اكتب بيت شعر عن بداية الدراسه [الأرشيف]

مشاهدة النسخة كاملة : اكتب بيت شعر عن بداية الدراسه

احمد الخالدي

10-09-2002, 10:21

مساء وصباح الخيرات...

شمر العز والكرامه.....شمر الشموخ...

ابتعدت لزحمة عمل بالأنترنت..

وهاانا اعود بهذه الفكره الجديده التي لم ارها

بجميع المنتديات....

وهي ان تكتب بيتين عن ذكرياتك بأيام الدراسه

او عن اي شي يتعلق بالمدرسه والكتب...

نعرف جميعاً ان العد التنازلي لبداية الدراسه قد بدأ...

واشبع دفاتر ابو ستين ودفاتر وجه ووجه....ومساطر

وحلاتها افتح مكتبه بس يومين والله تجاره رابحه..

وابيع فيها اقلام ابو نص

وسأبدأ اولاً......

لاتشغلك... عني مساطر.. وأقلام
..............لاتشغلك... عني كتب... أو دفاتر
انا بحبك... اسهر الليل ....مانام
.............وانته... ولااهتميت ناجح..وشاطر

احمد الخالدي

:D

والله كانت الدراسه ذكريات جميله وحلوه...

اتمنى لجميع الطلاب النجاح والمثابره

لكم تحياتي

عبدالله الجعيثن

10-09-2002, 10:32

لي حبيب مايحب المدرسه
ساقط بالانجليزي والعلوم
ـــــــــ

ياناجح(ن)وشو شعورك لياصار
قريت اسمك ناجح بالجـريده

الداعيه / براك الفريسي الجربا

10-09-2002, 17:14

قالو لي ادرس قلت مانا ويا الدرس
هالحين ابدرس مشكل اللى بلتني =

اللى تعلمني على العمس والطمس
ياما دمرت مستقبلي واتركتني=

شموخ

10-09-2002, 23:58

يعني حتى انتم انتقل لكم الفيروس من فوفو لازم تنكدون علينا وتذكرونا بالدراسه خلاص خلونا نستانس هاليومين من غير ماتجي على البال مو كفايه فوفو كل يوم وهي باقي 5 ايام عن الدراسه باقي 3 عن الدراسه ماتهنينا بالايام اللي تعدها

مع تحياتي لكم

اختكم
شموخ

مبروك بن ماضي

11-09-2002, 01:49

هـذة مشاركتي : مع صـادق مودتي .

------------------

( يـا احمـد ) فــ ايــام الـدراســة تـعـجـبـت
--------------------- خـمـسـة . ولاحـبـيـت فـيـهـن ولايــوم
لا فرحـت ( بـالجمعـة) يـروعـنـي الـسـبـت
--------------------- لـمـا يـصـحـونـي اخــوانـي مـن الـنـوم
والـمــــشكلـه (يـالخــالـدي ) لا تـغــيــبــت
--------------------- أحــزن واضـلـي طــيـلـة الـيـوم مهـمـوم
قـل ( للـفـريـسي ) من دروسي أنـا تـعـبـت
--------------------- والـلي مـعي كافـي من دروس وعلوم
خــذيــت تـحـصــيــلـي مـن العلم ماخـبـت
--------------------- والحمــد لـلـمـولـى عـلـى كل مقسـوم

وعلى المحبة نلتقي :

أخوكم ومحبكم بن / ماضي

ريانة العووود

11-09-2002, 02:25

السلام عليكم ..

ويعاودنا الحنين ...

الى مامضى..

وذكرت اني..على الصفحه...اخايل..نور..بسماتك..

مع جمعه ومع طرحه...تضيعني..بضحكاتك...

فديت علومك السمحه....وتاريخك...ومافاتك...

دخيلك...دقت الفسحه...واحاسيس الغلا جاتك..

بصراحه مااعرف كيف طلعن هالابيات ...؟؟

كل العذر منكم..

(ابيات كيبورديه...)

ياليت..وليت ..ماتجدي...اعيد..العام....ماارحل

نجح قبلي ونجح بعدي...وانا..لاعلم..لاجدول..

دفاتر..بيّحت سدي....مسائل....واتحدا الكل..

علومي بحبك تعدي..على علم..وفقه الاخطل..

ايا مستقبلي الوردي....معاك احيا ..ولا اذبل..

على عهدي على عهدي...اعيد العام..ماارحل

السمووووووحه

(ريانة العود)

طارق

11-09-2002, 09:18

مريول طفله .... والشوارع تبتسم لعيونها

هم طفله ..... والزهر ذابل على زيتونها

ليش طفله..... فى الحساب وفى القرأه..... تسئل الابله

هنادي .... يعني خمسين عام كم !!!!!

قا لت هنادي ... يعني خمسين كاس سم

قالت الطفله ف برائه .... يا ابلتى ... ليش نرضخ .... لليهود

قالت الابله ف بلاهه ( ما رضخنا ... بس حرفين قلنا .... شارون........ ( سم ) ( سم ) !!!!!!!!!

سلطان الشمري

11-09-2002, 17:50

ماعدت انا ياستاذ بالدرس ملزوم

صلاح مع حمدي وشوقي على زيد

هذا فعل مبني وهذاك مجزوم

وهذا فلز وسين مع صاد ماريد

ياهيه ياللي من الوناسات محروم

خل الدراسه واترك الدرس يالليد
:D

احمد الخالدي

11-09-2002, 20:10

شكراً لجميع المشاركين...

ومشكور يامبروك بن ماضي.......

واقول لشموخ...

الدراسه لاتعرف حلاوتها الا عندما نفقدها..

لكم الشكر جميعا

تحياتي

نوف

12-09-2002, 00:19

وربي ما اعرف وش اقول

ما اعرف وش اعبر

صدقوني اللي ينتهي من دراسته وربي راح يشتاق لها

لاني اللحين امر بهالوضع

مشتاقه حيل للدراسه

وربي ايام الدراسه حلوه
جمعت الصديقات مع بعض
ضحكهم ووناستهم

وجدهم ايام الاختبارات..ربكه الاسئله

ترتيب الاجابه..........واااااااااااااااو لحظات حلوه
وربي حلوه الدرااااااسه وحلوه ايامها ولحظاتها ودقايقها...

اسفه
ماقدر اقول شي ثاني

تقبلو تحيات اختكم
نوف

العذب

12-09-2002, 02:31

يازين وقت قد مضالي مع الدرس ** وانا غرير ما عرفت العشاشيق

أيام لا عاشق ولا عارف الهرس ** ما غير بالكراس مثل البطاريق

واليوم قلبي محترق ينشد العرس ** والعرس أبعد من جبال شواهيق

وعلىالمحبة ,,,

الداعيه / براك الفريسي الجربا

12-09-2002, 15:25

هنيت من لا ذاق طعم الدراسة
ولا ذاق فيها من بهاذيل وشطون =
عزالله انه ناعمٍ (ن) بالوناسة
ومقدرٍ(ن) رزقه على رافع الكون =
ما لوعته الرايرة مع مماسه
وتفاعلات الكيمياء لو تعرفون =

السالمي

13-09-2002, 01:48

الدراسه وش لقيت من الدراسه
ما لقيت الا التعب مابه وظيفه
جامعي وعطلان من زود النحاسه
المعدل زفت والنسبه ضعيفه

فنجان

13-09-2002, 11:00

في المدرسه احكيلكم قصه&&& تروق للى لديه احباب
بديت اغني بكل حصه &&& حتى طردوني من الابواب
اول دروسي فلك ونجوم&&& واستاذ يشرح بجديه
يسالني وين القمر معلوم &&& جاوبت انا بالشماليه
تاريخ ثاني الحصص ماقواه &&& يسال عن محمد الفاتح
جاوبت انا وقلت اهواه&&& والشرح في وصفهم واضح
ثالث دروسي انشاء صار &&& ويقول عبر على كيفك
عبرتبه عن خفوق طار &&& وعنوان درسي على طيفك
المرشد جاني وانا طالع &&&جاني يقول المدير يبغاك
قلت اغسل وانا راجع &&&ورميت كتبي من الشباك

--------------------------------------------------
--------------------------------------------------

فيصل اللويش

13-09-2002, 11:57

ياسيدي علمتني وصرت عبدك 000خليتني ياأستاذ اكتب وأقرى

تحيه اكبار واجلا ل لكل من علمني حرف في هذه الحياه وفعلا

( من علمني حرفا صرت له عبدا )

فيصل اللويش

احمد الخالدي

14-09-2002, 17:13

شكراً لجميع المشاركين....

لكن امتعني فيصل بوفاءه لمعلميه....

الشباب الباقي مدري شفيهم على المدرسه

تحياتي للجميع