عمر المدلاه؟؟؟؟؟

[عيون الذيب]

صباح أو مساااء العود ودهن العود ..rooose2للجميع

ابي قصه :315r:{{{عمرالمدلاه}} وأتوقع كل أحد يعرفه:148r:
سمعت فيه قصيده::

ياعمر المدلاه يانازل الخوف عذبتني وانت تنشد لك ايام

المشكله اكتب ولاأحد يرد :za3lan: والمشكله اني اعرف طرف القصه بس ولاأعرف الباقي :za3lan:

[وافي الزنيدي]

حياك الله اخوي عيون الذيب

بالنسبه للبيت اللي ذكرت ورد في قصة ماجد الحثربي يوم البويت يوم دخيله القصه معروفه ومشهوره ولكن باختصار
ماجد الحثربي كان دخيل يبي يزبن عنده بس ما بعد دخل البيت وقطع رجله مفوز التجغيف من فرسان شمر وكان ماجد الحثربي ماهو موجود ولما عاد لقى امه مطيحة عمود البيت قال سلامات يمه وش العلم قالت له السالفه الرجال ناصي البيت ومفوز قطع رجله وكان فيه حلف بين عدة قبائل شمر وعنزه والظفير على أساس ما أحد يزبن المجرم ولكن ماجد الحثربي ضاقت به الوسيعه وراح لعمر المدلاه ويقولون انه خاله أو أو.... قريب له وجلس عندهم فتره لا يتكلم ولا ياكل ولا شي ونفسه شينه اللهم انه اذا جاء العصر أو حول المغرب رقى له على رجم حولهم , قام عمر وأرسل بنت له كانوا يحسبونه عاشقها قال روحي شوفيه وش علمه تزينت البنت وراحت وتبيه وتبيه وتقلبه , الرجال ماهو يمها ورجعت لأبوها اللي هو عمر قالت اللي به ماهو عشق شي ثاني شوفوا وشوا .
يوم رجع ماجد اقسم عليه انه يعلمه وش اللي بيه قام ماجد الحثربي وقال هالقصيده وقاله عمر لا تشيل هم هاذي فرسي وهذا لبس حرمه ومفوز (يحب انه يترزز عند البنات :d: حاله حال الفرسان اللي بعمره) ورح على اساس انك وحده من البنات ومن يوم يشوف فرسي تبي تلقاه حولك وفعلاً هذا اللي صار يوم قرب ماجد يبي يورد الفرس على الماء الا هذا مفوز وقم عليه والهبه وزبن عند السويط شيوخ الظفير ثم عند فنيخ اباالميخ ثم عن ابن عريعر :-




يا عمر ياالمدلاة يـا نـازل الخـوف==اذهبتني وانـت تنشـد لـك أيـام

يا خو فهيد اللي بك الطيب ما صـوف==والكل منكم يشبع الطيـر لا حـام

يا اللي على كل الجماعة بكـم نـوف==عذبتني وانـت تنشـد لـك أيـام

ما تشوف حالي كنها حـال ملهـوف==والا العليل اللي عن الزاد صـوام

ولو قربوا عندي من الـزاد بصنـوف==وفوقه فقـار وسيـح الـزاد بيـدام

ولو حنطة البلقا مـع تمـرة الجـوف==ما تقبله نفـسٍ عليهـا الطنـا زام

ولو عرضولي لابس الخصر وشنوف==بارض الخلا عن دار كفر(ن) والاسلام

لو صوتو باللة وامانة عـن الخـوف==مابيه لو انه علـى الـروح عـزام

شفي مفوز شمعـة الغـوش منقـوف==خيالهن وان جا بعثعـث ورضـام

خيالهن وان جن مع الحـزم زفـزوف==مثل الحباري عن شفا الطير خـرام

اللي كساني ثوب اسود وانـا اشـوف==خله يقع في سهر عيني وانـا انـام

ومن عقب ماني قنب صرت انا صوف==اجـود للحضـر المقيميـن فحـام

وان جيت لمجلس لابتي تقل ما شـوف==اقلط الغتـره علـى الوجـه قـدام

وحنا على حرب المعادي بنـا نـوف==امر من طعم الشري عنـد الالـزام

شفي زبون اللي من الحصن مجلـوف==قرمٍ ويروي شذرة السيف لا هـام

اقطع عليه النزل طوف ورى طـوف==واقلط عليـة بربعـة البيـت قـدام

ثـم الهبـه بمصقـلٍ يبـرد الجـوف==ما صوغه عند الصنانيـع بلحـام

اما عليـه البيـض يصفقـن بكفـوف==والا فلا يمشي علـى كـل الاقـدام

وان كان ما سويـت فـي حـد مرهـوف==وجهي مع الخفرات دقـوه بوشـام



هذا باختصار :) وتقبل تحياتي

[خلف الرويتع]

هلا با اخوي عيون الذيب اسفين على التاخير ولكن لو سويت عمليه بحث كان اختصرت على نفسك كثير من الوقت بعدين مايمديك تسئل وزعلان وحنا ردين عليك بنفس اليوم كيف لو شطفناك لمده سبوع ويش تسوي على كل حال الاخ وافي الزنيدي ماقصر شرح لك القصه مختصره ولكن تجد على هذا الرابط مايزيد معلوماتك


http://www.shammar.org/vb/showthread.php?t=4350

اخي العزيز هذه معلومات قد تهمك

ماجد الحثربي من العليان من الخرصه ومفوز التجغيف من العمود من فخذ التجاغفه وعمر وفهيد المدلاه من العمود من فخذ الخلف وهم خوال ماجد بيده عمر وفهيد وفخذ الخلف الي منهم فايز ابن هذيل شيخ العمود في السابق ويمكن تعرف قصته اوتجدها في هذا الموقع اذا رغبت بها

[عيون الذيب]

صبااح أو مساااء النور...والنوير...

لاخوي وافي تسلم ع القصيده ومشكور كفييت ووفييت

[عيون الذيب]

هلابك أخوي خلف وباالخير ..ومشكور ع اضافه المعلومه ...

لا والله أنا دايم أسال بس محد يرد في بعض المواضيع ..أحس خلق الله نيمييين ...

واذا أنا مشتط وش اسوي بدوي طااح باالمريس....

لو انتم شاطفينن اسبوع كسرت الجهاز

[وافي الزنيدي]

ومن قال سالم اخوي عيون الذيب
اجل الحمدلله لحقنا على جهازك قبل تكسره :)