.. صباحات .. ما بين .. الخير .. والشر ..

[عبـدالعزيز الوادي]

بسم الله الرحمن الرحيم ..


..



السلام عليكم ورحمة الله وبركاته ..



..


صباحات .. اما ان تكون بصباح الخير .. او صباح الظلم ..

..

وددت ان تكون فقط صباح الخير ..

..

وددت ان اردد هذه الابيات .. على مسمعك .. كل صباح ..

..

حتى وان لم تكن بالقرب .. فأنا أطرب .. لألقاءها .. وكأنك موجود >> حالة عشق


..

..


فـ // صباح الخير ..

..

..


صباح الخير يا أنتي .. صباح الخير يا فلانه
صباح النور يا نور العيون .. وعمر راعيها

/

صباح الصبح وأنفاسه .. صباح الشوق وأشجانه
صباح الورد وعطوره .. صباح آمال مغليها

/

صباح الحب يا نايم .. أشوف العين نعسانه
فديت الضحكه الحلوه .. فديت اطراف اياديها

/

حبيبي قوم وطيورك .. لصبحك موت ولهانه
تغرد تطرب اسماعك .. تمنى بس تناديها

/

حبيبي والحياه احلى .. معك والناس زعلانه
ما هموني ما دام انك .. بحر روحي وشاطيها

/

معاك انتي حرام أزعل .. حرام اشكي لك احزانه
زمان(ن) خيب آمالي .. حرام عيونك اشقيها

/

لك الفرحه لك الضحكه .. وهاك الشعر وألحانه
علي اشرب عنك مر الحياه .. وهاك حاليها

/

حياتي وان حكيتي لي .. أحس الارض طربانه
تمايل من غنج صوتك .. وصوتك حيل مغريها

/

غرستي حبك بقلبي .. وريدي ضم شريانه
سمحتي لعيني تشوفك .. سحرتيها وأسرتيها

/

عذاب ان لامست كفي .. كفوف(ن) شوق رويانه
ذبحها طول هجرانك .. كواها عض اشافيها

/

صباح الطهر في ذاتك .. صباح انسام سهرانه
تبي تلحق على شعرك .. تداعبه ويسليها

/

صباح السكر بريقك .. صباح الذوق والوانه
صباح الكحل بعيونك .. و عينك لا تبكيها

/

صباح الكلمه الحلوه .. صباح الشوق واشجانه
صباح النور يا نور .. العيون وعمر راعيها

/



..


..


..


لكنك ابيت .. ان تكون هذه الصباحيه هكذا ..

..

بسببك انت اصبحت هكذا ..

..

..


صباح الظلم ..

..

صباح الظلم ...

..

..

..


صباح الظلم يا ظالم .. صباحك ما طلع نوره
صباح الذنب يا قاسي .. صباح الهجر وآهاته

/

تقهوى وهاك ابياته .. حبيب(ن) كنت جمهوره
شراك بكل هالدنيا .. عطاك ولا يبي هاته

/

أنا مصدوم هاللحظه .. ولاني شايف الصوره
ما هو معقول وش صاير .. علام الناس شماته

/

حسافه خابت الهقوه .. وحبك طاحت قصوره
وصار اللي يسمونه فراق .. بجسمه وذاته

/

هجرت ولا تبي قربي .. تخون الوصل وجسوره
خلاص اقفيت يا خلي .. وصدك ذي بداياته

/

أنادي لك تجاهلني .. وأسوق الرجل مجبوره
أصد وداخلي حيره .. ولا أدري ويش غاياته

/

احس الروح في صدري .. من الآلام محشوره
تبي تطلع ولا تقدر .. تواجه شر نياته

/

ألا يا وقت ما ترحم .. وخلي زايد(ن) جوره
شف اللي صار لا تقسى .. ابي ترسم نهاياته

/

نهاية حزني وجرحي .. ونفس(ن) حيل مكسوره
ابي تنهي معاناتي .. ما ابي ليلي ونجماته

/

وفيت ولا وفا خلي .. وش اللي صار معذوره
تظن ان الهوى لعبه .. ولا تعرف حكاياته

/

رسمتك والسما تمطر قهر .. والارض مغدوره
رسمتك لوحة(ن) عميا .. بحس(ن) يذبح اسكاته

/

بدوي وطقها لطمه .. زعل والروح مقهوره
رحل ينقل وسط كفه دموع .. ويذكر امواته

/

كريم يكبر الضيفه .. حكيم وينوخذ شوره
شجاع ودايم أفعاله .. تجي وتعز هقواته

/

صبور ولكن صدودك .. يغيض ويجرح شعوره
لان الشوق لا زاره .. يزيد الدمع كياته

/

صباحك ظلم يا ظالم .. صباحك ما طلع نوره
صباحك ذنب يا قاسي .. صباحك هجر وآهاته

/



..


..


..


..



قبل ان أترككم ..

..

وددت ان اضع هذه ايضا بين ايديكم ..

..

..



أحس بداخلك كلمه .. تصيح مضيقه صدرك
دخيلك لا تخليها تموت بداخلك قلها

/

وأشوف بعينك اليمنى .. دموع(ن) تشتكي غدرك
حسافه ما هقيت انك .. تخون وتنكر أولها

/

يا ليله نام لا تشكي .. وش اللي جاك من بدرك
صحيح انه نوى حاجه ولكن .. صعب يوصلها

/

أنا واللي جمعني بك .. نويت اعلمه قدرك
ما هي صعبه ولا سهله .. ولكن غصب اسهلها

/

خلاض (ا)شفيه يا صدرك .. علامه زايد(ن) كدرك
خلاص اغدر على كيفك .. ونفسي ما انت مزعلها



..


..


..

..




محبكم

..

..

..

..

عبدالعزيز الوادي ..

[فواز الغسلان]

صور رائعه ومشاعر صادقه منثوره في هذه اللوحه 00

لوحه شعريه جميله بريشة فنان متمكن

تحياتي لك يالوادي

[ابو ضاري]

لاهنت يابو وادي على الابيات الجزله منك

وصح لسانك يالغالي

[سيف الدولة]

أخي عبد العزيز


ابيااات روعه وجميله


صح لسااانك ولااااهنت

[عبـدالعزيز الوادي]

العملاق . فواز الغسلان .. اهلا بمرورك الذي يسعدني ويشرفني ..

..

الغالي .. الضاري11 .. صح بدنك ولا هنت على مرورك وبيض الله وجهك يالغالي ..

..

الراقي .. سيف الدوله .. صح بدنك .. مرورك .. مبعث سعاده وربي ..

[بتول آل علي]

سأعود على رواقه بإذن الله


،

[فارس الصحراء]

بتول ..

..


بأنتظار عودتك ..

..

[هلآ الآسلميهـ]

عبدالعزيز ..



لا هان قلمك ونبضك وأحساسك..



القصيده الاولى تحملك في عالم الخيال لم أرغب بتعكير مزاجها بالقصيدتين الاخريتين ..



شكراً لك ..

[شام]

قرأتها في وقت غسق
وتذكرت تلك الصباحات الملونة
بـ ألوان الخير و الشر
و الوصال و الهجر
و الوفاء و الخيانة
كنت ابحث عما يروي ظمأ ذاك العجاف
فوجدت هنا ينابيع لا تنتهي
شاعرنا القدير عبدالعزيز
أبدعت بكل المقاييس
ف/شكراً لأنك هنا
ولأنك ترتقي بذائقتنا..

[راقيه الجزائريه]

صح لسااااااااااانك
اخوي عبد العزيز
الله يعطيك العافيه
ابيات جزله
شكرا لك
احترامي ايها الفاضل

[فارس الصحراء]

بيرل الصغيره .. شكرا كل الشكر لمرورك .. وتعليقك ..

الا انني لا اقبل بالاولى الا اردفها بالثانيه .. .. >> حقيقه لا خيال .. تباً


..

شام .. اهلا بك اهيتها الراقيه ..

مقدر لكل حرف كتبتيه .. هنا .. شكرا يا شام ..

..

راقيه .. صح بدنك .. واسعدني تواجدك .. كل الشكر ..

[رشيد العطاوي]

الاخ العزيز عبدالعزيز الوادي

صح لسانك ملايين وعلا شانك

ابيات رائعه بروعة حضورك

دمت ودام ابداعك لاعدمتك

تقديري واحترامي لك