القوطي ... يتصل بك ..!! [الأرشيف]

مشاهدة النسخة كاملة : القوطي ... يتصل بك ..!!

سمااا

10-01-2009, 12:07

حيييـهـــم ..

مساكم عطر إسكادا << الأخضر ...

تصدقون أمس أمي أعطتنـي واحد كلاسيكـي على علباتي
عاد قعدت أصيح و تفاجأت بأني ماقدرت أغمض ... آثاري دموعي تجمدن بعيوني .. من شدة البرد .. << أبوك يا الصاروخ

أشتقت للفله .. و أشتقت للقلوب الطيبه الرهيبه ..
لكن الظروف الصحيه السيئه للوالده كانت السبب في بعدي عن أهلي عن الفلـه ..

لكن الحمد لله صارت أحسن و نبي نزوجها بعـد << تولم يا أبو عاااارف ..

بصراحه بقول لكم ..
شي قاعده أفكر فيه .. منذ زمن طويل ..
و لا أدري .. وش السواة ..؟!

تعبت مني أحسني مضيعه ..
كثير أنسى .. و أفهي و أتنح ..
كلهم يضحكون علي ..
حتى خواتي ..

طيب أنـا مثـلكم ... أنا كائنه حيه أشغل حيز من الفراغ .. أكمش في البروده ... و أتمدد في الحراره ..
يعني شي يوجع القلب ..
أسمعوا هالموقف يا تكـفون"

أختي ضيعت جوالها ...
و قالت لي : سمـااا
قلت : عيونـهااا والله ..

قالت : بالله أتصلي على جوالي مدري وينه ..!
بكل أحترام و حب و إخاء ..
أتصلت عليها ...

أتلفـت أدور جوالها ...
إلا هـو جنبي ...
أوجعني خشمـي يوم شفت شاشة جوالهـا ..

]القوطـي ...[
يتصل بك ...!!

طيب ليش <<< قامت تصيـح البنــت ..

يعني عشان إنا غلابـه مساكيـن

ولا عشان إنا نعاف القطـاعه

صحيح إنا ماملكنـا ملاييـن

لكن بحمد الله ملكنا القناعـه ..

<<< أنفلونزا شاعر المليون ..!

يعني الواحد لازم يصير ملعون و حقود و ستذوب و ملسون عشان يصير أوكـيه و يواكـب عصر التحرحر الفكري ...
تهئ تهئ تهئ <<< هات الفايــن ..

<<< تمسح دموعها .. تبـي تسولـف ...

خلوني أقولكم سولافتي ...
... و خلوهـم يقولوا اللي يقولوا ... و خلوها <<< قلبت محاوره <<< الله يرحمك يا فيصل الرياحي ..[

في هالإجازه جتنا خالتي ..
.. و ماني معلتمكم بأسمها << أخاف أنها مطلوبه أمنيا" .. و أبلش ..

الوكاد أنها من سنين ماشفناها
يعني علمي بها من أهدعشر سنه أو أحدعشر سنه << كانت بغوانتنامووو << أمزح يا الربــع

عندها بنت كبري سنا" .. لكنها أكبر من أمي حجما" <<< جازورااا ..<<< حاقده عليها ...

و عندها توم أولاد ..<< أعوذ بالله من غضب الله .. يعطون للجنون دروس خصوصيه في الجنون ..

و قال الله و قلنا خير .. و كانوا في ضيافتنا ..
طبعا" بنتها جلستها بغرفتي <<< أغبى تصرف سويته بحياتي ...[

و الولدين عند أمهم في الملحق ..

جونا قبل العيد بيومين ...

أول يوم راح تعارف .. و عشان نستوعب أشكال بعض ..[

ثاني يوم بديت ألاحظ بعض التصرفات الغريبه من هالعائله السعيده ..]

يعني بنت خالتي لما بغت تنام ماشفتها شالت نظاراتها ولا رمت العلك <<< ومو أي علك أعوذ بالله .. ماتآكل ألا سبع علوكات .. !!!

و أخوانها ما تعدوا ثلاث سنين و يقرطعون ثلاث أربع قواطي بايسن ..

الله يستر عليك ياخالتي .. مدري وش بيطلع منك بعد ..

المهم كنا صيام في يوم عرفه ..
و حلفت خالتي .. أنها تسوي الفطور هي و بنتها ... تقول ماتبينا نتكلف و عشان تحس أنها مو غريبه ...

وسوت الفطور ولاهي عودت شر ..[

مدري أول مره .. أشوف الجزر مقلي ..!!

و السمك محشي بمربى فراوله ..!!

و الخيار مقطع مربعات صغير
مع المهلبيه .. !!

لما كنت جالسه ع السفره جاني الإيثار لخواتي ..
أقرب لهم صحوني و أقطع لهم من السمك اللي في صحني و مع هذا كنت مضطره آكل .. لأن خالتي كانت ترمقني بعنونها ...

هو صدق إني أحب آكل بس هذا ما يعني إني مجلى آكل أي شي ...]

و طول ما أحنا ع السفره جالسين نتغصب ع الأكل
كانوا عيالها يلعبون طاق طاقيه .. حولنا ..

ومافي أحد مطمعه يحطون الطاقيه وراه .. إلا سمااا

عاد تعالوا شوفوا كيف الثاني لما يلقاها وش يسوي ..

يآخذها مع بكس على الظهر

أو نص شوشتي تروح بيده ...

و مرات يسوي سواة محمد علي كلاي ..

و أحيانا" يغمرني بوابل من ريقه <<< مؤدبه ماتبي تقول سعابيل .. << أبوووك ..

ياليل البقرات الثلاث .. وش مصيبتكم ... يا ستلاب ..
هو أنا ألقاها ..
منكم أو من أمكم الشيف أسامه ...[

مدري وش صار بس الوكاد إني كليت هواا ... [

] ...جاء الليل و جانا النوم
كانت بنت خالتي تنام في غرفتي

و في نص الليل صحيت على صوت صرااااخها .. و أسمعها تقول أتركوني .. مابغى أموت ..

].. اللي مو قاري المعوذات يقراها ... ترى حتى الجنون عندهم تكنولوجيا .. و يمكن فيه جني فاتح ع المضايف و يشوف سولافتي .. عاد وقتها ماتنفع ياليت ..

ريتاج وشو اللي يمشي وراك .. << بسم الله على قلبك ..نياهاهاهاي يا خواااافه ..[

و أنا أبلع العافيه ..

أحط الغطى على وجهي
و أنزله بشويش ..أوايق ولا أشوى .. المآخوذه نامت ...[

كذا ربع ساعه .. و تصحيني وتقول : سمااا سمااا قومي بسألك سؤال ..<<< يا حلاة المخمس ..

أسألي يابعد روح مغليك <<< خايفه لا يكون بها جنـي

قالت : وش أكثر شي يعجبك فيني ...!!
<< الظاهر جنيها راعي قصيد ...
و مجلات ..

قلت بصراحه كل ما فيك جذاب ... <<< جبت العيد

أبتسمت و صدت ع الجهه الثانيه و ناااامت ..

ثلث ساعه و تصحيني .. قلت الظاهر الجني بيقلبها محاوره ولا قلطه ..

قالت : وصليني لمطبخكم ..

وصلتها .. للمطبخ لكن اللي في الدور الثاني .. جنب غرفة الشغاله ..

و أشوفها تفتح بدروج المطبخ بقوه ..
و طلعت سكين ...

و هي تتوجه يمي .. << يابشر ترى بكرا العيد ..[

حد علمي بروحي وأنا أقولها : لا لا لا لا أنقذني يا حليب السعوديه ...

صحيت وأنا بفراشها ..

وتفاجأت بأن مصنع الشعراوي وأخوانه كله على شعري ،، من
هالمخلوق الفضائي اللي أسمه ... بنت خالتي جازورا /

و جالون كاز و ثلاث علب بف باف عشان أشيل علكها ..

و بالقراده راح ،،

يا حيي يا الشغاله .. صحت على الصوت و أنقذتني ...

و مسكتها و كبت على وجهها كوب ماء ،،

لين صحت بنت خالتي ...[

عاد عرفت .. بعدين من الشغاله .. أن بنت خالتي من النوع اللي يمشي و يسولف و هو نايم ... و ما عندها مشكله لو تذبح بعد ...[

كانت ليله منيله بواحد وأربعين نيله ،،،

قال الله و قلت خير ..
أصبحنا للعيد ،،

راحوا يصلون و مافيه إلا أنا
و حليب السعوديه << شغالتنا الجديده << و العائله السعيده ،،

كشخت و تهندمت و كلش تمام ،،
أرسلت الشغاله تجيب لي طرطعان ثوم من البقاله ..<<<< عشان أحس بالعيد ..[

و غير كذا صعبه أجيب أي طرطعان يحتاج ولاعه
عشان أخاف من أولع يشب راسي .. لأن البف باف سريع الأشتعال ...

طلعت للحوش و ياليتني طحت و أنكسرت قبل ما أطلع ...

ياليتني رشيت بعيوني عطر ..
وماشفتهم ولا لقيتهم ..

ياليتني ذبحت روحي .. بقلم الرصاص اللي مع شبيثان ..

لقيت القرود ،، عيال خالتي ،،

ومن طلعت ..
و هم يركضون وراي بالنافوره ..
و الثاني يولع فحم و يرمي ،،

<< عاد تصدقون كنت أحسبها صعبه أن الواحد يركض و يطامر بنفس الوقت ،،
مثل الحصان ..

لكن من بعد ذاك اليوم لا لا تغيرت هالفكره ..

صرت كني غزال ...<<< هو ترى أنا من الأول غزال ...
و عاد حوشنا ماهو من كبره
و هم يستفردون بي بالزاويه ...

أنادي ياحليب السعوديه يا داناو ياشنينه ... يا قراده ،،،

ماكو أحد ...

و كذا خمس دقايق
و هم يهدون اللعب ،،

ماهو بر و أحسان ... لأن الطرطعان خلص .. [

و أنا أركض أدخل .. للبيت ،،،
و بطلعة أمي ،، من المجلس ،،

تبي تعيد علي ،، << الوالده فيها ضعف نظر ،، أنا متأكده لو كانت مركزه ،، وتشوف كويس كان ،،
أنحااااااشت ...[

طيران لغرفتي ..

و قفت قدام المرايه ..

مدري حسيتني طالعه من مذبحه ... ضيعت وجهي .. مدري ويني ..!!

أو كن عيال عايد مصفقيني ...

أويلي يا عيال خالتي
هالنعلين ...

ليه ماتغيرون سيارتكم هذه ...[

رحمت روحي ...
أستشوار ست ساعات و وقفة أربع ساعات قدام المرايه راحت بظرف عشر دقايق ..!!!

مدري شلون كملت حياتي في ذاك اليوم .. كل البنات كاشخات و أنا بلشانه بلصق الجروح و المسحات الطبيه [

متفشله .. كني بوش يوم أستقبل قبلة الوداع .. أو كني مذيعة العربيه يومها تكرفست على الهواء مباشره ...!!!!!

بدل ما أسمع كل سنه و أنتي طيبه .. صرت أسمع عسى ماشر ...[

ياليتنـي قويه ... أعرف أسطر الوغدان <<< قلبـها رهيف .. و مطمعه ..[

.. ع العموم الحمد لله على سلامتي ... لا تنسون تباركون لعمي أبوعارف ..<<<
على طاري أبو عارف ... أبوطروق وش رايك ببنت خالتي جازورااا ... [

]تحياتي ... وللأمام سـر [

عبدالله الجعيثن

10-01-2009, 12:27

وييييه وامعاليقي

ابوك يالهذره..........كيف اوجعني حنوكي من القرايه

عن اذنك ابروح ....وارجع!!!

حجز............تصريف

ماجد

10-01-2009, 13:27

هههههههههههه
يالقوطي

الحمدلله على سلامت امك

وبعدين ماني خابرن احد يشري ثوم الا وهو شري
لانه سلاح ينفع بكل مكان

موضوع ممتاز

يالقوووووووووووطي < مسكت عليتس

السنعوووسيه

10-01-2009, 13:38

هههههههههههههههههههههههههههه

سمسم <<دلع جديد

عزي لقلبتس احستس عايشه بمعتقل

الحمد الله ع سلامة الوالده اولا

والحمد الله الي فكتس من الغورلا هع هع هع

ويعطيتس العافيه ع الموضوع الفلاوي

كل الشكر

عاطر ودي
*

أحمد

10-01-2009, 15:17

الله يجزاس خير والله انا طلعت من الدوام الساعة 12وربع قلت امر المضايف قبل النومة خابر المتكي دابغاتوه عبدات اول العمر ابشوف وش صار الاوالله هالموضوع الجديد قمت اقراء

واقراء

واتمرمح

وارجع واقراء لين اذن العصر

قلت : ادعيلتس احسن لاني لو نمت يمكن ماأصلي مع الجماعة ........

بس والله اني استمتعت يالقو....... خخخخخخخخخخخخخخخخخخ

ولي نكسة على قولة صديقي المتكي لان السمك بالمربى ماينخلى ,,,,,,,,,

ريتاج

10-01-2009, 15:39

هههههههههههههههههههههههههههههههههههههه...

يااحلااتس ههههههه وينتس منذو مبطي عنتس يالقااطعه..<< مااتفهم خااتمن على جبهته هندي
الحمدلله على سلاامه امتس.. ماااتشووف شر الله يخليه لك ياارب..

يع
ني الواحد لازم يصير ملعون و حقود و ستذوب و ملسون عشان يصير أوكـيه و يواكـب عصر التحرحر الفكري ...

سمسوومه مااودي اخرربتس بس ماالتس الى العواابه هذا اللي يمشي بهالزمن لا جاا احد يحااتسييتس ابد بالصاابر ههههههههههه

.. و ماني معلتمكم بأسمها << أخاف أنها مطلوبه أمنيا" .. و أبلش ..

ههههههههههههههههههه منييره مطلووبه عند المبااحث<< اسمووكه تقووله

أرسلت الشغاله تجيب لي طرطعان ثوم من البقاله ..<<<< عشان أحس بالعيد ..[

اووييح قلبي عقب صدااام .. طرطعاان ثووم عشقي الازلي المتزلي هههههه

ياليتنـي قويه ... أعرف أسطر الوغدان <<< قلبـها رهيف .. و مطمعه ..[

وييييييييييييييييييييي لو انا منتس كاان عااجنتهم عجن ابد شيلي هذا على هذا وضرب وضررب ياااتفلتيينهم الا وانتي مبررده تسبد كل ابلااتس بهم

ههههههههه

مشكووره سمسووومه عالمووضووع الجوناان

صرتي من ربع يوسف هههههههههيااطوووله طولااااه
طااحت لهااتي وانا اقرى

شييييييييييييييييع

*

شنقل

10-01-2009, 22:00

اقرب مشرف يثبته

عبدالله الجعيثن

10-01-2009, 22:02

وش يثبت؟

الموضوع ولا القوطي

ريال الفسحه

10-01-2009, 22:32

اما قوطي يتصل بك خخخخخخخخخخخخخخ

عرفت لتس ياقوطي :)

اقول

قسم بالله انتس منسمه

شنقل

10-01-2009, 23:38

وش يثبت؟

الموضوع ولا القوطي

لا القوطي:)

εïз خزامى εïз

10-01-2009, 23:55

8
8
ههههههههههههههههههههههههههههههه
ههههههههههههههههههه
لا تشيلين هم
كل عآآم وانتي بخير هاااآآه:(
كسرتي خآآطري
ياليييل ابو طويله
سالوفه تقطر شيره
لآآآ فينش يو

أحمد

11-01-2009, 00:07

انا ابي انصحتس نصيحة اذا بغو يجونكم مره ثانية شلة السفاحين هذولا مالك الا تسرقين سيارة احد اخوانتس وتقطعين الاشارات قدام الدورية والله توقيف الناصرية أرحملتس خخخخخخخخخخخخخ

فتى البيداء

11-01-2009, 00:42

سماا الأبداع .. مبطين عن مثل هالمواضيع .. الحقيقة طلعن من جو غزة ..

أنا مع شنقل الموضوع المفروض ( يثبت ) مايخليه يوسفيه .. يقراه ويثبته ..

حيل حليل

11-01-2009, 03:55

ومازالت المطالب الشعبيه بالتثبيت
تتناثر في هذا المتصفح
ونأمل من اخونا متكي الاستجابه لطلب الجماهير
في هذا اليوم المبارك لعل الله ينفع به هذه الامه
وينسيهم مايحل بهم

مراسلكم من شواطئ القوقاز
حيل حليل

<<< ياحبه للشطحات

عبدالله الجعيثن

11-01-2009, 13:58

ببببببط........كنايه عن قم بس قم

وش يثبت.....

انا اشوف الموضوع عادي ومايستاهل التثبيت

ابناحي بس.......يعني اخالف العالم بس

يـــوسف

11-01-2009, 19:54

ارسوووووووووووووووو على بر اثبت القوطي ولا الموضوع :)

أختي سما الحمدلله على سلامة الوالدهـ أول شي وماتشوف شر وخير من أخترتي ابو عارف :)

بس اهم شي بوه شاص وردي علشان يتهيض ابو عارف :)

بعدين انتي الحين ياأم الخـــلاقين <_ عصب

شلون تسمحين لأحد يخزن اسمتس بجواله يالقوطي والله لو أنه امتس ماعلي :)
حنا بعام 2009 صار الواحد له حق يشتكي حقوق الأنســان تريهم فتحو أشتكي وخذي لك 4 مليون وأنتهينا

ولا تدرين اشتري لتس مزرعه وبسطي به انتي وهالمنسمات اللي فوق [ ريتاج شيع والسنعوسية ]

<_ لازال يتجاهل المطالبه الشعبية بالتثبيت :(

يالربع خلوني انبسط رجال بإجـــازهـ أنا وأبي أروح للهند :)

شنقل

11-01-2009, 21:57

^
^
^
ايه واضح اجازه واجازه مفتوحه بعد

خوش اجازه يوم وصل مخطط71

قالوا له انكس
ههههه
ههههههههه
هههههههههههههههههه

اجازة خطوط
هههههه

روح حايل

12-01-2009, 00:01

ماشاء الله ماااااااااااااشاء الله

سالفتس سما والله عن 3 مواضيع تبارك الله

<< تدهن رقبته بفكس :)

ازين شي هذيك البريئه اللي تسألتس وش رايتس فيني هههههههههههههههههههههههههههههه

حركات مراهقه

ولا تهون سالفة / القوطي :) /
ههههههههههههههههههههههه

سوالف مجنونه

:solh:

سمااا

12-01-2009, 08:16

عبدالله الجعيثن ..

ذكرتني بالشاعره الكبيره ..

سهام العدوان ..

ست طعش ألف قصيده

لا عاد حمد السعيد يقول : مدري أقيمج على أي قصيده الأولى ولا الثانيه ولا الثالثه ...

و أنا بعد .. مدري أرد على أي رد ..

حضور من طراز آخر ... عوافي ..

رغم إنك فشلتني جامد أوي ..

عبدالله الجعيثن

12-01-2009, 08:21

يلعن ابو هيك.........!!

ثبتوا موضوعه وفوطيّه لا هالحين اتمردغ ببطن ابوخلوف

اشي ابوخلوف......ورن صابرك.....ايا صوابر الغالين انت

سمااا

12-01-2009, 08:29

الأخ الموحترام <<< ياعمار أولى أبتدائي

الكابتن ماجد ...

أسألك بالله تخيل معي إنك في غرفتك و تبي تطلع مشوار و أنت محتار كيف تعرف أن فيه هواء برى بدون ما تفتح الشباك ؟؟؟

هاه ستيف << أسلوب حماسي

إلا من صوت القواطي لما يمشون بالشارع <<< جواب ولا أروع << على بالها ذكيه ...

حضور كوكبي <<< تبي تطلع كلمه
جديده ...

سمااا

12-01-2009, 08:38

السنعوسيه ...

وش هالحتسي الله يهديك وشو معتقل <<< بلعت العافيه

هو الصراحه مو معتقل .. يشبه المعتقل .. بس ما نلبس برتقاني ..

بعد راسي والله ...

سمااا

12-01-2009, 08:48

‏^‏
‏^‏
‏^‏
يوسف شف عبدالله الجعيثن ..

‏<‏<< ماتبي موضوعها يقفل

الجثري ... يامال الجنة والله ..

أهم شي بالحياة الضحتس و التمرمح ..

عادي يا وخيي قلها : قوووقل ..<< هاهاهاي ماتبي تتفشل ...

سمااا

12-01-2009, 09:07

بؤبؤتي والله ..

يا ريتاج الحلا ..

قسم إني أحسني مدغدغه لما أشوف مرورتس

ذاك اليوم أسولف لصديقاتي .. عن عطر دي سي إل ..

تسدحوا ضحك ..

عوديها .. يا بعد جديها <<< لزوم السجع

سمااا

12-01-2009, 10:41

شنقل ... حياك الله ..[

الله يثبتك و يجملك ..

و يخلي لك عيده ..

‏<‏<< أنا مو قوطي أنا برمطان مدري برطمان أو ثلاث براطم .. مدري وشو بس الوكاد إنه شي أكبر من القوطي ..

تحياتي يا بطل ..

سمااا

12-01-2009, 10:54

كبيرنا و زعيمنا ريالوش

يابرحبا والله ...

أسمع بقولك شي بس لاحد يدري ..

بعدي أذنتس يا خزامى ..

أنا بصراحه توهقت ..

أضحك على وحده تسولف تقول :

والله إني أفرح لما أشوف شاشة جوالي
مكتوب عليها ...

] مكالمه لم يرد عليها أحد [

عاد أنا قمت أضحك ... من وين جابت كلمة ]أحد[ ...

عاد ربك بلاني ... أقول القوطي يتصل بك ... و أنا مدري .. من وين جبت ..

] بك [ ...

لا تعلم أحد ..

تحياتي يا قدع ..

ندووو

12-01-2009, 18:06

ههههههههههههههههههههههههههههه

بجد سالفه تموت من الضحك

بس هذا كله صايرن بالحلم

تنامي وتحلمي بغيرهااااااااااااااااااااااااا

ابو عارف

12-01-2009, 22:25

الحمد لله على السلامة ياسماء
شكراً على تذكر العم ابو عارف وعلى العرض الطيب المغري الزواج من الوالده الله يخليها لك.

ما أخفيك أنا وأعوذ بالله من كلمة أنا متزوج متزوج بعد التقاعد العام الجاي 2010 الله يلحق على خير ولكن صاحبت الحظ الطيب لها مواصفات خاصه.

لازم مايكون لها إخت مثل خالتك وإن صار لها أخت مايكون عندها ولدين توأم أشرار وبنت تمشي وهي نائمة.

ولابد أن تكون تشوف زين وعندها مبادي تمريض وخبيرة مرقوق.

ولابد أن تكون لياقتها تمام يعني تستطيع أن تحمل 74 كيلو مع الدرج طلوع ونزول .

وكل البنات يتمنن ابو عارف إينعم.

شكراً لك مرة ثانية لاهنتي

حمـود

12-01-2009, 23:30

هههههههههههه

من طول الغيبات جاب المضايب

هههههههههههههههههههههه

هالخاله مشكله

سماا

ابداع اتمنى منه الاستمرار

وما تشوف شر والدتك

سمااا

13-01-2009, 09:29

خزامى .. << ياحلو لقبك ..
و أنتي سالمه ..

يسلمو ع هالعبور الحلو .. و يا جعلها هالضحكه دوم وكل يوم ..كوني بيخير ..
يا غناتي ..

سمااا

13-01-2009, 09:39

فتى البيداء ... حياك الله أخوي
الناصح ..

يا خوي مشاكل الأمه ما تقضي .. لكن أحنا نتبع سياسة : ساعه و ساعه ..

شرف لي هالتعقيب ..

&^^مهــــا^^&

13-01-2009, 17:16

الحمدالله على سلامت الوالده وان شاءالله ماتشوف شر

قلبي عليتس من الشيف وعياله :)

وجازورا هذي قنبله الموسم ههههههههههههههههههههههههههههههه

والله كل سالفه احلى من الثانيه

ربي يسلم قلبتس على الموضوع الفلاوووي

ومشكوووووووووره

غالب

15-01-2009, 16:46

أول شي ياهلا بتس والحمدلله على سلامة الوالده

معقوله إنتي قوطي
كنت أحسبتس شيطانيه :)

واستلمي سلامي

أبوطروق

17-01-2009, 02:21

هههههههههههههه والله اشتقنا لسولافاتس (يالقوطي)

وسوت الفطور ولاهي عودت شر ..[

مدري أول مره .. أشوف الجزر مقلي ..!!

و السمك محشي بمربى فراوله ..!!

و الخيار مقطع مربعات صغير
مع المهلبيه .. !!

أما هذي رهيبة

وش هالذوق الحلو

أبوطروق وش رايك ببنت خالتي جازورااا ... [

سكنهم مساكنهم

تبيعينه على خرابه

""""""""""""""""""

خطيره شمر

17-01-2009, 03:28

الله يعينج هههههههههههههههههههههههه

عجايب بنت الشايب

17-01-2009, 03:29

لبا العرب اللي كاتبين موضوع

:)

امتعتيني بجد

كان وفرتي وكتبتي سالفة بنت خالك بغرفتك بموضوع

والحوش بموضوع

والاكل بموضوع

لبا العررررب بتتاع كولوا

:)

لاتقاطعين يااابعدي

سمااا

17-01-2009, 08:23

حيل حليل << إيه هين

تشرفنا بمرورك ...

تحياتي يا قدع ..[

سمااا

18-01-2009, 09:50

القبطان : جوزيف ..

حياك الله ،

وش رايك بي و أنا أقلدك ..

أسوي سولافتي طويله ..

شرفتني والله [

سمااا

18-01-2009, 09:57

روح حايل ..

أهم شي إنك ذكرتي الله ..

نصيحه .. لا تكثري من أستخدام الفكس .. تراه يجيب السهر ..

لكي تحياتي .. يا حلوه

سمااا

18-01-2009, 10:01

ندووو ...

هلا و كرتون حلا ..

أشكرتس بعنف لأنك هونا ..

كرريها ..

سمااا

18-01-2009, 10:11

عمي أبو عارف ..

لا لا أنت فهمتني غلط .. ماما مافيها ضعف نظر .. أنا كنت لابسه قناع عشان كذا ما شافتني ..

و خالتو .. ماعليك مكافحة الإرهاب ماراح يخلونها ..

و هالتوأم بيكبرون .. و يعقلون ،

و جازورا أبوطروق .. بيسوي الواجب و يخلصك منها ..

و بعدين ليش تحتري ألفين وعشره ..

خير البر عاجله ..

سناعيسو أها أزهم المأذون ...

تحياتي .. يا عمن ..

سمااا

18-01-2009, 10:15

ضحكه مزمجره ، حضور مترف و مزركش ، و تعقيب مشرف

أكيد الناصر حمود بذاتا ..

يسلمك ربي ..

حمـود

18-01-2009, 10:45

ايوه
حمود هنا
دحينا انا راد عليتس وبس هذا مدحتس لي
الله يهديتس بس
هههههههههه
يا القوطي

سمااا

18-01-2009, 13:00

مهاوي ..

هلابك أيتها المفيده ..

يسلم غاليتس يا ستبدي ..

قسم بالله إني أستانست ليا شفت ردك ..

قبلاتي ..

سمااا

18-01-2009, 13:04

سناعيسو ..

بالمهلي ..

أنا مو شيطانه ولا قوطي

أنا خضيرا ..

شكلك نسيت أسمي ..

أستلم تحياتي

سمااا

18-01-2009, 13:12

أبا طرقرق ..

مبروك ياعريس ..

باركولوه باركولو ..

صب القهوه يا أبوخلوف

سناعيسو رح ولع الطرطعان

شبيثان سخن الطيران

جوزيف قرب البخور للعريس

ريتاج زغردي ..

منك المال و منها العيال "

تحياتي : يا : كبير

سمااا

18-01-2009, 13:15

خطيره .. هلا والله ..

يا علها دوم هالدهكه الهلوه هادي << جالسه جنب تكرونيه ..."

أحتراماتي

سمااا

18-01-2009, 13:20

عجايب ..

كلي بتس إعجاب

تعرفين متحمسه و مبطي عنكم و مشتاقه لكم ... عشان كذا كنت أسولف
لا شعوري ..

ما أنتبهت إلا الكي بورد .. تفكك ..

ولا ترى ماودي أخلص..

تشرفت بتس ..

شامان

19-01-2009, 13:38

سماااا

الله يعطيك العافية على الموضوع اللي ما قريت الا اوله سالفة القوطي

الله يكافينا شر الاسماء هذي الظاهر بتأكد من تلفونات الاهل والاصدقاء من الحين

لكن المهم موضوعك ما سويتي له ريجيم واذا ممكن تعلميني وين احصل تلخيص للموضوع

ترى صراحه لياقتي مو مثل اول في قرائة المواضيع وهذا والله من ضغط العمل ومن امتحانات

الاولاد ... وتقبلي فائض شخابيطي باحترام وتقدير :) <-- يا ولد يا اسلوب

سمااا

20-01-2009, 08:59

أهلن وسهلن ..

بشخابيطك ..

الله يوفق الأولاد و ينجحهم و ينجحنا
كل أبونا ..

قال تبي ملخص هاه ..

فشلتني ..

فشلتموني ..

عادي عادي ..

هيك الدنيا ..

أحترامي لك :