المساعد الشخصي الرقمي

مشاهدة النسخة كاملة : أبي لاب توب جديد ....ملامح لاتدخل


ريم شمر
22-07-2008, 10:01
صبحكم الله بالخير


قررت اشتري لاب توب جديد :d:

بس مابي استعجل وابغي اذا رحت اشتري تكون عندي فكره كامله عن الجهاز المناسب



وش افضل لاب توب من جميع النواحي ؟!!


الشركه والمواصفات والشكل ويكون سعره معقول


أنا جربت ديل وتوشيبا


توشيبا ثقيل وكئيب بس يتحمل

ديل حلو جدا وهو الخيار الاول بالنسبة لي دائما


نفسي بسوني بس فيه ناس مايمدحونه يقولون حساس ويخرب بسرعه


على فكره حسب خبرتي بشراء اللاب توبات :)

اكتشفت انه مو شرط الغالي يكون افضل

احيانا يبيعونك اسم الشركه بمواصفات عاديه جدا

وتتوهق بجهاز اقل من عادي بسعر مرتفع



.
.
اراءكم قبس ينير لي الدرب فلا تبخلوا بها



ولكل من يهتم الشكر والامتنان مقدما


.
.


roooose
العَـــروب
22-07-2008, 11:45
نفسي بسوني بس فيه ناس مايمدحونه يقولون حساس ويخرب بسرعه








انحاشي عن السوووني .. <-- بالعة العافية من وراه :(


هذا اللي اقدر انصحج فيه


وبالتوفيق ام طلال .. rooose2
منصور الغايب
22-07-2008, 11:50
ما استخدمت غير التوشيبا ..... ومستعمل بعد :)



الله يوفقك ... للجهاز الزين ان شاء الله ..

شكرا ام طلال ..
ملامح شمري
22-07-2008, 12:02
مبرووووووووووووك ..! :tongue:


جهازك القديم لا ترمينه , أعطيه لي , بضيفه لـ معملي حق التجارب :)


و قولي لي كم ميزانيتك ..؟ :puzzled:

و تبغين الاب توب لإيش أو طريقة إستخدامك له كيف بتكون ..؟


انترنت و اشياء خفيفة ( برامج اوفس , ماسنجر , مشاهدة أفلام ) , بس .



أو لإستعمال ثقيل : ( برامج تصاميم , فوتوشوب و ثلاثية الابعاد و ألعاب ثقيلة ) ..

و تبين تشبكينه بوصلة خاصة بتلفزيونك .. أو لا ..؟


ترى مكتبة جرير منزلين عروض , بس ما جيتهم و مدري عن اسعارهم .


بعطيك موصفات بعد ما تقولي لي وش تبين تستخدمين الجهاز فيــه و وش متطلباتك منه ..


إسم الماركة خليه أخر شي ..
عبدالله المهيني
22-07-2008, 12:19
والله أنا أرشح الـ ديّل

وثانياً الـ توشيبا

( مهما كانت الإستعمالات )


أما الـ سوني
فاشل جداً .. لا أكثر من فاشل


وإذا بغيتي تشترين ( طبعاً لأهل الرياض )

لا مكتبة جرير ولا إكسترا ولا غيره

حراج الكمبيوتر بالعليا أفضل مكان
لا من ناحية السعر ولا من ناحية تنوع المعروضات



هذا رأيي

:)
هند القاضي
22-07-2008, 16:11
مساء الخير أم طلال


اممم عندج سوني جربته مو عملي وثقيل حيل وأعطاله أكثر ..

جهاز أختي فوجيتس سيمنس روووووووووعه وأنا جهازي توشيبا بعد حلوو وعملي صراحه برغم ملعون خيرهـ تصاميم وبرامج إلا أنه مريحني ولله الحمد ولج حرية الأختيار :)




roooose
سلمان النبهان
22-07-2008, 16:16
ديل حلو جدا وهو الخيار الاول بالنسبة لي دائما
^
^
^
^
هذا كلامك ماهو كلامي وهو الصحيح
ودل جهاز رائع مريح نظيف
ومبروك مقدما يالعميدة
قلم شمر
22-07-2008, 16:33
ديل ... جهاز مثالي جداً لجميع الأستخدامات





لأستخدامات الانترنت فيه بيبي لاب توب
جهاز صغير وسهل الأستخدام
http://ak.buy.com/db_assets/prod_lrg_images/762/206655762.jpg

من أبرز عيوبه عدم استخدام اية برامج فيه كالميكروسوفت اوفس وغيرها

المواصفات

1- حجمة 7 انش يعني تقدرين تحطينة بشنطتك
2-سعته 2 جيجا
3- الرام ( 512 )
4- واير لس
5- بلوتوث
6-مداخل USB

ما أعلمه انه غير متوفر بالأسواق ولكن هناك مندوبين ومندوبات مبيعات له في السعوديه
سعره لا يتجاوز الالف دولار شامل الشحن من أمريكا



ريم شمر موفقه ان شاءالله
ملامح شمري
22-07-2008, 23:23
بجد و بتفصيل أكثر .
ريم خليك عملية و حددي اختياراتك أول أو متطلباتك منه بعدها دوري جهاز و قارني بين الماركات .


تبينه صغير الحجم للتنقل , كاميرا مدمجة للفيديو كونفيرنس ( أو مؤتمرات الفيديو ) , بصمة حتى ما احد يستخدمه
غيرك , بلوتوث , مدخل لقراءة كروت الذاكرة للجوال , مدخل tv ... إلخ
بتخزنين عليه ملفات واجد ..؟ ( سعة الهارد دسك )
بتحررين عليه روسوميات و بتشغلين برامج ثقيلة..؟ ( نوع المعالج , كرت الشاشة)
و انتي بتستدمينه قريب من مصدر الكهرباء او بالخارج بعيد ( البطارية )
نوع الشاشة و حجمها ..
نظام التشغيل ( بيزيد من سعر الجهاز )
حرارة الجهاز و طرق تبريده ..
الضمان اذا هو دولي و سمعة و كفاءة صيانة الوكيل بالمملكة ..
و أشياء كثيرة غير كذا ..
على الاقل هذة اللي أضعه بإعتباري قبل أشتري لنفسي أو لغيري إذا شاورني احـد ..
أحدد وأكتب كل إحتباجاتي الدُنيا بورقة , و سقف ميزانيتي , بعدها اروح
لغدة أماكن و اتسوق على أساس إحتياجي موب على حسب المعروض قدامي .
و قبل اشتريه و ادفع أسوي بحث بالمواقع الاجنبية و بموقع الشركة و اشوف اذا كان فيه
عيوب تصنيعية أو مشاكل معينة ظهرت بهالموديل و وهو لأي فئة مخصص
( رجال اعمال , مستخدم منزلي ... إلخ )
و اخذ بحدود ثلاث أسابيع إلى إسبوعين إذا ما كنت مستعجل ..
و إسبوع إذا كنت .



لا تغرك إسم الماركة ..


تبين جهاز للكرف و الشغل الثقيل و ولا إستعمال ترفيهي أو جهاز عملي وكم سنة حاطة بإعتبارك بتستخدينه


قبل تغيرينه ..؟


لا تشترينه بس عشان شكله حلو ..! :a:


وخذي لك إسبوع قبل تشترين واحد ..
و حددي وش تبين قبل تروحين ..
و أخر شي فاضلي بين الماركات و مسألة الشكل ..


بالتوفيق و لا تشترين واحد زهري ..! :)

تشاو ..
ريم شمر
23-07-2008, 01:49
[U]
[align=center]
انحاشي عن السوووني .. <-- بالعة العافية من وراه :(


هذا اللي اقدر انصحج فيه


وبالتوفيق ام طلال .. rooose2






هلا والله وغلا بام يوسف

ونصيحه ثمينه جدا لأني بعد (الدوجه) بجرير واكسترا وبيست وبعد مافتر راسي

شفت لي جهاز (سوني ) حلو عجبني بس ماحبيت استعجل قلت اشاوركم اول

وصار اول رد لك ياجود ويحذرني من سوني :)

بالتالي بناء على كلامك وكلام بنت عمي بخلي سوني بآخر القائمه الين اشوف


تسلمين ياغاليه وعقبالك يارب يهدي لك ابو يوسف احلى لاب توب :thumb:
ريم شمر
23-07-2008, 02:09
ما استخدمت غير التوشيبا ..... ومستعمل بعد :)



الله يوفقك ... للجهاز الزين ان شاء الله ..

شكرا ام طلال ..


ياهلااااااااااا ويامسهلااااااااااا بعريسنا منصور


حيا الله من طل علينا منوره المضايف بقدومك :7ayyoh:

.
.
.

بالنسبه للتوشيبا كثير يمدحونه وانا مااذمه حسب الفترة البسيطه لاستخدامي له

بس غالبا يكون ثقيل الوزن واحسه رجالي اكثر منه نسائي :)




تسلم اخوي منصور اسعدني حضورك
.
.
.
.
.
.
ريم شمر
23-07-2008, 02:47
مبرووووووووووووك ..! :tongue:


جهازك القديم لا ترمينه , أعطيه لي , بضيفه لـ معملي حق التجارب :)


و قولي لي كم ميزانيتك ..؟ :puzzled:

و تبغين الاب توب لإيش أو طريقة إستخدامك له كيف بتكون ..؟


انترنت و اشياء خفيفة ( برامج اوفس , ماسنجر , مشاهدة أفلام ) , بس .



أو لإستعمال ثقيل : ( برامج تصاميم , فوتوشوب و ثلاثية الابعاد و ألعاب ثقيلة ) ..

و تبين تشبكينه بوصلة خاصة بتلفزيونك .. أو لا ..؟


ترى مكتبة جرير منزلين عروض , بس ما جيتهم و مدري عن اسعارهم .


بعطيك موصفات بعد ما تقولي لي وش تبين تستخدمين الجهاز فيــه و وش متطلباتك منه ..


إسم الماركة خليه أخر شي ..




هذا وانا حاطه منع الدخول بالعنوان :tongue:



- الله يبارك فيك والعقبى لك تشتري طيارة خاصه :)

- جهازي القديم مهو قديم بالحيل له سنه الحين وشغال حلو بس انا ماشتريته بنفسي :( لذلك ماكان حسب مارغب :) واحس فيه تنافر بيني وبينه وعدم تواصل :tongue: ( عاد انت خبير بهالامور :001b:)..المهم انوه اعجب وحده من خواتي وقالت اذا اشتريتي جديد عطيني جهازك ..هي قالت كذا ومير تطن براسي الفكره :d: بس عاد مايغلي عليك ياوخيي لو تبي الجديد بعد خذه :qannaj:


- بالنسبة للميزانيه / انا سبق وتميلحت وشريت لي جهاز بتسعه الاف:puzzled: على بالي انه بيكون احسن جهاز بالعالم بس اكتشفت ان بعض الاجهزه غاليه بسبب اسم الشركه فقط كذلك هذي الاجهزة تصلح لرجال الاعمال ولاصحاب مهن معينه ماتصلح لمستخدم عااااااادي ...المعنى انه المهم مواصفات مناسبة وبسعر معقول ومناسب خل نقول من ثلاثة الاف الى اربعه وممكن تكون خمسه اذا جا معه هديه كيس رز :)


- ابغى اللاب توب استخدام شخصي لتصفح الانترنت ثم للتصاميم( فوتوشوب ) وبعض الاعمال المكتبيه ( مايكروسفت ) الالعاب نووووو اكره الالعاب :148r:


- وصله للتلفزيون :) ماعمري فكرت فيها بس ليش لا ...؟!! اذا مالها تأثيرات جانبيه <<<شراب كحه :)


- جرير رحت لهم قبل امس بس مليت من الزحمه وطلعت وانا ماشفت كل شي يبي لي اروح لهم الصبح

علشان اتفرج بروقان ...فعلا فيه اشياء حلوه ...ولاب توب سوني اللي عجبني كان عندهم ..واما اسعارهم اغلى من غيرهم طبعا


- اصبر لاترد علي الين ارد على ردك الثاني :) علشان يكون عندك كم من المعلومات كافي ..



تسلم ملامح وسامحني قطعت عليك اجازتك من المضايف :100r:



.
.
.
.
نزف القلم
23-07-2008, 03:38
السلام عليكم ورحمة الله وبركاته


بصراحه على حسب المواصفات اللي تبينها وانا للامانه جربت نوعين من الاجهزة

hp

وكذلك توشيبا الان

وبصراحه انصحك الشكل مو مهم اهم شي عمل الجهاز وتحمله

عموما الاتش بي افضل جهاز بنظري على وجه العموم

تحيتي
ملامح شمري
23-07-2008, 07:08
- جرير رحت لهم قبل امس بس مليت من الزحمه وطلعت وانا ماشفت كل شي يبي لي اروح لهم الصبح




علشان اتفرج بروقان ...فعلا فيه اشياء حلوه ...ولاب توب سوني اللي عجبني كان عندهم ..واما اسعارهم اغلى من غيرهم طبعا





- اصبر لاترد علي الين ارد على ردك الثاني :) علشان يكون عندك كم من المعلومات كافي ..






تسلم ملامح وسامحني قطعت عليك اجازتك من المضايف :100r:






.


.
.


.





دامك خربتي إجازتي ,:puzzled:

عناد فيك إلا أرد .. :148r:


و علميني قبل تروحين ..! :a:


اذا اعجبك جهاز او اثنين , هاتي ارقام او اسماء موديلاتهن مع مواصقاتهن و أسعارهن ..


حتى نفاضل بينهن من ناحية الكلفة + الأداء و الموصفات .


لا أحد يضحك عليك و يقول لك سرعته كذا و يسكت , يمكن المعالج يكون


ردئ ( سيلرون ) أو قديم ( بانتيوم ) أو موديل المعالج ما يأدي اللي تبين ( بعض موديلات
معالج انتل كور 2 ديو ) ..


و الذاكرة , اذا قالك 1 او 2 غيغا إسألي , كم ترددها و وش نوعها DDr أو DDr2


و كرت الشاشة هو منفصل او لا , و من Ati أو من انفيديا اذا كان منفصل و كم سعته ..


و عدد فتحات اليو اس بي USB .


هذا اللي بالي الحين .. و ميزانيتك أكثر من جيدة و إستفسري عن سعر


الاجهزة اللي تصنيعها اوربي . ( الصينية شكلها او ازرار لوحتها تبدا تتشوه بعد سنة و شوي


اذا كان استعمالك له غير حذر ) . أغلى شوي بس قيمتها بها .


هذا اللي ببالي الحين .
حمــ الموت ـراء
23-07-2008, 07:54
قسم بالله يا ملامح شمري انك راعي أوله ..




مفروض ينحط تحت معرفك راعي الأوله ..كنت اسمع بهاللقب ولا شفت لوه راعي





لين دخلت المضائف وشفتك لك من الاحترام اكثروووه roooose
طلال
23-07-2008, 08:06
:. ام طلال .:

Dell Dell Dell Dell Dell

وشهادتي فيهـ مجروحهـ
ريال الفسحه
23-07-2008, 09:05
عليتس بالدل لابغيتي تشترين=الجهاز اللي عليه الكلام ومسكت وحلووو حيييل



ههههههههههههههههههه


عليتس بالدل وخلي الحتسي :)
أبوطروق
23-07-2008, 09:41
انا اشهد ان الديل سيارة (قصدي جهاز)

وراح اصوت له بكل ما أوتيت من قوة (مع ان اللي عندي ايسر)


بالتوفيق وتكسرينه بالعافية

:
بالمختصر..
23-07-2008, 15:53
نصيحه ..

لاتشترين من جرير ..!

و إنتبهي لإسم الجهاز و الموديل اللي على الستيكر

هو نفس إسم الجهاز اللي خذيتيه وألا لا ..؟

لأن المواصفات اللي على الستيكر يغيرونه أحيانا ..!




.
.
المشرف العام
23-07-2008, 16:01
/

اصبري شوين لا تستعجلين

بينزل معالج جديد عن قريب ، يضرب المعالجات اللي مطروحه بالسوق وتاخذين سعر الجهاز الحالي بنصف السعر

اعتقد ان المعالج اللي بينزل اسمه اكستريم ، اللي فهته انها اربع معالجات بآن واحد .



فـ قلنا نشارك :)
silntassassin
23-07-2008, 16:22
السلام عليكم ورحمة الله وبركاته يا عم في ناس مش لاقية تاكل وبتموت من الجوع وانت بتدور على احدث لاب توب يا نهار اسود متزعلش من صراحتى
عجايب بنت الشايب
23-07-2008, 18:55
8
8

اما بنعمة ربك فحدث



يعني نموت معهم ولا نشري لهم لاب توب ؟


ياشيخ ماهكذا ... الصراحه




بعدين فيه نااس بتموت من الجوع وناس تدخل نت وتشارك :)


علم روحك



هها




ريم حولي حدر
عجايب بنت الشايب
23-07-2008, 19:07
ريومه جهازي دل


خفيف

وسريع مثلي




يهبل



وخليته على نظام فيستا انقلش نظام وكاله >> ياورحي يالهايلكس :)



يعني بتحبينه مثل ماتحبيني :)



7
7



http://up5.m5zn.com/photos/00150/pjdyj46b8do2.jpg
ابن جشعم
23-07-2008, 21:58
انا ارشح جهاز واحد فقط والمفروض يكون اول اختيار من الخيارات هو !!!!!!!
http://www.asus.com/999/images/public/asus_above_01.jpg
ليش أسوس طيب؟؟
لأن أسوس من أقوى شركات التكنولوجيا والمذر بورد التي تنتجه هي أقوى مذر بورد
وتقريبا اغلب اجهزة الكمبيوترات مزودة بالمذر بورد من انتاج أسوس.

فكري فيه ولا تستعجلين وبعدبن نطرح المزايا والنوعية وبالنسبة للسعر فهو منافس.


دمتي بخير ام طلاااااااال

تحياتي
ريم شمر
24-07-2008, 01:37
والله أنا أرشح الـ ديّل

وثانياً الـ توشيبا

( مهما كانت الإستعمالات )


أما الـ سوني
فاشل جداً .. لا أكثر من فاشل


وإذا بغيتي تشترين ( طبعاً لأهل الرياض )

لا مكتبة جرير ولا إكسترا ولا غيره

حراج الكمبيوتر بالعليا أفضل مكان
لا من ناحية السعر ولا من ناحية تنوع المعروضات



هذا رأيي

:)


هلا باخوي عبدالله وهلا باقتراحاته


يسعدني حضورك وشاكره جدا وممتنه لاهتمامك


سجلت ملاحظتك بالمفكرة اللي برجع لها في النهايه


شكل هالمفكره بتصير تقرير من مية صفحه :)
ملامح شمري
24-07-2008, 01:49
/



اعتقد ان المعالج اللي بينزل اسمه اكستريم ، اللي فهته انها اربع معالجات بآن واحد .




اسمه Core 2 Extreme quad و اربع أتوية على رقاقة واحدة , و مبطي نازل برى السعودية ..

اكستريم غالي الحين و مخصص لـ الشغل الثقيل و ما تحتاجه ريم .!
شليويح
24-07-2008, 02:42
اسمه Core 2 Extreme quad و اربع أتوية على رقاقة واحدة , و مبطي نازل برى السعودية ..



اكستريم غالي الحين و مخصص لـ الشغل الثقيل و ما تحتاجه ريم .!


:hala1:

هذا المعالج مصمم لاعمال السيرفرات ... ولبرامج التصميم الكبيرة ... مثل الاوتوكاد ..وغيرها ...اما الفوتوشوب اي جهاز يزبنه بهالوقت :d:

ومن وجهة نظر ان شركة AMD تتفوق بمعالجاتهما من ناحيه السرعة وقلة التعليق ...
ومن قوة معالج AMD ان الشركة تجعل كرت الشاشة خارجي ..؟؟؟ ..في المقابل انتل تلقى اكثر الاجهزة ..كرت الشاشة مدمج ..

كلامي عن اللاب توب ...

لكن اعتقد ان DELL مناسب لريم شمر ... ومثل ما قال دكتورنا .. ان احد علماء الغرب اسمه Moore قال ان قوة المعالج سوف تتضاعف بعد 18 شهر من انتاجة ويؤدي ذلك الى نزول سعره بشكل حاد ...
وبعدها اصبحت هذه المقوله ... قانون في علم الحاسب :) ..
حمـود
24-07-2008, 12:35
والله أنا أرشح الـ ديّل




وثانياً الـ توشيبا


( مهما كانت الإستعمالات )



أما الـ سوني
فاشل جداً .. لا أكثر من فاشل



وإذا بغيتي تشترين ( طبعاً لأهل الرياض )


لا مكتبة جرير ولا إكسترا ولا غيره


حراج الكمبيوتر بالعليا أفضل مكان
لا من ناحية السعر ولا من ناحية تنوع المعروضات




هذا رأيي



:)



انا رأيي من راي اخوي المهيني



انا معي DELLولله الحمد ممتاز لا ورخيص بالمرة

تصدقين اني مقارنونه مع جهاز واحد من زملائي وهو hpولا شاريه بخمس وخمس ميه
انه طلع افضل

لوه عندي سنه وشوي وبس افدع بوه
حتى بنت اخوي كبت عليه الماء والحمد لله ما فيه شي

ما شاء الله على جهازي لا تنضلونه (تنحتونه)

ريم ام طلال نصيحت مجرب

DELLوبس

على فكرة اذا كنتي في الرياض مالك الا حراج الكمبيوتر بالعليا

مثل ما قال اخوي المهيني وانا اذا بالرياض دايم بوه

كان ودي ادور لك بس الحين انا عند اهلي بحايل

دمتي بخير
ريم شمر
24-07-2008, 19:42
مساء الخير أم طلال


اممم عندج سوني جربته مو عملي وثقيل حيل وأعطاله أكثر ..

جهاز أختي فوجيتس سيمنس روووووووووعه وأنا جهازي توشيبا بعد حلوو وعملي صراحه برغم ملعون خيرهـ تصاميم وبرامج إلا أنه مريحني ولله الحمد ولج حرية الأختيار :)




roooose



هلا وغلا بهنوده

سوني شكله ماله جمهور :)


مع انه كان داخل مزاجي وبقووه بس مؤكد التجربه خير برهان والرأي ممن جرب افضل واكمل

توشيبا حاليا هو الخيار الثاني والله يكتب اللي فيه الخير



شاكره لك جدا اهتمامك وحضورك ياهند ..ولاهنتِroooose

.
.
.
ريم شمر
24-07-2008, 19:55
ديل حلو جدا وهو الخيار الاول بالنسبة لي دائما
^
^
^
^
هذا كلامك ماهو كلامي وهو الصحيح
ودل جهاز رائع مريح نظيف
ومبروك مقدما يالعميدة


حياك الله ابو سند والله يبارك بعمرك

زيارة اعتز بها ورأي سديد

ممتنه جدا لحضورك واهتمامك


.
.
ريم شمر
25-07-2008, 03:55
ديل ... جهاز مثالي جداً لجميع الأستخدامات


لأستخدامات الانترنت فيه بيبي لاب توب
جهاز صغير وسهل الأستخدام
http://ak.buy.com/db_assets/prod_lrg_images/762/206655762.jpg

من أبرز عيوبه عدم استخدام اية برامج فيه كالميكروسوفت اوفس وغيرها

المواصفات

1- حجمة 7 انش يعني تقدرين تحطينة بشنطتك
2-سعته 2 جيجا
3- الرام ( 512 )
4- واير لس
5- بلوتوث
6-مداخل USB

ما أعلمه انه غير متوفر بالأسواق ولكن هناك مندوبين ومندوبات مبيعات له في السعوديه
سعره لا يتجاوز الالف دولار شامل الشحن من أمريكا
ريم شمر موفقه ان شاءالله





هلا فيك اخوي قلم شمر

- ديل يبدو انه خيار الجميع المفضل واظنه يستحق

- حلو هالبيبي لاب توب :d: لو اني ماحتاج لبعض البرامج يمكن أخذته:qannaj:

حضور اعتز به فلك الشكر والامتنان

.
.
.
ريم شمر
25-07-2008, 04:32
بجد و بتفصيل أكثر .
ريم خليك عملية و حددي اختياراتك أول أو متطلباتك منه بعدها دوري جهاز و قارني بين الماركات .

وانا أكثر شئ استفدته من طرح الموضوع هو هالنقطه ، فعلا التروي وطلب المشوره وتحديد المتطلبات

يساهم في جعل الاختيار اسهل وافضل ..


بالنسبه للمواصفات :

حجمه.... متوسط واهم شي وزنه مايكون ثقيل

الكاميرا ....غير مهمه لكن لو وجدت فلا مانع

بصمه... ..لا مايحتاج

بلوتوث ......افكورس

مدخل لقراءة كروت الذاكرة للجوال .....لا ماشوف له داعي او ضروره

, مدخل tv ... هذا اللي ودي اجربه ان حصل :) بس مو مطلب اساسي

الخ .......لا مابيه:tongue:

بتخزنين عليه ملفات واجد ..؟ ( سعة الهارد دسك ) ....أنا منيب من اللي يحبون كثرة التحميل والتخزين ، اغلب الاشياء اطلع عليه في محلها :) اكثر ملفاتي صور لأجل التصاميم وعدد من المفكرات فقط لاغير ...يعني سعه وسط تناسبني


بتحررين عليه روسوميات و بتشغلين برامج ثقيلة..؟ ( نوع المعالج , كرت الشاشة).....ايضا ماحب اكثر برامج : الفوتوشوب وبعض البرامج الخفيفه وبس

و انتي بتستخدمينه قريب من مصدر الكهرباء او بالخارج بعيد ( البطارية ) ....ايييييييييه جيت على الجرح :wallah_hoo: أنا اكثر مايعقدني بحياتي هالبطاريه :148r:...يمكن اهم شي واللي بركز عليه ان البطاريه تكون تستمر فترة طويله وتكون قوية وتتحمل ....بطارية جهازي الحالي لاتستمر اكثر من ساعه ونص فقط :(

نوع الشاشة و حجمها .....الشاشه بما انها نافذتي لدخول عالم الانترنت فيجب ان تكون ذات مواصفات عاليه ومميزه ،شاشة جهازي الان تميل لعدم الوضوح خصوصا عند العمل على البطاريه فقط ولولا ان نظري سته على سته ( اسم الله علي:d: ) كان جبت العيد :) حجم الشاشه افضل يكون صغير او متوسط اتوقع 14 مناسب

نظام التشغيل ( بيزيد من سعر الجهاز ) .....هذي ابي رايك أنت فيها وش يناسبني بعد ماعرفت كل هالمعلومات :thumb:

حرارة الجهاز و طرق تبريده ...... هذا مهم جدا جدا لأن جهازي الحالي مرتفع الحراره بشكل لايطاق حتى انه يسخن الجو من حوله ( دفايه مهوب لاب توب :) ) فاهم شي يخلو الجهاز الجديد من هالمشكله ( يمكن هذا اكثر شي كرهني فيه :148r:

الضمان اذا هو دولي و سمعة و كفاءة صيانة الوكيل بالمملكة .. ...مادري ماعمري اهتميت بالضمان :( لأنه اذا صار له شئ مافكر اوديه للوكيل .....اقرب محل يفي بالغرض ...ادري ..غلط بس عاد تعودت على كذا :)






على الاقل هذة اللي أضعه بإعتباري قبل أشتري لنفسي أو لغيري إذا شاورني احـد ..
أحدد وأكتب كل إحتباجاتي الدُنيا بورقة , و سقف ميزانيتي , بعدها اروح
لغدة أماكن و اتسوق على أساس إحتياجي موب على حسب المعروض قدامي .


تفكير رجالي ميه بالميه:puzzled: ......تسلفني مخك اتسوق بوه وارجعه:)

عكسي وكل انثى في الدنيا :(
انا اروح ومخي فاضي وكل سلعه يعجبني شكلها يالله امسك روحي ماشتريها
مره رحت مع اخوي وكل ماشفت جهاز شكله حلو قلت ابي هذا :)

قال لي : انت بتشتغلين على اللاب توب والا بتلبسينه ؟!!:solh:






و قبل اشتريه و ادفع أسوي بحث بالمواقع الاجنبية و بموقع الشركة و اشوف اذا كان فيه
عيوب تصنيعية أو مشاكل معينة ظهرت بهالموديل و وهو لأي فئة مخصص
( رجال اعمال , مستخدم منزلي ... إلخ )


عاد هذي صعبه علي لسببين

اولا اللغه ماتساعد ثانيا الخبرة بمثل هذه الامور مييييح :)









لا تغرك إسم الماركة ..


تبين جهاز للكرف و الشغل الثقيل و ولا إستعمال ترفيهي أو جهاز عملي وكم سنة حاطة بإعتبارك بتستخدينه


قبل تغيرينه ..؟


لا تشترينه بس عشان شكله حلو ..! :a:


وخذي لك إسبوع قبل تشترين واحد ..
و حددي وش تبين قبل تروحين ..
و أخر شي فاضلي بين الماركات و مسألة الشكل ..


بالتوفيق و لا تشترين واحد زهري ..! :)

تشاو ..[/QUOTE]





- مادري احس ان فيه شركات وماركات معينه مجربه وتشتريها وانت واثق

- الجهاز للترفيه والاعمال الخفيفه جدا وبحتفظ فيه اطول مده ممكنه ( تعبت من التغيير والتنقل مابين الاجهزة )
خل نقول انه جهاز العمر :)

- هذي نقطة ضعفي:) ....وش اسوي احب كل شي يكون شكله حلو بعدين وش المانع جهاز بمواصفات زينه وشكل يفتح النفس بوريك صورة جهازي الحالي بعدين وصراحه جايب لي الكاءبه وبقوووه ....اما الزهري شيييييي:d: بس مافكرت اشتريه انا في بالي حاليا اللون الابيض و لو فيه مجال لتعدد الالوان والاشكال اكثر
ياسلااااااام ..


ياعل ربي يسلمك ويحفظك ياملامح واجازة سعيده :thumb:



.
.
ريم شمر
25-07-2008, 08:46
السلام عليكم ورحمة الله وبركاته


بصراحه على حسب المواصفات اللي تبينها وانا للامانه جربت نوعين من الاجهزة

hp

وكذلك توشيبا الان

وبصراحه انصحك الشكل مو مهم اهم شي عمل الجهاز وتحمله

عموما الاتش بي افضل جهاز بنظري على وجه العموم

تحيتي



هلا بك اخوي نزف القلم


نسيت اذكر الـ hp ضمن الماركات

وهو من الانواع اللي اعجبتني مبدئيا مع ان اسعاره مرتفعه شوي

بس بصراحه ماسبق وسمعت ان احد استخدمه لذلك نسيته :)


عموما بضيفه للقائمة


شكرا لك الفاضل نزف القلم على اهتمامك وحضورك


.
.
.
ريم شمر
25-07-2008, 09:10
دامك خربتي إجازتي ,:puzzled:

عناد فيك إلا أرد .. :148r:


و علميني قبل تروحين ..! :a:


اذا اعجبك جهاز او اثنين , هاتي ارقام او اسماء موديلاتهن مع مواصقاتهن و أسعارهن ..


حتى نفاضل بينهن من ناحية الكلفة + الأداء و الموصفات .


لا أحد يضحك عليك و يقول لك سرعته كذا و يسكت , يمكن المعالج يكون


ردئ ( سيلرون ) أو قديم ( بانتيوم ) أو موديل المعالج ما يأدي اللي تبين ( بعض موديلات
معالج انتل كور 2 ديو ) ..


و الذاكرة , اذا قالك 1 او 2 غيغا إسألي , كم ترددها و وش نوعها DDr أو DDr2


و كرت الشاشة هو منفصل او لا , و من Ati أو من انفيديا اذا كان منفصل و كم سعته ..


و عدد فتحات اليو اس بي USB .


هذا اللي بالي الحين .. و ميزانيتك أكثر من جيدة و إستفسري عن سعر


الاجهزة اللي تصنيعها اوربي . ( الصينية شكلها او ازرار لوحتها تبدا تتشوه بعد سنة و شوي


اذا كان استعمالك له غير حذر ) . أغلى شوي بس قيمتها بها .


هذا اللي ببالي الحين .



كل هالكلام سجلته في مفكرتي اللي معي بالشنطة :)


وبحفظه صم واحاول افهمه :puzzled:


وقبل ادخل اي محل بقعد اراجع وبسوي نفسي فاهمه علشان اخوفهم :)



وياعل ربي يسلمك ويردك سالم غانم ويحفظ لك والدينك
ريم شمر
25-07-2008, 09:18
قسم بالله يا ملامح شمري انك راعي أوله ..

مفروض ينحط تحت معرفك راعي الأوله ..كنت اسمع بهاللقب ولا شفت لوه راعي

لين دخلت المضائف وشفتك لك من الاحترام اكثروووه roooose


هلا بحمراء :d:

سلمي طيب :7ayyoh:


مع انوه ملامح غثيث ويتفلسف واجد بس خدوم ماعليه يمشي حاله

ومتحملينه علشان خدماته فقط لاغير :qannaj:


بس هو مايستاهل هاللقب .........الحق ينقال :3ayyen_khair:


















يستاهل الخيييييييير كله

ومهو غريبه عليه يكفي انه شمري

وانا افدى شمر وابناء شمر تسيف ماينطلب منهم شي ابد :d:


الشمري لانخيته أبشر بعزك..يجيك كله لو أنك طالب عيونه

هم عزوتي لاتعزوى كلن بربعه..وهم تاج راسي وراس المجد وعيونه



.

وحياك الله ياغاليه نورتي roooose
.
.
.
.
ريم شمر
25-07-2008, 09:24
:. ام طلال .:

Dell Dell Dell Dell Dell

وشهادتي فيهـ مجروحهـ


هلا ومسهلا بمصممنا المبدع
اسعدني جدا حضورك

وشهادتك القيمه والتي حتما تشكل لي فارقا كبيرا


فلك الشكر وكثير الامتنان



.
.
ريم شمر
25-07-2008, 09:43
عليتس بالدل لابغيتي تشترين=الجهاز اللي عليه الكلام ومسكت وحلووو حيييل



ههههههههههههههههههه


عليتس بالدل وخلي الحتسي :)


اهلين ريالوووه .....وصح لسانك :001b:



طيب واللي مالتن من الديل وتبي تجرب شي جديد :biggrin:




.
.
.
ريم شمر
25-07-2008, 09:59
انا اشهد ان الديل سيارة (قصدي جهاز)

وراح اصوت له بكل ما أوتيت من قوة (مع ان اللي عندي ايسر)


بالتوفيق وتكسرينه بالعافية

:


الله يبارك بعمرك ابو طروق ورأيك على عيني وراسي

وهو خله يجي اول والتكسير لاحقين عليه :)
ريم شمر
25-07-2008, 10:05
نصيحه ..

لاتشترين من جرير ..!

و إنتبهي لإسم الجهاز و الموديل اللي على الستيكر

هو نفس إسم الجهاز اللي خذيتيه وألا لا ..؟

لأن المواصفات اللي على الستيكر يغيرونه أحيانا ..!.
.


هلاوغلا بالمختصر ياحياالله من جانا roooose



المشكله اني اروح لكل مكان وارد ارجع لجرير :(


وانا سمعت عن سالفتهم مع التغيير والتعديل


وماقول الا الله يستر



.
.
شاكره جدا قدومك واهتمامك .....لك كل الود


.
.
.
ريم شمر
25-07-2008, 10:21
/

اصبري شوين لا تستعجلين

بينزل معالج جديد عن قريب ، يضرب المعالجات اللي مطروحه بالسوق وتاخذين سعر الجهاز الحالي بنصف السعر

اعتقد ان المعالج اللي بينزل اسمه اكستريم ، اللي فهته انها اربع معالجات بآن واحد .



فـ قلنا نشارك :)


هلا والله بابو سلطان

عاش من شافك :tongue:


ومشاركه اسعدتني جدا ....بس ماقلت لي الى متى اصبر :232r:

ومتى وقته هالقريب ....تسن قريشاتي اللي صافطتهن للاب توب بدن ينقصن :(

كل شوي اخذ منهن واشتري شيتوس وكون زون :)


.
.




تسلم ابو سلطان

مشورة سوف اضعها نصب عيني ..ولاهنت على اهتمامك ...


.
.
.
ريم شمر
25-07-2008, 10:29
السلام عليكم ورحمة الله وبركاته يا عم في ناس مش لاقية تاكل وبتموت من الجوع وانت بتدور على احدث لاب توب يا نهار اسود متزعلش من صراحتى



وعليكم السلام ورحمة الله


حياك الله اخوي وجميله منك هذه المشاعر والاحاسيس الله يزيدك


واتمنى انك تذكر لي نوع جهازك اللي تدخل منه ورأيك فيه وهل مواصفاته مناسبه


علشان يساعدني بتحديد الافضل حسب الاراء المطروحه


وصراحتك ماتزعلش ويانهار ابيض يوم طلتك علينا :7ayyoh:


متشكرين ,,,



.
.
ريم شمر
25-07-2008, 10:39
8


ريم حولي حدر


احوّل ليش مااحوّل ...يابعد كل من رقى وحوّل :d:


.
.
بس اصبري الين انام ويصفى راسي :)

احس ان بيست واكسترا وجرير عاقدين اجتماع عاجل بمخي وصاير تسنوه بورصة اسهم


مختلط حابله بنابله :puzzled:




حـ ارقع لك ياقميل :qannaj:

.
.
.
العَـــروب
25-07-2008, 20:29
بخلي سوني بآخر القائمه الين اشوف


لاااااااااااااااااااااااااء لا تخلينه بآخر القائمة :a:



شيليه من القائمة خير شر :148r:


من اول ما شريته ما تهنيت والله
خرااب وراا خرااب

وانتي بعد عندج عياال صغاار الله يحفظهم واكيد يطقطقون بجهازج ويلعبون فيه نفس يوووسف
وهالجهاااز ما يتحمل حتى نفخة الهوا يخرب بيته <-- طلعة من قلب :(






تسلمين ياغاليه وعقبالك يارب يهدي لك ابو يوسف احلى لاب توب :thumb:





الله يسلمج بعد عمري ويسمع منج .. ودام انج داعية داعية .. عااد ادعيلي بالمرة انه يسفرني تركيا هالصيف .. <-- طماعة :)





بالتوفيق يا ام طلال .. وعلمينا بالاخير شنو اخترتي

ومبروووك مقدما ..
يـــوسف
25-07-2008, 20:44
أم طلال الحين يوم أنك مسويتن قلق لمخك ليه ؟؟؟






لاتطلع الشمس إلا وأنتي بحراج أبن قاسم وطقي لك أطلق كمبوتر لا يغرك كلامهم تري كل واحد يمدح جهازه :)




<_ جهاز مكتبي وعليه لزق سن توب :)







أم طلال توشيبا:thumb:
ريم شمر
26-07-2008, 12:34
ريومه جهازي دل


خفيف

وسريع مثلي




يهبل



وخليته على نظام فيستا انقلش نظام وكاله >> ياورحي يالهايلكس :)



يعني بتحبينه مثل ماتحبيني :)



7
7



http://up5.m5zn.com/photos/00150/pjdyj46b8do2.jpg


ايو الله انه فله :)

بس يخسي احبه مثلك :d:


يسلم لي هالحضور ياعجوبتي ورأيك محل اهتمامي roooose

.
.
.
ريم شمر
26-07-2008, 12:39
انا ارشح جهاز واحد فقط والمفروض يكون اول اختيار من الخيارات هو !!!!!!!
http://www.asus.com/999/images/public/asus_above_01.jpg
ليش أسوس طيب؟؟
لأن أسوس من أقوى شركات التكنولوجيا والمذر بورد التي تنتجه هي أقوى مذر بورد
وتقريبا اغلب اجهزة الكمبيوترات مزودة بالمذر بورد من انتاج أسوس.

فكري فيه ولا تستعجلين وبعدبن نطرح المزايا والنوعية وبالنسبة للسعر فهو منافس.


دمتي بخير ام طلاااااااال

تحياتي



هلا والله بابو سليمان


وشو اسوس هذا :a: اول مره اسمع عنه

.
.


بس مدام انت اللي اطريته اكيد انه جهاز يستحق


اكيد بفكر خصوصا اني ابحث عن الجديد

وانتظرك ترجع لي بالمواصفات والمزايا والسعر ايضا


لاهنت وربي يسلمك



.
.
.
ابراهيم الصقر
26-07-2008, 14:22
ديل
ومن مكتبة جرير ان امكنك
وضمان ثلاث سنوات .. حتى لو اضفت مبلغ بسيط لتمديد الضمان من سنه الى ثلاث سنوات
خدمات ما بعد البيع والصيانه ممتازه جدا وهي الأهم
وفقك الله
مصيول
26-07-2008, 15:05
بعد اطلاعي على الموضوع وخصوصاً الردود وقرايتي له بذمه :) ـــــــــــــــــ تبين الاتي :):)

ان ماعندي سالفه لله لله يوم اروح واشري جهازي :):)


تسيف من زياره وحده لجرير ـــــــــــــــ ماطلعت الثانيه من عندهم الا والجهاز معي :):)


مع ان هالحتسي من شي سنتين ـــــــــــــــــ بس الحمدلله ربي وفقن بجهااز على الكيف :)

اخذته بــ 4590 ريال ــــــــــــــ وبصراحه اني حللته :)


جهازي ديل ـــــــــــــــــ مع اني مغرم بالتوشيبا حييييل :(


وبصراحه نجلس عليه بالشقه اكثر من اربعه ـــــــــــــــ والله يستر عليه عملي عملي جداً


فيه نصيحه قاله لي مهندس حاسب اعرفه ـــــــــــــــــ قال شف اذا انت رجال تبي تستخدم وتكرف الجهاز علييك بالديل !

اما انك واحد تقول ابي استخدمه شي سنه وابيعه ــــــــــــــــ او فكرة البيع حاطه براسك عليك بالتوشيبا لأن سعره مايطيح كثير حتى بعد استخدامه :)



بس من صوتت للتوشيبا بأستطلاعك ـــــــــــــــــ جهازي جااه له بلا الله اعلم به :):)


الله يوفقك وتلقين الجهاز اللي يريحك
طلال الاسلمي
26-07-2008, 16:08
ازين جهاز

hp نوع dv6000
ريم شمر
26-07-2008, 23:12
:hala1:


لكن اعتقد ان DELL مناسب لريم شمر ... ومثل ما قال دكتورنا .. ان احد علماء الغرب اسمه Moore قال ان قوة المعالج سوف تتضاعف بعد 18 شهر من انتاجة ويؤدي ذلك الى نزول سعره بشكل حاد ...
وبعدها اصبحت هذه المقوله ... قانون في علم الحاسب :) ..





الله كريم

حلو انك تأخذ شي له قيمته بسعر معقول

كذا تحس انوه مانلعب عليك :)



تسلم ياشليويح

اسعدني هذا الحضور يالسبع :7ayyoh:



.
.
ريم شمر
26-07-2008, 23:22
حمود الناصر :7ayyoh:



لوه عندي سنه وشوي وبس افدع بوه
حتى بنت اخوي كبت عليه الماء والحمد لله ما فيه شي

ما شاء الله على جهازي لا تنضلونه (تنحتونه)

مشاء الله تبارك الله الله يخلي لك الجهاز ويحفظ لك بنت اخوك شكلها شقيه :d:




ريم ام طلال نصيحت مجرب

DELLوبس

تسلم على هالنصيحه الذهبيه





على فكرة اذا كنتي في الرياض مالك الا حراج الكمبيوتر بالعليا

مثل ما قال اخوي المهيني وانا اذا بالرياض دايم بوه

كان ودي ادور لك بس الحين انا عند اهلي بحايل

دمتي بخير




ان شاءالله بجرب امره

تسلم اخوي حمود وربي ماقصرت الله يجزاك كل خير واجازه سعيده بأذن الله



.
.
ريم شمر
27-07-2008, 00:41
لاااااااااااااااااااااااااء لا تخلينه بآخر القائمة :a:



شيليه من القائمة خير شر :148r:


من اول ما شريته ما تهنيت والله
خرااب وراا خرااب

وانتي بعد عندج عياال صغاار الله يحفظهم واكيد يطقطقون بجهازج ويلعبون فيه نفس يوووسف
وهالجهاااز ما يتحمل حتى نفخة الهوا يخرب بيته <-- طلعة من قلب :(



انت لو تشوفينهم وشلون يحتلون الجهاز ويطردوني :)


طلال يطلع الالعاب ويلعب

وفهد ماله حيله الا يجلس عليه :d:




الله يسلمج بعد عمري ويسمع منج .. ودام انج داعية داعية .. عااد ادعيلي بالمرة انه يسفرني تركيا هالصيف .. <-- طماعة :)





بالتوفيق يا ام طلال .. وعلمينا بالاخير شنو اخترتي

ومبروووك مقدما ..




يووووووه ياتركيا لاتذكريني

خربت سفرتي هالسنه بسبة ...............:148r:<<<<مشفر:)


يارب يارب يسويلك ابو يوسف مفأجاه وماتدرين الا وانتي بالمطار :thumb:


تسلمين ياغاليه على اهتمامك وعودتك

واكيد اول مايشرف بلقط له صور من جميع الجهات وانزلها
شام
27-07-2008, 00:46
كنت اتابع بصمت
لأكتسب خبرة في نوعيات اللاب توب
فما زلت أستخدم كمبيوتر مكتبي .
و اتمنى أن تجدي المواصفات التي تساعدك على أداء عمل جيد
و بدون مشاكل في السوفت أو الهارد وير .
شكراً ريوم على الدعوة و سأتابع المزيد من المشاركات
تقديري للجميع .
شام
27-07-2008, 00:48
http://www.asus.com/999/images/public/asus_above_01.jpg

ماركة محترمة بس عندي اضطررت لتبديلها 3 مرات
لأعطال مختلفة لكن المريح بالتعامل مع هذه الماركة بالذات
الكفالة المجانية لمدة 3 سنوات .
ابو ضاري
27-07-2008, 10:10
توشيبا ////ديل كلهم ممتازين وانا افضل توشيبا لكن

اذا اختارتي وشريتي على البركه واذا لم تختارين يكون في ديل مواصفات ممتازه هاردسك الرام 2قيقاكرت

الشاشه مفصول يكون فيها واير لس بلوتوث كاميرا بالتوفيق
ابن جشعم
27-07-2008, 22:42
بشري شريتي والا الياهلحين !!!!! اجل شلون لو تبين تشرين سيارة :)

سمي بالله وشتري دل اذا لك رغبة في الدل او اي جهاز آخر وكلهن زينات ولو ماهن لهناك كان افّلسوا ...لو ماتعددت الاذواق لبارت السلعه....كل زبون وله سلعه حسب ذوقه...وموضي اخت حصة :)

ومثل ماقال اخوي الضاري اهم شي لايكون كرت الشاشة مشترك مع المذر بورد...VGA not sharing
وثاني هام السيدي رام 2 قيقا وحولة....اخبرك راعية تصاميم وفوتوشوب :) <<< ابي توقيع :)

سي لاااااااام
ريم شمر
28-07-2008, 03:59
يوسف :7ayyoh:


أم طلال الحين يوم أنك مسويتن قلق لمخك ليه ؟؟؟



لأني بشتري جهاز يكفيني ولاعاد افكر اغيره فما حبيت استعجل هالمره واطيح لي بشي مايتحمل او زي قلته

وبالعكس انا استفدت جدا من هالمشوره المباركه :) الله يجزاكم خير جميعا بالفعل ماقصرتوا




لاتطلع الشمس إلا وأنتي بحراج أبن قاسم وطقي لك أطلق كمبوتر لا يغرك كلامهم تري كل واحد يمدح جهازه :)

حراج ابن قاسم shlwee7



<_ جهاز مكتبي وعليه لزق سن توب :)


:)
هذا يصلح لطلول :315r:


انا عندي مكتبي واستخدمه اذا احتجت للكتابه فتره طويله

بس اللي يستخدم اللاب توب ماعاد يفكر يرجع يستخدم المكتبي


اعتقد له خصوصيته وحميميته اكثر واسهل في التنقل




أم طلال توشيبا:thumb:







توشيبا مثل ماقلت اني سبق وجربته

بس مارتحت له

اولا ثقيل الوزن وشكله رجالي مره

بعدين ماعجبني اسم توشيبا :) الحين بيذبحني ملامح :315r:

.
.
.
تسلم اخوي يوسف على هالطله

وعقبالك يارب


.
.
ريم شمر
28-07-2008, 04:09
ديل
ومن مكتبة جرير ان امكنك
وضمان ثلاث سنوات .. حتى لو اضفت مبلغ بسيط لتمديد الضمان من سنه الى ثلاث سنوات
خدمات ما بعد البيع والصيانه ممتازه جدا وهي الأهم
وفقك الله




اهلا وسهلا بالكاتب والروائي المبدع ابراهيم الصقر

مشورة خير بأذن الله

شاكره لك هذا الحضور والاهتمام رغم انشغالك


وربي يسلمك
ريم شمر
28-07-2008, 10:04
مصيول باشا :7ayyoh:



[align=center]
بعد اطلاعي على الموضوع وخصوصاً الردود وقرايتي له بذمه :) ـــــــــــــــــ تبين الاتي :):)

ان ماعندي سالفه لله لله يوم اروح واشري جهازي :):)


شفت ان فكرتي وش زينها :) انا فعلا استفدت كثير من وضع هالموضوع واتمنى الجميع يستفيد




تسيف من زياره وحده لجرير ـــــــــــــــ ماطلعت الثانيه من عندهم الا والجهاز معي :):)


عندنا وعندك خير :(


انا لو مايكون معي احد يهجدني كل ماتحمست تسان قشيت جرير كلها ومشيت :)






وبصراحه نجلس عليه بالشقه اكثر من اربعه ـــــــــــــــ والله يستر عليه عملي عملي جداً


فيه نصيحه قاله لي مهندس حاسب اعرفه ـــــــــــــــــ قال شف اذا انت رجال تبي تستخدم وتكرف الجهاز علييك بالديل !

اما انك واحد تقول ابي استخدمه شي سنه وابيعه ــــــــــــــــ او فكرة البيع حاطه براسك عليك بالتوشيبا لأن سعره مايطيح كثير حتى بعد استخدامه :)


نصيحه جيده



بس من صوتت للتوشيبا بأستطلاعك ـــــــــــــــــ جهازي جااه له بلا الله اعلم به :):)

بعذره الحين الديل هو اللي يكرف معك واخرتها تصوت للتوشيبا ، شكل الديل زعوول :)



الله يوفقك وتلقين الجهاز اللي يريحك


اللهم امين


تسلم اخوي مصيول وشاكره جدا لك هذا الاهتمام والحضور
ريم شمر
28-07-2008, 10:11
ازين جهاز

hp نوع dv6000


هلا بك طلال الاسلمي


شكرا لحضورك ومشورتك


وحياك الله
ريم شمر
28-07-2008, 10:17
كنت اتابع بصمت
لأكتسب خبرة في نوعيات اللاب توب
فما زلت أستخدم كمبيوتر مكتبي .
و اتمنى أن تجدي المواصفات التي تساعدك على أداء عمل جيد
و بدون مشاكل في السوفت أو الهارد وير .
شكراً ريوم على الدعوة و سأتابع المزيد من المشاركات
تقديري للجميع .




ماركة محترمة بس عندي اضطررت لتبديلها 3 مرات
لأعطال مختلفة لكن المريح بالتعامل مع هذه الماركة بالذات
الكفالة المجانية لمدة 3 سنوات .



هلا بك شاموو منوره ياغاليه

بالنسبه لي كنت استخدم المكتبي فتره طويله وكنت رافضه اللاب توب

الى ان جربته ووجدته مريح اكثر


عموما اي نافذه توصلك لمحيط الانترنت تكفي وتوفي



شكرا لك roooose



.
.
ريم شمر
28-07-2008, 10:24
توشيبا ////ديل كلهم ممتازين وانا افضل توشيبا لكن

اذا اختارتي وشريتي على البركه واذا لم تختارين يكون في ديل مواصفات ممتازه هاردسك الرام 2قيقاكرت

الشاشه مفصول يكون فيها واير لس بلوتوث كاميرا بالتوفيق

حياالله الضاري وياهلا فيك :hala1:


ملاحظاتك بتكون في بالي اكيد


ربي يسلمك وشكرا لك
ريم شمر
28-07-2008, 10:36
بشري شريتي والا الياهلحين !!!!! اجل شلون لو تبين تشرين سيارة :)


لا مابعد ......والقريشات كل مالها وتنقص :)

شكلي بفتح موضوع ثاني اطلب قطه لشراء لاب توب :)


عاد يابو سليمان منيب عجله بتركد هالمره علشان اجيب شي يقعد معي فتره طويله




سمي بالله وشتري دل اذا لك رغبة في الدل او اي جهاز آخر وكلهن زينات ولو ماهن لهناك كان افّلسوا ...لو ماتعددت الاذواق لبارت السلعه....كل زبون وله سلعه حسب ذوقه...وموضي اخت حصة :)


اللي اعرفه ان هيا اخت حصه :tongue:


حاليا صار عندي كم معلومات بتساعدني اكيد اذا عزمت

والله يكتب لي اللي فيه الخير




ومثل ماقال اخوي الضاري اهم شي لايكون كرت الشاشة مشترك مع المذر بورد...VGA not sharing
وثاني هام السيدي رام 2 قيقا وحولة....اخبرك راعية تصاميم وفوتوشوب :) <<< ابي توقيع :)

سي لاااااااام

طيب وش الحكمه انه يكون منفصل خلنا نستفيد ؟!!

والتوقيع خله مع لجهاز الجديد بأذن الله :wavey:


.
.
.
ريتاج
29-07-2008, 01:26
انصحك بأيسر سهل استخداامه مررره... بس مشكلته الشحن مايجلس سااعتيين......
ريم شمر
30-07-2008, 08:30
هلا رتوجه /


حياك ربي


اول وحده تمدح ACER



تسلمين ياغاليه اسعدني مروركroooose