أمي.. والسكر

[فوووز]

السلام عليكم ورحمة الله وبركاته




صباح / مساء الخير على الجميع



كنت أسمع أن مرض السكر مايصيب إلا كبار السن

وهالحين الله يكفينا الشر صار حتى الصغار يصابون فيه


الله يشفي مرضانا ومرضى المسلمين


أمي .. معاها مرض السكر بس أنها مو راضية تنضمه :(

ورافضه تراجع عند طبيب السكر..حتى أنها رافضة تاخذ أي أدوية..

مع أن أختها تعاني منه ومتعبها وهي تدري وش مخاطره.. مع ذلك مصره و معنده ماتأكل حبوب السكر.


إلين سوت العملية من شهرين و فرض عليها الطبيب أدوية لتنظيم السكر diamicron mr - glucophage

(خاصة أن السكر يبطىء من إلتأم الجروح..)

قالت له أن سكرها مارفعه الا أنتم (تقصد المستشفى) أنا مافيني إلا العافيه.

بس غصب استمرت على الأدوية وقبل رمضان تركتها وماعاد تبي تاكلها تقول لآنها تعطشني وأحس بتعب إذا أخذتهم


بس المشكلة أن جرحها إلى الآن مابعد إلتأم..


و رجعت للحبوب مرة ثانية وصارت تأكل نص الحبه :) ( تقول عشان ماتتعبني).


واليوم قالت لي أقيس سكرها لآنها تحس بتعب وخمول وهده يمكن سكرها منخفض.. وصار 77 ..

قلت لها يمه أعطيك شي تفطرين عشان يرتفع السكر.. طبعاً عيت ..<<< لوني مفطرتها يجوز صح :)


والسكر عند أمي إذا أرتفع يوصل تقريباً 280

فقلت لها يمه خلاص كل يوم نقيس سكرك قبل السحور إذا مرتفع أكلي العلاج ولو نسبته 120 أو 130 خلاص لاتأكلينها عشان ماينخفض سكرك زي اليوم



اللي عنده مريض سكر يعطيني رأيه بكلامي ..

و أفيدونا بخبراتكم مع مرضى السكري..




ولكم جزيل الشكر,,,

[عبدالله الجعيثن]

هلا اختي فوز



والله يعين




امي عندها سكر من كم سنه تقريبا ... وتاكل AMARIL 5GM<<<مو متأكد من الاسم:315r:


المهم اقيسها كل 3 ايام وطبيعي بحدود (120 - 150) معها ولله الحمد



مع رمضان بدأ ياصل 200 والسبب تغيّر نوعية الاكل مثل ماقال لي الطبيب


بس ماأنصحك تقيسينها قبل السحور لانها تكون مفطره وشي طبيعي انه يزقح :) فوق


سوي مثلي

بعد العصر اقيسه عندها

[أهداااب]

السكر بالنسبة لنا صديق العائلة ..:)

أمي و خالي و عمي و بنت عمي و حتى أخوي مصاب بالسكر ..!!

الحمد لله أمي عندها السكر خفيف يعني بس تنظيم وجبات و رياضة ..


لكن انا صراحة أنصدمت لمن صاب أخوي اللي أكبر مني بالسكري..

كان ما شاء الله جثة طول و عرض ..

جسمه قريب من جسم الجراح ..:)

سافر للدراسة و قبل السفر حلل و طلع معه سكر و كان في بداياته

بعد غياااب ست أشهر رجع لكن الجميع أنصدم بنزول وزنه بشكل مذهل

حتى ملامح الوجه تغيرت ..!!


حتى أن بعض العجز يقولن هذا الولد معيوون ..:)


و هو دراسته في المجال العسكري يعني يتطلب منه بشكل يومي بذل مجهود و تمارين صباحية و غيره ..

حتى أنه أحد الأيام دخل المستشفى بسبب هالسكر .. و قرر له الطبيب ك حل نهائي أبر الا نسلين .!!

و حالته و لله الحمد الآن تمام مع الأبر و تزوج و جاب بنوته وش حلاتها ..:d:


فوووز ..

لازم أمك تنظم سعراتها الحرارية في الوجبات و تأخذ الحبوب

لأن السكر إذا تكرر ارتفاعه ممكن ما ينفع معها غير الا نسلين



و الله يشفيها يا ربّ و يحفظها لكم ..roooose

[الشبث]

مرض السكر


الله يعين المرضى ويشفيهم ولا يوريهم مكروه



انا اختي فوز عندي واحد من عيال عمي كذا


مثل امتس


يوم يقول ابي حبوب

ويوم يقول ابي ابر



وذكر له واحد علاج بالبحرين

علاج شعبي


وراح لهم

واعطوه حبوب اعشاب ومدري وشو

الوكاد انوه يمدح علاجهم



الله يشفي امتس اختي فوز


واهم شي المشي

وديه لبرحه وخليه تفك سبرنت :)



ولا ارتسبي الددسن والحقيه


خليه تركض غصب:7ayyoh:






الله يشفي امتس وام اخوي ابو غازي وامهات العيال كلهم


وتقلدي تحيتي

[أبو فهد]

انصحتس تهتمين بأمتس و تداومين على الحبوب معه



لأنه لا قدر الله لو تدهور السكر معه ترى بتكون الحبوب لا تؤدي أي مفعول معها



و سيقرر لها الطبيب الإبر



الله يمن عليها بالشفاء العاجل



-----------------
أبو فهد الهمزاني

[صلفيق]

مرحبا أختي فوووز

السكر اليوم لايفرّق بين صغير وكبير أو ذكر وأنثى !!
وهو منتشر في جميع الأعمار ،، ويكاد يندرج تحت مسمى الأمراض المستوطنه عالمياً.
وكما هو معلوم لدى الجميع انه ليس هناك علاج بمعنى الكلمة للشفاء من السكر .. ولكن
هناك أدوية للسيطرة على مستوى السكر عند حد معين، للتقليل من أخطاره وتفادي مضاعفاته.

الله يهدي أمك ويخليها ،، ويفكها من السكر ومضاعفاته.
والعناد بأخذ الدواء ليس من صالحها .. وهذا ماجعل الى الآن لم تلتأم العملية بالشكل المرضي.

تحدث الأخوة قبلي بالمفيد، وقدموا النصائح المهمة لأمك ..
والعطش الذي تقول أمك بسبب الحبوب .. هي ليست بسبب الحبوب !!
انما ذلك يدل على ارتفاع مستوى السكر ،،، وكذلك عندما تشتكي التعب والأرهاق دون بذل
مجهود ـ فهذا أيضا دليل على ارتفاع مستوى السكر بالدم.

نصيحتي لك أختي فوز بالتمشي بالعلاج [الـ جلوكوفاج والـ دايامايكرون] كما وصفها الطبيب
تماما. وليس هي أو أنتي أو أياً كان هو من يقرر مقدار الجرعة المطلوبة..!
هذه الجرعة التي قررها الطبيب بعد اعتماد نتائج تحاليل ومراقبة لضبط المستوى يجب أن
تستمر كما هي ،، وان حصل تغيّر في مستوى السكر مع ضبط الجرعة ـ هنا يجب أيضا
زيارة الطبيب لتغيير الجرعة.

أخشى ماأخشاه أن يؤثر هذا التبديل بالكمية وترك الجرعة بحث ان يكون الأقراص غير مجديا
عند ذلك [والذي لا أتمناه] يكون البديل هو الأنسولين...!


استمري أختي بإعطاء أمك جرعتها كما هي دون تغيير ، مع قياس الضغط قبل السحور وقبل
الفطور لمعرفة مستوى السكر .."كأن تقيسيه مثلا عند الساعة 3 فجرا و 6 المغرب". وهذا
لمدة أربعة أيام ، وياليت لو عملتي سجل لهذا القياس حتى نرى التحسن الذي سيكون
عند العلاج المنتظم. [وبإذن الله ستجدين الفرق للتحسن واضح، وسيكون الألتآم ملحوظاً].


أسأل الله العلي العظيم الشفاء لوالدتك وأن يعينها على الصيام وياجرها.
والحمد لله رب العالمين الذي رخّص لمن لم يستطع الصيام بالفطر عند المشقة ...!


وماتشوف شر أم فوووز ان شاءالله

[شموخ شمالية]

الله يشفيها يارب

عمتي وخالتي ياخذن أبر اريح من الادويه ...قبل كل وجبه ياخذن هالابــر وياكلن أي شئ
ومعهن السكر من زمان

انتي انصحيها ترى اهماله مو زين ...وزي ماقلتي الجرح صعب يبرى بسرعه

الله يشفيها ويطمن قلبك عليها

[بنت الجبل آخت القصيد]

الله يشفيها يارب


السكر يسبب غرغرينا والطب ماعندهم الا بتر الجزء المصاب بها

فاحسن شيء تنظم اكلها بحميه وتحلل كل يوم

.
.
ماتشوف شر يارب

[لوليتا]

*
*


الف سلامة على الوالده فوز
ما ازيد على كلام د/صلفيق
اعاشر السكر من يوم وعيت على الدنيا
مع ابى وبعد صار مع امى
الاهمال له مؤذى جدا ومضعفاته اكثر سوء من السكر نفسه
لذلك لازم تنتبه لجرعات العلاج وتنتظم عليها حتى لو السكر نسبته مظبوطه
لا تترك العلاج وتنظم الاكل بصورة دائمة
صدقينى من خلال تجارب قاسية جدا السكر يؤدى الى امراض تانية امك فى غنى عنها
فارجوك لا تهمله ولا تهمل علاجه
ومن خلال التعامل مع ادويته
الاماريل الى تستخدمه والدة ابو غازى افضل من الديميكرون
بمصاحبة الجلوكوفاج
وطبعا الجرعات حسب ما يوصى الطبيب

بالنسبة لجرح العملية يحتاج عناية اكبر ليلتئم
ومن المعروف ان اى جرح او التهاب فى جسم مريض السكر يزيد نسبة السكر اكثر
لذا لازم تنتظم اكثر حتى يطيب الجرح

والف لا باس عليها وما تشوف شر يارب
ويشفى كل امهات المسلمين

تحياتى

*
*

[فوووز]

’

أهلين أخوي أبو غازي


أنا أقيسه لها قبل السحور أخاف يكون نازل وإذا أخذت العلاج ينزل خلال اليوم أكثر زي المرة اللي فاتت

وفعلاً قسته لها من بكرة على السحور وصار 222

بس رفضت تاكل الحبوب .. وقسته العصر صار 168


هي بس لو تطيع وتروح للدكتور وينظمه أفضل :(



يعطيك العافيه أبو غازي .. والله يشفي والدتك ويخليها لكم

’

[فوووز]

’

فعلاً يا أهداب

حالة أخوك قريبه من حالة وحدة سوت ريجيم ونحفت بشكل سريع بس بذبول واضح على ملامحها
وتعبت فجأة وحللت صار معها السكر

يوه هالحين امي يالله عقب الحساير تأكل الحبوب كيف لو وصل الموضوع للأبر...

الله يستر


يعطيك العافيه أهداب ..شاكرة لك حضورك

’

[فوووز]

’

لو تسمع أمي بها العلاج الشعبي دورته :)

أهون عليها من الحبوب والكيماويات على قولتها :)


والله كانت هي تمشي .. بس من تعبت صارت تتعاجز


امين الله يشفي مرضانا ومرضى المسلمين


شكراً لك أخوي أبو ماجد على الحضور

’

[عبدالله المهيني]

الله يكتب الشفاء للجميع




.
.
.



دام العلاج حبوب ولم تصل لمرحلة الإبر فالحاله بسيطة إن شاء الله

بس عاد تحتاج تنظيم عشان ماتتطور لمرحلة الإبر






الله يشفيهم جميع

[فوووز]

’


الله يستر .. ويهونها


يعطيك العافيه ابو فهد

’

[انفاس الغلا]

يعطيك الف عافيه يالغلا

[فوووز]

’


عندما تشتكي التعب والأرهاق دون بذل
مجهود ـ فهذا أيضا دليل على ارتفاع مستوى السكر بالدم.

بالعكس ماتحس بالتعب الا اذا أنخفض عندها السكر



طيب بسوي لها جدول ..
بس ماتطيع تأكل الحبوب زي ماوصفت لها :(


الشر مايجيك يا صلفيق .. يعطيك العافيه

’

[فوووز]

’


شموخ

أنت لو شفتيها يوم صارو يعطونها أبر عشان ينخفض مستوى السكر قبل العملية وش سوت :)


الله يجزاك خير ياشموخ

’

[فوووز]

’

الشر مايجيك ياعطر


صحيح وهذا اللي يخوف والله

,

[فوووز]

’

الله يسلمك من الشر لوليتا


هذي أول مرة الوالدة تأخذ فيه أدوية للسكر


والجرعات واحد قبل السحور بنص ساعه
والثاني بعد الفطور وبعد السحور

بس ما تأكلهم بإنتظام :(

مشكورة لوليتا ...

’

[فوووز]

,

الحمدلله على كل حال


مشكور اخوي عبدالله المهيني

,

[ليلى بنت عبدالعزيز]

اقول شي ولاتزعلين ..؟؟


هاااه



انا مدري شلون خذت ابوك:)

امك من الناس صعب التعامل معها والله يعينها على نفسها ويعينك عليها

ادعي لها وقولي لها السكر مايجي الا الناس الحلوة:)

[فوووز]

’


حرام عليك ياليالي و الله أمي زي العسل ..

وإلا كان ماجاها السكر :)

’

[صلفيق]

ادعي لها وقولي لها السكر مايجي الا الناس الحلوة:)[/COLOR][/SIZE][/B][/FONT][/CENTER]


يبدو ان أمك من النوع الصعب التعامل معها ..
بس مالك الا تخوّفينها ، علشان تتقبل الحبوب والأنتظام فيها.

ومثل ماقالت أختي ليالي..!!!