يانوره بالله اسمعي لاتصدين

[سالم الظفيري]

ساره وحسين ,, حبوا بعض مثل اي عشاق .. وفرقهم الزمن ..
مرت الأيام والسنين وساره اصبحت معلمه في احدى مدارس الأبتدائيه .. والمفاجأه الكبرى انها شافت حبيبها جاي للمدرسه يبغى يسجل بنته وجت ساره قالت قصيده تشكي لصديقتها نوره ...
ويالله اسمعواا وقولوا لي رايكم ...



قالت سااااااره ....


يانوره.. بالله اسمعي لا تصدين
يابنت حر ن مركزه بالصداره

شي جرالي قسم القلب قسمين
وابلا ملامه افهمي للعباره

باول دوام المدرسه يوم الاثنين
معلمه في وجه باب الاداره

وقفت باللجنه على سادس اثنين
مثل المجند ينتظر للاشاره

هذي تنادي وهذي ابله انا وين
زحمه وتو اليوم باول نهاره

اصوت لبنتين وبيدي بنتين
نوره،،مضاوي عايشه،، مي،، يارا

وسمعت صوت رجع الوقت لسنين
صوت الذي اسمه بنقش السواره

" اختي عن اذنج ناقل البنت هالحين
تفضلي الاوراق و الاستماره"

عجزت لا اجاوب ولا ارمش العين//
طول سكوتي وهو طال انتظاره

حسيت كن الدم مثل البراكين
شريان قلبي وصل حد انفجاره

ورفعت راسي وصارت العين بالعين
ولمحت في عينه سواة الشراره

هو،،هو والا واهمه يامسلمين
زوله ورفعة حاجبه مع سماره

لاماتغير فيه ياكود شيين
حف الشنب والشيب زاد بوقاره

اتلا علاقتنا ثلاثه وتسعين
باول حلاة العمر قبل انكساره

الشاهد الله ماحصل بيننا شين
ولا يخدش احساس بنت وعذارا

نعم الحبيب اللي الطيب والزين
ونعم الرفيق اللي حفظ حق جاره

ياوجه ابوي الوجه مرحب وسهلين
لا يابعد روح ومعاليق ساره

ودي المه وودي اصيح بس وين
مثل الكسير اللي نشب وسط غاره

مايستطيع المشي من دون رجلين
وحوله جنودتشتهر بالشطاره

ياللاسف هالحين صرنا غريبين
حكم القدر واصدر علينا قراره

الهم والغربال والفقد والبين
وانا اسيره تنتظر للزياره

ويلي علي لاماك ويلاه ياحسين
يامن يجمعنا واسوق البشاره

ساره!!! وسكت له لحظة كنها سنين
واقفا واشوفه يوم شب الزقاره!



‏​‏​


هذا رد احدى الشعار
حاط نفسة حسين


يامرحبا ياغايتي يا هلا وين
يابنت عودن فيه طيب ونعاره

لايابعد كل البنات المزايين
يافرحت المظلوم يوم انتصاره

من يوم ماغبتي وانا ماني بزين
ضايق واحس القلب طال انتظاره

دايم على بالي وانتي تمرين
واقول يفدوها جميع العذاره

لو الليالي ترجع لعشرة سنين
ماكان شفتي الشيب زاد بوقاره

لامانسيتك من ثلاثه وتسعين
وشلون ابنسى حب واضح مساره

تدرين شاللي هزني بيوم الاثنين
واللي ذبح قلبي باول نهاره

زولك لمحته يوم كنتي تمشين
بين الصفوف اقبال باب الاداره

وفز الخفوق وقلت ياربي تعين
هي هي ولاهي شبيه لساره

جيتك وقلت ابنقل البنت هالحين
تفضلي الاوراق والاستماره

طول سكاتك والبلا العين بالعين
ضقت واحس بضغط مدري حراره

وخانتني الدمعه وطاحت من العين
كني طفل يبكي مضيع دياره

بحط بنتي عندك بسادس ثنين
عشان اكثر جيتي بزياره

واليا دخلتي الصف لازم تخشين
اسمي لانه مسجلن بسواره

وامانتك انك عليها تخافين
لحدن يضايقها بايت عباره

بصارحك في شي يمكن تحسين
ان الزمن اقفى علينا قطاره

انا سمعت ان اكبر عيالك حسين
وانتي أكيد انك سمعتي بساره

[عبدالله الجعيثن]

سالم الضفيري





تسلم على النقل الرائع

[-------]

يسلمو الظفيري

نقل مميز

[سالم الظفيري]

تسلم وتدوم يابو غازي

شرفني مرورك الكريم لاهنت


لك تحياتي

[سالم الظفيري]

هلا فيك اختي ايثار

شرفني مرورك الكريم لاهنتي


لك تحياتي

[عبدالرحمن]

وش نحكم
وش نقول
وش نقتبس!
موقف وقصيدة وحوار يصور لك الاحداث ويضعك تعيش الدور!.
رائع اختيارك اخينا الرائع ابو زياد.

[شموخ شمالية]

,.


,



ياوجه ابوي الوجه مرحب وسهلين
.............. لا يابعد روح ومعاليق ساره



بيت يحكي صدق الحب في القلب العاشقة
كان الله في عونها




تسلم يمينك سالم

[الاصمعي]

عنتر وعبله
قيس وليلى
قيس ولبنى
كثير وعزة
توبة وليلى
وقائمة تطول كان الرجل هو المقدم وهو البادئ بالوجد لتأتي سارة محاولة تعديل الكفة بتقدم اسمها على اسم حسين وبدئها بالقصيد والتوجد على علاقة انقطعت واذكى نار شوقها سميتها ابنة حبيبها السابق حسين :)

القصيدة يغلب عليها الصناعة رغم جمال حبكة القصة لولا بيت فيها تحس فيه الصدق وانه طالع من قلب :

ياوجه ابوي الوجه مرحب وسهلين**لا يابعد روح ومعاليق ساره
يا وجه أبوي
لا يا بعد روح ومعاليق سارة
أضفن حرارة وصدق وواقعية كانت غائبة عن غالبية أبيات القصيدة

شكرا أخوي سالم لما تتحفنا به من جميل الإنتقاءات

تحياتي

[متفاائل]

يسلمو الظفيري

نقل مميز تحياتي

[سالم الظفيري]

الاروع مرورك يابو يوسف

لاهنت

احترامي لسمؤك


لك تحياتي

[سالم الظفيري]

تسلمين اختي ام عمر

وشرفني مرورك الكريم

لاهنتي

لك تحياتي

[سالم الظفيري]

عفوراً اخوي الكبير والغالي ابو خالد

شرفني ومرورك الكريم

لاهنت

لاك تحياتي

[سالم الظفيري]

يسلم عمرك يابو عمر

لاهنت على المرورك الكريم

لك تحياتي

[جمران]

لاهنت يابو زياد على النقل


تسلم يدينك

[سالم الظفيري]

هلا بخوي الغالي ابو نورة

شرفني مرورك الكريم

لاخلا ولاعدم


لك تحياتي