهم الله جميعا ..

[الشبث]

صح لسااانك يالذيب على هالرائعه



اختيارك راااايق ومن الوزن الثقيل







وتقلد تحيتي

[راعي الوقيد]

صح بدنتس يالشيخة
تشرفت بمروك الرائع
دمتي بود

[راعي الوقيد]

صح بدنك ياجدي هالوجه :)
وتسلم يالغلا على هالحضور الرائع
لاهنت يالعزوة

[جمران]

تتعب تقول روووعه


أبو فيصل



لاعدمتك يابعدي

[راعي الوقيد]

الله لا يخلي منك ابو نورة
مشكور على المرور يابعدي
ولك التحية

[عبدالله الجعيثن]

أمسٍ وهو معهم على البيدا جميع
واليوم عنهم غايب تحت الثرا



روووعه يابوفيصل


دائم اختياراتك جزله

[راعي الوقيد]

من ذوقك يابو غازي
مشكور ع المرور يالغلا
ولك التحية