لدينا خصومات حتى 90 %

[ريال الفسحه]

السلام عليكم


/



مساؤكم ورد يا أهل العام ..


مسكين هو هذا المدعو ( مواطن :) ) فالكل يطمع به !!


وعلى أيش يا حسره .. على مامنش :055r:


بالأمس كنت أدوج بأحد المولات ( الغولات ) التي تعج
بالشعب اليمني وكأنك في قلب صنعاء .. ايش مالك ياخي :)


لم نأتي لمربط الهورس


لفت أنتباهي محل مكتوب عليه خصم 90% والله ماكذبت ..


جلست اتأمل هذه النصبه ( الحسبه ) كيف تم حسابها
وهل هي فعلا صحيح !!؟


لو ضربت لكم مثلا


ان قطعة الملابس كانت تباع بقيمة 100 ريال ذلك يعني ان
الـ 100 بعد ذلك الخصم تصبح 10 ريال ف ق ط :puzzled:


يعني


من المعروف انه مافيه تاجر يعرض بضاعه باقل من سعر
التكلفه ..


هنا نخرج من هذا الموضوع بخيارين امرهما مر :)


ان القطعه اساسا سعرها 10 ريالات وهو له سنه جالس
ياخذ مكسب عشر اضعاف التكلفه :148r:



الخيار الاخر


انه لافيه خصم وهذا مجرد استغفال للمدعو المواطن
وهذي اخس واردى يامواطن :) ..


ليش مافيه تسعيره في كل المولات الان جميع المحلات
حاطين نظام كمبيوتر من تمر القطعه يطلع سعره بالشاشه


ليش وزارة التجاره ماتشبك سستم كامل لجميع المحلات
وكل قطعه مسعره من قبل الوزاره بكودها الخاص ؟!!


جاوبوا يامواطنين :)




كوسشن


هو صحيح كلمة مدير بالبنقالي تعني الاخ دونكي؟!
اللي متاكد يعطينا خبر طلعنا مديرين :)

[منصور الغايب]

أهلا بالغالي ريال الفسحة ...

الخوخ .. أضاء جنبات العام :)

.
.
.

غالبية تلك الخصومات وهمية ... الهدف منها جذب الزبون الذي إذا جاء ... سيشتري مهما كان الثمن ... ظنا منه أنه سبق غيره لتلك الخصومات ..

المسؤولية ملقاة على عاتق الجهات الحكومية التي يجب ان تفعل دورها الرقابي ..

والمستهلك ليس بمنأى عن المساءلة ... فلو كنا أكثر وعيا ... لما ضحك علينا أحد ...

شكرا يا خوخ ...

[ســـعود]

اول شي وش دخلنا نحن يا المواطنين نجاوب :)

نحن غلبانين زيك ونندهش كل يوم من اللي نشوفة ومالك الا الصبر وانت صدق وش وداك له:) << يقصد المحل

ريال الفسحة تحياتي لك

[ريم شمر]

^
^
هو صادق اخوي سعود

السؤال يوجه للمسؤول فهو مسؤوول

اما انه ملعوبن علينا فهذي خالصين منها

ومشكلتنا شعب حبوب ونمشيها :)


واما اهل صنعاء وحضر موت فالله يردهم لديرتهم سالمين

ويكفينا شر من فيه شر و ابن البلد احق واولى

بس من يفهم ؟!!


منور ريالنا وربي منور :7ayyoh:

.
.



ابو عبدالله ترى ريال الفسحه رد الزياره

في ظل تبادل الزيارات الدبلوماسيه

بما ان مندوبة العام زارتهم :)

[جمران]

ياخيي ريال انت بطران تروح للمولات





خلك من القيصريه وورى


هههه






بالنسبه لسوالك عن المدير




اذا هو صحيح الترجمه



ماكذبوا



لانه ماياصل للاداره الا واحد مدير محترم:315r:

[عبدالرحمن]

الاعلان التجاري فن وحرفة وقد تستغرب ان قلت لك بأن الاعلان التجاري
له اهله المتخصصين حتى في الاسلوب الاستخباراتي!
وقد تقول كيف؟ فأقول الجواب في اطراف دماغك حركه ستجد الاجابة لكن انتبه من هذه الطواقم الاستخبارية على مايحتويه دماغك!
ومع كل هذا اللوم يقع بالدرجة الاولى على المواطن ومن ثم الوزارة المعنية! نعم المواطن هو من جعل منه التاجر بقرة حلوب
تدر في حسابه الشهري المبالغ الكبيرة جراء انجراره وراء اعلانات خادعة الهدف منها افراغ ما بقى بجيبه من بواقي الريالات!.

لك شكري وسعداء اهل العام بطلتك ايها العزيز المقدام.

[الشبث]

ريالي


لقد اصبت خشم الحقيقه

<< يخبروه مهو صويبن حيل










كان فيه خوين لي عزيز بالحيل



وهالخوي تعرفت عليه بالدوام عندنا بالمصنع لانه زميل لي



يقولي هالزميل



انه كان يشتغل عند الجديعي حق الاقمشه



اللي ما تشري المتر منوه بأقل من 60 ريال




يحلف ويقسم الرجال وهو ان شاء الله من الصادقين


يقول اقسم بالله ان المتر يطلع علينا ( بربع ريال )



وازيدك من الشعر بيت


بضاعتهم صينيه ويطبعون عليها انقليزي



وهو كان يشتغل بالتكاليف عندهم


وكل شوين مسفرينوه للصين








يارجال حنا عندنا حماية مستهلك اصلا



وتقلد تحيتي

[جمران]

عندنا حماية تجار فقط

[المشرف العام]

/

اولا : وش موديك يم المولات وانت عزوبي :)

/


ثانيا : ماعمري شفت توحيد في اسعار البيع ، عشان اطالب بأن تكون التخفيضات تحاكي الواقع :)


لو تشتري جهاز تلفون بالثقبه ، تلقى نفس الجهاز بالخبر بزياده تقريبا 25% او بالدمام ارخص من كذا


الشيء المضحك ، ان بنفس الشارع تلقى تفاوة غريب من محل لمحل لنفس البضاعه ولنفس الموزع ، اذكر اني سألت احد فاهم بهالشغلات قال السبب ارتفاع فاتورة كهرباء المحل بسبب الاكباس اللي حاطها اخونا في الله بالواجهه والمستهلك يدفع ثمن استهلاكها


:)



تسلمي ومنوّر العام ياسلمان


لاهنت

[أبو فهد]

ياخي وش هالمول اللي كله يمنا



ياخي اغدي إنهم لبنانيين و تحسبهم يمنا :)





المهم يا حبيبي هاللي يشرون الملابس يشرونهن بقيمة تكلفة و جمرك و نقل ما يقارب ربع أو نص ريال



و يبيعه بمية أو حول الدعوة



و هامش الربح




و أنا ما ادري ليه سموه هامش رغم دسامته



الهامش يكون 10000%




و سلامتك




----------------
أبو فهد الهمزاني

[ابو ضاري]

المشكله ان العالم يدرون انهم ينصبون بس رغم ذلك

يذهبون ويقولون خصومات

تسلم يمينك يالغالي على الموضوع

[أهداااب]

لدينا خصومات حتى 90 %


:


يمكن المحل يبي يعزل ..:315r:

شوف يا خيي ريال ..

صحيح أنهم يشتروا بضاعة بالجملة و من الخارج و يطلعوا قيمتها بالقطاعي دبلّ ..

لكن في المقابل في ..

جمرك ، أجار محل ، راتب عمال ، فاتورة كهرب ........الخ

و العالم تبي ترزق الله :315r:

أما موضوع توحيد الأسعار فأظن صعب تحقيقة ..

لأن كل محل تصنيفة يختلف عن الآخر من ناحية نوع البضاعة و مصدر بضاعته و خراجه فيها و غيرها من الاعتبارات ...



شكراً

[ريال الفسحه]

منصور


تسلم ياخوخ معاليدزي انت :)


::


سعود


الله لايهينك وكلامك صحيح ..


::


اختي الكبيره ريم


مرورك من هنا فقط شرف لي فكيف بتعقيبك

سلمتي ولاهنتي يام طلال وعقبال زيارات اخرى:)


::

راع الجمريه


القيصريه له عشر سنين ماتهيا يخلصونه :)


تسلم يابعدي


::

عبدالرحمن


كلامك صحيح يابعدي


لاهنت ع المرور ياشايبنا:)


::


شبوثي .. شيبثان .. شبثث <-- يحب يدلعوه :)


وحنا كل ماهذا ملوذينن على الجديعي نشري
المتر بسبعين وثمانين خخخخخ

وهو بقيمه علك خخخخخخ


لاهنت يابعدي


::


ابوسلطان هنا <--- وقف :)


كلامك صحيح والايجار يؤثر بسعر
القطعه ..

شكلك كل يوم شاري تلفون :) بيدو حيلك الوغدان :)


مرورك من هنا وسام اعتز به


سلمت يابوسلطان


::

ابوفهد

الهامش والله حنا :)


لاهنت يابعدي


::


ابوضاري


لياجيت الحساء مرن خل نروح للمول نتوطا
ابويمن :)


تسلم لي يابوضاري


::

اهداب .. هدبدب هديبا :)


كلامك صحيح ولكن عشرات الاضعاف
يعتبر ظلم :( بعدين لو ماركه مايخالف:)

تسلمين ولاهنتي



اعذروني مستعجل والاا والله كل واحد يستحق اكثر
من رد لكن مع الخصومات صار رد :)

[ليلى بنت عبدالعزيز]

الله يرحم الحال


دمت مبدعا يامقل بمواضيعك:)

[الجازي]

ياحليلك ياريالوه ماشفت شيء !!

أنا أعرف لك محل اكسسوارات وعطورات في أسواق العويس كان داج بقوة خصوصا بعد ماطلعت المولات الفخمة حوله ,,

لدرجة إنه عرض المحل للتقبيل وسوى تصفية لبضاعة المحل بسبب الخسارة

لكن

من قلب المحنة تبرز المنحة :) <<< متأثرة بوثائقية الجزيرة :)

اكتشف ان هالحريم صاروا بالهبل عنده من عقب ماكان يهش الذبان عن بضاعته :)

وقضت البضاعة في زمن قياسي وجاب بضاعة جديدة والتصفية مستمرة وكل شهر يمدد للشهر اللي بعده

لما جلس على هالحال سنتين أو ثلاث ,, وهو عمي يصفي بضاعته :)

جاب أرباح سنوات التقشف وعوض كل هذيك الأيام العجاف :)

والسبب ثقافة التخفيض اللي ملعوبن بها على هالحريم :)

*
*
*
أما الاسعار فلو تبي الغبنه صدز رح للصين شف بكم تطلع القطعة من المصنع وبكم يشترونها تجارنا وبكم يبيعونها علينا !!

إذا مو مية ضعف لاعاد تحاتسيني :)

آه بس

أما سالفة المدير فأنا من يومين جاني ايميل ينفي هالمعلومة يقول مصدر النفي مكتب الجاليات سألوا عنها وقالوا لأ

وأنا عاد استخدمت ترجمة قولو وطلع لي معنى حمار بالهندي كدهى :) <<< مالقيت لغة بنقالية قلت كودهم دامهم جنبهم يحتسون مثل حتسيهم :)

وعساك سالم على هالموضوع