الملف الأخضر .. [الأرشيف]

أهداااب

12-10-2008, 19:15

مسيكم بالخير يا ربع الفله

كيفكم بعد العيد أن شا الله مستانسين << على طاري هالكلمة البارح

شفت واحد كاتبها على سيارته من ورى :)

وكيف أول يوم دراسي

والله مثل ما قال عبدالله الروشيد ( مافي أحد مرتاح ) يعني لا أهل الدراسة

و لا الموظفين

ولا حتى العاطلين أمثالي ..

أيام العيد و الجمعات قالت لي زوجة أخوي : هدوبة في تقديم بدل استثناء أخواتي قدمن فيه

ألحقي عليه لا يروح عليك ..

انا طبعاً طنشت طموحي أكبر من التدريس << ياشيخة روحي بلا هياط فاضي

ويوم الجمعة باليل قمت الساعة 12 << الناس تنام وانا أصحى :)

فتحت الجوال و تجي رسايل موجود كان من ضمنها رقم زوجة أخوي عرفت أن عندها شي :puzzled:

أتجهت من غرفتي عقب ما صليت الصلوات اللي راحت علي إلى المطبخ بحثاً

عن طعام مروراً بالصالة << يمديكم على الفصحى :7ayyoh:

وأذا فيها أخوي فاتح لاب توبة و يكتب

وبجنبة أمي فاتحه ملف أخضر وتخرم بذي الأوراق

قلت في نفسي : خير وش عندها أم تركي و ولدها بتالي هاليل

وأول ما شفتني وهي تصوت علي تعالي تعالي جاااااي

قالت : أسمعي بكره أن شا الله تأخذي هالملف الأخضر وبوجهك على

مكتب التوجيه و الأشراف في وظائف بدل استثناء و أخوك دبر لك واسطة

وانا أقاطعها : يا ميمتي أنت عارفه أني صاحبة مبدأ لا للواسطة دام

نسبتي حلوووه و تخصصي مطلوب ليه الواسطة

وهي تأصص لي وتقول : بلا مبادء بلا هياط فاضي .. حنا أرخينا لك الحبل

سنة كاملة من تخرجتي

وانت على كيفك .. بلا ما كبر علباك الا النوم و الجلسة على هالمروح -

المروح هو كناية عن النت ياهي تكره كره -:)

مدري ليه تبيني أتوظف وانا فكتها من قومة الصبح والفطور و الغدا :za3lan:

وهذا أخوي يخلص معروضة و يقول : بكره وجهك على حصة القعير -

أسم غني عن التعريف التعليم كله بيدها -

وتقولي لها انا من طرف خالد عبدالرحمن - خالد مدير اخوي بالمدرسة

اللي يدرس فيها و أخو حصة من الرضاعة - << ياخال أبوي حك ظهري ههههههه

وانا اقاطعه : لا و عيباه كيف أقوله انا من طرف أخوك أستحي وش تقول عني :d:

وهو يعصب علي و ينافخ : أنت قولي لها اللي أقولك عليه و هي تفهم الطبخة

ماني متعوده على حركات دهن السير ولا لي فيها :wallah_hoo:

عطاني المعروض وقريت فيه جملة عرفت أن أخوي فعلاً أستاذ في فن

المعاريض كاتب ( حتى استفيد و أفيد وطني و أكون عضوه ساهمت في بناء مجتمعي الغالي )

أمحق مجتمع اللي بينبني على ايدين اهداااب ههههههههه

والصبح وانا أكشخ على أخر شيييي

تحزمت بهالجنز .. وميك أب .. و سويت شعري كدش .. و أكب علبة العطر نصها علي

لا وحاطه نظارات شمسيه مسوية فيها أحضرية ما تحمل الشمس ههههه

و أختي تشوفني وهي تقول : يا بنت ياخوفي يشوفك يكحتوك مع الباب

هذا شكل وحده تبي وظيفه

طنشت كلامها

و انزل الصالة و لا هذي أم تركي جالسه ومطرفة عباتها و شنطتها وجوالها

على بالي رايحه المستوصف وتحتري زوجة أخوي تنزل يروحن سوى ..

قلت : يا ميمتي روحي معنا انا و ابوي بدل ما تمشي بهالشموس << مسويه فيها باره بالوالدين :)

قالت : من قالك أني رايحه المستوصف

انا معك ربي يسلمك :a:

وليه معي ماهي اول مره اروح اقدم ولا انا صغيرة

قالت : بروح اسلم على حصه و اعايدها وانشد عنها و عن اختها >>

الحين يعني طرت عليك حصه و اختها :)

انا عنيدة وهي اعند مني ..

ونروح مع فاذر .. ولايوم الزحمه أمة محمد ..

الدوائر الحكومية عندنا كلها بشارع واحد وهو ينزلنا بأول الشارع

يقول : يلا طقنها كعابي و الله ماني داخل بذي الزحمه ويطقون سيارتي

شاري سيارة جديدة وخايف عليها :)

وحنا ننزل ..

و أول باب قابلنا وشفنا عنده زحمه حريم وحنا ندخله

ولا كله عجايز و لا وعبند بعد و انا قلبي يقرقع :a:

كأني داخله عند حدى هالقراين .. حسيت ان في شي غلط .. و أسحب امي

ونطلع أقرا اللوحة

مكتوب عليها ( الضمان الأجتماعي ) :)

ونروح ندور على مكتب الأشراف ونحوس .. ونحوس

نسأل شويب نازل من سيارته وين مكتب الاشراف قال: بالشارع الثاني ونروح له ..

لما دخلنا قلت : يمه خلينا نسأل الموظفات أذا فيه تقديم هنا أو لا

قالت : انت تمشي معي وانت ساكته >> تيب أمرك :)

ونطلع لمكتب حصه ونلاقي وحده عند الباب

قلنا لها نبي نشوف حصه و نسلم عليها بس

قالت : ممنوع ممنوع يا أختي حصه عندها اجتماع ورافضه تقابل احد

وامي تنفخ عليها : انت قولي لها بس ام تركي عند الباب .. حنا بس نبي نسلم

>> الله اكبر يمه الحين طرت عليك حصه وتبي تسلم مو لله عشان بنيتها :)

وعيت بنت اللذينا

وحنا ننزل تحت ونسأل الموظفات فيه تقديم بدل استثناء .. ؟!

قالت : والله يا اختي مو عندنا روحي لديوان

ما صدقتها و سألت ثانية و قالت : نفس الكلام

وحنا نتصل على شويبنا يأخذنا و يرد علينا بقولة :انا ماني داخل وسط

هالزحمه تعالن انا في نفس مكاني الأول

ويوم ركبنا والله انه رايق حاط سميرة توفيق ( وقوم درج لي و أمش قدامي )

يا حب الشيبان لأم غمزه :)

وامي تسوالف له قالت : أول غلطنا دخلنا الضمان الاجتماعي ولا كله

عجز ويرد عليها : ليه أنت وش انت

هههههههه >> الشعب السعودي ما يعرف يدلع

وصلنا الديوان ..

خلووو مابه احد الا موظفه وحده قلت لها : انا ابي اقدم بدل استثناء

قالت : والله يا اختي مو عندنا في مكتب التوجيه

وانا اعصببببببب

لا شعورياً تخصرت لها وقلت : يا ســـــــــــــلم

انا توي جايه من التوجيه يقالوا روحي الديوان تلعبوا علينا انتم ..؟!

قالت : هذاك العام عندنا السنة هذي عند التوجيه روحي لهم

هنا تذكرت أغنية حكيم ( نجي هنا يئلولنا هناك نجي هناك يئلولنا هنا على

الحال بألنا سنه ... لاهنا هوه هنا هوه ) :7ayyoh:

ونرجع السيارة .. ونعم شويبنا باللي صار قال : والله الحين الظهر اظهر

و لاعندي وقت أرجعكم

العمال في العماره يبون طلبات ويحتروني

وحنا راجعين و انا اناظر بهالملف الأخضر و أتنهد بحسره و أقول :

( والله ودنيا .. عقب هالتعب و السهر أخرتها ملف أخضر ما يسوى خمس ريال و أتمرمط فيه من مكان لمكان )

ما خلصت التنهيده و حنا واقفين عند الاشاره الا هذي سيارة فيها اربع

شباب نازلين عند حدى هالدوائر الحكومية اثنين منهم معهم ملفات خضرا

هههههههههههه

الحمد لله أثاري موبس انا أعاني مع هالملف الأخضر

وبكره لي رجعه عند مكتب الأشراف و التوجيه .........

تهقون تنفع الواسطة هالمره و لا أتوسد هالملف و اناااااام :)

غالب

12-10-2008, 19:31

أنا أفضل لو تتوسدينه وتنامين أحسن لتس
بس شلون تقولين تلبسين جنز؟؟؟
جلي ماإنتي تلبسين عباة
وألا إنت من هالمروحات اللي لابساتن عبات وهن تقل مالبسن شي

مراسلكم من حائل

12-10-2008, 19:34

مساء الملف الاخضر
بصراحه أعجبتني سالفتك وذكرتني بسالفه كل ماتذكرتها قلت الله يلعن أم الواسطه للي انا أعرفه ...
اولا أقولك الملف لاخضر صدقيني لايخلوا منه بيت سعودي إذا ما شفنا الملف الاخضر نحسن إننا ما درسنا ولاتعبنا ...الله لايحرمنا منه
ثانيا ...السالفه ووما فيها مرره لله لايعيد الشر توسطت لوحده وجبته عندنا بالمدرسه بشغله بسيطه تنتفعه منها وتكل لقمة عيش المهم ...
قلتله بكرا تعالي لي بالمدرسه الصبح وألبسي لبس رسمى ...يعني مافيه بهرجه ..
وجت وياليته ماجت دخلت على بالمكتب وحسيت إني بعرس مو بمدرسه لابسه كل دولابه ..(يعني لغير الناطقين بالغه الحائليه كل كبته )من زود الكشخه وتعالى للمكياج حاطه مكياج عرس ..لا مكياج عارضات الازياء صايره تقل مهرج ...
والله إنه دارت بيى الدنيا أكالحظه وشلون أواجه زميلاتي وقوله إنه تقرب لي ...
ودي اني أغسله بصابون ..وقعدت تمشي بالمدرسه وتقول إنه تقرب لي ...مت من الفشيله
وحلفت بعده إني ماتوسط لحد ...توبه ...
وأبدعتِ فأمتعتِ

أهداااب

12-10-2008, 19:34

سناعيسو

في شي اسمه عباة اسلامية مقفله من قدام

ولا انت ما عندك خوات .. ؟!

أحسنوا الظن يانااااااااااس

هلا حياك سناعيسو

ماجد

12-10-2008, 19:40

والله اني أنغثيت من هالسالفه
يعني الواحد لازم واسطه علشان يعيش بهدنيا

أقول خلي امتس تنشب لحصه ماله الا كذا دام التعليم كلوه بيده

وبتوفيق ,,,

أهداااب

12-10-2008, 19:45

مساء الملف الاخضر
بصراحه أعجبتني سالفتك وذكرتني بسالفه كل ماتذكرتها قلت الله يلعن أم الواسطه للي انا أعرفه ...
اولا أقولك الملف لاخضر صدقيني لايخلوا منه بيت سعودي إذا ما شفنا الملف الاخضر نحسن إننا ما درسنا ولاتعبنا ...الله لايحرمنا منه
ثانيا ...السالفه ووما فيها مرره لله لايعيد الشر توسطت لوحده وجبته عندنا بالمدرسه بشغله بسيطه تنتفعه منها وتكل لقمة عيش المهم ...
قلتله بكرا تعالي لي بالمدرسه الصبح وألبسي لبس رسمى ...يعني مافيه بهرجه ..
وجت وياليته ماجت دخلت على بالمكتب وحسيت إني بعرس مو بمدرسه لابسه كل دولابه ..(يعني لغير الناطقين بالغه الحائليه كل كبته )من زود الكشخه وتعالى للمكياج حاطه مكياج عرس ..لا مكياج عارضات الازياء صايره تقل مهرج ...
والله إنه دارت بيى الدنيا أكالحظه وشلون أوجه زميلاتي وقوله إنه تقرب لي ...
ودي اني أغسله بصابون ..وقعدت تمشي بالمدرسه وتقول إنه تقرب لي ...مت من الفشيله
وحلفت بعده إني ماتوسط لحد ...توبه ...
وأبدعتِ فأمتعتِ

هلا أختي :7ayyoh:

والله أول مفكره أنك عضو مو عضوه من المعرف :)

وأذا على الكشخه والله من الفضاوه يا خيه

لا أنا تبي الصراحة كل هالتكشخ ما شلت البريقع عن وجهي

حياك

و أسعدتني زيارتك ... rooose2

&^^مهــــا^^&

12-10-2008, 19:45

سالفت الملف الاخضر والله انها تضيق الصدر اهيء اهيء

ترراهم نصابين يلعبون فيك مره هنا ومره هناك <<لعبوا بي

يااااااااااااااااااااااااااااااااااااااا ااااارب توظف كل اللي ماتوظفوا <<وانا منهم

ماتهنيت ياربي بنجاحي

ويعافيك ربي على سالفتك

وان شاءالله يارب تنفع معك الواسطه ووتوظفين وتتوسطين لي <<خخخخخخخخخ

والله يوفقك يارب

تقبلي ودي,,

ريال الفسحه

12-10-2008, 19:46

سناعيس طلع يفهم :)

بعدين ياسناعيس فيه بنطلو ن جنز
وفيه تنورة جنز احسن الظن :)

هديبا

طيعيني خلي الوظايف والهم الواحد
يموت وهو ماشبع نوم :)

أهداااب

12-10-2008, 19:49

والله اني أنغثيت من هالسالفه
يعني الواحد لازم واسطه علشان يعيش بهدنيا

أقول خلي امتس تنشب لحصه ماله الا كذا دام التعليم كلوه بيده

وبتوفيق ,,,

الله لا يجيب المغثه لأحد

الواسطة الحين هي كل شي

ولا توصي حريص أمي أحرص مني على مصلحتي

حياك حسب علمي

أسعدتني زيارتك ..rooose2

أهداااب

12-10-2008, 19:55

سالفت الملف الاخضر والله انها تضيق الصدر اهيء اهيء

ترراهم نصابين يلعبون فيك مره هنا ومره هناك <<لعبوا بي

يااااااااااااااااااااااااااااااااااااااا ااااارب توظف كل اللي ماتوظفوا <<وانا منهم

ماتهنيت ياربي بنجاحي

ويعافيك ربي على سالفتك

وان شاءالله يارب تنفع معك الواسطه ووتوظفين وتتوسطين لي <<خخخخخخخخخ

والله يوفقك يارب

تقبلي ودي,,

شكلهم كذا يلعبون فينا

مها الله يوفقك و يوفقنا جميع

وأذا نفعت الواسطة بتوسط لك ولو كم مها عندنا :d:

حياك

و أسعدتني زيارتك ... roooose

أهداااب

12-10-2008, 19:58

سناعيس طلع يفهم :)

مو أفهم منك :)

بعدين ياسناعيس فيه بنطلو ن جنز
وفيه تنورة جنز احسن الظن :)

لا هو بنطلون مو تنورة عندك شي :)

هديبا

طيعيني خلي الوظايف والهم الواحد
يموت وهو ماشبع نوم :)

في هذي طلعت أفهم مني ومن سناعيسو

حياك خيووو ريال من ملفاك لملقاك

صعوة فسفورية

12-10-2008, 20:29

اهداب سالفة تحرق القلب بالرغم انها بصيغة ساخرة.. اااه لاتقولين واقولك ع التقديم

وربي مالك غير الواسطة.. هذا هو اللي ماشي بها الزمن الاغبر..

ومشكورة

ابو خلوف

12-10-2008, 22:25

هي هي الواسطه لازم لازم

وهنا الفله علاج لكل القضايا الاجتماعيه

احسنتي هديبا

حمـود

12-10-2008, 23:04

هههههههههههه

مشكله الملف الاخضر

بس تصدقين اني اغليه

عندي بسيارة خمس ملفات مدري ليه

اما الواسطه فحدث ولا حرج مشكله

فنصيحتي لكِ يا اهداب

اذا امك قويه شخصيه

خليه تسنتر عند حصه

ابدعتي فامتعتي

دمتي بخير

بنت الجبل آخت القصيد

12-10-2008, 23:59

هدباء ياهديبا...
ياعل ربي يوظفك ويوظفني ..

اقعدي بحلق حصه طيعيني الواسطه ماتجي الا مره وحده ..

لاتصيرين مثل وحده اعرفه اول ماتخرجت قال له واحد من قرايبه اعرف واحد يوظف بس ياخذ منك 20 الف ..

وقالت لاااااااااااااا والف لا عمري ماتوظفت حراااااااام هذي اسمه رشووووه

ومرت السنين ومرت السنين ... واحتاجت هالبنت وقالت لقريبه وين ابو الـ 20 الف ابتوظف واعطيه الشكوى لله

قعد يضحك عليه الظاهر فنقشوه من مكانه <<<يستاهل

بنت الجبل آخت القصيد

13-10-2008, 00:01

شكل بكرى كل بنات المضايف عند حصه ويقلن حنا من طرف خالد

خخخخخخخ

ريتاج

13-10-2008, 01:24

تهقون تنفع الواسطة هالمره و لا أتوسد هالملف و اناااااام

اقووول نااامي احسن لك...ههههههههه

اما امك بتعاايده ههههههههههههه تووه تذكر المره ههههههه

يااملي هالخشه تبيين تووضفيين يااعمري الله يععيين بس

انا اعرف لي وحده 3 سنيين والى الان ماتوضفه
الله يرزقه الوضييفه...

يااااااااااارب تووضفيين بس بشرط اول رااتب لتس لي نصه << ماخلليت احد مااقلتله

شيـــــــــــــــع

شنقل

13-10-2008, 01:26

وبكره لي رجعه عند مكتب الأشراف و التوجيه

من امس وانا مقاااابل مكتب الاشراف

الا ماتعرفين احد بادارة التعليم بالدمام

تهقين يوافقون على اجازة سنه رعاية مولود

مابيلهم راتب انا اعطيهم راتب

<<< قعده به عنده دوره سنه

ريال الفسحه

13-10-2008, 05:11

ليه انت والد؟ :)

مبروك ماجاتس :)

ريال الفسحه

13-10-2008, 06:34

لا هو بنطلون مو تنورة عندك شي :)

ايه عندي

ماستحيتي وانتي تقولين لابسه بنطلون ؟

مابقي الا هذي

استحي وعيب والله الرجل وهو رجل لامنه لبس جنز
بغير ضروره انه مايتفاخر به ولايحتسي به شلون بنت
وبموقع انترنت كاشخه وتقول لابسه بنطلون جنز ومن زود
الحيا تقول وش عندك ؟

هذا غير المكياج

استحي واحشمي عمرتس

الشبث

13-10-2008, 09:10

اي علي ما علي انك جبل

وانت على كيفك .. بلا ما كبر علباك الا النوم و الجلسة على هالمروح -

المروح هو كناية عن النت ياهي تكره كره -:)

الحين حنا مروحين ته ته ته ته

عقلي الوالده خخخخخخخخخخ

لاهنتي

سالفه تحكي الواقع المرير

وتبين نصيحتي

ناااااامي وخليهم يولون

لا ديوان ينفع

ولا توجيه يفيد

كذااااااااااااااابين ونصابين

لاهنتي

وتقلدي تحيتي

يـــوسف

13-10-2008, 09:57

يعني الحين ليش ماتبي تقتنعون أن الواحد لازم يمشي بواسطه :)

سعوديين ماعليكم شرهه <_ تكفى يالإيراني :)

أقول هديبا أول شي الله يوفقتس وينزل تعيينك بقرية :)

الحين انتي ليش متضايقه من أم تركي خليها تفزع لك والله مالها إلا كذا تبينه تشوف بنته تنقع شهادته قدامه هههههههههههههههههههههههههههههههههههههه

وأنتي بعد معنده إلا تتعينين بدون واسطة والله ماهقوتي :)

أجل صرتن سردادي مردادي بين الضمان والتوجيه :)

بالتوفيق ياأهداب ...

توسدي إحترامي

أبوطروق

13-10-2008, 21:52

بالتوفيق ياهديبا وانشبي لحصيصة يما توظفين وبعدين خليتس قليلة خاتمة واسحبي عليه

لو انتس عندنا كان وظفتس مديرة وبدون واسطة

شكراً هديبا والله يفكتس من البطالة وتسيرين عضو فعال (مستفيد) ومفيد في الوطن العربي خخخخخخخ

"""""""

شامان

13-10-2008, 22:57

وبجنبة أمي فاتحه ملف أخضر وتخرم بذي الأوراق

انا قلت الظاهر توزيع ارباح الأسهم

في وظائف بدل استثناء و أخوك دبر لك واسطة

أنا قلت خربتها البنت الظاهر ما في أحد يقبلها إلا الجيش

حصة القعير -

سجلت هذا الاسم بحرف ( ح ) حق الواسطات

أسم غني عن التعريف التعليم كله بيدها -

أها أوكي وتحته غني عن التعريف ( من اسمها شكلها قوية )

وتقولي لها انا من طرف خالد عبدالرحمن -

لو راشد الماجد أتوقع راح تمشي معاملتك

اللي يدرس فيها و أخو حصة من الرضاعة

يا خال ابوي حك ظهري

والصبح وانا أكشخ على أخر شيييي
تحزمت بهالجنز .. وميك أب .. و سويت شعري كدش .. و أكب علبة العطر نصها علي
لا وحاطه نظارات شمسيه مسوية فيها أحضرية ما تحمل الشمس ههههه

انتي متأكده انك ناوية تتوظفين ؟؟؟

ووامي تنفخ عليها : انت قولي لها بس ام تركي عند الباب .. حنا بس نبي نسلم

للحين ما ذكرتي وش منصب أمك شكلها أقوى من حصه

وانا اعصببببببب

على قولة الكويتيين ( يعني مو منهم ) أي طلع الحجي طلع

لا شعورياً تخصرت لها وقلت : يا ســـــــــــــلم

افا خربت الكشخه والحركات

وحنا راجعين و انا اناظر بهالملف الأخضر و أتنهد بحسره و أقول :

اتوقع لو أزرق تمشي المعامله

وبكره لي رجعه عند مكتب الأشراف و التوجيه .........

غيري اللبس والتسريحه والنظارة علشان كأنه مو انتي ( تنكري )

تهقون تنفع الواسطة هالمره و لا أتوسد هالملف و اناااااام :)

وخري عن خالد عبد الرحمن ودوري واسطه يا من راشد الماجد والا إسألي اخوج اذا يعرف وائل كفروي :3ajebni:

عجايب بنت الشايب

14-10-2008, 03:03

بصراحه ياااهداب

موضوعك طووووووووووووووووووووووووووووويل

وانا مرتن عجاااازه

بس اللي لفت نظري وحبيت اشير عليه

ان بحكم خبرتي ان واسطة الحريم ماتنفع .. وأخذيها مني ..

عن نفسي ماجربت وااسطه ولله الحمد ( مرتبة شرف) صحيح ماجاني تعييين بديرتي بس جاني تعيين بدير اقربها ساعتين واهلي رفضوا

يعني المشكله مننا

غير هذا

الشباب هنا

ركزوا على

الجنز

ليه ؟

لكم كللكم

ليه تركزون عليه ؟؟

ممكن لأنهم فطرياً .. يتنحون هنا :) بالسطور هذي

وليه انتي ..كتبتي جنز ورجعتي ركزتي

صحيح انه على قولتك فيه عباءه اسلاميه والكل يلبس

بس بدون مفاخره بهالشيء

وتخصيص له

يعني مثلا

لو قلتي كشخت ولا خليت شين زين الا لبسته وحطيته

ابرررك من التفصيل ( وكأنك أول مره تكشخين ) :)

شفتي شلوون ان هنا بعالم النت ممكن أن أي أحد يقرأ ردك باكثر من معنى

غير هذا

ممكن اعطيك مثال

هنا ريال قال لك

ماستحيتي وانتي تقولين لابسه بنطلون ؟

مابقي الا هذي

استحي وعيب والله
استحي واحشمي عمرتس

بالنت

وهنااااك

احد قال لك برااا

واحد يقول خلهن خلهن هذوالي مطوعات - يقصدني انا واختي

وذلك لأنك قمتي بالنصيحه >> وربي يمديني على الفصحى :)

من جانب آخر

لو قلتي لي شيء عقب هالحكي

باقولك مثل ماقلتي أنتي سابقا

صار اللي ينصح هو الغلطان الوقت هذا .. !

الله يوفقك ويعيينك الوظيفة الراقيه لو معيده بتبوك .. :) المهم توظفين .. هالسنه

ههههههه

طحياتي .........,,

شامان

14-10-2008, 12:39

اااهــداب

هاه وش صار على المعامله اليوم

بالمختصر..

14-10-2008, 12:53

المروح هو كناية عن النت ياهي تكره كره -:)

ههههههههههههه أجل مو بس أمي اللي تكره النت ..

طبعاً مع إختلاف المسميات .. أمي تسميه ( الزفت :) )

يااااااااارب تعينين بـ حقل :)

.
.

أهداااب

15-10-2008, 01:44

اهداب سالفة تحرق القلب بالرغم انها بصيغة ساخرة.. اااه لاتقولين واقولك ع التقديم

وربي مالك غير الواسطة.. هذا هو اللي ماشي بها الزمن الاغبر..

ومشكورة

هلا صعوه :7ayyoh:

أكثر شي حرق قلبي انهم يتلاعبوا فينا مره هنا ومره هناك

اذا على الواسطة و الله واجد معارفي ... بس انا كسوله وعاجبتني النومه :)

الله يوفقك وو فقنا جميع للخير

مشكوره غلاتي على الطله ... roooose

أهداااب

15-10-2008, 01:48

هي هي الواسطه لازم لازم

وهنا الفله علاج لكل القضايا الاجتماعيه

احسنتي هديبا

ايه الفله بتاع كله :)

الواسطة

يا كرهي لذي الكلمه

بس وش حادك على المر غير اللي امر منه

حياك ابو خلوف منوررر

أهداااب

15-10-2008, 01:56

هههههههههههه

مشكله الملف الاخضر

بس تصدقين اني اغليه

عندي بسيارة خمس ملفات مدري ليه

اما الواسطه فحدث ولا حرج مشكله

فنصيحتي لكِ يا اهداب

اذا امك قويه شخصيه

خليه تسنتر عند حصه

ابدعتي فامتعتي

دمتي بخير

حمود

انا كل درج أفتحه فيه ملف اخضر

من زود الوطنيه طبعاً :)

خلاص مالنا حاجه بالواسطة ... تصدق اليوم وش يقالون لأخوي

خلها تروح تقدم من ضبا لأن التعاقد قفل عندنا و هناك يبون ولي امر

من وين أجيب لهم ولي امر هههههههه

حياك حمود

نورت بطلتك

أهداااب

15-10-2008, 02:02

هدباء ياهديبا...
ياعل ربي يوظفك ويوظفني ..

اقعدي بحلق حصه طيعيني الواسطه ماتجي الا مره وحده ..

لاتصيرين مثل وحده اعرفه اول ماتخرجت قال له واحد من قرايبه اعرف واحد يوظف بس ياخذ منك 20 الف ..

وقالت لاااااااااااااا والف لا عمري ماتوظفت حراااااااام هذي اسمه رشووووه

ومرت السنين ومرت السنين ... واحتاجت هالبنت وقالت لقريبه وين ابو الـ 20 الف ابتوظف واعطيه الشكوى لله

قعد يضحك عليه الظاهر فنقشوه من مكانه <<<يستاهل

لا رشوووووه :a:

اعوذ بالله

بس يمكن الظروف تحدني عليها و ساعتها أخلي الطواعه لأهلها :)

عطر

وربي اغليك :d:

ويارب في الحزه من الليل أنك توظف عطر وتوظفني بيوم واحد

حياك غلاتي منوررره ... rooose2

أهداااب

15-10-2008, 02:06

شكل بكرى كل بنات المضايف عند حصه ويقلن حنا من طرف خالد

خخخخخخخ

لا من طرف اهداااب :)

ولو أنا عرفتكم على حصه و اخوها هههههه

فديتك ... rooose2

أهداااب

15-10-2008, 02:12

اقووول نااامي احسن لك...ههههههههه

اما امك بتعاايده ههههههههههههه تووه تذكر المره ههههههه

يااملي هالخشه تبيين تووضفيين يااعمري الله يععيين بس

انا اعرف لي وحده 3 سنيين والى الان ماتوضفه
الله يرزقه الوضييفه...

يااااااااااارب تووضفيين بس بشرط اول رااتب لتس لي نصه << ماخلليت احد مااقلتله

شيـــــــــــــــع

هلا رتوجه حياتي

الأ كيف أول يوم بالمدرسه:)

وأذا على الراتب محجوز نصه بين خواتي و امي

راحت عليك :)

انا توي مالي سنه متخرجه

بس كنت بانيه طموحات كبيرة على هالنسبه على بالي يحتروني بس اتخرج ههههههه

حياك رتوجه منووووره .. roooose

أهداااب

15-10-2008, 02:21

من امس وانا مقاااابل مكتب الاشراف

الا ماتعرفين احد بادارة التعليم بالدمام

تهقين يوافقون على اجازة سنه رعاية مولود

مابيلهم راتب انا اعطيهم راتب

<<< قعده به عنده دوره سنه

ههههههههه

شنقل

انت بس دبر الأجازه و انا احل محل هالمدرسة

ما تشوفني احوس على بدل الأ ستثناء

بس قبل و ش تخصصها .. ؟!

أهلي ما عندهم مانع أروح لو الصين

- متفاهمين ما شا الله عليهم - :)

أذا وافقوا على الاجازه رد لي خبر

وحياك ربي

أهداااب

15-10-2008, 02:44

ايه عندي

ماستحيتي وانتي تقولين لابسه بنطلون ؟

مابقي الا هذي

استحي وعيب والله الرجل وهو رجل لامنه لبس جنز
بغير ضروره انه مايتفاخر به ولايحتسي به شلون بنت
وبموقع انترنت كاشخه وتقول لابسه بنطلون جنز ومن زود
الحيا تقول وش عندك ؟

هذا غير المكياج

استحي واحشمي عمرتس

تصدق

اكثرشي يضحكني لما احد يكون معصب بدون سبب يستاهل :)

واللي يضحكني أكثر

ان الموضوع جملة وتفصيلاً يتكلم عن التوظيف و البطاله و الواسطة

وانت تركت هذا كله .. وسلطت الضوء على نقطة .. الجنز و الميك أب .. !!!

وش ذنبي انا أذا هذي نظرتكم ....

وبعدين

انا لما اقول لابسه جنز وكاشخه هو انتم تعرفوني من اكون و لا انا طالعه لكم بالصوره وانا مدري ..؟؟

وثالثاً

في الدين كله قرآن و سنه ما ذكر أن الجنز حرام ... أذا انا وسط حريم حالي حالهم .. ؟!

رابعاً

انت وش دراك و ش نوع لبسي أذا هو ضيق و لا فضفاض .. ؟!

ولا وش نوع عباتي اللي ألبسها

خامساً

يمكن أنا أكذب عليكم عمري ما لبست الجنز ولا أعرف كيف شكله بس اسمع عنه

و أسوي روحي بنت عز وهاااااي :)

ريال

انا مو مضطره أمدح روحي و أدعي المثاليه هنا

ولا انا مضطره ابرر لك موقفي و أعترف أني غلطانه و ما استحي - على حد تعبيرك -

يكفي

اني عارفه زين من رباني

شكراً على لسانك اللي ينقط عسل

بس تذكر أن النصحية قدام الناس فضيحه

اذا تشوف اني غلطانه تعالي انصحني بيني و بينك

ولا انا زعلانه من كلامك ابد ابد

لأنك مثل أخوي ..

وخايف على مصلحتي

بس ما عرفت وش لون تقدم النصيحة

- فأخذتك العزه بالأثم -

وعلى قولة سيدة القلم

كن بخير:)

أهداااب

15-10-2008, 03:19

اي علي ما علي انك جبل

وانت على كيفك .. بلا ما كبر علباك الا النوم و الجلسة على هالمروح -

المروح هو كناية عن النت ياهي تكره كره -:)

الحين حنا مروحين ته ته ته ته

عقلي الوالده خخخخخخخخخخ

لاهنتي

سالفه تحكي الواقع المرير

وتبين نصيحتي

ناااااامي وخليهم يولون

لا ديوان ينفع

ولا توجيه يفيد

كذااااااااااااااابين ونصابين

لاهنتي

وتقلدي تحيتي

الوالده

لا أحيان يخونها التعبير أذا عصبت هههههه

النوم زين ما احد يكرهه

بس سنين عمري اللي راحت في هالتعلوم

حياك يا الشبث

ونصيحتك راح أعلقها في أذني لي و للأجيال القادمه ههههههه

أهداااب

15-10-2008, 03:45

يعني الحين ليش ماتبي تقتنعون أن الواحد لازم يمشي بواسطه :)

سعوديين ماعليكم شرهه <_ تكفى يالإيراني :)

في هذي صدقت

أقول هديبا أول شي الله يوفقتس وينزل تعيينك بقرية :)

والله ودي تكون بقرية لو في صبية و لا ابو عريش :)

عشان ألعب فيهم لعب << تخطط لبعيد هههههه

الحين انتي ليش متضايقه من أم تركي خليها تفزع لك والله مالها إلا كذا تبينه تشوف بنته تنقع شهادته قدامه هههههههههههههههههههههههههههههههههههههه

هذا كلام أم تركي

تقول : حنا ما درسناك العمر هذا كله عشان ترصي اذنك تنامي عندنا ههههههه

امي تطبق النظام الرأس مالي الأشتراكي في بيتنا وينص على

( أن المواطن لبد أيكون منتج لدولة بأي طريقة كانت )

وأنتي بعد معنده إلا تتعينين بدون واسطة والله ماهقوتي :)

أجل صرتن سردادي مردادي بين الضمان والتوجيه :)

ههههههه

لا بين التوجيه و الديوان

فتح يا مفتح

بالتوفيق ياأهداب ...

أجمعين

توسدي إحترامي

حياك ربي ..

أهداااب

15-10-2008, 03:55

بالتوفيق ياهديبا وانشبي لحصيصة يما توظفين وبعدين خليتس قليلة خاتمة واسحبي عليه

لا توصي حريص ههههههه

لو انتس عندنا كان وظفتس مديرة وبدون واسطة

لا تكفا

مدرسة وتخب علي

شكراً هديبا والله يفكتس من البطالة وتسيرين عضو فعال (مستفيد) ومفيد في الوطن العربي خخخخخخخ

"""""""

ههههههههه

عجبني تخصيصك لكلمة ( مستفيد ) بين قوسين

ابوطروق

ليتهم يفهموا مثلك :thumb:

حياك ربي

غيمــة

15-10-2008, 03:59

.

عسى بهالساعه الفضيله ربي يوفقتس ويفتحها عليتس ..

بس ماقلتي لنا وش صار عليتس اليوم ؟!

أختس / غيمـة

أهداااب

15-10-2008, 04:18

انا قلت الظاهر توزيع ارباح الأسهم

أنا قلت خربتها البنت الظاهر ما في أحد يقبلها إلا الجيش

سجلت هذا الاسم بحرف ( ح ) حق الواسطات

أها أوكي وتحته غني عن التعريف ( من اسمها شكلها قوية )

لو راشد الماجد أتوقع راح تمشي معاملتك

يا خال ابوي حك ظهري

انتي متأكده انك ناوية تتوظفين ؟؟؟

للحين ما ذكرتي وش منصب أمك شكلها أقوى من حصه

على قولة الكويتيين ( يعني مو منهم ) أي طلع الحجي طلع

افا خربت الكشخه والحركات

اتوقع لو أزرق تمشي المعامله

غيري اللبس والتسريحه والنظارة علشان كأنه مو انتي ( تنكري )

وخري عن خالد عبد الرحمن ودوري واسطه يا من راشد الماجد والا إسألي اخوج اذا يعرف وائل كفروي :3ajebni:

شامان

عليك تحيلات غير شكل

ملف أزرق .. وتنكر .. وائل كفوري :3ajebni: << انا بعد

اقول

لو محصله وائل كفوري ما دورت وظايف

ههههههههه

<< ياروحي يا الصراحة :)

حياك شامان

ونورت الموضوع بطلتك

أهداااب

15-10-2008, 04:45

بصراحه ياااهداب

احب الصراحة انا .. واحب الناس اللي على الفطرة :)

موضوعك طووووووووووووووووووووووووووووويل

وانا مرتن عجاااازه

وليه دخلتيه طيب .. ؟!

ولا عشان حصلتي نقطة تنتقديني فيها .. ؟!!

بس اللي لفت نظري وحبيت اشير عليه

ان بحكم خبرتي ان واسطة الحريم ماتنفع .. وأخذيها مني ..

الا تنفع و تنفع

بس ناس عن ناس تفرق

عن نفسي ماجربت وااسطه ولله الحمد ( مرتبة شرف)

وانا بعد مرتبة شرف .. بترتيب السابعة على دفعتي ..

بس انا يا أنسه عجايب

مو من خريجات قبل 5 أو 7 سنين

توي خريجة العام و لا عندي خبرات ابد :)

صحيح ماجاني تعييين بديرتي بس جاني تعيين بدير اقربها ساعتين واهلي رفضوا

يعني المشكله مننا

الله يوفقك بحياتك العملية

ويرزقك بأبن الحلال اللي يستر عليك :)

غير هذا

الشباب هنا

ركزوا على

الجنز

ليه ؟

لكم كللكم

ليه تركزون عليه ؟؟

ممكن لأنهم فطرياً .. يتنحون هنا :) بالسطور هذي

وليه انتي ..كتبتي جنز ورجعتي ركزتي

صحيح انه على قولتك فيه عباءه اسلاميه والكل يلبس

بس بدون مفاخره بهالشيء

وتخصيص له

يعني مثلا

لو قلتي كشخت ولا خليت شين زين الا لبسته وحطيته

ابرررك من التفصيل ( وكأنك أول مره تكشخين ) :)

شفتي شلوون ان هنا بعالم النت ممكن أن أي أحد يقرأ ردك باكثر من معنى

تصدقين ما دريت الا منك .. !!

جزاك الله خير على هالنصيحة

لو انت مثل أختي الكبيرة و أتقبل نقدك بصدر رحب :)

غير هذا

ممكن اعطيك مثال

هنا ريال قال لك

بالنت

وهنااااك

احد قال لك برااا

وذلك لأنك قمتي بالنصيحه >> وربي يمديني على الفصحى :)

من جانب آخر

لو قلتي لي شيء عقب هالحكي

باقولك مثل ماقلتي أنتي سابقا

ما شا الله عليك

أحسدك على قوة ذاكرتك

انت لسع ذاكره ردي هذا ههههههههههههههه

اقول

احفظي رابط موضوعي هذا عندك

عشان في المستقبل لا سمح الله لا سمح الله لو لفيت منا و لامنا

خلي هالموضوع حجه قويه لك علي

الله لا يضرك بس :)

الله يوفقك ويعيينك الوظيفة الراقيه لو معيده بتبوك .. :) المهم توظفين .. هالسنه

من جاب طاري الاعاده .. ؟!

وانت ليه حاز بخاطرك هالموضوع .. ؟!

يا عمري يا الحريم ما يقدرن يخبن شي

المشاعر تفضح :)

ههههههه

طحياتي .........,,

هههههههههههه

حياك ربي ابله عجايب

أهداااب

15-10-2008, 04:50

اااهــداب

هاه وش صار على المعامله اليوم

عندك ولي امر مؤقة بس فترة التقديم يكون في ضبا

ههههههههه

أهداااب

15-10-2008, 04:55

ههههههههههههه أجل مو بس أمي اللي تكره النت ..

طبعاً مع إختلاف المسميات .. أمي تسميه ( الزفت :) )

يااااااااارب تعينين بـ حقل :)

.
.

ههههههه

اجل كلنا بالهوى سوى يا بالمختصر:)

يارب تعين

لو في الخريبه << اتحداك تعرفي هذي وين ههههههههه

حياك بالمختصر

نوووورتي الموضوع بطلتك .. roooose

أهداااب

15-10-2008, 05:06

.

عسى بهالساعه الفضيله ربي يوفقتس ويفتحها عليتس ..

بس ماقلتي لنا وش صار عليتس اليوم ؟!

أختس / غيمـة

غيمه :7ayyoh:

مسيره هاه حياك الله من ملفاك لملقاك

اقول عجبني توقيعك :thumb:

ويارب تسمع منها و ويوفقنا أجمعين

اليوم يا طولية العمر ...

عطيت الملف أخوي .. وكلم حقين الأشراف والتوجيه

قالوا له ..

التعاقد من عندنا خلص بح ..

ما في الأ من محافظة ضبا .. وهناك لازم يكون لك ولي امر في نفس المحافظه

وانا مالي احد هناك وش الدبره .. من وين أجيب ولي امر :)

بس قالوا يوم السبت ينزل أربع ألاف اسم للمعينات بشكل رسمي

أذا لك أحد مقدم شوفوا الجرايد

حياك غيمه

ونور الموضوع بطلتك ... roooose

عجايب بنت الشايب

15-10-2008, 13:55

اهداب

اكيد راح يعجبك كلامي

لأن سبق واعجبنا كلامك

بس اعجبتني يوم تقولين ممكن اكذب عليك

ليه انتي مجربه تكذبين وعادي عندك تعيشين معنا بكذب ؟

بعدين لاتحسديني على قوة الذاكره :) ترا وراي عيال

لأني ولله الحمد مااطوف شيء شباب توني مو ختياره

يالله 7 و 5 سنواااات ..

اجل بعذركم وااسطه

مو انا عجبجب والأجر على الله .. ؟

بعدين ليه منرفزه .. :)

واحس فيه دخان طالع من موضوعك :)

جنيتي على نفسك بكلمه كتبتها .. وش نسوي ؟ :( انت مو كتبتي

انت كتبتي وحنا علقنا .. عااادي فررري

الله يستر عليك .. ويحيمك .. ويزرقك باللي يشبعك ياااارب

رجعتي هنا فقط لأكب مويه بس احسك شوي فايره ياغاليه

ماله داعي

فلة حجاج ياخاله

هههههههههههههههه

ياحبني لكن ياحريم .. المضايف ( طقم )

طحياتي .........,,

عجايب بنت الشايب

15-10-2008, 14:33

عطيت الملف أخوي .. وكلم حقين الأشراف والتوجيه

ماقلت لكم الحريم ماينفعن ..

>> واااي ياحلاتهن الحريم

أهداااب

15-10-2008, 19:36

يوسف ليه حذفت ردي .. ؟!

لأني مو محترمه يعني .. ؟!

طيب الشيخه عجايب أذا احترمت نفسها ذيك الساعه تفرض احترامها علي وعلى الجميع

اقول

أغلق الموضوع احسن

مع السلامه

يـــوسف

15-10-2008, 19:42

أخت أهداب كنك داريه :)

الموضوع اصلا من الاول كنت ناوي أقفله لأن فيه جنز :)

وعجايب محترمة زين والجميع يدري منهي عجايب رجاء اخت أهداااب الموضوع ضحك ومزوح وانتي من الاول قلبتيها كلام ماله داعي ..

الموضوع مغلق ..بناء على طلب صاحب الموضوع :)