% وش اسم ولدك .. اللي بوه ضغط يبعد نبي نتذابح :) %

[الشبث]

بسم الله الرحمن الرحيم << علشان اذا مات يموت شهيد :)




يا الربع والربعات


القريبين والبعيدات




كلكم اكبر مني واعلم مني بسلوم شمر وحركاتنا القديمه


فيه بعض السلوم شي لحد الان مطبق

وبعضهن اندثر << يا مندثر انت :315r:



وبعض السلوم مطبق عند ناس وبعضهم لا



هكا اليوم جانا واحدن من الربع بشبة


وكان فيه واحدن مهو شمري


سألوه الربع وين انت ومنين جاي


قال ولدي فلان جاوه ولد


وابيكم تختارون لي اسم



قال اللي مهو شمري ليه ما تسميه فلان على اسمك



قال افااااااا

ولدي يسمي ولدوه على اسمي وانا حي ؟


علي بالحرام ما يسميه لو وش ما يصير









انا اعرف ان الولد ما يسمي على ابوه وهو حي


وهذا سلم عند شمر او بعض شمر على الاقل


حتى فيه بعض القبايل يطبقون الشي هذا







ابي تحليلاتكم


وارائكم


والمجال مفتوح للنقاش بين الجميع


اللي قاهروه رد لا يردوه الا كيبوردوه يعجن بوه وجه اقرب واحد :)




وتقلدوا تحيتي

[شموخ شمالية]

.


,


ياهلا والله بـ أبوماجد
شرفت الاسري


ثواني بطفي لمبات الأسري لان نورك غطى عليهن :7ayyoh:

ياهلا
ياااهلا




هالرد للترحيب ولي رجعة للرد ع الموضوع

[الاصمعي]

ولعي اللمبات أبي أرد ولا أشوف الكيبورد :thumb:

لي رجعه ان شاء الله :)

[الشبث]

وش قصدتس


يعني يسمي عادي << يسمع بالحماس :315r:






انتي ما سمعتي الشاعر اللي يقول


لاكانت الكهربا بالبيت


فالنور كله بعبدالله n)





شكرا << ضارب ثقل



وتقلدي تحيتي

[الشبث]

ولعي اللمبات


بدو يتوافدون الشيبان



قربت القبسه واااهنيي << يموووت بالشر :315r:




حيالله ابو خالد



ننتظر عودتك




وتقلد تحيتي

[ســـعود]

خلو النور شغال دامه على الضمان :)



عادي ياخي وين المشكله


انا اعرف واحد اسمه علي واسم ابوه علي:)
علي علي

[الجازي]

^
^
هذا واحدن من جماعتنا :)

عسى منت من الجماعة بس :7ayyoh:

انا اخوي مسمي على ابوي وابوي مبسوط ومستانس :)

بس امي ماطاعت يسمون عليها :7ayyoh:

وبالنسبة لي فأنا بشرط على عيالي كلهم يسمون علي تسان جتهم بنيتن زينة :)

اما تسان بناتهم مادلهن الملح فياويلهم يا سواد ليلهم تسان سموهن علي !!

[شموخ شمالية]

,



,


فعلآ فيه ناس كذا مايحبون يسمّى عليهم وهم أحياء
حنا عائلتنا يسمّون ع الاحياء كان والدين أو حتى أعمام



لكن فيه شي مو زين مع أكثر الناس اذا الوحدة تبي تسمّي بنتها على أمها يرفضون :za3lan:
أنا كنت بسمّي بنتي على أمي لكن عيّوا حتى أهلي يقولون عيب يمسّي على أمتس وأموه لا ..؟
قلت الثانية بسميها على خالتي لكن ماااش ماحصل لي .










شكرآ أبوماجد

[-------]

الموضوع بس لشمر

طيب انا ابي اقول رأيي :d:

[الشبث]

سعووود


اعرفوه علي علي


بس ابوه متوفي مبطي هذا


اذا انت تقصد اللي انا اعني




حنا نتكلم اذا ابوه حي



انا ما ابي عادي ولا لا


ابي هل السلم موجود


وهل انت مقتنع بوه ؟






وتقلد تحيتي

[الشبث]

الجااازي


حتى فيه واحد من الجماعه مسمي على ابوه


بهالوقت صار فيه تجاوزات شوي للسلم القديم


بس الرجال اللي معيي ان ولده يسمي على اسمه


يقول يازين وجهي باتسر يقولون جيبوا لفلان حفايظ ( الله يعزكم ) وانا حي :)


شوفي الحجه شلون قويه :)





وانا اتفق معه بهالشي



وتقلدي تحيتي

[الشبث]

لكن فيه شي مو زين مع أكثر الناس اذا الوحدة تبي تسمّي بنتها على أمها يرفضون
أنا كنت بسمّي بنتي على أمي لكن عيّوا حتى أهلي يقولون عيب يمسّي على أمتس وأموه لا ..؟
قلت الثانية بسميها على خالتي لكن ماااش ماحصل لي


شموووخ


هذا والله من لعانتكن


اكيد اول شي اموه

يعني كل هالكره بكن لام الزوج :)



وتقلدي تحيتي

[الشبث]

ايثار


قولي رايتس


احد قال ان هالموضوع لشمر بس



ولا تستهبلين انتي وراستس



وتقلدي تحيتي

[ابو ضاري]

قديم موضوعك يابو ماجد <<<<الديتس






المشكله يالغالي اذا كان الاسامي القديمه ماتصلح كااسماء


ويسمون عليها اليس من الظلم انك تسمي عليها



انا كنت ابي اسمي بنتي هيا على جدتي ورفض الوالد لانه امه


قالي اذا سميت اذبحك ولا سميت :)

[الشبث]

^

طيب لو كنت تبي تسمي عليه وش راح يقول ؟




وتقلد تحيتي

[سالم الظفيري]

ام عمر وين القوة الشبث حضر هنا


هلا بالغالي ابو ماجد

بالعكس عادي تسمي على ابوك اذا كان حي مافيها شي

بس اهم شي يكون اسم ابوه زين


ترى من حقوق الولد على الوالد التسمية

لاهنت ياجدي


لك تحياتي

[عبدالله الجعيثن]

الاسامي ببلاش ولا فيه اكثر منه



اختار الاسم الحسن وسم ...



مسألة حي او ميّت اشوف انه انتهت ...ولاّ بالماضي كانوا يقولون انه فال مهو زين انك تسمّي على الحي من والديك

[بالمختصر..]

،





تبي الأريّح ؟ لا تسمّي على أحد منهم :)

التقدير ما هو بـ الأسم !

يعني لو أبوك أو أمك - سواءاً حي أو ميت - و إسموه مو حلو و سميت على حديهم ، طيب وش ذنب عيالك يتعقدون من الإسم و يكرهون اللي تسمّوا عليهم !

هذا بـ رأيي مو تقدير أبد ..

تقدّر شخص متوفى على حساب شخص حي ؟!

هذا إذا كان الإسم شين بس ..

أما إذا كان زين فـ ليه لا ؟ و عاد تطلع لنا سالفة يسمّي على أمي وألا أموه و ألا أبوي أو أبوه ! يعني نسّمي عليهم كلهم عشان يرضون جميع الأطراف ؟ :)





.
.

[الشبث]

سالم



اكيد يبي يسميه اجل يخليه بدون اسم علشان يدج الضعيف خخخخخخخخخخخخ




بالله ابيكم تفهموني شلوووون عادي يسمي على ابوه وهو حي


ياااخي ما هضمته




للحين ما جاء رد يبرد التسبد سواء معارض ولا مؤيد




ابي هوااااش ابي فلقااات خخخخخخخخخخخ



وتقلدوا تحيتي

[الشبث]

بالمختصر


يعني انتي عااادي عندتس انوه يسمي على ابوه وهو حي ؟




انا اتكلم عن سلم


مالي شغل بالاسم زين ولا ان شاء الله مهو زين




انا اللي فهمته من رد الاخت بالمختصر انوه عادي وان سلم الاولين مهو وارد وناكس للمرح << يبي يورطه مع الشيبان






وتقلدوا تحيتي

[صعوة فسفورية]

حنا عادي يرجع للحرية الشخصيه للام او الاب

انا مسميه ولدي ع اسم اخويه رحمه الله عليه

شبث اذا الاسم حلو سمي واذا ماحلو لاتسمي

اوجوكرن

[الاصمعي]

حسب معرفتي يابو ماجد وما ألاحظه بلي حولي انه مهو سلم انك ما تسمي على أبوك وهو حي ، ولا هو حق للأب انك تسمي عليه مثل ما يقول أبو زياد

بعض الناس وخصوصاً العجز ما يحبون تسمية الأحفاد على أجدادهم خوفاً ان يكون البديل حضر فارحل يالأساسي :)

الي ما هضمته أن يكون عدة أخوه وكلهم يسمون على أبوهم فتلقى عيال عم أربعه اسمهم واحد على اسم جدهم !!

والثاني الي يسوونها سلسلة من الأسماء المكررة يعني اسمين مثل ((محمد صالح)) يتكررون بستة جدود ما ناقص الا يقول محمد الأول ومحمد الثاني ومحمد الخامس !

المهم ماهنا سلم يفرض ولا يمنع وسلامتك

[الشبث]

صعوه


يا سلاام على الناس اللي تجي تمشي الفين وتشارك


احسن من ايثار اللي مسويه تسني مؤدبه خخخخخخخخخخ







مشاركه كويسه



وتقلدي تحيتي

[الشبث]

ابو خالد


انت شلون تقول ما فيه سلم الله يجزاك خير



هذي قويه صراحه


احس ارتفعت حرارة الموضوع من يوم دخلت بوه انت



يابو خالد اقولك شااايب يقوله وايدوه الشيبان الباقين


تبينا نتقاضب الشوش هههههههههه




راجع نفسك واتمنى يجي احد يرد عليك


لاني احب اكون على طرف :)




وتقلد تحيتي

[الجازي]

أنت من جدك تحتسي !!؟ :)

أجل حنا شين وقوة عين :)

اللي يسمي على أبوه يبشر بالسماوة من أبوه :7ayyoh:

والسماوة عاد مبلغ وقدره من الجد للحفيد :)

وبعض الناس العكس

السماوة تكون هدية من الحفيد للجد لأنه سمح له ياخذ اسمه :)


مع احترامي

لكنها خزعبلات ما أنزل الله بها من سلطان

طيب فرضاً أنا أحب اسم ساري وأبوه اسمه ساري :) <<<< مايمديني ياللبنانية :7ayyoh:

أحرم نفسي من تسمية ولدي عشان سلومهم !!؟

أها بس

شف لنا سالفتن سنعة <<<تسمع بالتحطيم :)

[الشبث]

^

بالله تنكتين انتي وراستس ياللبنانيه :)




السماوة تكون هدية من الحفيد للجد لأنه سمح له ياخذ اسمه


ايووون


هنا ياطونيه اثبتي صحة كلامي


وهو ان الجد لازم يسمح له

لو ابقول نفس كلامتس

طيب هو اسم وش دخل الجد فيه

لو فرضنا ان اسم جده مصطفى << مصري :)

وانا ابي اسمي مصطفى


وش دخله يرفض ؟



لكن اكيد ان هالجد باقي براسه من هالسلم الطيب :)




أحرم نفسي من تسمية ولدي عشان سلومهم !!؟



ايه

ياما حرمنا انفسنا من اشياااء غير الاسامي


وش علشااانه


بس لانه سلم




السلم يعني قانون


والقانون دائماً مرفوض عند المخالفين للقانون


اذاً انتي مخالفة للقانون :)





شف لنا سالفتن سنعة <<<تسمع بالتحطيم


فيه سالفه ثانيه مخليها على جنب


اخاف ابو خالد يشوتن اذا جبته خخخخخخخخخخخ





وتقلدي تحيتي

[صعوة فسفورية]

ياساري سرا الليل
:)

[الشبث]

ياساري سرا الليل


افهم من كلامتس انتس تتهكمين على الجازي:)




<< يبي يقبسه بأي شكل :)



وتقلدي تحيتي

[الاصمعي]

أنت الله فوق دايم على طرف وتجي منصلدز مع لك محيدره بس أشوى ان لياقتك جيده ويمديك تطمر تسان واجهتك حفرة ولا حصاة :)

والله يابو ماجد ليا جينا للجد مثل ما قلت لك بس بعض الشيبان يدهولون بسالفة السلوم تلقاه خابر أبوه ولا جده ما يحب هالشي ويقوم يعممه على انه سلم وليا برقت يمار هالسلم من أبوه وجاي !!

[الجازي]

عاد لو تدري منهو ساري :)

هذا تيس توه مولود مسمينه بزارين العائلة ساري :) <<<<< لبى قلوبهم حتى تيوسنا لبنانيين :)

شف عاد

أحياناً الشايب يصير فيه عرق حضرمي فيستقعد لولده بالاسم عشان ترتفع قيمة السماوة وممكن توصل لهايلكس <<<< طموح هالجد :)

انا عن نفسي ودي كل حفيداتي يسمونهن ريم :d:

بس أهم شي لاتصير حفيدتي شديهة ضحى :)

[عبدالرحمن]

طيب وماجد عبدالله الشمري وش يقرب لك:)
حي الله العزيز ابو ماجد وموضع الاسم على الاب وهو حي!
لنرجع قليلا ونرى الامر كيف كان عليه ابناء القبيلة من وجهة نظري
قبل مئة عام شمر لا يسمون على اسم الاب ان كان حي او ميت!
ولكن بعد هذه المئة عام تغير الوضع واصبحوا يسمون على الاب بعد موته
وتطور الامر خلال العقود الاخيرة واصبح الاسم المفضل اسم الاب وهو حي!
هذا رايي وعشت وسلمت يالعزوة.

[الشبث]

هههههههاااااي


لقد اضحكتني يا ابا خالد حتى بغيت اتكرفس بلي حفره :)






ابو خالد


ليش ما تكون انت انسان شوي متحضر وساحب على السلوم



ياخي انا سألت كذا واحد وقالوا لي نعم هالشي او هالسلم موجود عندهم



وفيه ناس قالوا لا عادي ولا عندهم هالسلم





هو ممكن يكون سلم ركيك او مهو من الاساسيات اذا قسمنا السلوم والعادات



بس هو موجود


اما انك تلغيه من الوجود فهذا شي ثاني




وتقلد تحيتي

[الشبث]

أحياناً الشايب يصير فيه عرق حضرمي فيستقعد لولده بالاسم عشان ترتفع قيمة السماوة وممكن توصل لهايلكس <<<< طموح هالجد


والله ما عرفنا لتس يالجازي


مره لبنانيه ومره حضرميه والظاهر المره الجايه اردنيه من اصول فلسطينيه




وكلامتس مردود عليتس


انتي ترمين التهم جزافاً على جدتس وتتهمينه بالطمع علشان تثبتين ان كلامتس صح





صدز بتس عروق حضارم :)





وتقلدي تحيتي

[الشبث]

طيب وماجد عبدالله الشمري وش يقرب لك
حي الله العزيز ابو ماجد وموضع الاسم على الاب وهو حي!
لنرجع قليلا ونرى الامر كيف كان عليه ابناء القبيلة من وجهة نظري
قبل مئة عام شمر لا يسمون على اسم الاب ان كان حي او ميت!
ولكن بعد هذه المئة عام تغير الوضع واصبحوا يسمون على الاب بعد موته
وتطور الامر خلال العقود الاخيرة واصبح الاسم المفضل اسم الاب وهو حي!
هذا رايي وعشت وسلمت يالعزوة.


يااابعد زولي يابو يوسف


هذا الكلام اللي يجمد على الشارب


وين ابو خالد ما يجي ويشوف العلم


ذبحن ابو خالد بغا يعلقن بالمضايف يحسبن جايبن هالسالفه من عندي



انا معك بكل حرف قلتوه يابو يوسف


وفعلاً هذا اللي حاصل






ابو يوسف

لا تروح بعيد ابي فزعتك


الربع قاموا يتضرسون يبووووني هههههههههههه




وتقلد تحيتي

[الاصمعي]

لا أدري مهي من عندك بس ما يقال له سلم لأن الناس مختلفه عليه ، تلقى من يسويه ومن يتركه وهم أقرب من غيرهم لبعض !!

عندي لك مثال ما أظنك تقدر تجاوزه !!

ابن علي الي مات قبل شهر تقريباً وش اسمه؟ عاد امنتم وياهم بالممشى والسلوم من دون البقية :)

أسمه الله يرحمه : غازي بن فارس بن غازي بن فارس بن صحن العلي وهو مات عمره فوق الخمسين وعليك الحساب بالنسبة لجده وأبو جده وجد جده
^
^
بس لا يصير ما اجتمع الجد والحفيد سوى !!

[الشبث]

^
^

اويلي



وش مدريني عنوه هو وجدوه


الا والله ابقمز هالمثال قمز يابو خالد مثل هالحفيرات خخخخخخخخخخخخخخخ



طيب شف رد ابو يوسف


ليه ما ترد عليه


ولا جودك علي :)



وتقلد تحيتي

[عبدالله الجعيثن]

ابو ماجد ماعليك من ابو خالد


<<<يبي يفزع لو على ظلال هههههه




الا سلم وكان فال شؤم ...ويزعلون الاولين ياسميّت على ابوك وهو حي

[بالمختصر..]

بالمختصر


يعني انتي عااادي عندتس انوه يسمي على ابوه وهو حي ؟




انا اتكلم عن سلم


مالي شغل بالاسم زين ولا ان شاء الله مهو زين




انا اللي فهمته من رد الاخت بالمختصر انوه عادي وان سلم الاولين مهو وارد وناكس للمرح << يبي يورطه مع الشيبان






وتقلدوا تحيتي


ايه عادي و نص ..

إذا إسم أبوه حلو يسمّي عليه وهو حي .. بعدين مو لازم نشاوروه :a:



علّق النت على هالرد :wallah_hoo:





.
.

[الجازي]

^
^
بعدي والله

هذي المره السنعة القوية :7ayyoh:

[بالمختصر..]

^
^
بعدي والله

هذي المره السنعة القوية :7ayyoh:


منهي ؟ :)

اها ..

لا تطبلّين لي ماني ناقصه شر ههههههه




.
.

[الشبث]

ابو ماجد ماعليك من ابو خالد


<<<يبي يفزع لو على ظلال هههههه




الا سلم وكان فال شؤم ...ويزعلون الاولين ياسميّت على ابوك وهو حي

اما والله من العز بهالشيشة اللي انت تعسل


وشو معسلك بالله << يبي يجيب لوه درزن :)




هذا الكلام الصدز يابو غازي


بس ابو خالد الظاهر بس يبي يلاهد




وتقلد تحيتي

[الشبث]

ايه عادي و نص ..

إذا إسم أبوه حلو يسمّي عليه وهو حي .. بعدين مو لازم نشاوروه



علّق النت على هالرد



اقول اعصابتس يا قرعوطه



لا مهو عادي وين عادي



انا اتكلم هل كان سلم ولا لا


مهو هالحين


جايتن هداده قرعوطه



بعد قرون :)



وتقلدي تحيتي

[الشبث]

^
^
بعدي والله

هذي المره السنعة القوية


اقول ايه هين سنعه


الا قولي هذي ام شرين :)



بغت تفقع وجهي باسطوانة الغاز :315r:





وتقلدي تحيتي

[الشبث]

منهي ؟

اها ..

لا تطبلّين لي ماني ناقصه شر ههههههه



انتي مثل اللي يقول


الخير مامن خير والشر عجلن بوه :)




وتقلدي تحيتي

[بالمختصر..]

،





هو سلم و لا هو سلم ، يعني نص نص !

يعني للحين موجود عند بعض العوايل اللي متمسكين بـ السلوم مهما كانت !




أبوي و عمي عادي عندهم ، و خالي الله يرحموه ولدوه الكبير سمّى عليه يوم كان حي ..

حنا عندنا عادي فرررري والله ..




.
.

[الشبث]

ايوووه


شوي شوي بديتي تعترفين



بعض الناس عندهم سلم وبعضهم ما يعترفون بهالشي



طيب ليه من اول ما قلتي هالحتسي


ولا بس تبين المعامش يا قرعوطه << يدور الشر :)





وتقلدي تحيتي

[شموخ شمالية]

شموووخ


هذا والله من لعانتكن


اكيد اول شي اموه

يعني كل هالكره بكن لام الزوج :)



وتقلدي تحيتي


لاوالله مو كـره ياعزوتي


لكن أكيد أني أحب أمي أكثر مليون مرة من خالتي
وأبي أسمّي بنتي عليها ..



وغير كذا الاسم المفروض يكون للاب والام فقط




سؤال ؟
ليش الام وأهلها لهم الكلمة الثانية بالاسم ؟
على أن الام هي اللي حملت وتعبت والتربيه على راسها





حرام عليكم يالرجال

[أبو فهد]

الشيبان يعتقدون أنك إذا سميت ولدك على اساميهم فإنه نوع من التشاؤم عليهم



ما تسمعه يقول



فلان تفاول على أبوه بالموت (يعني سمى ولدوه باسم أبوه)




----------------
أبو فهد الهمزاني

[أبو فهد]

سؤال ؟
ليش الام وأهلها لهم الكلمة الثانية بالاسم ؟
على أن الام هي اللي حملت وتعبت والتربيه على راسها



طيب بضرب لتس مثال ولو إنوه مختلف شوين




هالحين الواحد يروح بنده :)



و ياخذ لوه عربية



و يحط به من كل شين



وهو اللي يدفع الحساب



طيب اللي بالعربية لوه و لا للعربية




مع احترامي لجميع الأمهات



طيب الولد يتسمى بأبوه و لا أموه ؟



هذي سنة الله في خلقه




------------------
أبو فهد الهمزاني

[الاصمعي]

طيب اللي بالعربية لوه و لا للعربية



هذا موضوع لحاله :goooood:

[صلفيق]

هلا ابو ماجد
يالله حيوه ...
والله عشنا وشفناك بهذا ،، لا ـ وجايب موضوع سارقه من الفلة !

انا اشوف مافيها شي انك تسمي تمجيدا لأبوك حتى في حياته ، وهذا انا مسمي عليه "الله يرحمه ويغفر له"
وهو في حياته ، وبالعكس .. كان متقبّل الموضوع ومرحب فيه ،،
اعتراضه بس خوفه لايطلع الولد سفله وهو على اسمه !! ههههههههههه


موضوع رائع وجميل كجمال روحك شبيثان ..
شكرا لك







احتراماااات،،،

[الشبث]

سؤال ؟
ليش الام وأهلها لهم الكلمة الثانية بالاسم ؟




لان الولد يتبع نسب ابوه يا ذكيه


يقولون فلان ابن فلان


مهو فلان ابن فلانه



وبعدين سالفة الحمل وما الحمل


الظاهر الدين كرمكن وعزكن وحفظ للام حقه واصبحت اكبر من حق الوالد




بس انتن ماااش





حرام عليكم يالرجال

حرمت عليكن عيشتكن :)



وتقلدي تحيتي

[الشبث]

الشيبان يعتقدون أنك إذا سميت ولدك على اساميهم فإنه نوع من التشاؤم عليهم



ما تسمعه يقول



فلان تفاول على أبوه بالموت (يعني سمى ولدوه باسم أبوه)




لا فض فوووك يا بعد فوووي انت :)



وتقلد تحيتي

[الشبث]

طيب اللي بالعربية لوه و لا للعربية


:puzzled:

طلعت العربيه حااامل :a:


تخيل عاد تجيب هاندلفتر صغير خخخخخخخخخخخخخخخخخخخخخخخ



ولا تخيب ولد ومالوه رجلين


لوه كفرات خخخخخخخخخخخخخخخخخخخخخخخخخخخخخ



اااااااااااااه يابطني على هالصبح


حسسسسسبي الله على عدوك يابو خالد لا تدقق خخخخخخخخخخخخخخخ



وتقلدوا تحيتي

[الشبث]

اعتراضه بس خوفه لايطلع الولد سفله وهو على اسمه !!




الله حي ابو مشعل يااهلاااا


هذا ممكن يكون بعد سبب لهالسلم


يعني فعلاً كلامي كان صحيح ان هالاعتراضات موجوده على التسميه على الابو


انا ادري يابو مشعل ان فيه ناس عندهم عادي


وفيه ناس لا



انا اتكلم عن هاللي ما عندهم التسميه على الاب وهو عايش



الله يطيل اعمار ابائنا جميع


ويرحم الاموات منهم




وتقلد تحيتي

[سالم الظفيري]

ابو ماجد افضل شي انا اقول مايسمية


يقلبة


صن

[الشبث]

بالله


سالم يقلبه صن





تنكت وانت تشوف العالم متماسكين ؟




وتقلد تحيتي

[الجازي]

وجع يوجع العدو :3ajeeb:


الأم صارت عربية !!؟


هذي بحق !!

[الشبث]

^

:goooood:



تشبيه بليغ من ابو فهد خخخخخخخخخخخخخ




وتقلدي تحيتي

[الجازي]

واذا جاء عند الكاشير رماها !!

واذا رجع للمحل ياخذ بدالها :)



هذا مطوعنا يقول هالحتسي

ماعلى شبيثان شرهه أجل هو وسلومه :7ayyoh:

[عبدالرحمن]

خوفو الله سويتو شقائق الرجال عربات ياظلمه:a:
سيدة الكفاح حاربي محاربي عنصر توازن المعمورة:thumb:

[الجازي]

أنا ضاع عمري وأنا أكافح ولا نفع معكم


أخاف نهايتي نهاية هتلرية على طاري كفاحي :7ayyoh:

[الاصمعي]

طيب ولي عنده أكثر من عربية :a:

[عبدالرحمن]

^^
الاخ شقصدوه:)

[عبدالرحمن]

أنا ضاع عمري وأنا أكافح ولا نفع معكم


أخاف نهايتي نهاية هتلرية على طاري كفاحي :7ayyoh:
افضل ثمرة يجنيها المكافح هي الثمرة التي تستوطن قلوب المجتمع بعد رحيله> يبي يرثعبه:)

[الشبث]

واذا جاء عند الكاشير رماها !!

افهم من كلامتس ان الاخ الكاشير هو طبيب الولاده


يولد العربيه خخخخخخخخخخخخخخخخخخ




وتقلدي تحيتي

[الشبث]

خوفو الله سويتو شقائق الرجال عربات ياظلمه


صايرين عاد شقائق النعمان وانا مادري




وتقلد تحيتي

[الشبث]

طيب ولي عنده أكثر من عربية



شف يابو خالد


اهم شي تعدل بينهن


مهو وحده تحط به خضره والثانيه نعول الله يعزكم :)




وتقلد تحيتي

[الاصمعي]

^^
الاخ شقصدوه:)
ما عنده شين بس يفكر شلون يتعامل مع أكثر من عربية؟

هو يريح العربية القديمة ويركنه على جنب ويخلي المقاضي كلها بالجديدة ، ولا ياوي للجديدة ويكد القديمة؟

أو يشيل مقاضيه على ظهره وبلا عربية بلا هم:thumb:


عاد تصدق أبو فهد جاي على دليل ما قالها عبث:)

تقول وحده عشقت لها واحد اسمه سرور الأطرش طراد صيد :

أنا بوادي الرس داري ظليلة**وصويحبي يتلي المها بالصواهيد
ليته ليا شال المها عنه اشيله**أشيل أنا عن صاحبي جملة الصيد<<عربية:)
شفي سرور ولا اتمنى بديله**عليه ضيعت الحيا والمناقيد
من لامني يلهم دقاق النثيلة**ولا يطق بهامته نايف الحيد

[الشبث]

ليته ليا شال المها عنه اشيله**أشيل أنا عن صاحبي جملة الصيد



كم انت كبير يابو فهد :)


اثبت بما لا يدع مجال للشك ان المره هي العربيه


وانت يابو خالد اثبتت هالشي


وتقلدوا تحيتي

[الاصمعي]

ههههههه والله أكتب وامسح رثعت بنا هالعربية :)

[الشبث]

ابو خااالد


كله منك انت ههههههههههههههه







شرايك


نبي نطالب ابو سلطان يغير الجنس عند الحريم


بدال انثى يحط عربيه خخخخخخخخخخخخخخخخخخخخخخخخخخ



وتقلد تحيتي

[الاصمعي]

أبو ماجد تهقى فيه علاقة بين قناة العربية وعربياتنا ولا تشابه أسماء بس؟؟!!

[الشبث]

ايه فيه يابو خالد



العربيات اللي يقدمن بالعربيه خخخخخخخخخخخخ



وتقلد تحيتي

[الاصمعي]

لا رمعتك سماوية حاول مرة أخرى:)

وبعدين يابو ماجد اثر التسمية قديمة بس حنا الي مطفين!

يقول شاعر قديم:
تعلق قلبي بالهوى عربية**تنعم بالديباج والحلي والحلل

وبعده يوصف عربيته مرة بانه حجازية ومرة عراقية ومره تهامية ومره سودانية الى آخر أنواع العربيات الي بعصره<<ما جتهم العربيات اليابانية هكالحين :)

المهم خل عينك على برج المراقبة وان شفت أبو فهد متصل لهلم موضوعك واحذفه طول يدك قبل يشوفه وتصير علومنا زبيرات :(

فتك بعافية أنا بتغيب عن المضايف ليما تفوت هالعجة :)

[الشبث]

^

وليه ابو فهد



بالعكس ابي اشكروه لانوه هو اللي علمنا على هالسالفه :)




وتقلد تحيتي

[بالمختصر..]

،





أقول بما إن الموضوع للحين فيه نقاش و جدال وشرآيكم نعرضوه على مجلس الشورى ؟ :)

وش وصلتوا لوه ؟

نبي مُخرجات هذا اللقاء ..





.
.

[الشبث]

وصلنا الى انكن عربيات :)



قصدي اختلفوا الشباب


مع ان الاغلبيه السااااحقه معي بالرأي




وتقلدي تحيتي

[بالمختصر..]

وصلنا الى انكن عربيات :)



قصدي اختلفوا الشباب


مع ان الاغلبيه السااااحقه معي بالرأي




وتقلدي تحيتي



خير إن شاء الله :)

<< مفتر مخه من هالموضوع

عربيات مييييين و الناس نايمين ! :)





.
.

[الشبث]

يعني مين بالله


انتي حكمي ضميرتس وشوفي وش يطلع مع ضميرتس



الرجال عربيات


ولا الحريم عربيات


مبين من النطق :)




وتقلدي تحيتي

[الشبث]

سؤال علشان نعرف مين العربيات




انتي عربيه ؟



يبيه تقول لا علشان يقول اجل بنقاليه :)




وتقلدي تحيتي

[بالمختصر..]

يعني مين بالله


انتي حكمي ضميرتس وشوفي وش يطلع مع ضميرتس



الرجال عربيات


ولا الحريم عربيات


مبين من النطق :)




وتقلدي تحيتي


الحين أقنعتن ..

ناقصنا ألقاب حنا ؟ :a:

أنا أقول الرجال يسمّي على أبوه و أموه عادي << تضيّع السالفه :)




.
.

[الشبث]

على طاري اسم الولد




ليش انتن عربيات :)



وتقلدي تحيتي

[بالمختصر..]

سؤال علشان نعرف مين العربيات




انتي عربيه ؟



يبيه تقول لا علشان يقول اجل بنقاليه :)




وتقلدي تحيتي



لا أنا سلّه ، للحين ما تطورت و صرت عربيه :)




.
.

[الشبث]

الله يرزقتس بالكفرات اخت سله وتصيرين عربيه اد الدنيا :)




وتقلدي تحيتي

[شموخ]

حنا عادي يسمون على الاب وهو حي واخواني مسمين على ابوي الله يرحمه من ايام حياته ..


بس الام المسكينه محد سمى عليها غير واحد منهم ورفضت امي بالبداية بس اخوي اصر وسمى وضحى :) واخوي الثاني يعز امي معزه بس مايقدر يسمى عليها لانه نفس اسم زوجته ( طبعا تقرب لأمي زوجته وعلى اسم امي :) )


وانا بمشية الله اذا الله رزقني بولد بسمي على ابوي مع ان زوجي ضد انه يسمي على ابوه او ابوي مايبي :( بس بضل اصر على اسم ابوي ،،،، وابوه هو بكيفه ان سماه وان تركه :)

[عبدالرحمن]

ذكرتني اختي شموخ بسالفة اسماء الابناء والحنة والونه والعفسة والخبصة اللي تصير لو جاء مولود:a:
فالاب يبي اسم والام تبي اسم غير وهااات سالفة وخذ قصيدة:thumb:
لا وتضيع الاسماء وتلقاهم يبحثون عن الاسماء في الجرايد وغيرها!
فاحسن حل لهم هو الاتفاق على طريقة اختيار الاسماء في شهر العسل:)

[ريال الفسحه]

من زين اسماءهم يوم نسمي بهم

[عبدالرحمن]

من زين اسماءهم يوم نسمي بهم

فعلا ليش اكثر اسماء الاولين صعبه وبعضه تقل لغز:a:

[الجازي]

^
^ابو يوسف على جنب الله لايهينك الاسهم لريالوووه :)

خخخخخخخخ

الا انت من زينك يوم انهم صابرين عليك :)

ياعزتا لاميمتك بس

مدري ليه حابتها ياخي

احسها مبتلاة هالادمية الله يعظم اجرها :7ayyoh:

[شموخ]

8
8
8

هههههههههههههه انا الحمد لله اسم ابوي زين يحق لي اسمي عليه لو مو حلو ماراح اورط ولدي بها الاسم وبتضل المعزه بالقلب ..


عبدالرحمن


على طاري الاختيار من بدري حنا نسمي وهو ماجاء ولايف من اول ماحملت فيها وانا مختارته لها وماخبرت احد اخاف احد يسميه قبلي :) ووصايف جت على نفس الوزن :)

[عبدالرحمن]

يعني ولايف ووصايف والثالث ان شاء الله راح يكون اسمه حايف :)

[شموخ]

8
8
8

لالالالالالالالالالالالالالالا وش حايف :) وين حقين الصرف عنك :)


كان عيال بسمي ضاري وضاوي خخخخخ عز االله يطلقني ابو ولايف ان اطريت له هالاسماء هههههه

[-------]

فعلا ليش اكثر اسماء الاولين صعبه وبعضه تقل لغز:a:


اي والله حتى انا مستغربة من اسماءكم
حتى في النطق صعبة وغريبة مثل ضحاك و ظامئ وكانز ولهفان ومائس و ولوع:)

بس والله من جد اسماء تفشل
اما اسماءنا المعروفة وبكل بيت هي محمد
وعلي وحسن وحسين وفاطمة وزينب
وجهة نظري
بعض الأباء اسمائهم بايخه فحرام
يسمي ولده اسم بايخ عشان يرضي ابوه او امه





على طاري الاختيار من بدري حنا نسمي وهو ماجاء ولايف ووصايف جت على نفس الوزن :)

من جد اسماء بناتك روعة والله ربي يخليهم لك


انا والله اخترت اسم ولدي لاجا نبراس
بس سي السيد مايبي هالاسم :d:
اما البنت حور او حوراء

وشكرا لك ابو ماجد
وشكرا للجميع

[شموخ شمالية]

.


,

محكمممممممة :hammer:


حكمت المحكمة حضوريآ وغيابيآ على المتهم الاول أبوفهد والمتهم الثاني أبوخالد والمتهم الثالث والاهم أبوماجد
بالسجن 20 سنة وبعد هالعشرين سنة يشنقون على باب الاسري ليكونوا عبرةٍ لغيرهم








قال عربيات قال :gun2:

[الشبث]

ياااخي انا لو ادري ان هالموضوع يبي يجيب اختنا الغاليه والعزيزه شموخ تسان مببببببطي كاتبه ههههههههه


اول شي يالله حيه


ثاني شي الله يرحم ابوتس


ثالث شي ان شاء الله تجيبين عشر عيال وتسمين على القبيله كلهم هههههههههههه




انا ادري ان هالسلم موجود ببعض شمر مو كلهم

وادري ان القبايل الثانيه ما يطبقون هالسلم


بس البلا اختي شمووخ ناس من القديمييييين يراوغووون هههههههههههههههه




نورتي الموضوع والله اختي شموخ



وتقلدي تحيتي

[الشبث]

ابو يوسف


اعرف لك واحد من العيال جتوه بنت

هو يبي يسميه فلانه واهلوه معوه بالاسم

وامه تبي تسميه اسم ثاني


واهاه معه بالاسم


وهالحين البنت له اسمين :)


قسم بالله



وتقلد تحيتي

[ابو ضاري]

و ش قالت تحكم عليكم



هين يابنات مخيندز تحكمن على الشبث وانا من يلاهدهن

ومن معه احصل قاز


ابو ماجد لعيونك وقفت بصفك



انهن عربيات

[الشبث]

ريال


حلك وارد :)



وتقلد تحيتي

[الشبث]

الجازي


رجاء خاص


ريال الفسحه عليه خط احمر


ما تشوفين زولوه تقل ددسن خمس وثمانين خط :315r:




وتقلدي تحيتي

[الشبث]

على طاري الاختيار من بدري حنا نسمي وهو ماجاء ولايف من اول ماحملت فيها وانا مختارته لها وماخبرت احد اخاف احد يسميه قبلي ووصايف جت على نفس الوزن



كفشششششششتس يا شموووخ


يعني الولد اذا جاء ان شاء الله تبون تسمونه نااايف << مسوي ذكي :)




وتقلدي تحيتي

[الشبث]

بس والله من جد اسماء تفشل



احترررررمي نفستس يا ايثار لا اصير علك بوجهتس


<< يراعي لريال ( ريااال ما تدري بأسماء ذوينا :) )





ايثار


الله يرزقتس بالذريه الصالحه




وتقلدي تحيتي

[الشبث]

ام عمر



انا بررييييييء



انا مسكين


بس طرحت هالموضوع وهم قالوا وفالوا


وانا اقولهم لا تقولون انهن عربيااات


بس اللي ما تعرفينه ان ابو خالد هددن بسكين بالرسايل الخاصه << ايا التسذووب





وتقلدي تحيتي

[الشبث]

ابو ضاري



وين راح ارخ ارخ ارخ


ياخي انت ما تنومن




وتقلد تحيتي

[بالمختصر..]

ابو يوسف


اعرف لك واحد من العيال جتوه بنت

هو يبي يسميه فلانه واهلوه معوه بالاسم

وامه تبي تسميه اسم ثاني


واهاه معه بالاسم


وهالحين البنت له اسمين :)


قسم بالله



وتقلد تحيتي



اي والله فيه ناس كذا يسمّي الأب إسم و الأم تسمّي إسم :a:

بس ينسجل بـ الإسم اللي اختاروه الأب لأنوه هو اللي يروح للأحوال يسجلوه :)



شطحه :

والله أعرف وحده تطلقت بـ سبب الإسم لأن زوجه سمّى على أبوه و هي ما تبي بـ حجة إنوه قديم الإسم !

صارت مشاكل بـ سبب الإسم ..!




.
.

[الشبث]

سلميلي عليه


والله انوه رجل



ودك المره ما تعارض وتعاند زوجه




وتقلدي تحيتي

[ليلى بنت عبدالعزيز]

هلا ومرحبا
تو مانور الاسري ياريس
راح تمطر من طلتك عندنا


هذا الرد لترحيب
والرد الاتي لتعقيب :)

[ليلى بنت عبدالعزيز]

تدري عاد اول مره ادري ان هالسلم البايخ موجود عند شمر
اسمع به عند السهول والقحاطين والعتبان:qannaj:


عاد يا ابو ماجد الا كبر الشيخ ماجد وقال يبه جاي لي ولد وسميته عبدالله عليك يا ابوي
امانه امانه امانه عليك ماتفرح :)

انا بس لاتخيلت ليلى بنت محمد تغورق دموعي من الوناسه الله يبلغنياها يارب
ومحمد ولدي من ولد وابوه يسميه ابوفهد :)

تعال تعال بقولك شي واكتشفته
اسم ابوك مذري و ولدك ماجد
لو لاحظنا نفس اول حرف والاسم من اربع حروف >> تسمع بالتحليل
اعترف انك ماعجبك هالسلم ومسوي تمويه:)



لازم نتحرر من هالسلوم والعادات والتقاليد الي مافيها من الدين شي :thumb:

[ريال الفسحه]

الجازي

اشكيتس على الله :)

[الجازي]

توه يوصلك الارسال !؟ :3ajeeb:


أجل الله يعظم أجر أميمتك :(

[أحمد]

انا اعرف واحد جاه ولد وسماه باسم ابوه وابوه ماكان باقي الا شوي ويموت

ويوم جاه الولد الثاني وهو يسميه باسم امه


:)

[ريال الفسحه]

اذا اعرست باذن الله وجتن بنت ابسميه الجازي


وكل يوم ادعس وجهه :)

[الجازي]

ماشاء الله وش هالبنت عندك

والله لو ان وجهها وجه تريلة :)

بتصبر لك هي كل يوم تدعس وجهها ماتفطس :7ayyoh:

[ريال الفسحه]

ايه ههههههههه


بعدين ابصبغ وجهه اسود واعيره يالجازي يالعبده :)

[الجازي]

الله يرجك

حبيت بنيتك هالعبدة :)

اذا صبغتها بالله أرسل لي صورتها :d:

[الاصمعي]

الا على طاري التسمية؟

وليه اللاعب ولا الفنان أو أي مبرز في مجال عندما يسأل عن اسم الشهرة الذي يحمله يقول بكل فخر ونشوة لقد أطلق علي هذا الأسم فلان أو يقول جمهوري المحب ويتكلم عن علاقته وتقديره واعتزازه بمطلق الاسم عليه ، بينما من أسموه ورددوا اسمه وتداولوه قبل أن يعرفه بقية الناس به لا يذكر ولا يشكر ذلك لهم ؟؟!!؟؟

صدز بنادم اسيود راس ينسى بسرعة!!

[الشبث]

هلا اختي الغاليه ام محمد



شوفي وانا اخوتس



انا ما سمعت ان عتيبه ولا قحطان ولا السهول عندهم هالسلم


هالقبايل هذي بالذات اغليهم حيل والله




بس انا اتكلم عن انه عندنا بشمر موجود


والى وقت قريب حيل





اجل وش تقولين لو اجيب لتس السلم الثاني


والله الظاهر يبي يصير قتلى وجرحى صحيح ههههههههههههههههههه





بس تحليلتس تحليل محششين خخخخخخخخخخخخخخخخخخ






وتقلدي تحيتي

[الشبث]

الجثري


مووه يا زلمه



انا ادري ان ثلاث ارباع شمر ما يعترفون بهالسلم الحين


بس سابقاً يا ويلك ياللي تسمي على ابوك















ابو خالد

ايوالله اسيود راس صحيح خخخخخخخخخخخخخ









الجازي وابو الجازي


برا




وتقلدوا تحيتي

[الحيمري]

المفروض يسمي الولد على أسم أمه

فاطمه او عمشا او صيته لخ هههههههههههه


سلم شمر ماتسمي ولدك على ابوك اذا هو حي هذي عند اهل الجنوب

[الشبث]

هذا الحتسي الطيب يابو منيف




انتظر الموضوع الجاي بوه ذبحه طيبه هههههههههههه



وتقلد تحيتي

[أبو فهد]

أشوف جازت لكم سالفة العربية



لو إني داري تسان مبطي مقلع بكم




طيب التعددي كل بيت لوه عربية أو يصلح عربيتين لبيت واحد <<<<< يخطط :)




------------------
أبو فهد الهمزاني

[سلطااان السويري]

انا اعرف واحد مسمي ولده على اسم جده <<<< فاهم غلط

[المعزبـه]

وش به !!

عآدي .. والله والحلا يوم يسمى حفيدي ب اسمي

أبوي قبل شهر حاشرن اخوي بالزاويه يبيه يسمي بسموه

ولا مو اي حفيد , كود اول حفيد علشان يقال ابو فلان

:315r:

انا احس شمر طلعو هالسلم من نفسيه خخخخ

يخافون من المفاول .. ( التطير ) :solh:

[الشبث]

ابو فهد


انت رثعت ببنات مخيندز خخخخخخخخخخخخخخ



اكيد اللي يبي يعدد يجمع كم عربيع غلى بعضهن


يرجمهن رجم خخخخخخخخخ



وتقلد تحيتي

[الشبث]

سلطان



عليك وجه


يقطع المطر خخخخخخخخخخ



وتقلد تحيتي

[الشبث]

المعزبه


ندري ان مابه شي



بس هو سلم ونسولف بوه وكلن يقول رايوه



وشمر على قولتس جايبينوه من باب المفاول



وتقلدي تحيتي

[ام الرغفان]

نعععععععععععععععععععععععععععععععععم موجود هالسلم

وعندنا بفخذنا اللي يسمي باابوه وهو حي يعتبر مقتول هو وولدووه:)<<دووعابه



وشكرن

[الشبث]

ههههههههههههههه


ياملا اللي


شلون مقتول هو وولدوه خخخخخخخخخخخخخ



يالله حي اختنا ام الرغفان


منوره الموضوع



وتقلدي تحيتي