قصه وقصيدتين

[عتيبي]

قصه وقصيدتين

هذه القصه حدثت في عصور البداوه الماضيه وهي مقتل عبيد بن تركي بن حميد على يد رجل من قبيلة قحطان يدعى مبارك بن غنيم بن هدلان وهو ابن عم شالح بن هدلان الفارس والشيخ القحطاني المشهور الذي ولده ذيب بن شالح الفارس الذي ذاع صيته وقتل على ايدي قبيلة عتيبه واحببت ان اضع هاتان القصيدتان لما فيهما من حكمه وجزاله في المعنى

قال ضيف الله بن تركي بن حميد (العفار) في رثاء اخيه عبيد ويحض الامير بن هندي على غزو القحاطين طلبا للثأر


ياونتي ونة كسير الجباره = اليا وقف مااحتال واليا قعد ون

عليك ياشباب ضو المناره = عليك ترفات الصبايا ينوحن

من مات عقب عبيد قلنا وداره = لا باكين عقبه ولا قايلن من

تبكيك صفر البسوها غياره = تبكيك يوم ان السبايا يعنن

وتبكيك وضح ربعت بالزباره = اليا قزن من خايعن مايردن

الخيل عقب عبيد مابه نماره = حتيش لو راحن حتيش لو جن

ياشيخ ماتامر عليهم بغاره = كود الجروح اللي على القلب يبرن

يقطع صبين ماينادي بثاره = اليا اقبلن ذولي وذوليك قفن

يااهل الرمك كلن يعسف مهاره = والمنع مانطريه لاهم ولا حن




فرد عليه شالح بن هدلان يذكره بمقتل الفديع (اخو شالح) على يد الحمده من عتيبه سابقا .. ورد شالح فيه الشي الكثير من الحكمه والجزاله

ضيف الله اشرب ماشربنا مراره = اصبر وكنك شالح يوم حزن

راح الفديع اللي علينا خساره = واخذ قضاه عبيد حامي ثقلهن

يمنى رمت به ماتجيها الجباره = اللي رمت بعبيد في معتلجهن

من نسل ابوي وضاري للشطاره = يصيب رمحه يوم الرماح يخطن

وعبيد خلي طايحن بالمعاره = عليه عكفان المخالب يحومن

وعاداتنا بالصيد ناخذ خياره = ثلاثة الجذعان غصبن بلا من

ياقاطع الحسنى ترى العلم شاره = لابد دورات الليالي يدورن

حريبنا كنه رقيد الخباره = خطرن عليه اليا توقظ من الجن

ماني برماين بليا نماره = اجدع نطيحي بالسهل وان تلاقن

من حل ديار الناس حلوا دياره = لابد ماتسكن دياره ويغبن

ومن شق ستر الناس شقوا ستاره = ومن ضحك بالثرمان يضحك بلا سن

وان كان ضيف الله يعسف مهاره = فمهارنا من عصر نوح يطيعن

تدنا لصبيان سواة النماره = شهب لماضيين الفعايل يعنن




===== ابيات مختاره من قصيدة شالح اعجبتني

ياقاطع الحسنى ترى العلم شاره = لابد دورات الليالي يدورن

==== وايضا

من حل ديار الناس حلوا دياره = لابد ماتسكن دياره ويغبن

ومن شق ستر الناس شقوا ستاره = ومن ضحك بالثرمان يضحك بلا سن

[سلمان النبهان]

الاخ عتيبى
تحيه طيبه وبعد :ـ
يعطيك العافيه مشاركه اكثر من رائعه
وحقيقه نحن بحاجه لمثل تلك المشاركه
لما فيها من حكم ومواعظ كبيره ...
شكرا مره اخرى يالغالى ماقصرت .
(((ومن ضحك بالثرمان يضحك بلا سن ))) .

[خلف الرويتع]

اخي العزيز عتيبي
السلام عليكم ورحمه الله وبركاته

اهلا وسهلا بك في هذا المضيف وهذه الساعه المباركه واسمح لي ان ارحب بك نيابه عن جميع الاخوان

اشكرك على هذه المشاركه الرائعه

ونحن في انتظار مشاركاتك القادمه

[أبو فيصل]

فعلا قصة وقصيدتين من روعتها اخي الكريم اتمنى ان تسمح بأن اخرجها وأنسقها
فهي تستحق ذلك.
اخي اسعدنا تواجدك بين اخوة لك
ننتظر منك المزيد من هذة القصص القوية
اخوك ابو فيصل

[الزقروطي]

الله لايهينك والله انك اتحفتنا يالعتيبي بهالقصيدتين
بيض الله وجهك

وعساك عالقوه
وننتظر اكثر باذن الله

[المطلاع]

الله يعطيك الف عافيه يالعتيبي
ولاهنت
وبيض الله وجهك
وانا انشاء الله بأكتب موضوع شامل عن شالح بن هدلان ارجو ان تشرفني فيه وبقية الأخوان

[عتيبي]

لا هنتوا يالربع الله مار يحييكم

ابو فيصل لك الشكر انا والله ماعرف التنسيق ولا كان نسقت ولا اتعبتك :)

[أبو فيصل]

اخي العزيز عتيبي
لاتعب ولا شي فأنت اخ عزيز نكن لة كل محبة وتقدير

[الحربي]

الاخ العزيز

عتيبي

في البداية ارحب بك بين اخوانك

واشكرك على القصة والقصيدتين التى امتعتنا بها.

ننتظر منك المزيد





اخوكم الحربي

[ابو يزيد]

الأخ/عتيبي
لاهنت وصراحة طرح تشكر عليه

يااهل الرمك كلن يعسف مهاره والمنع مانطريه لاهم ولا iiحن


الله واكبر ممنوع المنع

كبيرة والله كبيرة استسلام مافيه

والله فعلا طلاب ثأر.

المهم طال عمرك يالعتيبي

حروب عتيبه وقحطان يشيب منها الوليد

ولكن بودي اسألك هل كما سمعت ان اول بداية حروبهم

هو بسبب الجمل المسمى زبن بسبب دخوله حما ومرابع قحطان .

ياليت تنورنا اذا في أجندتك شي عن البدايات.


وتقبل خالص تحياتي

اخوك ابو يزيد

[عتيبي]

والله يا بو يزيد ماسمعت بالجمل هذا ولا اعتقد ان هذه القصه صحيحه وجرت العاده عند البدو ان اي حلال يرعى في حمى غير قبيلته يؤخذ ولا يرد وايضا الكسب في الحروب يؤخذ ولا يرد اما الكسب من الحنشله وهي الدخول في حمى القوم واخذ حلالهم فهذا فيه نظر ان شاء رده وان شاء لم يرده وقد تقوم بسببه الحروب وقصته ولكن من قراءة التاريخ فالحروب بين القبائل كلها تبدا بسبب المراعي والثارات وايضا تبدا كمغازي او حنشله وتستمر كذلك فيما بعد اما اكبر حروب عتيبه وقجطان فهي الحرب التي جلت بسببها قحطان من وسط نجد واستقرت عتيبه فيه ولهذه الحرب قصه لا استجمعها الآن ولكن في وقت اخر انشاءالله واذكر منها بعض الابيات التي قالها تركي بن حميد في حال قومه وحيرته بين الدهر في الحجاز والجوع وبين قحطان الممتنعين عن السماح لعتيبه بجوارهم في الربيع وقال هذه الابيات التي لا احفظ ترتيبها موجها كلامه الى غلام كان يغني

ليلك طرب وانا ليلي هواجيس ** ولا يسهرك بالليل كثر الحلومي

اسهر الا نامت عيون الهداريس ** *******************

بالليل اسامر صاليات المحاميس ** والصبح اناوش كل قب قحومي

كل القلم من كتاب القراطيس ** وركابنا من كثر الادلاج تومي

ومن لا يدوس الراي من قبل لا ديس ** داسوا عليه العيال القرومي

ومن لا يقلط شذرة السيف والكيس ** تبدي عليه من الليالي ثلومي

واليا اختلط عج المقابيس وابليس ** المسعد اللي حظ ربعه يقومي

وطبعا القصيده طويله وابيات كثيره ناقصه ولكن هذا ماحفظته وليس بالترتيب

وبعد هذه القصيده قاد تركي عتيبه الى نجد وقامت بينهم وبين قحطان معركه كان من نتائجها ازاحة قحطان الى ماوراء العرض وجرت مساجلات شعريه بين محمد بن هادي بن قرمله امير قحطان وتركي بن حميد امير عتيبه منها هذه الابيات من قصيده طويله لتركي بن حميد يقول فيها

الشايب اللي ينقل الكبر والزوم ** يقرا الكتاب ولا يهاب المظله

جزاه من عندي من الخيل حثلوم ** مثل البرد مزنتن مستهله

انتم كما ظلعن طويلن ومزموم ** وحنا كما نجمن الا جاه هله

وانتم كما حوت على الشط لاهوم ** وحنا خلقنا الله للواهيم عله

وانتم كما طير البحر ذاك ابا الحوم ** وطير البحر مايذبحه كون ظله

وانا رمحي باول القوم ملحوم ** ولا انت رمحك عند ساره تشله

وشكرا لكم

ابيات القصائد طبعا غير مرتبه وناقصه الشي الكثير ولكن هذه الابيات هي التي تعلقت بذاكرتي لجزالتها وحكمتها

[راكان العياده]

لاهنت يالعتيبي على هالموضوع

وعلى هالاضافات الرائعة

تقبل اعجابي وننتظر المزيد