الحقوني المضادات الحيوية ما تجيب نتيجة

[الحنشل]

سلام عليكم


يا الربع حلقي صار له اسبوعين يوجعن .. و ما أقدر أبلع ريقي من وجعه


و المصيبه إن المضادات الحيوية ما عادت تنفع



أول من يوجعن أخذ لي مضاد حيوي لمدة ثلاث أيام وعلمي بالشر




و المصيبة الكبرى و الطامة المطمه إني يوم قلته لزملائي المدرسين



طلعوا ستة منهم يعانون من نفس المشكله .. أي إن المضادات الحيوية ما عادت تجيب نتيجة



وش هقوتكم .. لا يكون مرض جديد



<< منجضع على الكيبورد و يتشهد .. ذالن يموووت:)




عاد يا الربع أمس جيت الطبيب و عطاني أدوية و من ضمنهن علاج للمعدة


قلت ليه يا دختووور .. شايفن فار تجارب


أشكي لك حلقي .. تعطيني علاج للقرحه


قال إنت عندك المعده مهي جواد .. العصارة عندك به تهريب و يبي خرط


عاد خذيت العلاج و الحين نجرب





السؤااااال


هل فيه أحد منكم يوجعه حلقه و ما نفعت فيه المضادات الحيوية ؟؟؟

[ابو ضاري]

انا مانفعت معاي

الحنشل تراهم يعطونا من المضادات ولا ينفعن

اسمع رح لحدى العجز تعطيك مره

الدواء شعبي>>>>>>>>يسوي دعايه عنده اعشاب

[صلفيق]

ماتشوف شر يالحنشل
>>> ان شالله بعدوينك ولا فيك

التهابات الحلق تأتي اما فيروسية أو بكتيرية ..
وطالما ان هناك من يعمل معك من زملائك يشتكون من نفس الأعراض ،
وعدم فاعلية الدواء المستخدم >>> فغالبا تكون هذه اصابة فيروسية.
وطالما انك استخدمت مضادا حيويا موصوفا لك من قبل طبيب ، ولم تستفد .. مع انك لم تذكر نوعيته !
فكثيرا مايحدث ذلك نتيجة استعمال مضاد حيوي غير مقاوم للفيروس المسبب للشكوى.
وفي هذه الحالة ـ أرجو أن تعمل مزرعة مسحة للحلق عن طريق المختبر لمعرفة نوع الفيروس
أو الميكروب واعطاء المضاد الفعال بالمقاومة للقضاء عليه .
لو رحت لأي مستشفى أو مركز طبي حالا .. اطلب منهم عمل مسحة للحلق T- c&s

وستجد العلاج المناسب للقضاء على المشكلة.

تمنياتي لك بالشفاء عاجلا...

لولا انني على عجلة من أمري .. لتوسعت قليلا بما يفيد أكثر
ولكن بالتأكيد لي عودة لموضوعك هذا بعد ظهر هذا اليوم.

[أبو فهد]

سلامات ما تشوف شر يابناخي



والله انا جتن مثل حالتك و أسوأ بعد




قحة و التهاب بالحلق من عيد ارمضان حتى بعد الحج باسبوع




ادري تبي تنشدن عن سبب اختفاء القحة و الالتهاب




والله ياخوك طنشته و راحت




أما المضادات فقد استعملت اكثر من 6 انواع بوصفات طبية




الظاهر الفايروس قام يتارغ من المناعة اللي جتوه :)





و بالاخير


أسال الله العظيم رب العرش الكريم ان يشفيك






-----------------
أبو فهد الهمزاني

[الكاتم]

المشكلة ان ايَّ سعودي يوجعه حلقه يروح لأيَّ صيدلية ويقول عطنا مضاد لالتهاب الحلق>>المزرعة لنوع البكتيريا مهمة جداً
انا كنت مدمن على المضادات الحيوية ولعبت بي لعب وبالنهاية اكتشفت ان الموضوع مجرد حساسية تسبب لي الالتهاب والاحتقان في اللوز
ولقيت انسب شي حبوب لونهن زرق اسمهن اريوس اكل حبة باليوم ولمدة ثلاث ايام فقط وعلمي بالشر >>حبوب الزرتك يسببن تشنج للقصبة الهوائية وخطرات بالحيل من واقع تجربة

من ثلاث سنوات ما كليت مضاد الا مرة واحدة >>لكن تجنب مسببات الحساسية

ورأيي ان كثرت اكل المضادات يسبب تعود الجسم عليهن ويصيرن ما ينفعن بل العكس يضرن بشدة

[الحنشل]

ابو ضاري

انا ابي اعرف شي واحد ... ليه المضاد قبل ينفع و الحين لا !!!!



بس الظاهر ماله الا اللي قلت


اليوم أبي أجيب لأمي كراث و فجل ... و أخليه تعزم عجز الحاره


و انجضع بوسطهن و أخليهن يفحصني و يعطني العلاج الماسب

[الحنشل]

حياك يا صلفيق


و الله لا وصفة و لا هم يحزنون

متعود كل ما أوجعن حلقي أمر الصيدلية و أخذ مضاد حيوي .. و ثلاث أيام و علمي بالشر


بس هالمرّه غييييير



شكل الفايرس متحلفن بي .. و قاطن من النذور لين دااااخ



ملعون أبو القرندح صار لي اسبوعين و أنا أبلع من المضادات الحيوية و لا فااااد



لكن أنا مريت الدكتور و عطاني علاجات .. و الحين بفترة العلاج



بس اذا جاء السبت و ما نفع علاجه .. أبي اروح و أسوي المسحه اللي تقول




برايفت ابو ضاري


وش رايك تروح و تاخذ المسحه عنّي .. أخاف إنه توجع:)

[الحنشل]

يا شقردي


السالفه مهي باللي إنت تبي .. الصوت رااااااح غديت تقل أطرم




و بعدين أنا ناقلن هم الوغدان الضعوف اللي ادرسهم وشلون أشرح لهم السبت .... و الا أنا بقلعة ودارين <<هين :)





و بالاخير


أسال الله العظيم رب العرش الكريم ان يشفيك

تدري .. ركز على هذي

لا مضاد بلا خرابيط

اسبوعين و أنا أبلع .. و الله لو إنه (إيدز) أمداه يروح:)

[الحنشل]

الكاتم ..


بس وصلت خير .. هن هذولن اللي ابلعهن الحبوب الزرق


قبل أبلع من الحمر بس مالقيتهن بالصيدليه و خذيت الزرق اللي تقول عنهن


و مع هذا ما جابن فايده .. الظاهر مالنا الا أحرث t-c&s << يتحفظّه من الحين:315r:

[بعد ملي]

مع اني حساسه اتعب على طول من الحلق من يومي صغيره
بس الحمد لله المضاد ينفع معي
والحين المضاد بالشنطه ع طول

ماتشوف شر اخوي الحنشل
اجر وعافيه باذن الله

[الحنشل]

بعد ملي

الله يسلمك .. و لا باس عليك


و أبشري بالعلاج


اليوم عقدة أمي جلسة طارئة لمجلس عجايز الحارة .. من شان يناقشون مشكلة حلقي


و بعد مفاوضات حثيثه .. تخللها مشادات سمعوه الجيران


طلعن لي علاج .. و الحمد لله تشافيت عليه


العلاج هو .. من خطوتين


1ـ ماء دافي مع ملح للغرغرة

2ـ تاخذين ملعقتين خليط عسل مع ليمون


و علمك بالشر :thumb: