بعد قلبي يالجربوع :)

[الجازي]

الحين عرفت ليه ما أحب آكلك

ومو أنا لحالي لا !!

كل أنثى على وجه البسيطة ماتحب تذوق حتى المرقة اللي أنت انطبخت فيها :)

مع إن الرجال مايخلون شيء عشان يصيدونك ويتلذذون بطبخك وشويك وأكل لحمك :za3lan:

حسبي الله عليهم حسبي الله عالظالم والمفتري :)

هم يبون ينتقمون منك لأنك فضحتهم وكشفت عوارهم :7ayyoh:

طحت على معلومة من كم يوم

طبعاً من طيحني عليها غير طير شلوى :7ayyoh:

الدكتور جاسم المطوع لبى قلبه وتويتاته :thumb:

مستلم الحيوانات والحشرات وقاعد يفصفص علاقاتهم الزوجية :d:

شوفوا وش كاتب عن جربوع حبنا :7ayyoh:

“@drjasem: الجربوع يتمتع بحس اجتماعي عالي: ويتعرف إلى الحالة النفسية لأنثاه عبر الرائحة ليبادر بتقديم بعض الأعشاب الرطبة لها لتغير مزاجها”

لبى الحس الاجتماعي العالي ياناس

ولبى رومانسية الجرابيع كلهم :d:

من ريحة حبيبة قلبه يعرف انها مودها مو رايق :) <<<< يمكنها تحط عطر من أبو ريالين :7ayyoh:

وعلى طول يطارد في هالبرّان عشان يجيب لها عشبة الروقان والاسترخاء <<<< تسانها ماهيب قات الحين :)


بنات

لازم نسوي للجربوع نصب تذكاري في المضايف عشان نخلد ذكراه ونكافح حالات الصيد اللي يتعرض لها

وأي وحدة تسمع عن أخوها أو زوجها أو قريبها إنه رايح للبر يجربع تبلغ عنه هيئة حماية البيئة والثروات الحيوانية :7ayyoh:

هذا أقل شيء نقدمه لهالأطخم لبى روحه :d:

[متفاائل]

هههههههههه
يالبا الجرابيع عشان تعرفين ان الذكور مامنهم قصور حتى على مستوى اصغر المخلوقات

[-------]

الجازي

هل الجرابيع يعددون؟! << حالة نفسية

:315r:

[الجازي]

أبو عمر

أنا أشهد والله

عشان كذا حطيت هالموضوع :)

عشان ما أظلم الذكور على المستوى الحيواني والحشري بتعميمي :7ayyoh:

وكود الله يهدي الذكور البشريين ويتعلمون من هالجرابيع :)

[متعجب]

وعلى طول يطارد في هالبرّان عشان يجيب لها عشبة الروقان والاسترخاء <<<< تسانها ماهيب قات الحين

طيب وشتسوى عليه لا صارت نهايته بيد وغد يقلّب بوه على نار هادية !!


عموماً الدكتور لم يأت بجديد فهذا السلوك الجربوعي له نظير بشري

فيحق لنا ان نتساءل كيف اهتدى الحيوان الي محاكاة الاسلوب البشري بل والتفوق عليه على اعتبار ان الجربوع في خروجه حمل روحه على راحته والقى بها في مهاوي الردى

[شموخ شمالية]

.


,


حنا يالمسيكينات لاشافونا متضايقات قالوا الشهر 30 ليلة :puzzled:

أنا بجيب جربوعين بالبيت غدي يعطي اللي حولي دروس عن الرومنسية والليّن ..!

[متعجب]

^

إنتي امسكيهن أول

[شموخ شمالية]

^
^


اذا بهن فائدة صحيح بجيبهن :)

[الجازي]

إيثار

وش هالسؤال !!؟

أقول لتس يفحط في البران عشان المحروسة

تقولين يعددون !!؟

كذا أنت طعنتيه في صميم رجولته ورومانسيته ووفائه :7ayyoh:

الله يسامحك بس

[الجازي]

طيب وشتسوى عليه لا صارت نهايته بيد وغد يقلّب بوه على نار هادية !!


عموماً الدكتور لم يأت بجديد فهذا السلوك الجربوعي له نظير بشري

فيحق لنا ان نتساءل كيف اهتدى الحيوان الي محاكاة الاسلوب البشري بل والتفوق عليه على اعتبار ان الجربوع في خروجه حمل روحه على راحته والقى بها في مهاوي الردى

وش تسوى عليه !!؟

شفت شلون

هذا الفرق بين ذكور الجرابيع والذكور البشرية

انكم تفتقدون للحس الاجتماعي العالي اللي موجود في الجربوع :)

بعدين لو سمحت لاتقول كيف اهتدى لمحاكاة الأسلوب البشري !!

لأن العكس هو الصحيح

الجرابيع كلها تتصرف بهالطريقة

لكن البني آدمين ثلة قليلة من الأولين وثلة أقل من الآخرين اللي يتصرفون بهالشكل

معناها من اللي يحاكي الثاني !!؟

[الجازي]

شموخة

لا تكفين

لاتجيبين جرابيع عندتس للبيت

أخاف تخربين على الجربوعة جربوعها :)

ترى جرابيعنا قصدي رجالنا تأثيرهم قوي في مثل هالأمور

باتسر يعودونه على السهر والاستراحات وهيش وياولد ويمكن التعدد بعد :7ayyoh:

طالعي الجرابيع من بعيد لبعيد واطلبي ربتس تالي الليل انه .......







يعوضتس في الجنة :)

[ريال الفسحه]

عقبال ماشوفك جربوعه ويتنصادين عن طريق الغمت :)

[الجازي]

والله شف

اذا بتضمن لي حياة الجرابيع السعيدة هذي

أنا ماعندي مانع أضحي بحياتي :d:

[الحيمري]

هذا الجربوع لبي قلبك ليه لأنه ضعيف أنتي يبنات حواء تحبن من يطيعكن

ومن يروق مزاجكن


لكن ليش ماتشوفين اللبوه ملكه الحيوانات والغابه بتكليف من الاسد تصتاد الفريسه

ولاتذوقها حتى يسمح لها الليث


وكذلك الضب أنثى الضب وأسمها(المكون) اذا زارها في عقر دارها تضيفه

وتحك جسمه بضافرها من كل الأماكن ولا تتركه حتى يروق ويبتسم لها ويبين

ثناياه اللي تقل ثنايا منشار ويبدون في تعلله الرمنسيه



تسلمين الجازي

[بالمختصر..]

،





يبي لنا ندرس تصرفات الجربوعه وشلون تعامل الجربوع ؟؟

يمكن هي أطيب منوه :)

و الأهم من هذا نبي نعرف هي وش سوت لوه عشان يقدّر مشاعره !




.
.

[الجازي]

من قال يابو منيف اننا نبي الضعيف اللي يطيعنا :)

الضعيفة ماتبي ضعيف

بس تبي جربوع :7ayyoh:

[الجازي]

بالمختصر <<<يابعدي عطيني اختصار لاسمتس يريحني شوي :)

يعني هالحين جرابيعنا حريمهم ماهن أطيب منهم !!

أنا بديت أشك في هالطيب إنه هو ساس البلاوي :7ayyoh:

[أبو فهد]

طيب وش رايتس بالضب و أتسلوه



؟؟





------------------
أبو فهد الهمزاني

[ريال الفسحه]

لبّى قلب الشبث :)

[عبدالله الجعيثن]

^


لبا قلب الغلا :)

[شموخ شمالية]

.

,



أنا بديت أشك في هالطيب إنه هو ساس البلاوي


أنشششهد

[الجازي]

طيب وش رايتس بالضب و أتسلوه



؟؟





------------------
أبو فهد الهمزاني

والله على كلام أبو منيف

الضب يستاهل من ياكله

بس المشكلة

إنكم ماتصيدون إلا المكون :za3lan:

اللي هي أنثى الضب

وهذا سبب إضرابنا عن أكلها

زائد إننا نتبع السنة :)

الرسول صلى الله عليه وسلم تركه وحنا بعد نتركه :7ayyoh:

[الجازي]

لبّى قلب الشبث :)

صدز

فطنتني

كود الدكتور جاسم يسوي بحث على الشبث

غديه يصير حسه الاجتماعي فوق العالي

وتتعلمون من الغلا :)

[الجازي]

^


لبا قلب الغلا :)

الله يتمم عليكم :)

[الجازي]

شوشو

مايبيلها شهادة

هذي هي الحقيقة المرة :7ayyoh:

[ليلى بنت عبدالعزيز]

لبا الجرابيع تكفين :)

[عبدالرحمن]

يعني وش ناقصكم يالحريم يوم انكم رحتو للجربوع والعنكبوت وبقية الزواحف:)
وتركتو صاحب الايادي البيضاء والاعمل والافعال الحميدة وهو اقرب مخلوق لكم:thumb:

[صلفيق]

^
^

ابو يوسف ..
الغريزة واحدة في المخلوقات .. والانسان بفطرته اسمى وأجل من الجرابيع ،،
لكن بنت حواء تخلّت عن بحث وتقصّي اسباب تغيّر بني آدم وتحولهم عن الفطرة !!


>>> ونصيحتي لكل بنات حواء ـ "كوني له أربع..!" ستجدي جربوعك يفوق كل الجرابيع !



شكرا الجازي،،،

[الجازي]

هلا والله بليالي

أجل جاز لتس هالجربوع :)

ماشفتي شيء

عندي قائمة طويلة عريضة بهالبهايم والعز اللي عايشين فيه :)

بس أخاف تصكونهم بعين :7ayyoh:

[الجازي]

أبو يوسف

مو حنا اللي رحنا

الدكتور جاسم الله يسامحه هو اللي فتح عيوننا على حياة هالبهايم :(

وإلا حنا راضين وصابرين ومحتسبين :7ayyoh:


تهقى ليه ذابحن روحوه الدكتور ومسوي دراسات على هالبهيمات !!؟ :)

سؤال يستحق البحث عن إجابة

[الجازي]

أبو مشعل

جازت لي نصيحتك

(( كوني له آربع .... يكن لكِ مجربع )) :7ayyoh:

بس للتصحيح :

بنت حواء ماتخلت عن البحث والتقصي لأسباب تغير بني آدم

البحث والتقصي هو اللي خلانا نتابع مستشار أسري بوزن الدكتور جاسم المطوع :)

بس هو الظاهر وهو أعلم منا بنفسيات الرجال كونه رجل :)

أقول هو شكلوه بلش بعمروه ولا عرف لكم ولقى في دراسة الحياة الاجتماعية للحيوانات والحشرات بغيته :7ayyoh:

[عبدالرحمن]

سؤال يستحق البحث عن إجابةنعم سؤال يستحق البحث اذا مانظرنا اليه من زاوية قائمة اهتمامات مجتمع العرب اليوم!
ولكن اجابته يسيرة وسهلة اذا ماتم النظر اليه-السؤال-
من زواية الكمال الانساني!.
شكرا لك يالقديرة.

[الجازي]

أبو يوسف

طيب هات إجابته اليسيرة والسهلة من زاوية الكمال الإنساني :)

وخل عنك اهتمامات مجتمع العرب مع إني أشوف البلوى عامة عرباً وغرباً :7ayyoh:

[عبدالرحمن]

طيب انا جاوبت طال عمرك على السؤال:thumb:
بس مافيش مشكلة حجاوب مرة تانية:)
ارى ان اهتمام المطوع وغيره من الناس هو اهتمام طبيعي
بل هو اهتمام اصيل يجب على كل انسان ان يسلكه!
فالفطرة السليمة والعقائد السماوية والوضعية طالبت الانسان
بمعرفة مكونات ومزعجات وصفات بقية شركاؤه في المعمورة!.

[متعجب]

^
^
وفي رواية اخرى

ان كل من يتصدّى لنشاط حياتي إجتماعي كان أو نفسي
عليه أن يتزود بالمعلومة تلو المعلومة وأن يبحث في القمر لو اضطر للتنوّع الثقافي
كونهِ في حاله متجددة من المسؤولية تجاه مريديه

فالمعلومة كالرصاصة في كلاش المثقف

وأي خير يُرتجى من كلاشينكوف بدون رصاص

[عبدالرحمن]

نعم صدقت اخي متعجب فنحن المسلمون مطالبون بالعلم ولان العلم معرفة والمعرفة ثقافة والثقافة انسان واع والوعي نحن اولى الناس به!.

[متعجب]

صدقت أخي عبدالرحمن
نحن مطالبون بأن نعود لخير أمة
من إحترامنا لديننا
للغتنا... لإنسانيتنا

والثقافة مقياس لجودة المجتمع من عدمه

وليس كل مثقف.. مثقف

[أبو فهد]

والله على كلام أبو منيف

الضب يستاهل من ياكله

بس المشكلة

إنكم ماتصيدون إلا المكون :za3lan:

اللي هي أنثى الضب

وهذا سبب إضرابنا عن أكلها

زائد إننا نتبع السنة :)

الرسول صلى الله عليه وسلم تركه وحنا بعد نتركه :7ayyoh:



لما تقولين من السنة ترك أكله كأنك تقولين إن أكله مكروه !


الرسول ما اشتهاه أو ما طابت نفسه للضب بس موب معناه من السنة ترك أكله :)




------------------
أبو فهد الهمزاني

[الجازي]

بالنسبة للأخوان اللي قلبوا ردودهم وصاروا يتكلمون عن الثقافة ترى موضوع محمد العربي عن ملتقى المثقفين في العام مو هنا :7ayyoh:

هنا موضوعنا عن الدكتور جاسم المطوع وأبحاثه حول الحس الاجتماعي العالي لدى الذكور في الحيوانات والحشرات في علاقاتهم بزوجاتهم :)

نرجع لمحور حديثنا

الدكتور الله يطول بعمره شاف المعضلة اللي يعيشون فيها بنات حواء ومعاناتهم مع رجال يفتقرون للحس الاجتماعي :)

وبعد محاولات مستميتة للدكتور لوضع حلول كلها باءت بالفشل قرر إنه يدرس الطريقة الحيوانية ويشوف هل ممكن يستفيد من الخبرات الحيوانية في هالمجال :7ayyoh:

ولا زالت أبحاثه قائمة ولو إني أشك في إمكانية تطبيقها عليكم :)

لذلك أقترح من هالمنبر على الدكتور إنه يبحث عن أصناف حيوانية تعاني فيها الأنثى من جفاف الذكر ويشوف كيف قدرت تكيف نفسها عشان حنا نتكيف مثلها <<< الإناث عموماً أقدر على التكيف مع الظروف الصعبة :)

ودمتم سالمين

[الجازي]

أبو فهد

أنا ماقلت إن الرسول صلى الله عليه وسلم كره أكله

قلت ترك أكله

ومتابعة الرسول صلى الله عليه وسلم سنة حتى لو كان الأمر مباح ولا يعني قولي إنه سنة إن غيره مكروه

مثل متابعة عبدالله بن عمر رضي الله عنه للرسول صلى الله عليه وسلم في أدق الأمور ومروره على نفس الأماكن التي مر بها الرسول عليه الصلاة والسلام في العمرة أو الحج بينما غيره من الصحابة لم يتابع بهذه الدقة وكلهم يقال أنهم متبعون للسنة

[عبدالرحمن]

طيب والدكتور المطوع اليس من الناس المثقفين ---هذا نمرة واحد
نمرة اثنين ---- نعم هناك الكثير من الرجال الذين هم بفتقدون ادنى حس انساني
وخاصة مع زوجاتهم واهل بيتهم نعم يجب على الزوج ان يؤدي حقوق زوجنه قبل ان يطالب بحقوقه.
نمرة ثلاثة----.......................................... هونت:)

[ريم شمر]

جازت لي نصيحتك

(( كوني له آربع .... يكن لكِ مجربع )) :)

:solh:


ياليت كل اشهب جاف المشاعر يروح للبر ويصيد له جربوع
بس لاياكله :)...يخليه عنده شهر ياخذ منه دروس مجانيه
بعدين يرجعه لحبيبته الجربوعه المملوحه
وهو يبدأ بتطبيق اللي تعلمه :qannaj:


مشكوره الجازي على فتح اعين جرابيعنا على رومنسيه جرابيع البر :315r:

[الجازي]

الدكتور جاسم مثقف

لكن حديثنا كان بسيط واجتماعي بعيد عن الحوارات الثقافية :7ayyoh:

فبلاش تعقيد

وخليكم مثل جربوعنا ذوالحس العالي :)

[الجازي]

ريوم

لاياقلبي

أنا خايفة على الجربوع لاتختل تركيبته النفسية وتنعفس جيناته وينخفض حسه الاجتماعي بعد مايخالط جرابيعنا :7ayyoh:

ونجني على الجربوعة المسكينة :d:

خلي الجرابيع للجربوعات وحنا لنا الله :)