الجوال - رمز القفل -

[جمران]

بسم الله الرحمن الرحيم


السلام عليكم ورحمة الله



والله شطح هالسؤال على محدثكم وقلت ابي أشوف ردود افعالكم

مابين مؤيد او معارض او واحدن ماتفرق معه



الجوال

لايخفى عليكم انتشاره واصبح في متناول الصغير قبل الكبير

وايضا التطور الحاصل من خلال تقنيات الجيل الثاني والثالث مرورا بالرابع

والتنوع والتعدد الحاصل في الاجهزه الذكيه


كل هذا يجب ان يكون محل اهتمام رب الاسره ومن اولوياته هو وشريكة حياته


لكن السالفه اللي خلتن اطرح هالموضوع انه بوه واحدن من اخوياي البارح بالدوام بالصدفه عرفت انه حاط رمز قفل على جواله

سالته ببراءه طيب اهلك اعني زوجتك ماتسالك ليش حاط قفل يعني ماتشك ان عندك شي خايف منه بالجوال

قام وجاوب بغلظه شوي وقال بالحرف الواحد والله ياجماعه استغربت منه

قال انا اصلا قايلها اذا ماتبي يدها تمدها على جوالي :wallah_hoo:

رديت شلون يعني وش تقصد بكلامك؟

قال حرام اكسر لها يدها اذا مسكت جوالي ... افى الى هالدرجه يابو فلان!!

سالته ليش وش انت خايف منه او هل هناك شي تخاف انه تطيح عينها عليه؟


قال لا انا رجال .. والله جوابوه افحمن مدري بهت منه .. واذا رجال يعني سبيتك انا


قال عيب ياجمران >> عاد ماقال جمران :)

ايه يقول عيب الرجال هو اللي له السلطه ومحد يفتش وراه.

يقول والكلام لـ صاحبي .. عمرك شفت موظف يفتش على مديره ؟؟؟


صراحه ماعرفت وش اقول

بس


قلت لوه انت ترضى ان حرمتك تحط رمز قفل على جوالها ؟؟

قال ايه بس اعرف الرمز ... حللللوه يانا ضحكت بتهكّم >> لايجي احد ينشدن عن معناه :(








انا بالنسبه لي .. صراحه جوالي مابوه رمز قفل ولا حتى جوال اهلي ومن اجي البيت جدعته يا على حدى هالكنبات او على تسريحة الغرفه


لا ومره نسيته بالسياره بعد :)




السوال لك ولها:


مارأيك في رمز القفل وسريته على الزوج او الزوجه؟؟




بانتظاركم

[شموخ شمالية]

.


,

أعتقد إن الجوال حاجة خاصة بالشخص نفسه
ولكن أنا حتى لو حطيت رمز القفل يكون أبوعمر يعرفه
لكني أستخدم الرمز بحالة وجود أطفالي
لانهم الله يهداهم اذا صار بيديهم دائمآ يدقون على الاسماء الموجودة بالجوال






شكرآ أبونورة موضوع مهم الصراحة

تسلم

[الجازي]

الثقة اذا كانت موجودة بين الزوجين ماراح تمنع وجود رمز قفل على الجوال او عدمه !!

لأن الخصوصية حق من حقوق الطرفين

من حقه يقفل جواله ومن حقها تقفل جوالها

وهذا مايستدعي الشك أبداً

لأن اللي عنده بلاوي ممكن يطلع جوالين

واحد مفتوح وعام ويخليه قدام عينها عشان تتطمن

والثاني يخفيه ويهبب فيه من وراها :7ayyoh:

ولا من شاف ولا من دري :)

الثقة أساس العلاقة الزوجية

[الاصمعي]

والله يا فلان الخصوصية زينه ولا هنا مشكلة بالقفل الي أقل ما فيه انه يمنع هالصغار لا يتعبثون بالجوال

ذكرتن الله يذكرك بالشهادة بلي سؤال عن الأقفال مبطي ودي أسأل عنه والظاهر أبي أسدحه بموضوع مستقل

[جمران]

.


,

أعتقد إن الجوال حاجة خاصة بالشخص نفسه
ولكن أنا حتى لو حطيت رمز القفل يكون أبوعمر يعرفه
لكني أستخدم الرمز بحالة وجود أطفالي
لانهم الله يهداهم اذا صار بيديهم دائمآ يدقون على الاسماء الموجودة بالجوال






شكرآ أبونورة موضوع مهم الصراحة

تسلم
حي الله مشرفتنا ام عمر


كلامتس طيب

لكن لو كان الرجل هو اللي حط القفل بجهازه وعيّا يعلمتس عنه مفتاحه


.. هل هناك مشكله عندتس ام ترينها ايضا حريه شخصيه





أشكر لتس مرورتس خيه

[جمران]

الثقة اذا كانت موجودة بين الزوجين ماراح تمنع وجود رمز قفل على الجوال او عدمه !!

لأن الخصوصية حق من حقوق الطرفين

من حقه يقفل جواله ومن حقها تقفل جوالها

وهذا مايستدعي الشك أبداً

لأن اللي عنده بلاوي ممكن يطلع جوالين

واحد مفتوح وعام ويخليه قدام عينها عشان تتطمن

والثاني يخفيه ويهبب فيه من وراها :7ayyoh:

ولا من شاف ولا من دري :)

الثقة أساس العلاقة الزوجية



:goooood:


كلام سليم جدا وعين العقل خيتي الجازي


لكن المشكله بالعقليات ليست على مستوى واحد تختلف باختلاف الظروف والاشخاص




شكرا ع المرور وحياتس

[جمران]

والله يا فلان الخصوصية زينه ولا هنا مشكلة بالقفل الي أقل ما فيه انه يمنع هالصغار لا يتعبثون بالجوال

ذكرتن الله يذكرك بالشهادة بلي سؤال عن الأقفال مبطي ودي أسأل عنه والظاهر أبي أسدحه بموضوع مستقل

هلا بابو خالد ياهلا

هو الخصوصيه زينه


بس المساله ماهي بعبث الاطفال تقدر تلقى حل لهالموضوع



لكن الكلام عن موضوعك اللي فطنتك عليه الله يفطّنا الشهاده جميع ومن يقرا




<< منسدح ينتظرك تسدحه :)



منوّرني يالغالي

[سالم الظفيري]

انا بالنسبة لي حاط قفل وهي تعرفة وهي حاطة قفل ونا اعرفة

والموضوع عادي اهم شي الثقة بين الاثنين

بس لابد من القفل تعودنا على القفل

وتعرف فيه ناس ملاقيف احيانا اذا شاف الجوال طايح ومن غير قفل قام يفتش

فيه مسوي ميانة يعني

ولابد تكون في اسرار اقل شي رسائل غرامية من المدام



تسوي مشتاقة يعني


كل اكثر الرسائل وينك ومتي تجي مطول

وجيب معك وجيب معك الخ.....

لاهنت يابو نورة

[جمران]

انا بالنسبة لي حاط قفل وهي تعرفة وهي حاطة قفل ونا اعرفة

والموضوع عادي اهم شي الثقة بين الاثنين

بس لابد من القفل تعودنا على القفل

وتعرف فيه ناس ملاقيف احيانا اذا شاف الجوال طايح ومن غير قفل قام يفتش

فيه مسوي ميانة يعني

ولابد تكون في اسرار اقل شي رسائل غرامية من المدام



تسوي مشتاقة يعني


كل اكثر الرسائل وينك ومتي تجي مطول

وجيب معك وجيب معك الخ.....

لاهنت يابو نورة

تسلم على مرورك واضافتك الظفيري

والله يعينك على الاغراض اللي يوصونك عليها :)

[عبدالرحمن]

يقص يده ويذبحه!
اعتقد ان هذا الشخص معقد ومن العصر الحجري!
حقيقة انا مع القفل الادبي بين الزوجين وليس القفل التقني!
بمعنى ان الزوج او الزوجة يجب عليهما ان يترفعا عن هذا الامر.
شكرا لك العزيز ابو نورة.

[جمران]

يقص يده ويذبحه!
اعتقد ان هذا الشخص معقد ومن العصر الحجري!
حقيقة انا مع القفل الادبي بين الزوجين وليس القفل التقني!
بمعنى ان الزوج او الزوجة يجب عليهما ان يترفعا عن هذا الامر.
شكرا لك العزيز ابو نورة.

نوّرت الموضوع يالغالي باطلالتك واضافتك


كلام سليم واتوافق معك فيما قلت



شكر لك ابو يوسف

[بالمختصر..]

،





يعني بـ إختصار / مو كل من حط قفل للجوال يكون عنده بلاوي !

و لا كل من ترك جواله مفتوح يكون ثقه ( لأن ببساطه ممكن يكون عنده جوال ثاني ) :)

و اعتقد بهالوقت مو المشكله الجوال فقط ! اللابتوب بعد !!



لا تقول ما جاوبتي ع السؤال !

لا ناقة لي فيها و لا جمل :)







.
.

[ريال الفسحه]

انا وحرمتي جوالنا واحد :)

[الجازي]

مايهذري المهذري الا من حر الصخونة


الا تسانك فيك توحد :)

[ريال الفسحه]

^

حددي من تعين :)

[الجازي]

واحدن مسيكين عايشن أحلام اليقظة :)

[ريال الفسحه]

^

منك لله ياللي ماتخافين الله


الله فوقتس :(

كل قوي وفوقه قوي :(

[عبدالله الجعيثن]

انا وحرمتي جوالنا واحد :)


<<<خبل .. مثل اللي فوق:)



وشوّله الخساير

[الشبث]

يالربع اعصااابكم شوي على الرجال



جمران


قسم بالله يا خويك انوه الرجل


ياخي اشوف نفسي فيه ذيبان :)






ياخي انا اتكلم لك عني انا


انا ارمي جوالي على واذا تعرضتوه حسابه عسير


وانا لو اشوف جواله قدامي ما اجيه

احترام لخصوصيته


وانا ماني مركب قفل وعادي اركبه ما فيها شي




بس خويك يا جمران رجاااال صراحه وسلملي عليه







وتقلد تحيتي

[ليلى بنت عبدالعزيز]

مدري عن الناس لكل له عقل وتفكير
بعضهم شك وبعضهم بس شفايه:)

انا عني عمري مافتشت جواله ولا كمبيوتره
وهو نفس الشي ..


اهم شي بالعلاقهالزوجية الثقه المتبادله :)

ابو نورة امطر الاسري بموضوعك :)

[-------]

ليه الجوال بالذات سبب اساسي للااحساسنا بعدم الثقة بين الزوجين هذا سؤالي .. اود الاجابة عليه



,,,,,,,,,,,,,,,,,,


اما وضع رقم سري لجواله فأنا من قمت بوضعه وذالك بسبب احد اصدقائه متطفل
يقوم بتفتيشه ويعلق ع رسائلي لحد الازعاج وتم وضع رقم سري من قبلي انا اعرفه

حتى نحفظ اسرارانا بعيدا عن المتخلفين



بمعنى اخر ...

الحرص والغيرة على ارقام ورسائل اهله