تفاصيل صغيره جداً !!

[فلاح العماش]

.










الشعر بالآخر حكي !!
يبقى حكي ..
لو أنّه أحساس وشعور
موقف يمر / يحتاج نبض وعاطفه ..
والعاطفه أنواع ..
على حسب :
أحيان وأحيان وأحياناً خداع !!
أفكار ..
تتخطى هالأسوار
والشعر بالآخر حكي
وأهل الحكي تجّار ..
جالس يبيعون الكلام !!
شعّار
أحدٍ خسر وأحدٍ كسب ..
أحدٍ نجح وأحدٍ رسب ..
وأنا بعد من ضمنهم
شاعر وأهيم بكل واد !!
ومركزي مابين الأول والأخير ..
وبالأخير :
الشعر ياسيْدي حكي ..
مابي تواخذني عليه !!










.

[فلاح العماش]

.









هنا مات ..
بنفس المكان / أصوات :
تصرخ من الصدمه ..
فجأه رحل بسكات !!
واللي بقى بس ذكريات ..
وناس ماهي مصدقه !!
من زود مافيها ثقه ..
أنه يبي يبقى عمر !!
بس عاد لله الأمر ..
والصدفه جابتني لهذا المكان !!

بهذا المكان :
أحيان .. أجي هنا
وأنتبه / وأقول : فجأه وين أنا ؟!!
وش جابني !!
وأحيان .. أدوّر الكلمات !!
منهو سرق من فمي حروف الحكي ؟!!
عندي كلام ..
ودي أقوله من زمان
وأقول ياروحي خلاص
أنسي وأنسى يازمان !!

مامات
لا والله أنقتل !!
هنا قتلته للأسف ..
ولا أدري وش كان الهدف ؟!!
وش ذنبه بس شاللي حصل ؟!!
مات وتلاشى وأنتهى ..
وأنتا وأنا ياصاحبي :
كلٍ بنفسه ألتهى !!
قتلته بغيره وخوف ..
قتلته وتقول الظروف !!
ياشكّ هالأنسان / بمين مهما كان !!

اللي رحل ذا حبنا !!
ياحبنا يحقلك
لو حتى تزعل مننا !!
والله مانستاهلك ..
ولا أنتا تستاهل تموت / قبل الأوان !!
حتى لو أنك حيّ في داخلي
أحيان !!













.

[فلاح العماش]

.














ناديتك أنتي بسمها !!
غلطت قدامك ..
وآحسّني من قلتها :
قتلت أحلامك !!
هذا وأنا مرّه حريص
ياقلبها منتا رخيص
وإلا أنت ياقلب العنا ..
زلة لسان وساقتك :
للموت بأقدامك !!













.

[فلاح العماش]

.











مبسوط يوم أنّه جرح قلب مغليه
يضحك وأنا عمري أبد ماجرحته !!

والمشكله يزعل وأنا اللي أراضيه
فتحت بابٍ ليتني مافتحته !!

أخذها عاده كل ماراح أناديه
ياما نسى قلبي وياما ذكرته !!

مايعجبه كل شي لجله أسوّيه
ولو هي على كيفي مشيت وتركته !!

واليوم طوّل في جفاه وتماديه
يبغاني أسأل بس أنا ماسألته !!

أمّا يجي وإلا يروح بتغلّيه
وأنا بموت بعزّتي ماطلبته !!













.

[فلاح العماش]

.











أحسّ أن الفراق أوشك !!
قريب آصافح الفرقا !!
غيابي مو جفا أو شكّ
ولكن ماقدرت أبقى !!











.

[فلاح العماش]

.













هذا المساء المفعم بخيبة الذات
كئيب مثل الواقع المر , مثلي !!

مثل السنين اللي من سنين ماجات
مثل الطريق اللي مشت فيه رجلي !!

مثل الطموح اللي إلى الحين مامات
مثل الزمان وفلسفاته وجهلي !!














.

[فلاح العماش]

.









أحيان : تعني كل شي بحياتي
وأحيان : ماتعني بحياتي ولا شيّ !!

ناديت لك رجّع بعض ذكرياتي
وأنا أدري أن الميْت مايوحي الحيّ !!

يا صاحبي لولا الوفا وأمنياتي
كان أنطوت صفحة عذابي معك طيّ !!

يا كبرها يا صاحبي تضحياتي
شفني بشر متحمّل الجرح والكيّ !!

تعبت .. بس منهو يسوّي سواتي ؟
ليتك تحس شويّ أو ترفق شويّ !!

وأن كان ماهمّك حبيبي حياتي
أكيد ما همّك حبيبي ولا شيّ !!














.

[فلاح العماش]

.










البارحه دمعتي طاحت على شانك
يوم أنتي أغلى من الدمعه ومن عيني !!

كل خوفي أن الزمان يسبّب أحزانك
وتكوني بحاجتي ... ولا تلاقيني !!








.

[فلاح العماش]

.

















من الحين ..
هالسّهره بدت يا عين !!
أدري بدري ..
بس مابي إذا قرّب يقوم الليل :
يسهر قلبي / وتنامين !!
كالعاده ..
ويصبح هالسهر عاده !!













.

[فلاح العماش]

.












ما أنكر أني قلتلك :
كل شي يربطنا أنتهى !!
لكنّي ما أذكر بعد ..
هالحين أني قلتها !!

معقول هالكلمه طلعت ..
مني ؟ أبد ماهو صحيح !!
مجنون / ماعندي عقل ؟!
أو كل ظني بأستريح ؟!!

أشتقتلك غصبٍ عليّ !!
ردّيت زيّ أوّل وجيت ..
حبك تعب والمشكله :
بُعدك من أسبابه شقيت !!











.

[فلاح العماش]

.














إسمع عقارب ساعتك ..
قبل الوداع تقول : تك !!
وإسمع عقارب ساعتي
مو ساعة الحايط !!
الساعه اللي في يدي ..
تصرخ مهي زي ساعتك !!
عليك / أو يمكن علي !!
تصرخ قهر ..
رغم أنها مو قادره تقول : تك !!

وداعتك ..
كل ماتناظر ساعتك :
تذكّر الفرقا .. واللحظه ذي بالذات ..
وأحلامي اللي باعتك
لو قلتلك أبقى !!
وأنّي رفضت أودّعك !!
خايف بعد أشقى !!
مشيت في لحظة سكون ..
بدون أي كلمه !
شف قلبك شظلمه ؟!!
ماكننا نعرف بعض ..
كأننا أغراب ..
رغم أني أدري منهو أنت ,
لكني مدري من أكون ؟!!














.

[فلاح العماش]

.











إذا تبغاني أنسى شوف :
من عيوني / وبس بشرط !!
أبيك تصير نفسي بالشعور
وكل شي بالضبط !!

إذا مو عادي تنساني ..
أمانه كيف تبغاني ,
أنسى / وأنت مو قادر
تعيد الفكره من ثاني ؟!!

















.

[فلاح العماش]

.










ردّيت حقّ الكويت بكل مافيني
مشتاق والشوق ماله داخلي آخر !!

أسابق الوقت كل ذكرى تناديني
ماعاد فيني صبر حتى يجي باكر !!

فيها عرفت السعاده وأجمل سنيني
مايكفي عنها ثلاث شهور أنا صابر ؟!!

تسري بدمي وتسكن في شراييني
هالديره حاجه ولا مرت على الخاطر !!

شي عادي تكون في قلبي وفي عيني
مادام حتى ثراها داخلي حاضر !!

رغم أنّها وين ماسافر عناويني
إلا أني عنها دقيقة بُعد مو قادر !!

صافحتها .. صرت أحس برعشة يديني
وقت اللقا والفراق بذمّتي كافر !!

ضمّيتها .. يوم قالت : ( لا تحاجيني )
حاولت أكابر ولكن مقدر آكابر !!

غرّقتها دمع قالت : منت ناسيني ؟
لحظتها ليت أنخلق في داخلي شاعر !!

ومن يوم قالت : أمانه لاتخليني
قلت أوعدك هذي آخر مرّه آسافر !!















.

[فلاح العماش]

,





البرد هذا يسكن بوسط روحي
شوفيني لين الحين بردان / بدفا !!

شوفيني لين الحين تنزف جروحي
لقيتلي في داخل الجرح منفى !!

حزين وحروفي بها من وضوحي
غامض وحزني ليته بيوم يجفا !!

حاولت أدوّر شي يشبه طموحي
ولا لقيت إلا المواويل مرفا !!

غبتي ومثلك غبت لو أن بوحي
حاضر وقال لدربك بصمت : تكفى !!

الدرب مثل البرد وشلون يوحي ؟
عليك هالأشياء ماظن تخفى !!

قلتي تعال .. وزاد همّي ونوحي
كسرت قلبك قبل الأيام تصفى !!

وشلون أجي ؟ مادمت ماني بروحي
لو ملّني حلمي من العام وأقفى !!

خفتي علي , ولا منعتي جروحي
حافي قدم | في ذمّتك كيف يحفى ؟!!









.

[فلاح العماش]

,



لايهمّك حبيبي .. أنعمت عينهم
لايهمكّ , وشخصٍ مادرى مادرى !!

لعن أبو حيّ حيّك وينك ووينهم ؟
فرق بين الهلال ومن يطالع ورى !!

ليه أنا أصلاً أقارن بينك وبينهم ؟
أنت فوق الثريا وش نبي بالثرى ؟!!

قم تدلّع مادامك ماخذٍ زينهم
قم تثنّى ياغصنٍ بالليان أنبرى !!

قم تفيخر حبيبي في ميادينهم
شاعرك كم كتبّك | شاعرك كم قرا ؟!!

ربي اللي عطاك وربي يعينهم
بعذر منهو تغيضه كان قام وسرى !!

مدري تزيد وإلا تنقص سنينهم ؟
كل شخصٍ شغلته عن لذيذ الكرى !!

أختلط كل حرفٍ جيمهم سينهم
أنشدوا عنْك يانجمٍ سطع بالعرا !!

قلت هذا حبيبي , طاحت يدينهم
مابقى غير حنّا بالغرام خشرا !!








.

[فلاح العماش]

,







يا حديث السما للأرض يا
يامطر | أغسل هموم البشر !!
كل قلبٍ يبي بعض الضيا
وكل روحٍ تبي رشّة مطر !!








.

[فلاح العماش]

,








يتضايقون , الا يموتون غيره
وأخاف بسبابك بعد يكرهوني !!

قدّامهم ماجبتلك أي سيره
لكنهم شافوك بس بعيوني !!

مالومهم والورد ياخذ عبيره ,
منّك | ومنّك يبتسم كل كوني !!

أنتي رغم أنف السوالف كبيره
أكبر من همومٍ معاي وشجوني !!

بزيدهم همٍ وغمٍ وحيره
لو فكّروا عنّك بعد يسألوني !!

هذا وأنا ماجبتلك أي سيره
هذا وهُم شافوك بس بعيوني !!










.

[فلاح العماش]

,








خل نتفارق لكن بشكل ودّي
عشان مانخسر بعض بالنهايه !!

مابي أشوفك مثل الأيام ضدّي
والحمد لله توّنا فالبدايه !!

لاتفتكرها عناد وإلا تحدّي
أفهم بالأول كل فصول الروايه !!

تجاهك أحساسي ترى كان جدّي
معْك أستحاله للمحبّه كفايه !!

للآخر أسمعني حبيبي وهدّي
أحبّك وحبّك له ألفين رايه !!

وعشان تدري وشهو أسباب صدّي
أبيك تفهم ويش سر الحكايه !!

أمانه خل يدّك حبيبي فيدّي
حتى الموادع ياحبيبي غوايه !!

إلا إذا طاح المطر فوق خدّي
وأسرفت في دمعي وطوّل بكايه !!

أمسح دموعي | خل حزني يعدّي
والقلب خلّه غارق بصوت نايه !!

المستحيل أن كان خصمي وندّي
أبقى معاه أنسان ضايع وتايه !!

يمكن حلاة الحلم لا صار قدّي
يالمستحيل اللي وصولك دعايه !!

خلاص معْك اليوم وصّلت حدّي
حتى ولو مالي على البعد غايه !!

وعشان غيرك ماحب أنسان ودّي :
تدعيلي بعدك صاحبي بالهدايه !!









.

[فلاح العماش]

,






تضحك عيونك تضحك الأرض تحتي
وأرقّص القمرا على مهجة الليل !!

واقف وأغنّي للسما لانزحتي
وأجرّ دمعات الألم والمواويل !!

أبسألك : في ذمّتك وين رحتي ؟
وأنا أتسكّع خطوتي كلّها ويل !!

أبسألك : في ذمّتك وش ربحتي ؟
وأنا شجنيت اليوم غير الغرابيل ؟!!

لا ماكتبت أسمك , هنا كان نحتي
هنا عشقتك ويل , وأنهدّبي حيل !!

وهنا هنا بيدينك أنتي جرحتي
وسالت عروقي مدري كم سال من سيل ؟!!

لا مافضحتيني وبس أنفضحتي
وش أستفدتي يوم دمعك هماليل ؟








.

[فلاح العماش]

,








قريباً أهجر اللي هُم معي وأتنفّس الغربه
قريباً أسجن الليل الطويل ولعنتي جوّاي !!

تعبت أبني معا هذا الزمان المُفتري صُحبه
مدام أن البحر ماله خوي , وأستامنه ميناي !!

تعبت أرسم ملامح وجهي الشاحب على التربه
وألوم الريح وأتجاهل قبل هذا فعل يمناي !!

تعبت أكذب على نفسي وأقول أن السما رحبه
وأنا أشوف المدى ضيّق , وياصبري على بلواي !!

أحسّ أن الحياة بكبرها ماهي سوا لعبه
خسرت بكل جوله وأرتفع صوت الشجن والناي !!








أرسمي وجهي وقولي :
وش تشوفين بصراحه ..
تشبه أحلامي ذبولي ؟!!
كثر هالتُربه جراحه ؟!!
شخص غامض وإلا واضح ؟
أي أكثر شي فاضح :
فيني .. فرحي وإلا حزني ؟!!
ولا يغرّك لو تلاشت
صورتي مع أي نسمه !!
ولا بقتلي أي ملامح !!
وجه ماله أي صاحب !!
غير هذا الضيق | شاحب !!
أكثر أحبابه تخلّوا ..
ليته عمره يوم ما حب !!
فيه تتسلّى يدينك !!
منهو بس يقدر يدينك ؟!!
والزمن قبلك تسلّت
يدينه فيه .. وياما سامح !!










.

[فلاح العماش]

,







أنتي أكثر بنت مليانه حزن
وأكثر أنسانه عذوبه وأزدهار !!

أكثر أحلامك تبي قرصة أذن
دامها مبطي وللحين أنتظار !!

وأنتي أكثر بنت محشيّه قطن
ناعمه مالك شبيهه بأختصار !!

أنتي غيمه وأصدق أحساسك مزن
شي طبيعي جنبك أيامي خضار !!

وش يظنّ الوقت ؟ دمعك وش يظن ؟
لو شكيتي يوم لحظات أنكسار !!

أنتي أبتسمي مدام أنتي وطن
للبياض , وللعصافير النهار !!

مبطي أحلامي وأنا نبغى غصن
والسما من هالحكي واجد تغار !!

غادة الترفات منهو مايون ؟
دام كلٍ ينتظر ردّ أعتبار !!








.

[فلاح العماش]

,




أشوف العمر من دونك تخيّل عمري بليّاك
تخيّل بكرا وبعده .. تخيّل ليلتي دونك !!

عيوني ترفض الدمعه يصبّرها أمل لقياك
عسى ربّي يجمّعنا واشوف الشوق بعيونك !!

تأكد باقي بقلبي يمرّ الوقت أبد منساك
برغم البعد وأحزاني أنا والله ماخونك !!

أنا رغم الشقا والبعد ورغم اللي حصل وياك
أعيش بحبك المجنون وأعيش العمر مجنونك !!

أنا تدري أحبك موت وأموت بنظرتك واهواك
وإذا قالوا عواذلنا حبيبي لا يهمّونك !!

فداك العمر وسنيني وكل اللي تبي يفداك
مادام الحبّ شي أكبر من ظنوني مع ظنونك !!

حبيبي لو نسيتك مانسيت الحب مع ذكراك
تخيّلتك تجي تسأل تقول اليوم وشلونك ؟!

تصدّق والعمر يمضي ماحسّه يمضي بلياك
أحسّك عايش بروحي وفيني عايش جنونك !!









.

[فلاح العماش]

,








ع الأرض ناس
مايستحقّون الحياة !!
وكثير ناس
مايستحقّون الممات !!
وبالسما أرواح
ملّت تبي ترتاح
تدوّر على طوق النجاة !!

أحلام مخنوقه مثل :
فرحه ولهفه تختنق !!
مثل الأمل والذكريات
مثل المشاعر تحترق !!
وقلوب ذوّبها الجليد
محتاجه لصبحٍ جديد !!

العمر غلطه , لو يمر
من دون فرحه تستمر
من دون حب وتضحيه
وش فايدة هذا العمر ؟









.

[فلاح العماش]

,








أهل الشعارات طاحت مع شعاراتها
بدت تساقط قناعات وبعد أقنعه !!

واللي تنمّق من أوّل كل عباراتها
اليوم ضاعت بوسط الصوت والمعمعه !!





.

[فلاح العماش]

,









سلاماتٍ تطولك والخبر مايحتمل تصديق
حزن كل الرياض لوعكتك وأستاحشت جدّه !!

وصدر الشرق ضاق وبادله صدر الجنوب الضيق
تعب حتى الشمال الشامخ وكثر التعب هدّه !!

ثلاث شهور ودموع العباد الصابرين تويق
وكم من واحدٍ دمعه جرى حتى أرتوى خدّه !!

ثلاث شهور مرّت والدعاوي بس تبلّ الريق
وهذي حالة الشعب السعودي صارله مُدّه !!

على نبض الأمل نمسي , على صوت الحياة نفيق
ألين الله فرّجها عليك وزالت الشِدّه !

مشاعر شعبك اللي ماتعرف الزيف والتلفيق
ملكت قلوب شعبك لين جاوز هالغلا حدّه !!

أبد مافيه ترحيب بقدومك لاحضرت يليق
يصافحك الوطن والا المواطن مدّلك يدّه !!

وإذا شفت القلوب المرهفات تمارس التحليق
ترى موج الفرح قام يتلاطم جزره ومدّه !!

كثير اللي تخونه فرحته ويخونه التعليق
ولو كثر الغلا بيّح خفاه وباح كل سدّه !!

دعالك شعبك الوافي بطول العمر والتوفيق
رغم كل الظروف اللي تجي ياسيّدي ضدّه !!

مكانتْك الكبيره عند شعبك مثل حِمل طويق
تطمّن ماعلينا من هل التغيير والرِدّه !!


تطمّن دامنا حنّا تطمّنا وراح الضيق
وتدري شعبك المخلص حبيب الشعب وش ودّه ؟

يوثّقلك غلاه وفرحته في رجعتك توثيق
وتبقى بخير ياعزّ البلاد وترهي المدّه !!





+





الحمدلله يوم ردّك وعافاك
والشكر له شكرٍ يليق بجلاله !!

كل الوطن فزّ بقدومك وحيّاك
حيّ الله اللي كل مسلم دعاله !!

ياخادم البيتين حنّا بليّاك
بيتٍ خراب وماتهيّا ظلاله !!

حنّا فداك وكل أبونا فديناك
يالوالد القايد ورمز الشكاله !!

رجعت معْك الخير كلّه بيمناك
وكلّن هدا باله وجوّه صفاله !!

وشلون شعبك ياذرا الجود ينساك ؟
مادمت شاغل دوم فكره وباله !!

شعبك يحبّك حب ماظن يخفاك
وبادلته أنت الحب طيب وجماله !!

فريد في طبعك من أوّل عرفناك
ياحيّ منهو نادراتٍ خصاله !!

اللي رفع أسم الوطن فوق الأفلاك
حنّا معه نمشي وحنّا رجاله !!

وحنّا عياله لو غدا دربنا أشواك
وعمر الأبو مايوم ينسى عياله !!












.

[فلاح العماش]

,






الله يعز الوطن ويعز أبو متعب
ويعز منهو يهمّه عز هالديره !!

لاضاق حنّا نضيق ولاتعب نتعب
ومادامه بخير حنّا نعيش من خيره !!

الوالد القايد الصنديد والمرعب
عز المواطن نقيّ الروح والسيره !!

من دون هذا الوطن مانمزح ونلعب
عند الوطن كل أبونا نحترق غيره !!

رغم أن الأحوال من أصعب إلى أصعب
لكن عسى آخرة هذا الشقى خيره !!

مادام حنّا نعيش فظل أبو متعب
الخير بقبال , ذيّ أوّل تباشيره !!





بعد مكارم خادم الحرمين الشريفين حفظه الله .




.

[فلاح العماش]

,



هالبنت ماظنّيت إلها سميّه
إلا المرايا والفراشات والورد !!
هذا ولافي شي يشبه سُميّه
إلا الدفا في ليلةٍ تشتعل برد !!


كل بيتٍ أقوله فيك يانوره
ماوصل مستواك ولو نشف دمّه !!
وكل شاعر يخونه صادق شعوره
يلزم الصمت دام بداخله ذمّه !!
القصايد تموت أحيان معذوره
كانها مارقت للمجد والقمّه !!


ريما لها كل القصايد قلايد
رغم أنها في حق ريما قليله !!
ريما قصيده جت تغيض القصايد
يوم أكثر أبيات القصايد بخيله !!


أي نور هذا ؟ وأنتي النور ياضيّ
وأنتي أبتسامات الفجر والصباحات !!
النور نورك , كل نورٍ معك فيّ
لو أن له في وسط روحك مساحات !!


كل بيتٍ أقوله ماوفى ياهديل
ألف مبروك هذي ماوفتلك بعد !!
النجاح بتفوّق هذا أكبر دليل
أنّك اللي وصلتي للمُنى والسعد !!
ليلة الحفل هذي تشبه المستحيل
كل نجمه تجينا تحتفل ع الوعد !!
أقبليها هديّه , والفرح ياهديل
ألمحه في عيونك لو بقلبك قعد !!


الله يخلّيلي البارح سوالف ندى
عصفورةٍ تشرق الدنيا على شانها !!
مدري هي الصبح وإلا الورد وإلا الندى ؟
أو أنّها هالحياة وبهجة ألوانها ؟!!
للحين باقيلها فيني رفيف وصدى
لو أن صعبه عليّ أستوعب ألحانها !!
تاخذني الضحكه العذبه إلى آخر مدى
تفتحلي مُدْن السعاده كل بيبانها !!
من أمس فاقد خفوقي , وين مدري غدى ؟
أثره يحاول يذوب بوسط شريانها !!
من بعدها كل حاجه ذابله ماعدا :
صوره لها وسط عيني غاضت أحزانها !!
لو أنتهى الحلم معها قلت توّ أبتدا
لو العصافير ملّت أكثر أغصانها !!
بدونها أو معاها ضاع عمري سُدى
زي ماتضيع الحروف أحيان بلسانها !!
,
عذبة الأحساس والضحكه ندى
تنقهر كل الصبايا منّها !!
لو تبي تسرق نظر عيني فِدا
بس كيف أصبر دقيقه عنّها ؟!!




.

[فلاح العماش]

,







تطمّن ياوزير الداخليه مملكتنا بخير
غفت عين الرياض وماغفت عينك ولا ساعه !!

تطمّن والوطن شامخ وحنّا نرفض التخدير
ولا هزّت مشاعرنا حديث شفاه خدّاعه !!

إذا كان الوطن لعبه رخيصه في يدين الغير
ترى نبض الولا أكبر من السمع ومن الطاعه !!

جنودك كلّنا دام الوطن غصن وغلانا طير
نبيع العمر ونصدّ العدوّ ونلوي ذراعه !!













.

[فلاح العماش]

,








الرتبه اللي من أبو متعب تساويله رتب
لو أنّها جندي ولو هي جت بعد طول أنتظار !!

الحمد لله من صفا جوّي وحالي أستتب
والحمد لله أشرقت في داخلي شمس النهار !!

للفرد شرهه ع النظام المُجحف وعنده عتب
ياليت يصدر من أبو متعب بحالتنا قرار !!

تبّت يدين اللي وضع هذا النظام وهو يتب
مدام نبطي ماترقّينا وعيشتنا دمار !!

يقولها اللي في قطاع العسكريه أكتتب
يارب تصبح أسهمه دايم يغطّيها الخضار !!

شاعر ولولا حرّةٍ بالجوف ماقال وكتب
عسى المواطن والوطن الكل منهم بأزدهار !!








.

[فلاح العماش]

,









جيت أشبه الناس لو ملّيت من ناسي
لو أن مالي عيوبٍ مثلهم أشوا !!

لو أقوا مبطي نسيت الناس وأحساسي
لو أقوى ماجيت مثل الناس , لو أقوى !!

ويش أستفيد أن كتمت بصدري أنفاسي ؟
ويش أستفيد أن غدى صوتي ولا يسوى ؟!!

أحلامي تموت وأفكاري وهوجاسي
مادام عزّ الكلام وعزّت الرجوى !!

يلبسني الحزن قبل الليل يا ناسي
وآدوّر بزحمة الأفراح أي مأوى !!

وألقاني مرمي على أطراف كراسي
وحيد مالي سوا الآمال والنجوى !!

ضاقت علي الوسيعه وأنكسر باسي
غنّيت أبسلى ولكن عيّت السلوى !!

بلوى إذا أنّك تحمّل واحدٍ قاسي
وأن صرت زيّه بعد ياكبرها بلوى !!

ياقرب موتي والأقرب منّه أفلاسي
لو أن صوته نغم ومبيسمه حلوى !!

لا صار بس ديدنه يجرح ولا يواسي
خلوني أشرب غلاه وجعلني م أروى !!





.

[فلاح العماش]

,










بعديش ..
بعد الموت , والجرح , والآه ؟
توّك تذكّرني , بعد أيش ؟
بعديش ؟!!

أبشّــرك كل شــي والله نسينـاه
وأبيك تنسى خاطر الملح والعيش !!

لاعاد تسأل , والغلا قد طويناه
النفس طابت منْك .. لاتقوللي ليش ؟!!

من باعنا برخيص برخيص بعناه
حتّيش لو توّه يجي شوق حتّيش ؟!!

لاتعتذر عذرك ترا ماقبلناه
وطير الهوى ماله جناحين أو ريش !!

اليوم ملّينا المحبه وعفناه
وراحت سنين الود والشوق والطيش !!

أنا أنتهيت .. ولكن الحمد لله
قويت أداوي جرحك اليوم وآعيش !!

بعديش ..
بعد الموت , والجرح , والآه ؟!
أنا نسيتك | جايني أنت بعديش ؟!!










.

[فلاح العماش]

,




http://center.jeddahbikers.com/uploads/jb13052040561.jpg



بوستك ياطويل العمر غيمه
تسكب العطر بدروب الزعامه !!

وأنت تضحك .. ترش البال ديمه
تنتشي من قبل روحي غمامه !!

تبتسم .. بسمتك أكبر غنيمه
ياعساها تدوم الأبتسامه !!

وقفتك تعطي الوقفات قيمه
وأنت هامه وماهي أيّ هامه !!

كل كلمه تجي منّك عظيمه
والرجل فعله يشابه كلامه !!

الأداره على نهجك حكيمه
مالحقها عتب وألا ملامه !!

عزّنا الله بروحٍ مستقيمه
روحك الغارقه بالأستقامه !!

يكفي أن نيّتك دايم سليمه
صار الأزرق بحدّ ذاته علامه !!

عكس ناسٍ نواياهم سقيمه
وأن حكوا بس يالله السلامه !!





.

[فلاح العماش]

,




الأنتظار المُمل وقلبي الصابر
والغيبه اللي تجي فجأه وتقتلني !!
وأيماني أن الفرح في دنيتي عابر
وأن الشقى عطّل أحلامي وعطّلني !!
وأني أنا المُتعب المجروح وآكابر
لو التعب من ثمان سنين كبّلني !!






.

[فلاح العماش]

,









علّمني أقرا حديث عيونك الخرسى
مادام صمتك عنيدٍ مثل كتماني !!

وعلّمني ألقى معاك لحيرتي مرسى
وأقطع معك شكّي القاتل ب إيماني !!

وعلّمني زيّك أجيك وأشبهك وأقسى
وألقى علاج لعذابي معْك وأدماني !!

وعلّمني أنسى عيونك , قبل لا أنسى
مادامها هي سبب جرحي وحرماني !!









.

[فلاح العماش]

,





أنتظرت أتصالك لين قلبي غفى
وعيني تراقب الصبح البعيد القريب !!

ماهقيت المحبّه تبتدي بالجفا
كيف بعدين ؟ يعني شي عادي تغيب !!

روّح الليل , شف نور الشوارع طفى
شوفني وأنت تعرف ويش معنى غريب ؟!!

أنتظرتك وقال الصبر فجأه : كفى
رغم أنّي أبيك البارحه , غصب | طيب !!




.

[فلاح العماش]

,









صوتك وطيفك بآغتوني وفزّيت
وأشعلتي بصدري حطب ذكريآتي !!

ردّيتلك من قآل أنا عآد صدّيت ؟
وأنتي معي يا سآكنه وسط ذآتي !!



.

[فلاح العماش]

,





أشوفك بس ما أقدر أشوفك
بقربي بس ماكنّك بقربي !!

أنا قدّرت ياعمري ظروفك
أبيك تحسّ ب أحساسي وقلبي !!

أقل حاجه كذب أفتح كفوفك
أقل حاجه كذب خلّيك جنبي !!

ذبحني سرّك الغامض وخوفك
أمانه بس أبعرف أيش ذنبي ؟!!

وقوفي طال والأطول وقوفك
وكلٍ موقفه بالحيل سلبي !!

ضعفت وكل سبب ضعفي طيوفك
نسيت أقسى وأبطّل معْك دربي !!




.

[فلاح العماش]

,








ما للبنفسج سواك أحباب
لو ضاقوا أكثر محبينه !!

لولاك ماهو كذا جذاب
باهت إذا ماتحبينه !!

غنّيتلك يا سما الغيّاب
العمر ذبلْت تلاوينه !!

كم واحدٍ خافقه ماتاب
لو أنّ ياسه تشوفينه !!

مادام ما للصدور أبواب
والريح تلعب وسط عينه !!

مابيننا كلمتين أعجاب
لو حلمنا مات من حينه !!

لو م أندفنّا بقينا تراب
لو عمرنا مدّ يدّينه !!

الدرب ليل وأملنا ذاب
شمعٍ وذي آخر سنينه !!

أغراب جينا , نروح أغراب
والموت محدٍ عرف وينه !!













.

[فلاح العماش]

,









يا عليها هذي الحلوه جسم
كل من شافه نسى طعم الحياة !!

جسمها مرسوم ياعمّي رسم
روعه , عاد شلون من دون العباة ؟!!

سحرها حط فمعاليقي وسم
ملحها طاغي وهي سكّر نبات !!

رغم أن الأمر عندي منحسم
بس مدري دجله هي وإلا فرات ؟!!

قلت أسمّيها , ولا تبغى أسم
دامها ستّ الصبايا والبنات !!

قسمها في خافقي أكبر قسم
ريم كل الغيد وتغيض المهاة !!














.

[فلاح العماش]

,










أقلّها أرسل مسج
لو ناوي هالغيبه تطول !!
لاتترك العاشق يسج
والناس في عقله تقول !!
مابي يقولون : أنهبل !!
وماكان ذا وضعه قبل ,
أقتل جميع الأسئله
وكل نظره مليانه فضول !!

مكاني حط نفسك إذا :
ودّك تحس اللي أحس ..
ساعتها بتشوف الأذا
وقابلني لو تقدر تحس !!
وش هالغياب اللي خذاك ؟
مفروض ماخذاني معاك !!
مو حلوه تتركني كذا ..
أسأل وأدوّر بس وراك !!








.

[فلاح العماش]

,










الساعه ثنتين الظهر
زحمة سير
ودوريّه في كل زاويه
وشارع مختنق
والناس مختنقه
هذا جاي من شغله
يهو قرفان من عمره
وهذا ماله أي شغله
وهذا رايح لشغله , تأخّر ..
واللي ينتظره خصم من لقمة عياله
وهذا طفلته مرّه شقيّه
تلعب وطاحت
وأنجرحت , وسال الدم من يدها
وخذاها بسرعه للمستوصف الأقرب
وهذا زوجته حسّت ب اْلم
حامل , وشهرها هذا
وهذا وهذا وهذا وهذا
ومحد يدري وش الأسباب
وليه الزحمه | الرحمه يا عالم
وأغلب الظن حادث
وبالأخير , السالفه ياصاحبي موكب وزير
والمشكله توّ ماوصل
باقي سؤال , ينسلّ بين الأسئله :
لو هو ركب سيارته ألحاله , أيش المشكله ؟!!






.

[فلاح العماش]

,



أنتي النور في عز الظلام
طلّتك ضي وأحساسك قمر !!

كل ماجيت أعبّر عن كلام ..
داخلي | قلت يبغالي عُمر !!

حالتي ذيّ جديده ع الأنام ؟
وألا كل البشر فيها تُمر ؟!

كيف لو نقلب الدعوى غرام ؟
وقلتلك يابعد كل السُمر :

أنسي البِيض , قومي بس ننام
ماعلى داعي عيونك أمر !!

السهر عذّب عيونك حرام
جفنها ذابل وفيها جمر !!

أمس يسكن زواياها الغمام
شوفي وشلون هي صارت حُمر !!

أمطريني وأنا كلّي حطام
ما أبي غير كلّك ينهمر !!

لي متى نشرب حروف الكلام ؟
وأنتي أصلاً بحد ذاتك خمر !!





.

[فلاح العماش]

,




هالعيد ..
منهو يعايد أوّل الثاني
من فينا شوقه يبي يسبق تهانيّه ؟!!

قوليلي بطيش :
وش رايك بفستاني ؟!!
وأقول : ياحظ فستان الأنانيّه !!

كم لي وأنا أقول :
ياحلوه على شاني ..
محبوبك الشوق لاعب في محانيّه !!

هالعيد ..
ناوي أخرّبها إذا أمداني !
صبري نفذ .. لين ضاقت كل موانيّه !!

يابهجة العيد ..
وأنتي عيدي الثاني ,
العيد منّك أخذ أبهى معانيّه !!








.

[فلاح العماش]

,




أبرحل دام أنا عندك مجرّد واحدٍ مغمور
وجوده في حياتك ماقدر يلغي أبد جورك !!

أبرحل وأترك أوهامي تموت وتنتحر بالدور
وأبترك دفتر أشعاري ويمكن يرضي غرورك !!

جيتي حيل مبهوره وقلبك هو بعد مبهور
مجرّد معجبه جيتي ورحتي وأنتهى دورك !!

طفله مترفه جداً عرفتي تتقنين الدور
دفعك الطيش .. مثلتي غلاك .. وزايف شعورك !!

مدام أني على الهامش بعينك ماني بمجبور
أمثّل دوري الساذج حسب فهمك ومنظورك !!

تعبت أستحضرك فيني وأنا مالي معاك حضور
تعبت أشتاقلك والشوق مافكرتي يزورك !!

أنا كنت أعشقك حد الجنون وكنتبك مسرور
برغم الغيره ورغم الجنون وملعنة طورك !!

أجيك أنساني الشاعر , أجيك العاشق المخمور
يحسبنّك قفص مدري يحسبه صدق عصفورك ؟!!

مجرّد عاشق وكنتي لوحدك عتمته والنور
وكانت أمنياته كلها تاقف على سورك !!

كنتي مصدر غروره برغم أنه مهو مشهور
كنتي مصدر أزعاجه بغيباتك أو حضورك !!

كنتي أحتياجه وأحتجاجه كان بك مغرور
عشانك مو مهم يضما لجل ماتذبل زهورك !!

كنتي سيّدة شِعره | وشِعره .. كنتي الجمهور
وكانت أصدق حروفه وفا تستوطن سطورك !!

كنتي سيّدة عرشه وحيدة قصره المهجور
كنتي نصفه الثاني وكان الشور بس شورك !!

معك ألغى وجود الناس , كل الناس دون شعور
رضخلك والجفا والكذب والخذلان دستورك !!

معك كنّ البنات أشباح وأنتي وحدك امن الحور
يحب غمازتينك ، مبسمك ، ويموت في حورك !!

كثر ماكان في قربك يحس بنشوة المنصور
كثر ماشمّ بكموم الغياب الموحش عطورك !!

كره ذكراك وأيام الغرام وقلبك المسعور
تركلك كلمتينٍ جعلها ماتكسر شعورك !!

( رفضت أني أكون القطعه اللي تكمّل الديكور ) *
وياحيّ الظلام ولامذله من ورى نورك !!








* فهد عافت





.

[فلاح العماش]

,






ياللي غطّيتي على خالد عزيز
من كثر غيباتك المتكرّره !!

أرحميني دامني رجلٍ عزيز
ماهو كل جرح أستطيع آمرّره !!





.

[فلاح العماش]

,







نامت عيون الدرايش !!
والدروب اللي جمعتنا :
نبضها للحين عايش ..
فينا ,, لو هي ودّعتنا !!



نمت بدري ..
وماهي هذي عادتي !!
نمت بدري ..
وأحتضنت وسادتي !!
لي متى هالضيق بس
وأنتي قلبك مايحس ؟!
لي متى هذا التعب
يسكن عيوني / وصدري ..
ضاق به حتّى النفس ؟!!
ليلة البارح حزين
كنت كالعاده حزين !!
كنّ للدمعه حناجر
كنّ للضيقه يدين !!
الفضا رغم أتّساعه
ياهو بعيني صغير
مثل هذا العمر عندي
وماهو بمثل العذاب !!
ممتلي قلبي مواجع
ممتلي صدري حنين !!
وأشعر بضيقه وكتمه
مرّني هالوقت مثلك
ياثقل دمّه ورِتمه !!

وتخاطفني يدينك يالمسا | وجه السما عتمه
وأحاول أخلق لبعض الغياب أعذار وهميّه !!










.

[فلاح العماش]

,








يسعد صباح الدراسه يابعد عيني
يسعد صباح الشقى اللي فيك واعدني !!

ياحيّ هاك العيون اللي تراعيني
سودٍ هدبها تمادى لين بدّدني !!

وياحيّ باص الرئاسه يامشقّيني
والمقعد الخلفي اللي فيك راودني !!

يرحم أبو العلم كانك ماقريتيني
في درس الأحزان يوم الحظ عاندني !!

ياطالبه لو قريتي فهرس سنيني
تلقين حزنٍ من الأفراح جرّدني !!

أخاف مع زحمة دروسك تناسيني
وأخاف بعض المواقف ماتساعدني !!

وأصلاً أنا أدري بأنك ماتحبيني
الله لايهين قلبك لايعاهدني !!

أخاف بكره تجين وماتلاقيني
لو عاد طيفك يابنت الناس واعدني !!

لكن أمانه إذا مرّه ذكرتيني
أنسي صباح الربوع اللي تعمّدني !!

وسامحيني .. ولكن بينك وبيني
بحب غيرك وغنّيلي تهدّدني !!








.

[فلاح العماش]

,











مو عادته يبخل علي في وصاله
أموت وأعرف بس .. وش فيه مشغول ؟!!

أن كان يتغلى علي بأتصاله
أنا أتصل , ماهو ضروري هو يقول !!

أوّل علي يسأل ودايم سؤاله
أوّل أنا ويّاه دايم على طول !!

خايف نسى قلبي وحصّل بداله
معقول يلقى غيري أنسان معقول ؟!!

ليته يسوّي في عيوني جماله
ذبلت ولا غيره من الناس مسئول !!

للحين منتظره تحرّى وصاله
تسأل نجوم الليل وتدوّر حلول !!














.

[فلاح العماش]

.







هالبنت ماتستريح إلا على صدري
ينزاح عنها التعب , لكن يجي فيني !!

أحسّها تخنق أنفاسي وأنا مدري
وماباقي إلا شويّ وتدخل بعيني !!

لو الشتا هالسنه طلّ وحضر بدري
أنفاسها دون ما أشعر تدفّيني !!

والجمرتين وبقايا ريقها الخمري
يشربني هذا , وذيك أحيان تكويني !!

تشّر على خافقي وتقول : ذا قصري
وأقول في داخلك منفاي وأنفيني !!

وتقول : عاد أنت تقدر تحتمل عطري ؟
وكل شي فيها يذوّبني ويغريني !!

لو طال والا قصر بأسبابها عمري
هي وحدها اللي تموّتني وتحييني !!









.

[فلاح العماش]

,




صديقتها تقول : البنت عاديّه !!
وهي تقول : جذابه !!
وأنا مدري من آصدّق , وفيهن مين كذابه ؟!!
هذي الحياة , وهذي غيرة البنات !!
برغم أن الشكل يبقى آخر أهتماماتي !
وأهم شي أنها حلوه بخيالي ,
وروحها حلوه !
ويكفي أنها شيخة غلاي , ونبض كلماتي !
وإذا جت فجأه فبالي :
أوزّع أبتساماتي , بدون شعور !!





.

[فلاح العماش]

,





آسف إذا م أنتبهت لعيد ميلآدك
لأن تفكيرنا محصور بالهجري !!

حبيبتي يا عساها دآيم أعيآدك
ياللي ولآ مرّةٍ قلبك نوى هجري !!

والله يخلّيك ويبعد عنك حسّآدك
يآصبح الاحلآم , يآشمسي ويآفجري !!










.

[فلاح العماش]

,










هنا الدمام ..
أقسى وأجمل الأيام !!
هنا ذكرى لها كم عام ,
هنا .. كنّي هنا أول مره تحضر بعمري !!
هنا جرحٍ , غفى بس الأكيد أنه بعد مانام !!

هنا كل الدواعيس القديمه ..
والحواري ..
والشوارع تختنق بالناس !!
ياطيب الناس !!
هنا الأحساس ..
والأنفاس رطبه , كنّها ريحة عود كمبودي معتق !!

هنا أحبابي ..
هنا أصحابي ..
هنا شرعت صدري للطعون , وأنفتح بابي !!
هنا أصحى على غيابي.. ويصحى بي !!

هنا الكورنيش ..
نظره كل أبوها طيش !!
هنا حاولت أتأقلم غصب عني ,
وغصب آعيش !!

هنا الساحل ..
طويل وغامض وناحل !!
هنا لون الثرى والملح ..
ولون الليل ..
لوحه كلها أسرار !!
هنا المحار ..
هنا موج البحر غدار !
ونجمه ترفض التأجيل !!
تبي يكون الوعد هالحين ,, قبل بكرى !!
هنا الدمام .. هنا ذكرى فرح وأحلام !
رغم كمية الآلام !!







.