المساعد الشخصي الرقمي

مشاهدة النسخة كاملة : كدت أن أفطس ...


منصور الغايب
23-04-2009, 11:48
السلام عليكم ورحمة الله وبركاته



مساكم / صبحكم .... الله بكل الخير ...



ياجماعة ...


ياقرب الموت من ابن ادم ...

والله انه اقرب لواحدنا من شراك نعله ..


اذا طلع ريال يعرف شنو يعني شراك ... له 10 دنانير .. :)

المهم مالكم بالطويلة ...


ذاك اليوم .. راد من الدوام تعبان ... الساعة ثلاثة العصر ...

قلت خلني امر على المطبخ اشوف سندريلا قلبي شمسويتلي :)


المهم ... شفت هاك القدر على الطباخ ... يقولي ارحب ارحب ...



وانا اجيه طاير .... ماتصيدن كامرات الخط السريع كله ..



وافتح القدر وتفوح منه الروايح الطيبة ...


الاهل مسوين برياني ... :)


لقمة باثر لقمة ...

واخرى تنادي اختها ..

لقمة وراء لقمة ...


وتخبرون البرياني يجي الدجاج بعظمه مقطع داخل العيش ...


المهم ...






القادم مذهل أكثر :)







وآخذلك اللقمة الاخيرة ....



وانا اوجس به عظم ...

قلت يارجال عظم صغير ... مهو ضار :)


وانا ابلعه مع اللقمة من الطفاقة ...

وهو يوقف بلهاتي ..

لاهو اللي نزل ولا هو اللي طلع ...


وانا اختنق الله يجيركم ولاعندي أحد ...

واغدي أشاهق ..


بغيت اركض للصالة ...


تذكرت ان مابه الا امي وزوجتي ...

شراح يسون ... ماغير اخوفهن ..

قلت خلني اموت لحالي بالمطبخ ويسموني شهيد المطابخ ...


واقوم اشاهق واشاخر ....


وتطري علي كل سوالفي الشينة بهاك اللحظة ...


طرى علي سطرة سطرته لواحد من وغدان الشارع ...


ويطري علي يوم أعيب على ريال واقوله اليمني ... :)


ويطري علي يوم اعيب على ابوماجد ... واقوله معطينك درع كاتب المضايف عبارة عن طاسة شفر 89 ...


ويطري علي يوم اعيب على ابوعارف واتولجه .... واقول بطنه مليانه طين ..



ويطري علي منابشي انا والمطنوخ ... وعجايب ....



وبينما انا اتذكر ..


طاح العظم بقدرة الله عز وجل من حلقي ...



وانا امسح دموعي ...


وآخذ نفس عميق ...


وقلت خلهم يولون ريال وابوعارف والمطنوخ وعجايب ولا يهون وغد جيراننا ... يستاهلون اللي اسويه بهم ... :) <<< أسيود راس ..





ما يستفاد من القصة ...



الطفاقة مو زينة ... لا جيت من الدوام ول غسل وبعدين اهلك يحطون لك غداك ...




الموت قريب حيل والدنيا ماتسوى ...


اي واحد زعلان مني ... تراني أعتذر منه .....لأن الدنيا ماتسوى ... غصة بعظم .. :(


شكرا لكم ...
بالمختصر..
23-04-2009, 12:14
ههههههههههههههههه

الحمد لله على سلامتك ..

تذكرت الشبث يوم يغص بـ قطعة خبزه والله ستر ..


أنا عن نفسي مسامحتك .. لأنك ماسويت لي شين :)




.
.
متعجب
23-04-2009, 13:11
منصور غص وناظر الموت بعْظيم ..... عجلن ( تبرْيَنْ)ما نطر يغرفونه



سلامتك..ألف سلامه
عبدالرحمن
23-04-2009, 13:31
الف الحمد ع السلامة ولا عاد تعوده وتاكل برياني:)

بعدين هاذي اكلة هندية وانت من زينين المحازم
شرابة الهيل وش جابك له :)

الا وش سويت بالعظم بعد ماطلع :)
محارش
23-04-2009, 13:44
الحمد لله على السلامه


حلولات لو ما منعوا المزمزه بالفله :)


حرام ما يخلى


تكفون اسمحوا لنا لو هالنوبه :)
ريال الفسحه
23-04-2009, 13:47
والله من الشفحه بك يا منصور :)
ابو فارس
23-04-2009, 14:47
يامنصور
انا بغيت اروح لجمعية البر اتصدق عنك


ياعلك لطولة العمر يارب

ومرة ثانية اهجد شوي شوي

ترى حبوبة ابو عارف وريالوه وربعهم ماهي بسيطة


الا قل لي

ايهم احلى البرياني او الهمبرجر


لاهنت
دمت بخير
بتول آل علي
23-04-2009, 14:55
الحمدلله إنها جت على كذا

و لو ان أجلك وصل كنت غادي الحين بالكفن و الدود تتمزمز في البرياني

:(

>>>> بعد عمرٍ طويل إن شاء الله



و ما تشوووف شر يا منصور
فوووز
23-04-2009, 17:12
سلامات يامنصور

في العجلة الندامة

عقب المرة تركد ترى العمر غالي
واحد شقردي
23-04-2009, 17:56
شراح يسون ... ماغير اخوفهن ..

قلت خلني اموت لحالي بالمطبخ ويسموني شهيد المطابخ ...


هههههههههههههههههههههه
والله انك صادق بتخوفهن ولا تستفيد غير الصياح عليك

بطل بموقفك ذا

لا هنت على سالفتك يا غالي
فهد الجنيدي
23-04-2009, 18:09
منسور

طيب مرة تاني أأزمني
من زمان أنا ماياكل
برياني
لا و دزاز بئد

هرام أليك

همدالله ألى سلامة مال أنتا
منصور الغايب
24-04-2009, 00:31
ههههههههههههههههه

الحمد لله على سلامتك ..

تذكرت الشبث يوم يغص بـ قطعة خبزه والله ستر ..


أنا عن نفسي مسامحتك .. لأنك ماسويت لي شين :)




.
.


بدت الشماتة ... ومرحبا بأول الشامتين ...


الشبث مركب حوصلة طير هاللي غص بخبزة ..

اما أنا يخوك ... ذيب .. أغص بعظم :)


وشكرا على المسامحة ..
منصور الغايب
24-04-2009, 00:33
منصور غص وناظر الموت بعْظيم ..... عجلن ( تبرْيَنْ)ما نطر يغرفونه



سلامتك..ألف سلامه


ماهو بكيفي مير حدن أنا الضيم = الجوع كافر والبشر يخبرونه :)



شماتة شعرية ... من الاستاذ متعجب ..

مشكور على المرور ...
منصور الغايب
24-04-2009, 00:36
الف الحمد ع السلامة ولا عاد تعوده وتاكل برياني:)

بعدين هاذي اكلة هندية وانت من زينين المحازم
شرابة الهيل وش جابك له :)

الا وش سويت بالعظم بعد ماطلع :)


يارجال .. مالنا غناة عن هالطبخات المستوردة :)


وبعدين ماني من ربع الهيل .. يقولون يسوي قولون ... انا من ربع القهوة السودة ... كانك تخبره :)



وبالنسبة للعظم ... خزيته وقلت له الله يلعنك :) <<< صج ترى !!



شكرا استاذ عبدالرحمن ...
منصور الغايب
24-04-2009, 00:41
الحمد لله على السلامه


حلولات لو ما منعوا المزمزه بالفله :)


حرام ما يخلى


تكفون اسمحوا لنا لو هالنوبه :)


يارجال بدال ماتقول ... الحمدلله الذي عافانا :)


بلاك ماجربت غصة العظم ...

والله ان عيوني بغن ينقزن .. ويلعبن قدامي لحق ملاحق :)
منصور الغايب
24-04-2009, 00:43
والله من الشفحه بك يا منصور :)



ما عليك زود :)


نسيت يوم انك تخليني بالماسنجر وتقول ابي الحق على الغداء ؟! :)


هذيك شسمه ؟!
منصور الغايب
24-04-2009, 00:47
يامنصور
انا بغيت اروح لجمعية البر اتصدق عنك


ياعلك لطولة العمر يارب

ومرة ثانية اهجد شوي شوي

ترى حبوبة ابو عارف وريالوه وربعهم ماهي بسيطة


الا قل لي

ايهم احلى البرياني او الهمبرجر


لاهنت
دمت بخير

هلا ابوفارس ...


الكبار كلهم مارين علي اليوم ... عسى الله لايحرمن مرورهم ...



ويخوك هذا انت قلته .. انا حاس انه حوبة ابوعارف .. والا الباقين ... ماش مالهم حوبة :)


بس ابوعارف من شياب الرحمن ... شيوخ عرب :)


وبالنسبة لسؤالك ..

الاحلى هو برياني الهمبرجر :) <<< تصدق ما جربته
منصور الغايب
24-04-2009, 00:49
الحمدلله إنها جت على كذا

و لو ان أجلك وصل كنت غادي الحين بالكفن و الدود تتمزمز في البرياني

:(

>>>> بعد عمرٍ طويل إن شاء الله



و ما تشوووف شر يا منصور


ايه والله صدقت ... خص ليا طحت بدود هندي يادافع البلا :)



ماتشوفين شر ... وعسى الله يخليلك عيالك ..

شكرا على المرور اختي بتول ...
منصور الغايب
24-04-2009, 00:53
سلامات يامنصور

في العجلة الندامة

عقب المرة تركد ترى العمر غالي



اي والله ... في العجلة الندامة ... والغصة بعد :)


لاهنت على المرور والنصيحة ...
منصور الغايب
24-04-2009, 00:55
هههههههههههههههههههههه
والله انك صادق بتخوفهن ولا تستفيد غير الصياح عليك

بطل بموقفك ذا

لا هنت على سالفتك يا غالي


افا عليك ..


عندي الكثير من المواقف البطولية .. بس انت تابع :)



لا هنت على المرور ...


بس صج والله مدري شطري علي هالشئ وانا اطلع بالروح .. ربك الهمن ..
منصور الغايب
24-04-2009, 00:57
منسور

طيب مرة تاني أأزمني
من زمان أنا ماياكل
برياني
لا و دزاز بئد

هرام أليك

همدالله ألى سلامة مال أنتا

هلا راجو ... كيساهي ؟!


يارجال ... ماعرف جوالك والا كان عزمتك على عظم ... يمكن تغص ونفتك منك ..:)



الله يسلمك ياغالي ..


شكرا على المرور..
غالب
24-04-2009, 03:54
ويطري علي يوم أعيب على ريال واقوله اليمني ... :)
ههههههههههههههه ريال ياليمني

ويطري علي يوم اعيب على ابوماجد ... واقوله معطينك درع كاتب المضايف عبارة عن طاسة شفر 89 ...
ههههههههههه

ويطري علي يوم اعيب على ابوعارف واتولجه .... واقول بطنه مليانه طين ..
هههههههههههههههههههههههههههههههههههههههه هههههههههههههههههههههههههههههههههه
هههههههههههههههههههههههههههههههههههههههه ههههههههههههههههههه
هههههههههههههههههههههههههههههههههههههههه هههههههههههههههه
ليه ياشين مايستاهل هههههههه


واستلم سلامي
منصور الغايب
24-04-2009, 10:43
^
^
^

ياخي مدري ليه أحس إن شماغك أكبر منك :)


لاهنت على المرور ...
حمـود
24-04-2009, 21:18
انا زعلان عليك لانك معطين المخالفه الوحيده ببحياتي

حتى المرور ما عطوني

بس انت >>>تقل ابو الشباب مهو مخطي
<<لا ما اخطيت
>>مهو انت ناقل موضوع وحاطه بالعام

>>خلاص منصور طلعت سليم

واسف شطفتك وقاعد اسمع تسبدي وهي تانبني لا ني اتهمتك

هههههههههههههههه

دمت بخير
غالب
25-04-2009, 02:11
منصور
ياخي غض البصر يعني لازم تعلم هههههههههه


واستلم سلامي
ريوف
25-04-2009, 07:21
‘.

.‘


منصور الغآيب ..

أعتقد أن أوّل من قرأ موضوعك هذآ أنــآ بس مدري وش أرد عليك ...
أبتسيك وإلآ أضحك عليك ...!!

يآخي لآتعجّلون مآبكم صبر لين اللي طبخت تقوم تزيّن السفره لكم ..!!
وبعدين فعلآ ذكّرتنآ بـ الشبث الله يذكره بخير ..
ويطوّل أعمآركم جميعآ ..

الحمدلله على سلآمتك يآمنصور ..

تقبّل مروري قبولآ حسن ..!

:
:
أحمد
25-04-2009, 11:33
يالربع خلونا نتفق

هالحين انا عزابي ومن المتزوجين نستفيد

يامنك يالواحد بغيت تهفي لاي سبب من الاسباب مهو لازم تروح عند مرتك وهذا بسبب مشاعر المراءه الرقيقه صحيح

طيب على كذا ليه يقولون المراءه تقاسمك افراحك واحزانك ماورا غزت الكراع حزن ليه المره ماتشاركن

طيب ليه المهر يصير 50 الف والله ياللي ابخطبه انه ماتمالح الى 25 الف ويامني بغيت اموت لاتجينن مابيه ههههههههههههههههههههههههههه

تحياتي لك يامنصور والركاده زينه


تري مكاسي منصور
ابو ضاري
25-04-2009, 16:25
هذه من العجله منك يالرجال
تدري هذه جئتك لن كنت عند ريالووووه ودعى عليك ريالل الفسحه يقول ليته يغص بعظم سمكه

اقول خلك مسالم مع الناس ...............منصور لا تعوده
منصور الغايب
27-04-2009, 19:55
منصور
ياخي غض البصر يعني لازم تعلم هههههههههه


واستلم سلامي



لا انت عادي ... ممن يجوز النظر اليهم ... لم تبلغ الحلم :)
منصور الغايب
27-04-2009, 19:57
‘.

.‘


منصور الغآيب ..

أعتقد أن أوّل من قرأ موضوعك هذآ أنــآ بس مدري وش أرد عليك ...
أبتسيك وإلآ أضحك عليك ...!!

يآخي لآتعجّلون مآبكم صبر لين اللي طبخت تقوم تزيّن السفره لكم ..!!
وبعدين فعلآ ذكّرتنآ بـ الشبث الله يذكره بخير ..
ويطوّل أعمآركم جميعآ ..

الحمدلله على سلآمتك يآمنصور ..

تقبّل مروري قبولآ حسن ..!

:
:



الله يسلمك ياختي ...


والجوع كافر ... :)
منصور الغايب
27-04-2009, 20:02
يالربع خلونا نتفق

هالحين انا عزابي ومن المتزوجين نستفيد

يامنك يالواحد بغيت تهفي لاي سبب من الاسباب مهو لازم تروح عند مرتك وهذا بسبب مشاعر المراءه الرقيقه صحيح

طيب على كذا ليه يقولون المراءه تقاسمك افراحك واحزانك ماورا غزت الكراع حزن ليه المره ماتشاركن

طيب ليه المهر يصير 50 الف والله ياللي ابخطبه انه ماتمالح الى 25 الف ويامني بغيت اموت لاتجينن مابيه ههههههههههههههههههههههههههه

تحياتي لك يامنصور والركاده زينه




تري مكاسي منصور


الجثري .. لاتقلب المواجع ... :)


وش استفيد منه لابكت .. ؟!


ماغير اموت وانا دايخ :)



لاهنت
منصور الغايب
27-04-2009, 20:04
هذه من العجله منك يالرجال
تدري هذه جئتك لن كنت عند ريالووووه ودعى عليك ريالل الفسحه يقول ليته يغص بعظم سمكه

اقول خلك مسالم مع الناس ...............منصور لا تعوده


يارجال ... ومنو قالك ان دعوة ريال مستجابه ؟!


العالم الله يمكن ما تتجاوز سقف ببيتهم :)


على العموم ... انا مسالم من بعد ذيك الغصة ... الا مع الربع اللي سميتهم :)


لاهنت ..
εïз خزامى εïз
30-04-2009, 13:15
هههههههههههههههههههههههههههههههههههههههه هههههههههههههههههههه
الشفاحه "شمكله" عويصهـ :frown:
اهم شئ الحمد لله على سلآمتكـ
يووهـ أحس بهذيكـ اللحظه ... تفكيركـ تغيــر للحياهـ
الحين منصور.. وش تحس به عقب هالتجربه :) ؟ ههههههههههههههههههههه<لاتشره شاربه رمان:)
بعدين الله رآحمك وأنت قايل أنكـ "اوجست" عظم
يوووووووووووووم أنك تبلع؟؟ قال ايش قال صغيره:@
لا عآد تعودهآ
المرهـ الجآيه اصبــر ليآ ينحط الأكل وسمّ قبل تآكل :@
ميرســيhttp://www.shmmr.net/vb/images/icons/15.gif
منصور الغايب
30-04-2009, 14:19
هلا خزامى ...


والله ياختي انا قلت ثقتي باسناني كبيرة ... راح اجرش العظم .. :)


بس ماش .. زرق ووقف بالبلعوم ..


وساعتها .. صار القبر من امامي والموت قدامي :)

الله يسلمك ياختي ..